1. బాబా దయతో తగ్గిన ఇన్ఫెక్షన్ - అదుపులోకి వచ్చిన షుగర్
2. బాబాపై నమ్మకంతో ఏ కోరికైనా నెరవేరుతుంది
3. అనుక్షణం మాతోనే ఉంటూ మమ్మల్ని పరిరక్షిస్తున్న సాయినాథుడు
బాబా దయతో తగ్గిన ఇన్ఫెక్షన్ - అదుపులోకి వచ్చిన షుగర్
ఓం శ్రీ సమర్థ సద్గురు సాయినాథాయ నమః!!!
బ్లాగు నిర్వాహకులకు అభినందనలు. నేను సాయి భక్తురాలిని. నేను ఇంతకుముందు నా అనుభవాలు కొన్ని మీతో పంచుకున్నాను. ఇప్పుడు మరో అనుభవాన్ని పంచుకుంటున్నాను. నేను మే నెలలో కోవిడ్ వాక్సిన్ వేయించుకున్నాను. తరువాత నాకు ఫంగల్ ఇన్ఫెక్షన్ వచ్చింది. నేను దాన్ని సరిగా తెలుసుకోలేక, వ్యాక్సిన్ వలన వచ్చిందేమో అనుకుని, ఎప్పటికప్పుడు తగ్గుతుందని ఎదురుచూశాను. కానీ అది చాలా ఎక్కువ అయింది. అప్పుడు డాక్టరు దగ్గరకి వెళితే, కొన్ని పరీక్షలు చేశారు. అప్పుడు నాకు షుగర్ ఉందని, అది కూడా చాలా ఎక్కువగా ఉందని తెలిసింది. బాబా మీద భారం వేసి మందులు తీసుకుని వాడటం మొదలుపెట్టాను. బాబా దయవలన ఒక వారం రోజులలోనే ఇన్ఫెక్షన్ పూర్తిగా తగ్గింది. షుగర్ కూడా ప్రీ డయాబెటిక్ దశకు వచ్చింది. కరోనా చాలా ఎక్కువగా ఉన్న ఆ సమయంలో బాబానే నన్ను కాపాడారు. ఇకపోతే, మేము ఉద్యోగరిత్యా ఉన్న ఊరిలో ఒక చిన్న ఇల్లు కట్టుకోవాలని అనుకుంటున్నాము. బాబా దయతో ఏ ఆటంకాలు లేకుండా ఇల్లు పూర్తి కావాలని కోరుకుంటున్నాను. ఈ కోరిక తీరగానే మీ అందరితో నా అనుభవాన్ని పంచుకుంటాను. అలాగే మాకు వేరే ఊరిలో ఒక చిన్న ఫ్లాట్ ఉంది. ఆ కాంప్లెక్స్ లో ఉన్న ఇద్దరు, ముగ్గురు మా ఇంటికి అద్దెకు ఎవరూ రాకుండా చేస్తూ మాకు చాలా ఇబ్బంది కలుగజేస్తున్నారు. దీని విషయమై మేము చాలా ఆందోళన చెందుతున్నాము. త్వరలోనే ఆ ఇంటిలోకి మంచి అద్దెదారులు రావాలని, వాళ్లకి అక్కడి వాళ్ళతో ఏ ఇబ్బంది రాకూడదని బాబాను వేడుకుంటున్నాను. ఆయన దయవల్ల త్వరగా మా ఆందోళన తీరుతుందని నమ్ముతున్నాము. "ధన్యవాదాలు బాబా. నాకున్న చిన్నచిన్న ఆరోగ్య సమస్యలు తగ్గిపోయేలా అనుగ్రహించి, నాకు, నా భర్తకు, మా బాబుకు మంచి ఆరోగ్యాన్ని ప్రసాదించండి సాయి. మా బాబుకు బాగా చదువు వచ్చేలా ఆశీర్వదించండి. నా అనుభవాలను పంచుకోవడంలో జరిగిన ఆలస్యానికి నన్ను మన్నించి అనుక్షణం మా వెన్నంటే ఉండి కాపాడండి బాబా".
అన్యధా శరణం నాస్తి త్వమేవ శరణం మమ తస్మాత్ కారుణ్య భావేన రక్ష రక్ష శ్రీ సాయినాథ!!!
ఓం శ్రీ సమర్థ సద్గురు సాయినాథ్ మహరాజ్ కీ జై!!!
బాబాపై నమ్మకంతో ఏ కోరికైనా నెరవేరుతుంది
ముందుగా ఈ బ్లాగు నిర్వహిస్తున్న సాయికి ధన్యవాదాలు. నా పేరు సత్య. నా కుమార్తె టీచరుగా పని చేస్తుంది. 2020లో కరోనా మొదలైనప్పటి నుండి ఆన్లైన్ క్లాసులు జరుగుతుండేవి. అప్పటినుండి 2021 వరకు ఆన్లైన్ క్లాసులు చెప్తున్న నా కుమార్తె ఉన్నట్టుండి మార్చ్ నెలలో 'నేను ఆన్లైన్ క్లాసులు చెప్పలేకపోతున్నాన'ని తన ఉద్యోగానికి రాజీనామా చేసేసింది. ఈ రోజుల్లో మళ్లీ ఉద్యోగం దొరకడం అంత సులువైన పని కాదు. అందువలన తను ఇంట్లో కూర్చుని మానసిక ఆందోళనకు గురవుతుండేది. అప్పుడు నేను, "బాబా! నా కుమార్తెకు వెంటనే ఏదైనా ఉద్యోగం వచ్చేటట్టు చూడు తండ్రి. తనకి ఉద్యోగం వచ్చిన వెంటనే ఈ అనుభవాన్ని మన బ్లాగులో పంచుకుంటాను తండ్రి" అని బాబాకి మ్రొక్కుకున్నాను. తరువాత బాబా దయవలన తనకి దరఖాస్తు చేసుకున్న అన్ని స్కూళ్ల నుండి కాల్స్ వస్తుండేవి. కానీ అన్ని స్కూళ్లు ఆన్లైన్ క్లాసులే నిర్వహిస్తుండేవి. అందువల్ల తను చేసేదేమీలేక ఆ స్కూళ్ళలో జాయిన్ అవ్వడం, పది, పదిహేను రోజులు చేశాక మళ్లీ రాజీనామా చేయటం జరుగుతుండేది. అప్పుడు నేను నా కుమార్తెతో, "చూడు తల్లి, ఈ పరిస్థితి అస్సలు బాగాలేదు. చక్కగా స్కూళ్లు తెరిచిన తర్వాత దరఖాస్తు చేసుకో, ఇప్పుడు మాత్రం చేయవద్దు" అని చెప్పాను. అయితే నేను ఎంతలా చెప్పినా తను వినకుండా దరఖాస్తు చేస్తూనే ఉండేది. ఇలా ఉండగా 2021, అక్టోబరులో ఒకరోజు తనకి ఒక స్కూలు నుండి ఫోన్ వచ్చింది. ఈసారి నా కుమార్తె, "నేను ఆన్లైన్ క్లాసులు తీసుకోను. స్టూడెంట్స్ స్కూలుకు వచ్చేటట్లు అయితే నేను మీ స్కూళ్ళో జాయిన్ అవుతాను" అని ఖచ్చితంగా చెప్పింది. అందుకు వాళ్ళు, "సరే, నవంబర్ నుండి స్టూడెంట్స్ వస్తారు. కాబట్టి మీరు నవంబర్ 2న వచ్చి జాయిన్ అవ్వండి" అని చెప్పారు. అలా నా కుమార్తె నవంబర్ 2న కొత్త ఉద్యోగంలో చేరింది. స్కూలు మొదలై, తను రోజూ స్కూలుకి వెళ్లి వస్తుంది. అంతా బాబా దయ. బాబాపై నమ్మకంతో ఏ పని మొదలుపెట్టినా ఏ ఆటంకాలు లేకుండా జరిగిపోతాయి. "ధన్యవాదాలు బాబా. మరలా కోవిడ్ సమస్యలు లేకుండా స్కూళ్లు, మిగతా అన్ని పనులు ఏ సమస్యలు లేకుండా సక్రమంగా జరిగేలా చూడు తండ్రి. ఆపధ్భాంధవా సాయీ! ప్రతిరోజు నీ అడుగుజాడల్లో నడిచే మమ్మల్ని కాపాడి దీవించు తండ్రి".
అనుక్షణం మాతోనే ఉంటూ మమ్మల్ని పరిరక్షిస్తున్న సాయినాథుడు
శ్రీ సచ్చిదానంద సద్గురు సాయినాథ్ మహరాజ్ కీ జై! సద్గురు శ్రీ సాయినాథుని శరత్బాబూజీ కీ జై!!!
నా పేరు రాంబాబు. మాది విజయనగరం. అనుక్షణం మాతోనే ఉంటూ మమ్మల్ని పరిరక్షిస్తున్న సాయినాథునికి శతకోటి నమస్కారాలతో ఈ అనుభవాన్ని మీ అందరితో పంచుకుంటున్నాను. ఈ మధ్యకాలంలో నేను పనిచేస్తున్న కంపెనీలో ఒక సమస్యని ఎదుర్కున్నాను. అదేమిటంటే ప్రోడక్ట్ అవుట్ పుట్ మరియు సాల్వెంట్ అవుట్ పుట్ తక్కువ వస్తుండేవి. ఈ సమస్యను అధిగమించడానికి మా పై అధికారులు ప్రయత్నించి విఫలమయ్యారు. దాంతో పనిచేస్తున్న కంపెనీకి న్యాయం చేయలేకపోతున్నాను అనే న్యూనతా భావంతో నేను ఎంతో బాధపడుతుండేవాడిని. అటువంటి సమయంలో నేను, "ఈ సమస్య నుంచి బయటపడితే, నా అనుభవాన్ని బ్లాగులో పంచుకుంటాను" అని ఎంతో ఆర్తితో బాబాను వేడుకున్నాను. తరువాత ఆ సమస్య పరిష్కారం కోసం సహాయం కావాలని మా ఆఫీసులో సుపీరియర్స్ కి మెయిల్ పెట్టాను. బాబా దయవలన చాలా మంచి రెస్పాన్స్ వచ్చింది. టెక్నాలజీ సర్వీస్ డిపార్ట్మెంట్ నుంచి ఒక సీనియర్ మేనేజర్ వచ్చి సిస్టంలో మార్చవలసిన వాటిని చెప్పి వెళ్ళడమేకాక వాళ్ల టీమ్ని పర్యవేక్షణలో ఉంచారు. ఆ సార్ చెప్పిన ప్రకారం మాడిఫికేషన్ చేశాక సాల్వెంట్ అవుట్ పుట్, ప్రోడక్ట్ అవుట్ పుట్ రెండూ కూడా బాగా రావడం మొదలయ్యాయి. అంతేకాదు బెస్ట్ ఇంప్లిమెంటేషన్ అవార్డు కూడా వచ్చింది. ఈవిధంగా బాబా నా సమస్యను ఒక తండ్రిలా తీర్చారు. ఇదంతా బాబా దగ్గరుండి నన్ను నడిపిస్తున్నారన్న అనుభూతిని కలిగించగా, నాలో కృతజ్ఞతా భావం ఉప్పొంగింది.
శ్రీ సాయినాథాయ నమః!!!
సర్వేజనా సుఖినోభవంతు!!!
