1. ఎక్కడికి వెళ్లినా నా కన్నా ముందే అక్కడ ఉండే బాబా!
2. చల్లగా అనుగ్రహించే బంగారు సాయి తండ్రి
3. బాబా దయ
ఎక్కడికి వెళ్లినా నా కన్నా ముందే అక్కడ ఉండే బాబా!
అందరికీ నా నమస్కారాలు. నా పేరు శైలజ. బాబా తమను ఆశ్రయించిన భక్తులు ఎక్కడ ఉన్నా, సప్త సముద్రాల అవతల ఉన్నా వారి చెంతనే ఉంటారు. శ్యామా గయ వెళ్ళినప్పుడు ఏన్నో ఏళ్ల ముందే అక్కడికి చేరిన బాబా అతనికి దర్శనమిస్తారు. నా విషయంలో కూడా ఎప్పుడూ అదే జరుగుతూ ఉంటుంది. నేను ఎప్పుడు ఎక్కడికి వెళ్లినా నా కన్నా ముందే బాబా అక్కడ ఉంటారు. ఆ ప్రదేశంలో ఎక్కడో ఓ చోట ఫోటో రూపంలో బాబా నాకు దర్శనమిస్తారు. అలాంటి కొన్ని అనుభవాలను, తద్వారా బాబా నన్ను ఎల్లవేళలా ఎలా కాపాడుతున్నారో నేనిప్పుడు మీతో పంచుకోవాలనుకుంటున్నాను. మేము ఢిల్లీలో ఉంటాము. మేము తరుచూ హిమాచల్ప్రదేశ్, ఉత్తరాఖండ్ వెళ్తూ ఉంటాము. ఆ కొండ ప్రాంతాల్లో ఏ మారుమూల ప్రదేశానికి మేము వెళ్లినా అక్కడ బాబా దర్శనమవుతుంది. మేము 2021, అక్టోబర్ నెలలో 'కనతల్' వెళ్తూ టీ తాగుదామని ఒక ఢాబా దగ్గర ఆగాము. ఆ ఢాబాలో ఉన్న బాబా ఫోటో నన్ను ఆహ్వానిస్తున్నట్టు చిరునవ్వుతో దర్శనమిచ్చింది. అలా బాబాను చూసేసరికి నాకు చాలా సంతోషం కలిగింది.
2021, నవంబర్ 20, శనివారం ఉత్తరాఖండ్లోని జాగేశ్వర్లో ఉన్న శివునికి అభిషేకం చేసుకుందామని నేను, మావారు మా కారులో బయలుదేరాము. మా ప్రయాణానికి ముందు మావారు బిజీగా ఉండి కారు కండిషన్ గురించి సరిగా చూసుకోలేదు. తెల్లవారుఝామున బయలుదేరితే మధ్యాహ్నం 2 గంటలకి చేరుకోవచ్చని తలచి వేకువఝామునే మేము బయలుదేరాము. మధ్యలో రెండుసార్లు కారు ఆగిపోయిందికానీ స్టార్ట్ అయ్యింది. తరువాత మధ్యాహ్నం 2 గంటల సమయంలో దాదాపు 100 మీటర్ల దూరంలో మేము బుక్ చేసుకున్న హోటల్ ఉందనగా మా కారు మళ్లీ ఆగిపోయింది. చూస్తే, కారులోని బ్యాటరీ అయిపోయింది. కారు కొని 3 ఏళ్లు అయినందున బ్యాటరీ అయిపోయింది. చుట్టు కొండలు, లోయలు. నాకు చాలా భయం వేసింది. కానీ సరిగ్గా మా కారు ఆగిన చోట బాబా టెంపుల్ ఉంది. నాకంటే ముందే బాబా అక్కడ నా కోసం వేచి ఉన్నారు. ఆయన దయవల్ల ముగ్గురు మగపిల్లలు వచ్చి, ఏదో విధంగా కారు స్టార్ట్ చేసి ఇచ్చారు. అంతే నెమ్మదిగా మేము హోటల్ చేరుకున్నాము. అక్కడ ఒక డ్రైవరు తనకు తెలిసినవాళ్ల చేత కొత్త బ్యాటరీ తెప్పించి, మార్చారు. బాబానే ఆ రూపంలో వచ్చి మాకు సాయం చేశారు. బాబా దయవల్ల సంతోషంగా శివునికి అభిషేకం చేసుకుని తిరిగి వచ్చాము.
నాకు ఒకసారి వైరల్ ఫీవర్ వచ్చింది. ఒక పదిరోజులకు తగ్గింది కానీ, హఠాత్తుగా ఒకరోజు నాకు ఒళ్ళంతా బాగా దురదలు మొదలయ్యాయి. నేను సరేనని 'అలెగ్ర' టాబ్లెట్ వేసుకున్నాను. దాని ప్రభావం ఉన్నంతసేపు ఏమీ ఉండేది కాదుగానీ, ఆ మందు పవర్ అయిపోగానే మళ్లీ దురదలు మొదలయ్యేవి. ఒక రోజు అయితే ఎంతలా దురదలంటే, ఆ దెబ్బకి వణుకు వచ్చేసి మొహం, పెదాలన్నీ వాచిపోయాయి. వెంటనే నన్ను ఒక మంచి స్కిన్ స్పెషలిస్ట్ కలిశారు. ఆవిడ రూపంలో బాబానే వచ్చారు. ఆవిడ నాకు మంచి మందులిచ్చి, ఒక నెల వాడమన్నారు. బాబా దయవల్ల ఆ మందులతో నాకు నయమైంది. "సాయినాథా! ధన్యవాదాలు తండ్రి. మీ లీలలు ఏమని చెప్పను తండ్రి?".
చల్లగా అనుగ్రహించే బంగారు సాయి తండ్రి
నా పేరు లత. ముందుగా సాయిబంధువులందరికీ నమస్కారం. బాబా లీలలు ఎన్నెన్నో. ఆయన ఋణం ఏమిచ్చినా తీర్చుకోలేను. ఒకసారి మేము మా మనవరాలికి పుట్టువెంట్రుకలు తీయించి, చెవులు కుట్టించాలని అనుకున్నాం. కానీ అనుకోని అవాంతరాలు వచ్చి పడుతుండేవి. అప్పుడు నేను బాబాతో, "ఏ ఆటంకాలు లేకుండా చూడండి బాబా" అని చెప్పుకున్నాను. అంతే, అనుకున్న తేదీన విజయవాడ దుర్గమ్మ సన్నిధిలో నిర్విఘ్నంగా కార్యక్రమం పూర్తి చేయించారు బాబా. "చాలా చాలా ధన్యవాదాలు బాబా".
ఒకసారి మా అల్లుడువాళ్ళు యూరప్ టూర్కి వెళ్ళాలని అనుకున్నారు. అయితే వాళ్ళ ప్రయాణానికి కొద్దిరోజుల ముందు మా అల్లుడికి డెంగ్యూ జ్వరం వచ్చి ప్లేట్లెట్స్ పడిపోయి పరిస్థితి విషమించింది. ఆ మాట వింటూనే మా పైప్రాణాలు పైనే పోయినంత పనైంది. ఆ కష్టకాలంలో నేను 'ఓం శ్రీసాయి ఆరోగ్య క్షేమదాయ నమః' అనే నామాన్ని పఠిస్తూ, బాబాపైన, అమ్మ(లలితమ్మ)పైన భారం వేసి, ఆ రాత్రంతా బాబాను వేడుకున్నాను. ఆశ్చర్యంగా మరుసటిరోజు మధ్యాహ్ననికి మా అల్లుడికి జ్వరం తగ్గి క్రమక్రమంగా కోలుకోసాగారు. తర్వాత ఐదారు రోజులకి పూర్తిస్థాయిలో ప్లేట్లెట్ కౌంట్ పెరిగి మా అల్లుడు పూర్తిగా కోలుకున్నారు. ముందుగా అనుకున్న ప్రకారం యూరప్ టూర్కి వెళ్లి క్షేమంగా తిరిగి వచ్చారు. ఇదంతా బాబా దయవలన జరిగింది. నా తండ్రి కృప ఎంతని చెప్పగలను? నా బంగారు తండ్రి మీ పాదాలయందు నా నమ్మకాన్ని సదా ధృఢపరుస్తూ నన్ను ఎల్లప్పుడూ చల్లగా చూడు సాయి బంగారం".
బాబా దయ
బ్లాగును డైలీ చదువుతున్న తోటి భక్తులకు నా నమస్కారాలు. నేను ఒక సాయి భక్తురాలిని. ఒకరోజు నా భర్తకి దగ్గు వచ్చింది. మరుసటిరోజుకి నోరు చేదుగా అనిపించింది. నాకు చాలా భయమేసి నీటిలో బాబా ఊదీ వేసి మావారికి ఇచ్చాను. ఆ తర్వాత, "బాబా! నా భర్తకి ఎలాంటి ఇబ్బంది లేకుండా త్వరగా తగ్గిపోవాలి" అని బాబాతో చెప్పుకున్నాను. బాబా దయవల్ల రెండు రోజుల్లో నా భర్తకి నార్మల్ అయింది. "ఇది మీ దయవల్లే జరిగింది, థాంక్యూ బాబా".
ఇంకొరోజు నా భర్త మా రెండేళ్ల బాబుని తీసుకుని షాపింగ్కి వెళ్ళారు. మా బాబు ఎప్పుడూ అటూఇటూ తిరుగుతూ అవీ ఇవీ తాకుతూ ఉంటాడు. కరోనా పరిస్థితుల వల్ల మాకు కొంచెం భయంగా అనిపించింది. అప్పుడు నేను బాబాతో, "వాళ్లకి ఎలాంటి సమస్యలు లేకుండా ఉండాలి" అని చెప్పుకున్నాను. బాబా దయవల్ల ఎలాంటి ఇబ్బంది కలగలేదు. "థాంక్యూ బాబా. థాంక్యూ వెరీ మచ్".
