సాయిభక్తుల అనుభవమాలిక 1694వ భాగం....

---

ఈ భాగంలో అనుభవాలు:

1. ఇలా ఉంటాయి మన బాబా మహిమలు

2. దేశంకాని దేశంలో ఉచితంగా బీటెక్ సీటు ప్రసాదించిన బాబా

---

ఇలా ఉంటాయి మన బాబా మహిమలు

సాయిభక్తులందరికీ బాబా ఆశీస్సులు. నా పేరు నాగలక్ష్మి. మాది విజయవాడ. నేను 2008 నుండి బాబాని పూజిస్తున్నాను. నాకు ఏ కష్టమొచ్చినా బాబా చూసుకుంటారు. నా జీవితంలో జరిగే ప్రతిదీ బాబా ప్రసాదించిన వరమే. ఈ బ్లాగులోని భక్తుల అనుభవాలు చూసి నేను కూడా నా అనుభవాలు పంచుకోవాలని అనుకుంటుండేదాన్ని. కానీ సరిగ్గా వ్రాయలేనేమోనని వెనకడుగు వేసేదాన్ని. బాబా ఏదో ఒక రూపంలో పంచుకోమని సూచిస్తుండేవారు. ఇప్పుడు ఇటీవల జరిగిన ఒక అనుభవాన్ని మీతో పంచుకుంటాను. 2023, అక్టోబర్ నెల మూడో వారంలో మా బాబుకి తీవ్రంగా జ్వరం వచ్చింది. బాబా దయవల్ల ఒక మూడు రోజుల్లో తగ్గింది. కాని జ్వరం తగ్గిన మరుసటిరోజు నుండి బాబుకి విపరీతమైన కాళ్లనొప్పులు మొదలయ్యాయి. నాకు చాలా భయమేసి, "బాబా! ప్రతి గురువారం సంధ్య హారతికి గుడికి వచ్చి పారాయణ చేస్తాను" అని అనుకున్నాను. బాబా దయవల్ల మరుసటిరోజుకి కాళ్లనొప్పులు కాస్త తగ్గి, ఆ మర్నాటికి ఎటువంటి నొప్పులు లేవు. నేను తర్వాత గురువారం నుండి సచ్చరిత్ర సప్తాహ పారాయణ బాబా సన్నిధిలో మొదలుపెట్టాను. అయితే, బాబుకి కాళ్లనొప్పులు తగ్గిన ఒక వారం తర్వాత మళ్లీ జ్వరం వచ్చింది. అప్పుడు నేను, "బాబా! మావాడికి జ్వరం తగ్గేలా చేయండి తండ్రీ. మీ అనుగ్రహం బ్లాగు ద్వారా తోటి సాయిభక్తులతో పంచుకుంటాను" అని అనుకున్నాను. చిత్రంగా నేను ఎప్పుడైతే బ్లాగులో పంచుకుంటానని అనుకున్నానో, అప్పటినుంచి బాబుకి జ్వరం పూర్తిగా తగ్గిపోయింది. మన బాబా మహిమలు అలా ఉంటాయి. "ధన్యవాదాలు బాబా. చాలారోజుల నుంచి శిరిడీ వెళ్లాలన్న నా కోరిక తీరడం లేదు బాబా. అందుకని మీరు నన్ను శిరిడీ తీసుకొని వెళ్లెవరకూ నాకు చాలా ఇష్టమైన నాన్ వెజ్ తినడం మానేస్తాను. అలాగైనా నన్ను మీరు శిరిడీ తీసుకెళ్తారని అనుకుంటున్నాను. ఇక మీ దయ బాబా. ఎందుకంటే, మీ ఆజ్ఞ లేనిదే శిరిడీ వెళ్లలేమని నేను నమ్ముతాను".

---

దేశంకాని దేశంలో ఉచితంగా బీటెక్ సీటు ప్రసాదించిన బాబా

ఓంసాయి శ్రీసాయి జయజయసాయి. సాయిభక్తులకు నమస్కారం. నా పేరు కళ్యాణి. నేను ఇప్పుడు పంచుకోబోయే అనుభవం నా జీవితంలో జరిగిన ఒక పెద్ద అద్భుతం. బహుశా ఇటువంటిది మళ్లీ నా జీవితంలో జరగకపోవచ్చు. మా పెద్దబ్బాయి పేరు సోమశేఖర్. 2022లో తను ఇంటర్ పూర్తి చేసాడు. ఇంటర్లో తనకి ఒక ముగ్గురు మిత్రులు ఉన్నారు. అందరూ మెరిట్ విద్యార్థులు. క్లాసులో వాళ్లదే ఫస్ట్ ర్యాంక్. మేమందరం చాలా సంతోషించేవాళ్ళం. ఇంటర్ పూర్తయ్యాక పిల్లలు ఏదో ముఖ్యమైన విషయం మాట్లాడాలంటే తల్లిదండ్రులందరం మా ఇంట్లో కూర్చున్నాం. అప్పుడు పిల్లలు, "మేము  ఇండియాలో బీటెక్ చేయము, కెనడా వెళ్తాము" అని చెప్పారు. అది విని మాకు చాలా ఆశ్చర్యం కలిగింది. కెనడాలో చదువు, అది కూడా బీటెక్ అంటే చాలా ఖర్చుతో కూడుకున్న పని. మాకేమో వెనక ఆస్తులు ఏమీ లేవు, చేతిలో పైసా లేదు. అందువల్ల మాకు నోట్లోంచి మాటలు రాలేదు. నేను, మావారు ఎంతలా చెప్పడానికి ప్రయత్నించినా మా అబ్బాయి ఒప్పుకోలేదు. ఇక చేసేది లేక బాబా మీద భారం వేసి సరేనన్నాము.

పిల్లలు ముందుగా IELTS పరీక్ష వ్రాసారు. అందరికీ మంచిగా స్కోర్స్ వచ్చాయి. వెంటనే వాళ్ళు కెనడాలో అడ్మిషన్ కోసం అప్లై చేసుకున్నారు. కానీ హఠాత్తుగా నలుగురు పిల్లల్లో ఒకరి అమ్మగారు చనిపోయారు. దాంతో ఆ అబ్బాయి కెనడా వెళ్లే ప్రక్రియ నుండి విరమించుకున్నాడు. మిగిలిన ముగ్గురు పిల్లలు బాధపడ్డారు. అడ్మిషన్ విషయానికి వస్తే, మా అబ్బాయికి అడ్మిషన్ రాక వాడు చాలా బాధపడ్డాడు. మిగిలిని ఇద్దరిలో కూడా ఒక అబ్బాయికి మాత్రమే అడ్మిషన్ వచ్చింది. ఆ అబ్బాయి 16 లక్షల రూపాయలు ఫీజు కట్టి, మరో ఏడు లక్షలు తీసుకొని కెనడా వెళ్ళాడు. మిగతా ఇద్దరు పిల్లలు దిక్కుతోచని స్థితిలో పడ్డారు. మేము "ఎందుకు బాబా ఇలా చేశావు?" అని అనుకున్నాం. నేను మా అబ్బాయి కెనడా వెళ్లే ప్రయత్నాలు మొదలుపెట్టినప్పటినుండి రోజూ చేస్తున్న బాబా చరిత్ర పారాయణ ఆపకుండా చేస్తూ బాబా ఏదో మంచి చేస్తారని ఎదురుచూసాం.

ఒకరోజు మా అబ్బాయి మరోసారి ప్రయత్నించేందుకు ఒక కన్సల్టెన్సీకి వెళితే, పని జరగలేదు. కానీ అదేరోజు ఒక విచిత్రం జరిగింది. ఆ కన్సల్టెన్సీవాళ్ళు కెనడా వెళ్లేందుకు కాకుండా ఇటలీ గురించి మా అబ్బాయితో చెప్పారు. మా అబ్బాయిలో ఇంటర్లో 96.1% వచ్చినందున వాళ్ళు, "ఇటలీలో చాలా మంచి కాలేజీలు ఉన్నాయి. వాటిలో ఖచ్చితంగా అడ్మిషన్, దాంతో పాటు స్కాలర్ షిప్ కూడా వస్తుంది, ఖర్చు ఏం లేకుండా బిటెక్ చేయవచ్చు" అని చెప్పారు. మాకు చాలా ఆశ్చర్యం కలిగింది. 'ఇలా కూడా ఉంటుందా? ఇది నిజమేనా? ఖర్చు లేకుండా మెరిట్ మీద అడ్మిషన్ వస్తుందా?' అని మేము చాలా సందేహపడ్డాము. కానీ కొన్ని దినాలపాటు కొంత విచారణ జరిపిన మీదట మా అబ్బాయి 'వాళ్ళు చెప్పింది నిజమేన'ని నిర్ధారించాడు. అప్పటివరకు ఏ కాలేజీలో జాయిన్ అవ్వని తను, తన ఫ్రెండ్ చాలా ఆలోచించుకున్నాక మా అబ్బాయి ఇటలీ వెళ్ళడానికి, తన ఫ్రెండ్ జర్మనీ వెళ్ళడానికి నిశ్చయించుకున్నారు. అయితే కన్సల్టెన్సీవాళ్ళకి చాలా డబ్బులు కట్టాల్సి వస్తుందని మా అబ్బాయి ప్రతి విషయాన్ని తనే స్వయంగా పరిశోధించి ప్రాసెస్ మొదలుపెట్టాడు. ఆ క్రమంలో ఒక కన్సల్టెన్సీ అబ్బాయి తనకి ఉచితంగా సహాయం చేసాడు. ఎన్నో ఒడిదుడుకులు ఎదురైనప్పటికీ 2023, అక్టోబర్ 26, గురువారంనాడు మా అబ్బాయికి వీసా వచ్చింది. మాకు చాలా ఆనందం కలిగింది. చేతిలో ఒక్క నయా పైసా లేని సమయంలో దేశంకాని దేశంలో ఉచితంగా సీటు తెచ్చుకోవడం, హఠాత్తుగా వీసా కోసం 18 లక్షలు చూపించగలడగం అంతా బాబా దయనే కదా! బాబా ఆశీస్సులతోపాటు మీ అందరి ఆశీస్సులు ఎల్లప్పుడూ మా అబ్బాయికి ఉండాలని ప్రార్థిస్తూ సెలవు తీసుకుంటున్నాను. "చాలా చాలా ధన్యవాదాలు బాబా".

---