సాయిభక్తుల అనుభవమాలిక 1681వ భాగం....

---

ఈ భాగంలో అనుభవాలు:

1. బాబాని ఏమి అడిగినా వెంటనే అనుగ్రహిస్తారనేదానికి నిదర్శనం

2. బాబాని ప్రార్థించి, వదిలేయండి - ఖచ్చితంగా బాబా సహాయం చేస్తారు

3. కోరుకున్నట్లు సమస్యను పరిష్కరించిన బాబా 

---

బాబాని ఏమి అడిగినా వెంటనే అనుగ్రహిస్తారనేదానికి నిదర్శనం

సాయిభక్తులందరికీ నమస్కారం. నా పేరు 'సాయి అవినాష్'. నేను నా చిన్నవయసు నుండి బాబాని ఆరాధిస్తున్నాను. ఎన్నోసార్లు, ఎన్నో బాధల నుండి నన్ను, నా కుటుంబాన్ని సాయి ప్రేమతో కాపాడారు. ఏ రోజు ఇలాంటి ఒక బ్లాగులో నా అనుభవాన్ని పంచుకుంటానని నేను అనుకోలేదు. 2023, అక్టోబర్ 2న 20 నెలల వయసున్న నా కూతురు రాత్రి 12 గంటలప్పుడు 'నాన్నా' అని ఉలిక్కిపడి లేచి ఏడవసాగింది. అప్పటివరకు నిద్రపోతున్న పిల్ల హఠాత్తుగా లేచి ఏడుస్తుంటే మాకేం అర్థం కాలేదు. మా అమ్మ, నా భార్య, నేను ఎంత ప్రయత్నిస్తున్నా తాను ఆపకుండా ఇంకా గట్టిగా అరగంట నుండి గంట వరకు ఏడుస్తూనే ఉండింది. కనీసం నీరు కూడా త్రాగకుండా తను అంతసేపు ఆపకుండా ఏడుస్తుంటే మాకు చాలా భయమేసింది. నేను తన ఆ బాధ చూడలేక, "బాబా! పాప వెంటనే నిద్రపోవాలి. తనకి ఏ భాద లేకుండా చూడండి. తన బాధ్యత మీదే" అని గట్టిగా బాబాను వేడుకున్నాను. అయినా పాప ఏడుపు ఆపలేదు. కాసేపటికి తను నా దగ్గరకు వచ్చింది. తనకి బాబా అంటే ఇష్టం. తను ముద్దుగా 'సాయిబాబా సాయిబాబా' అంటూ ఉంటుంది. నేను తనని ఎత్తుకుని బాబా విగ్రహం ముందు నిలబడి, "చూడు! బాబాకి చెప్పాము కదా! తగ్గిపోతుంది" అని పాపతో చెప్పాను. విచిత్రంగా కాసేపటికి పాప ఏడుపు ఆపేసి నెమ్మదిగా నవ్వడం మొదలుపెట్టింది. మరికాసేపటికి చక్కగా నిద్రపోయింది. ఇలా బాబాను ఏమి అడిగినా వెంటనే అనుగ్రహిస్తారనేదానికి ఎప్పటికప్పుడు నాకు నిదర్శనం కనిపిస్తూనే ఉంటుంది. నాకు ఈ భాగ్యాన్ని ప్రసాదిస్తున్న ఆ బాబాకు నేను ఎప్పటికీ ఋణపడి ఉంటాను. "ధన్యవాదాలు బాబా".

 సమర్థ సద్గురు సాయినాథ్ మహారాజ్ కి జై!!!

---

బాబాని ప్రార్థించి, వదిలేయండి - ఖచ్చితంగా బాబా సహాయం చేస్తారు

నా పేరు దీప. నేను బాబాకి చిన్న భక్తురాలిని. నేను ఇప్పుడు బాబా నాకు ప్రసాదించిన ఒక అనుభవాన్ని మీ అందరితో పంచుకుంటున్నాను. మా అబ్బాయికి పెద్దవాళ్ళు ఇచ్చే  డబ్బులు దాచిపెట్టుకోవడం అలవాటు. ఒకరోజు మా అమ్మ వాడికి 100 రూపాయలు ఇచ్చింది. దాన్ని వాడు ఎక్కడో పోగొట్టుకొని ఏడవడం మొదలుపెట్టి, ఆ సాయంత్రం మొదలు రాత్రి వరకు ఆ 100 రూపాయలకోసం అంతటా వెతికాడు కానీ, దొరకలేదు. ఆ డబ్బులు ఎక్కడ పెట్టాడో వాడికి గుర్తురాక చాలా కలత చెందాడు. నేను తనని ఓదారుస్తూ ఆఖరికి "నువ్వు ప్రశాంతంగా ఉండు. బాబాను ప్రార్థించి, ఆయనకు వదిలేయ్" అని చెప్పాను. కానీ తను నేను చెప్పినట్లు చేసే మానసిక స్థితిలో లేడు. కాబట్టి నేను తనకి ఆ డబ్బులు ఇస్తానని చెప్పి బాబాను ప్రార్థించాను. కాసేపటికి మా అబ్బాయి కూడా శాంతించి బాబాను ప్రార్థించాడు. మూడు రోజుల తరవాత నేను డస్ట్ బిన్‌లోని చెత్త బయటపారేసి దాన్ని శుభ్రం చేస్తుంటే ఆ డస్ట్ బిన్ అడుగున 100 రూపాయల నోటు అంటుకొని ఉండడం కనిపించింది. నేను ఆశ్చర్యచకితురాలినయ్యాను. వెంటనే మా అబ్బాయిని పిలిచి తనకి ఆ నోట్ ఇచ్చాను. తను ఆనందంగా బాబాకి ధన్యవాదాలు తెలిపి, 10 రూపాయలు బాబాకి ఇచ్చాడు. బాబాని ప్రార్థించి ఆయనకి వదిలేయండి. ఖచ్చితంగా బాబా సహాయం చేస్తారు.

---

కోరుకున్నట్లు సమస్యను పరిష్కరించిన బాబా 

నా పేరు జయలక్ష్మి. మాది వైజాగ్. నేను మొదటిసారి ఈ బ్లాగు ద్వారా నా అనుభవాలను తోటి భక్తులతో పంచుకుంటున్నందుకు నాకు చాలా ఆనందంగా ఉంది. నాకు ఈమధ్య గర్భాశయమునకు సంబంధించిన ఒక ఆపరేషన్ జరిగింది. నేను సాయిని తలుచుకుంటూ ఆపరేషన్ చేయించుకున్నాను. తర్వాత అంతా బాగానే ఉందనుకున్నాను కానీ, 45 రోజులు దాటిన తర్వాత కుట్లు వేసిన దగ్గర నీరు వచ్చింది. నేను వెంటనే డాక్టర్ వద్దకు వెళ్లాను. డాక్టర్ స్కానింగ్ చేసి, "చిన్న ఇన్ఫెక్షన్ అయింది. చిన్న కోత పెట్టి క్లీన్ చేయాలి లేదా మందులతో కూడా నయం కావచ్చు. రేపు వేరే డాక్టర్ వస్తారు. ఆమె వద్ద చూపించి ఏం చేయాలన్నది చెప్తాను" అని అన్నారు. నాకు చాలా భయమేసింది. ఆ రాత్రంతా నేను సాయిని తలుచుకుంటూ, "మందులతో తగ్గేటట్టు చూడండి సాయి" అని కోరుకున్నాను. మరుసటిరోజు సాయిని తలుచుకుంటూ హాస్పిటల్‌కి వెళ్ళాను. నేను కోరుకున్నట్లు సాయి నా సమస్యను పరిష్కరించారు. డాక్టర్ చూసి, "మందులతో తగ్గిపోతుంది" అన్నారు. నాకు చాలా సంతోషమనిపించి వెంటనే బాబాకు ధన్యవాదాలు చెప్పుకున్నాను. "ధన్యవాదాలు సాయి. ఇలా ఎన్నో సమస్యలతో ఎందరో భక్తులు ఉన్నారు. వాళ్లందరినీ రక్షించు. తప్పు లేవైనా ఉంటే క్షమించండి బాబా".

---