సాయిభక్తుల అనుభవమాలిక 1487వ భాగం..

---

ఈ భాగంలో అనుభవాలు:

1. తండ్రిలా సదా రక్షించే సాయిబాబా

2. చాలారోజుల నుండి బాబా చూపుతున్న దయ

---

తండ్రిలా సదా రక్షించే సాయిబాబా

ఓం సాయి శ్రీసాయి జయజయ సాయి!!! సాయి బంధువులందరికీ మరియు ఈ బ్లాగు నిర్వహిస్తున్న సాయికి నా నమస్సుమాంజలి. నా పేరు వి.శ్రీనివాసరావు. నేనొక ఉద్యోగస్తుడిని. మా కొడుకు మా కోడలితో హైదరాబాదులో ఉన్న తన అత్తగారింట్లో ఉంటూ వేరే కాపురం పెట్టేందుకు అద్దె ఇల్లుకోసం వెతికాడు. ఎంత తిరిగినా వాళ్లకు మంచి ఇల్లు దొరకక ఒక వారం తర్వాత మూఢం(మంచి రోజులు లేవు) వస్తుందని వాళ్ళు చాలా కంగారుపడ్డారు. అప్పుడు మేము నా తండ్రి సాయిని, "మా కొడుకుకి ఒక మంచి కిరాయి ఇల్లు చూపెట్టమ"ని వేడుకున్నాము. మా విన్నపం విన్న మా సాయి రెండు రోజుల్లోనే కొత్తగా నిర్మించిన ఒక ఇల్లు చూపెట్టడం, గురువారంనాడు వాళ్ళు ఆ ఇంట్లోకి వెళ్ళటం జరిగిపోయాయి.

మా కోడలు బీటెక్ పూర్తిచేసి ఉద్యోగ ప్రయత్నాలు చేస్తుండేది. ఆ క్రమంలో ఒక ఉద్యోగం దగ్గర వరకు వచ్చి పోవడంతో, ఆ విషయం మాతో చెప్పుకొని బాధపడింది. అప్పుడు మేము, "మన సాయి మనకు అండగా ఉండగా నువ్వు ఎందుకు బాధపడతావు? దిగులుపడవద్దు" అని చెప్పి, "నువ్వు సాయిని మనస్పూర్తిగా వేడుకుంటే, తప్పకుండా నీకు జాబు వస్తుంద"ని ధైర్యం చెప్పాము. ఆ తర్వాత వారం రోజులకి క్యాప్ జెమినీలో జాబ్స్ పడ్డాయని, మా కోడలు ఆన్లైన్ పరీక్ష వ్రాసి, బాగానే స్కోర్ చేసింది. అలాగే ఓరల్ ఇంటర్వ్యూకి వెళ్లొచ్చి, ఇంటర్వ్యూ బాగానే చేశానని మాకు ఫోన్‌లో చెప్పింది. అయితే టెక్నికల్ ఎగ్జామ్‍లో తనకంటే వేరే అతనికి ఎక్కువ మార్కులు వచ్చాయని టెన్షన్ ఫీల్ అయింది. అప్పుడు నా భార్య, 'మా ఊరు నుండి) ఏడు కిలోమీటర్ల దూరంలో ఉన్న కోరికల సాయిబాబా గుడి/ఆశ్రమంకి నడిచి వస్తాన'ని మొక్కుకుంది. తరువాత నా భార్య మా కోడలికి ఫోన్ చేసి, "నేను సాయికి చెప్పుకున్నాను. నువ్వు నీ ఉద్యోగం గురించి టెన్షన్ పడకు. నీకు తప్పకుండా ఆఫర్ లెటర్ వస్తుంద"ని ధైర్యం చెప్పింది. తను చెప్పినట్లుగానే రెండు రోజుల్లో 'ఉద్యోగంలో జాయిన్ అవమ'ని మా కోడలికి ఆఫర్ లెటర్ రావడం, గురువారంనాడే ఆ ఉద్యోగంలో చేరటం జరిగాయి.

ఒకరోజు నేను, నా భార్య మా ఊరు నుండి సారపాక వెళ్ళాము. ఉదయం పూట ప్రయాణం. పైగా చలికాలం. అందువల్ల నీళ్లు త్రాగి బస్సు ప్రయాణం చేస్తే వాష్ రూమ్(మూత్ర విసర్జన)కి వెళ్లాల్సిన ఇబ్బంది ఉంటుందని నా భార్య టిఫిన్ చేసి, కొంచం నీళ్లే త్రాగింది. బస్సు కుకునూరు దాటాక నా భార్య ఎందుకో ఇబ్బంది పడుతున్నట్లుగా అనిపించి, "ఏంటి అలా అసౌకర్యంగా ఉన్నావ"ని అడిగాను. అందుకు తను, "కడుపు ఉబ్బిపోయింది. వాష్‍రూమ్‍కి వెళ్లాల"ని చెప్పింది. ఆడవాళ్ల వాష్‍రూమ్ కోసం మధ్యలో బస్సు ఆపమని చెప్పడం ఇబ్బందికరమైన పరిస్థితి అయినందున సాయిని, "బాబా! ఈ సమస్యను పరిష్కరించు స్వామి" అని వేడుకున్నాను. నేను అలా అనుకున్న తర్వాత బస్సు కుకునూరు దాటి కివ్వాక చెరువు కట్ట మీదకు వెళ్ళగానే డ్రైవర్ హఠాత్తుగా బస్సు ఆపి కిందకి దిగి పక్కకు వెళ్ళాడు. అంతే, వాష్‍రూమ్ ప్రాబ్లం ఉన్న వాళ్ళందరూ వారి పనులు కానిచ్చారు. చూసారా! నా బాబాని ఇలా తలుచుకోగానే అలా సహాయం చేశారు.

ఈమధ్య మా పిన్ని మనవడి పెళ్లికి చర్ల వెళ్లి 2023, ఫిబ్రవరి 26 సాయంత్రం సారపాక వచ్చాము. వచ్చిన దగ్గర నుండి నా ఎడమ చేయి, కాలు, దవడ బాగా నొప్పి పెట్టసాగాయి. అలాగే చెస్ట్ దగ్గర, వెనక వీపు భాగంలో కూడా నొప్పి వస్తుండేది. మనసులో ఆందోళనగా ఉన్నా పైకి మాత్రం ఏమీ లేనట్లే ఉండి గ్యాస్ టాబ్లెట్ వేసుకున్నాను. కానీ ఏమాత్రం తగ్గలేదు. 2023, ఫిబ్రవరి 27 సాయంత్రం సారపాక నుండి మా ఊరు వచ్చాము. అప్పటికీ నొప్పితో ఇబ్బందిపడుతూనే ఉన్న నేను అవి గుండెపోటు లక్షణాలుగా అనిపించాయి. మనసులో టెన్షన్ పడుతూనే నా తండ్రి సాయిని, "సాయీ! నాకున్న ఈ నొప్పులను తగ్గించు స్వామి. మీ అనుగ్రహాన్ని బ్లాగులో పంచుకుంటాన"ని వేడుకున్నాను. అంతే, తెల్లవారేసరికల్లా నొప్పి తగ్గి, ఆందోళన నుండి బయటపడ్డాను. ఈ విధంగా మన సాయిబాబా తండ్రిలా మన మొరలు ఆలకించి ఎల్లప్పుడూ మన వెన్నంటే ఉండి రక్షిస్తూ ఉన్నారు. "సాయీ! మీకు వేలవేల వందనాలు తండ్రి".

---

చాలారోజుల నుండి బాబా చూపుతున్న దయ

ముందుగా సాయి భక్తులందరికీ నమస్కారం. నా పేరు అనూష. నేను చాలా సంవత్సరాల నుండి బాబాను నమ్ముకున్నాను. ఇప్పుడు నేను చాలారోజుల నుండి బాబా నాపై ఎలా దయ చూపుతున్నారో మీ అందరితో పంచుకుంటున్నాను. ఒక సంవత్సరం క్రితం డైయాబెటిస్ కంట్రోల్ ఉండని కారణంగా మా నాన్నగారి కాళ్ళపై అల్సర్స్ వచ్చాయి. డాక్టరు దగ్గరకి వెళితే, "ఇన్ఫెక్షన్ అయింది. ఆపరేషన్ చేసి పాదం మొత్తం తీసేయాల"ని చెప్పారు. ఇంట్లో అందరమూ చాలా బాధపడ్డాము. నేను బాబాను వేడుకున్నాను. ఆయన కృపవల్ల డాక్టరు నాన్న పాదంలో ఇన్ఫెక్ట్ అయిన కొంత భాగమే తొలగించారు. అలా పూర్తిగా నడవలేని పరిస్థితి రాకుండా కాపాడిన బాబాకు మనసారా ధన్యవాదాలు చెప్పుకున్నాను. అయితే ఇటీవల మూడు, నాలుగు నెలల క్రితం నాన్న కాలికి మళ్ళీ అల్సర్ వచ్చింది. నాకు ఏం చేయలో అర్దంకాక బాబా మీద భారమేసి ఎప్పుడూ చూపించే డాక్టర్ దగ్గరకి కాకుండా వేరే డాక్టర్ దగ్గరకి తీసుకెళ్ళాను. బాబా దయవల్ల నాన్నకు చాలావరకు నయం అయింది. కానీ కొన్ని రోజులకి మళ్ళీ సమస్య మొదలయ్యింది. అప్పుడు కూడా నేను బాబాను వేడుకొని ఊదీ నా కాళ్ళకి  పెట్టుకున్నాను(నాన్న కాళ్ళకి కట్టు ఉండటం వల్ల). బాబా దయవల్ల ప్రస్తుతం నాన్నకు కాస్త బాగానే వుంది. "ధన్యవాదాలు బాబా. చాలా ఆలస్యంగా నా అనుభవం పంచుకున్నందుకు నన్ను క్షమించండి బాబా. నాకు ఇదివరకు పని చేసిన చోటు నుండి వేరే ఆఫీసుకి బదిలీ అయినప్పుడు నేను మిమ్మల్ని, 'పాత చోటే వుంచమ'ని ప్రార్థించాను. కానీ నేను కోరుకుంది జరగలేదు. ఇప్పుడున్న చోట నా ఇబ్బందులు మీకు తెలుసు బాబా. మీరే నాకు ఒక దారి చూపి నన్ను ముందుకు నడిపించాలి. ఎల్లప్పుడూ మా అందరిపై కరుణ చూపుతూ చల్లగా చూడు తండ్రి".

శ్రీ సచ్చిదానంద సమర్ద సద్గురు సాయినాథ్ మహరాజ్ కీ జై!!!

---