సాయిభక్తుల అనుభవమాలిక 1481వ భాగం....

---

ఈ భాగంలో అనుభవాలు:

1. బాబా దయుంటే శ్రమ ఉండదు - అంతా సవ్యంగా జరిగిపోతుంది

2. ఇంట్లో అద్దెకు దిగేలా అనుగ్రహించిన బాబా

---

బాబా దయుంటే శ్రమ ఉండదు - అంతా సవ్యంగా జరిగిపోతుంది

సాయి బంధువులందరికీ నా నమస్కారాలు. ఈ బ్లాగ్ నిర్వాహకులకి నా ధాన్యవాదాలు. నా పేరు మంగతాయారు. ఆ పరాత్పరుని కరుణాకటాక్షాల వల్లనే మనం ఆయన పాదాల చెంతకు చేరి ఆయన ప్రసాదించిన అనుభవాలను పొందుతున్నాము. నేనిప్పుడు ఇటీవల నాకు జరిగిన మూడు చిన్న అనుభవాలను పంచుకుంటున్నాను. 2022, జూన్ 18న 80 సంవత్సరాల మా మేనత్తని చూసొద్దమని మా కుటుంబమంతా హైదరాబాద్ నుంచి ఖమ్మం బయలుదేరాము. కారులో ఉన్న పెట్రోల్ 100 కిలోమీటర్లు దూరం వరకే సరిపోతుందని పెట్రోలు పోయిద్దామని చూస్తే, బంకులన్నీ మూసేసి ఉన్నాయి. కారణం ఆరోజు దేనికో సమ్మె చేస్తున్నారు. సిటీ దాటే వరకు చూసి బంకు లేవీ తెరిచి లేకపోతే తిరిగి వెళ్లిపోదామనుకున్నాము. అంతలో హఠాత్తుగా ఎందుకో కారులో ఉన్న సాయి ఫోటోకేసి చూసిన నేను, "పెట్రోల్ దొరికితే, బ్లాగులో మీ అనుగ్రహాన్ని పంచుకుంటాను" అని అనుకున్నాను. అలా అనుకొని చూసేసరికి ఒక పక్కగా ఉన్న పెట్రోల్ బంకు క్లోజ్ చేయడానికి సిద్ధమవుతూ కనిపించింది. వాళ్ళని రిక్వెస్ట్ చేస్తే, మాకు కారులో పెట్రోలు పోసేసి, బంకు క్లోజ్ చేసేశారు. అది సాయి దయ.

USAలో ఉన్న మా మనవరాలు 7వ తరగతికి వచ్చి స్కూలు మారింది. కొత్త స్కూలులో పాపకి జనరల్ మ్యాథ్స్ ఇచ్చారు. కానీ పాప నన్ను నాకు కంపోజిట్ మ్యాథ్స్ సబ్జెక్ట్ కావాలని ఒకటే గొడవ. స్కూలువాళ్ళను అడిగితే, "పరీక్ష వ్రాస్తే, దానిలో వచ్చిన మార్కులు ఆధారంగా ఇస్తామ"ని అన్నారు. అప్పుడు నేను, "పాపని కంపోజిట్ మ్యాథ్స్ గ్రూపులో వేస్తే, మీ అనుగ్రహాన్ని బ్లాగులో పంచుకుంటాను బాబా" అని అనుకున్నాను. ఆ స్వామి దయ చూడండి. పాపకి పరీక్ష పెట్టకుండానే కంపోజిట్ మాథ్స్ గ్రూపులో వేశారు. మనకి ఎప్పుడు, ఏమి ఇవ్వాలో ఆ స్వామికి తెలుసు. ఆయన మీద పూర్తి నమ్మకం ఉంటే చాలు, ఆయనే చూసుకుంటారు.

మేము 2023, ఫిబ్రవరి 11న ఒక గెట్-టుగెదర్(ఆత్మీయ సమ్మేళనం) ప్లాన్ చేసి, అందుకోసం ఒక వాట్సాప్ గ్రూపు క్రియేట్ చేసి, అందులో మా కులానికి చెందిన 500 కుటుంబాలను యాడ్ చేసి, ఎవరైనా, ఎక్కడున్నా ఆత్మీయ సమ్మేళనానికి రావొచ్చని ఆహ్వానించాము. ఆ సందర్భంగా భాగవత ప్రచనాలు, సాంస్కృతిక కార్యక్రమాలు, ఆటలు తదితర అన్నీ చేయాలనుకున్నాము. కానీ ఎలా జరుగుతుందో ఏమోనని నాకు భయమేసి, "ఏ ఆటంకాలు లేకుండా మంచిగా జరగాలి సాయి" అని సాయితో చెప్పుకున్నాను. అలా భారం ఆయన మీద వేసాక ఎందుకో అంత సవ్యంగా జరుగుతుందని నాకు నమ్మకం కలిగింది. ఆ బాబా దయ ఉంటే ఎటువంటి పనైనా శ్రమ తెలియకుండా సాఫీగా జరిగిపోతుంది. అలాగే ఫంక్షన్ చాలా బాగా జరిగింది. ఆ స్వామి దయ నా మీద, నా కుటుంబం మీద ఉందని తెలిసి చాలా చాలా సంతోషపడుతున్నాను. ఎప్పుడూ ఇలాగే ఆయన ప్రేమకు పాత్రురాలిగా ఉండాలని కోరుకుంటున్నాను. "ధన్యవాదాలు బాబా".

---

ఇంట్లో అద్దెకు దిగేలా అనుగ్రహించిన బాబా

శ్రీ సచ్చిదానంద సద్గురు సాయినాథ్ మహారాజ్ కీ జై!!!

సద్గురు శ్రీ సాయినాథుని శరత్ బాబూజీ కి జై!!!

'సాయి మహరాజ్ సన్నిధి' బ్లాగు నిర్వహిస్తున్న వారికి, సాయి భక్తులకు నమస్కారాలు. నా పేరు మంగారావు. 1993 నుంచి శిరిడీ వెళ్లి సాయిబాబాను దర్శించుకున్న భాగ్యం నాకు లభించింది. నేనిప్పుడు బాబా నాకు ప్రసాదించిన ఒక అనుభవాన్ని మీ అందరితో పంచుకుంటున్నాను. కొన్ని రోజులు ముందు నా ఫ్రెండు ఈ బ్లాగు గురించి నాకు తెలియపరిచి, తర్కడ్ కుటుంబ అనుభవాలు మరియు కొందరు భక్తులు అనుభవాలు వాట్సప్ ద్వారా షేర్ చేసారు. నేను వాటిని ప్రతిరోజూ చదువుతుండగా అందులో కొందరు భక్తులు తమ కోరికలను, కష్టాలను, బాధలను తీరిస్తే ఈ బ్లాగు ద్వారా తమ అనుభవాన్ని తోటి భక్తులతో పంచుకుంటామని బాబాను ప్రార్థించి, ఆ కష్టాల నుంచి బయటపడినట్లు చదివాను. అవి చదివిన నేను అప్పటికే ఒక సంవత్సర కాలంగా ఎవరూ అద్దెకు రాక ఖాళీగా ఉంటున్న మా ఇంటి గురించి బాబాను ప్రార్ధించి, "వెంటనే మా ఇల్లు ఎవరైనా అద్దెకు తీసుకుంటే, ఈ బ్లాగు ద్వారా నా అనుభవం అందరికీ తెలియపరుస్తాను" అని బాబాకు చెప్పుకున్నాను. కొన్నిరోజుల తరువాత 2023, ఫిబ్రవరి 26న నేను ఒక సత్సంగంలో ఉండగా నాకు తెలిసినవాళ్ళు ఫోన్ చేసారు. వాళ్ళు మా ఇల్లు చూసి 2023, ఫిబ్రవరి 27న మా ఇంటిని అద్దెకు తీసుకొని షాపు పెట్టుకుంటామని నిర్ధారణ చేశారు. అలాగే మార్చి 3న వాళ్ళు మా ఇంటిలో దిగారు. అనుకున్న దానికంటే అద్దె కొంచం అటుఇటుగా ఉన్నా బాబా దయవల్ల మా సమస్య తీరింది. "ధన్యవాదాలు బాబా".

---