సాయిభక్తుల అనుభవమాలిక 1364వ భాగం....

---

ఈ భాగంలో అనుభవాలు:

1. అడుగడుగునా వెన్నంటే ఉండి కష్టం లేకుండా చూస్తున్న బాబా

2. భగవాన్ సాయిబాబా అనుగ్రహం

3. కాలి బాధను తగ్గించిన బాబా

---

అడుగడుగునా వెన్నంటే ఉండి కష్టం లేకుండా చూస్తున్న బాబా

ఓం శ్రీసాయినాథాయ నమః!!! సాయి బంధువులకు నమస్కారం. నా పేరు వాణిశ్రీ. మాది శ్రీకాకుళం. ప్రస్తుతం మేము ఆఫ్రికాలో ఉంటున్నాము. నేను చాలా డిప్రెషన్‍లో ఉన్న సమయంలో ఎడారిలో ఒయాసిస్‍లా ఈ 'సాయి మహారాజ్ సన్నిధి' బ్లాగు కనిపించి నాకు ఎంతో ఆసరాగా నిలిచింది. ఇది సాయినాథుని కృప. సాయి అంతటా ఉంటారు అనడానికి ఇదే నిదర్శనం.

ఒకసారి నేను ట్రైన్ టికెట్ తీసుకోవటానికని వెళ్లి టికెట్ కౌంటరు వద్ద క్యూలైనులో నిలబడ్డాను. అయితే నా దగ్గర 500 రూపాయల నోటు మాత్రమే ఉంది, చిల్లర డబ్బులు అస్సలు లేవు. కౌంటరులో ఉన్న వ్యక్తి టికెటుకు సరిపడా చిల్లర ఇస్తేనే, టికెట్ ఇస్తానని అన్నారు. అవతల ట్రైన్ ఫ్లాట్‍ఫారం మీద బయలుదేరడానికి సిద్ధంగా ఉన్నందున నాకు ఎం చెయ్యాలో అర్ధంకాక బాబాని తలచుకుని, "బాబా! మీరే నాకు సహాయం చేయాలి. లేదంటే నేను ఇక్కడి నుంచి కదలను. దయచేసి నాకు సహాయం చేయండి సాయి" అని పలుమార్లు బాబాను ప్రార్ధించాను. అంతలో నా వెనుక ఒకతను, "అమ్మా! నా దగ్గర చిల్లరుంది, తీసుకో" అని చిల్లర డబ్బులిచ్చారు. అలా బాబా దయవల్ల నేను నిల్చున్న చోటు నుండి కదలకుండానే టికెట్ తీసుకుని వెళ్లి ట్రైన్ ఎక్కాను. "ధన్యవాదాలు సాయినాథా".

   

రోజూ స్కూలుకి వెళ్ళే మా బాబు హఠాత్తుగా ఒకసారి బాగా మొండికేసి స్కూలుకి వెళ్లడం మానేసాడు. నేను ఎన్ని ప్రయత్నాలు చేసినా వాడిని స్కూలుకి పంపడం నాకు సాధ్యం  కాలేదు. అప్పుడు శ్రీసాయినాథునికి  నమస్కరించుకుని, "బాబా! బాబు స్కూలుకి వెళ్లేలా చేయి తండ్రీ" అని వేడుకున్నాను. ఆ సాయినాథుడు కరుణ చూపారు. మా బాబు మనసు మార్చి స్కూలుకి వెళ్లేలా చేసారు. మా వలన కాని పని సాయినాథుని వల్ల జరిగినందుకు నేను చాలా సంతోషించాను. "థాంక్యూ సాయి".

ఒకరోజు మా బాబు సైకిల్ తొక్కడానికని వెళ్తే, అక్కడ తన సైకిల్ కనిపించలేదు. అక్కడ ఉన్న అందరినీ అడిగితే, "మాకు తెలీదు. మేము చూడలేదు" అని అన్నారు. మాకు ఏమి చేయాలో పాలుపోలేదు. అప్పుడు నేను సాయినాథుని, "సైకిల్ దొరికితే నా అనుభవాన్ని తోటి భక్తులతో పంచుకుంటాను" అని వేడుకున్నాను. అప్పుడు, 'అందరూ మాకు తెలీదు అంటుంటే, వాచ్మెన్ ఏమి ఎరగని వానిలా చోద్యం చూశాడ'ని గుర్తొచ్చి వెళ్లి అతనిని అడిగితే, "నేను తీయలేదు" అన్నాడు. కానీ మేము ఊరుకోక, "మా సైకిల్ ఎక్కడ ఉందో చెప్పు, లేదంటే పోలీస్ కంప్లైంట్ ఇస్తాం" అని అన్నాము. దాంతో అతను భయపడి ఎక్కడ దాచాడో అక్కడనుండి తెచ్చి మా సైకిల్ మాకు అప్పగించాడు. నేను ఆనందంతో సాయినాథునికి ధన్యవాదాలు చెప్పుకున్నాను.

ఒకరోజు నా కన్ను ఎర్రబడిపోయి ఆ రోజంతా నేను చాలా బాధపడ్డాను. చివరికి 'ఓం శ్రీసాయి ఆరోగ్యక్షేమదాయ నమః' అనే నామం గుర్తొచ్చి పలుమార్లు పఠించాను. బాబా దయవల్ల మరుసటిరోజు నా కన్ను ఎర్రదనం తగ్గి సాధారణ స్థితికి వచ్చింది. "నా అనుభవాలను ఆలస్యంగా పంచుకున్నందుకు  క్షమించండి బాబా. మీరు అడుగడుగునా మా వెన్నంటే ఉండి ఏ కష్టం కలగకుండా మమ్మల్ని  ముందుకి నడిపిస్తున్నారు తండ్రి. మీకు అనేక నమస్కారాలు".

---

భగవాన్ సాయిబాబా అనుగ్రహం

ముందుగా సాయి బంధువులందరికీ నా నమస్కారాలు. నేను ఒక సాయి భక్తుడిని. నాపేరు శ్రీరామ సాయి కార్తికేయ. నా వయస్సు పది సంవత్సరాలు. ఈ మధ్య సాయిబాబా నాకు ఎక్కువ అనుభవాలను ప్రసాదిస్తున్నారు. అందులో నుండి రెండు అనుభవాలు నేను ఇప్పుడు మీతో పంచుకుంటున్నాను. 2022, అక్టోబర్ 9, ఆదివారం నాడు నేను నా బంధువులతో కలిసి ఆడుకుంటూ మంచం మీద పల్టీ కొట్టి పొరపాటున కింద పడిపోయాను. నా ఎడమ కన్ను క్రింద, కుడి అరచేయికి కొంచం కిందగా నేలకి గుద్దుకుంది. కన్ను దగ్గర నొప్పి తగ్గిపోయింది కానీ, చేయినొప్పి తగ్గలేదు. మా నానమ్మ తైలం రాసినప్పటికీ నొప్పి తగ్గలేదు. ఆ రాత్రి నేను, "సాయిబాబా! రేపు ఉదయానికల్లా నొప్పి తగ్గిపోతే, నా అనుభవాన్ని తోటి భక్తులతో పంచుకుంటాను" అని చెప్పుకున్నాను. శ్రీసాయిబాబా దయవలన ఉదయానికి నొప్పి దాదాపు తగ్గిపోయింది. "ధన్యవాదాలు బాబా. మీకు మాటిచ్చినట్లే నా అనుభవాన్ని పంచుకున్నాను తండ్రి. మీ కృపను ఎప్పుడూ మాపై వర్షించండి తండ్రి".

2022, అక్టోబర్ 27, గురువారం రాత్రి నేను నా ముఖానికి అలొవేరా రాసుకుందామని నా కళ్ళజోడు తీసి ఓ చోట పెట్టి, అక్కడ పెట్టిన సంగతి పూర్తిగా మర్చిపోయాను. ఆ రాత్రి, మరుసటిరోజు ఉదయం ఎంత వెతికినా ఆ కళ్ళజోడు కన్పించలేదు. నాకు ఐ సైట్(మాయొపియా) ప్రాబ్లెమ్ ఉంది. కాబట్టి కళ్ళజోడు ఉండటం నాకు అత్యంత అవసరం. కానీ ఎంత వెతికినా ఎక్కడా కనిపించకపోయేసరికి కళ్ళజోడు లేకుండానే ఆరోజు బడికి వెళ్లాను. "బాబా! నా కళ్ళజోడు కనిపిస్తే, ఈ అనుభవాన్ని తోటి భక్తులతో పంచుకుంటాను" అని బాబాకి మ్రొక్కుకున్నాను. నేను బడి నుంచి ఇంటికి వచ్చేసరికి మా అక్క, "బట్టలు మడతపెడుతుంటే కళ్ళజోడు దొరికింద"ని చెప్పి నా కళ్ళజోడు నాకిచ్చింది. శ్రీసాయిని నమ్ముకున్నవారికి బాధ అక్కర్లేదు. అంతా శ్రీసాయే చూసుకుంటారు.

---

కాలి బాధను తగ్గించిన బాబా

సాయి భక్తులకు నమస్కారాలు. నాపేరు మణిమాల. నేను ఉపాధ్యాయ వృత్తిలో ఉన్నాను. మా పాఠశాలలో దసరా సెలవులు ఇచ్చాక చివరి రోజున ఉపాధ్యాయులు, పిల్లలు కలిసి బతుకమ్మ ఆడాము. అందరం ఆనందంగా ఆడుకుంటుండగా నా కాలు పట్టుకుని చాలా ఇబ్బంది పడ్డాను. వాపు కూడా వచ్చింది. హాస్పిటల్‍కి వెళితే, ఏమంటారో  అని భయపడ్డాను. నాకు బాబానే సర్వస్వం. అందుచేత, "బాబా! మీ దయతో నా కాలి సమస్య తగ్గితే, మీ అనుగ్రహాన్ని తోటి భక్తులతో పంచుకుంటాను" అని బాబాను ప్రార్థించాను. బాబా దయవల్ల మరునాటికి కొంచెం తగ్గి, పెద్ద బతుకమ్మ జరిగే నాటికి పూర్తిగా తగ్గిపోయింది. సాయి తమ భక్తులకు సర్వదా అండగా ఉంటారు. ఎన్నో జన్మల పుణ్యం కొద్దీ మనం సాయి కృపకు పాత్రులైనాము. సాయి పాదాలకు శరణు శరణు. బ్లాగు నిర్వాహకులకు కృతజ్ఞతలు.

---