1. సంకటహరణ శ్రీసాయినాథ
2. వేడుకుంటే ఏదీ కాదనరు బాబా!
3. గంటలోనే కోరుకున్నది అనుగ్రహించిన బాబా
సంకటహరణ శ్రీసాయినాథ
ఓం సమర్ధ సద్గురు శ్రీసాయినాథాయ నమః!!!
అందరికీ నమస్కారం. నా పేరు యశోద. మాది అనంతపురం. ముందుగా ఈ బ్లాగు నిర్వహిస్తున్న సాయికి ధన్యవాదాలు. నేను ఇదివరకు బాబా నాకు ప్రసాదించిన కొన్ని అనుభవాలను బ్లాగులో పంచుకున్నాను. ఇప్పుడు మరికొన్ని అనుభవాలను పంచుకుంటున్నాను. 2022, మార్చి 14న నాకు విరోచనాలు అయ్యాయి. రాత్రికి మరింత ఎక్కువ అవుతాయేమోనని నాకు చాలా భయమేసింది. ఎందుకంటే, ఇంటిలో నేను ఒక్కదాన్నే ఉన్నాను. అందుచేత వెంటనే, "బాబా! రాత్రి నాకు విరోచనాలు కాకుండా ఉంటే, నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాన"ని బాబాను వేడుకున్నారు. బాబా దయవల్ల రాత్రి ఏ ఇబ్బంది లేకుండా హాయిగా నిద్రపోయాను. "ధన్యవాదాలు తండ్రి":
నేను డయాబెటిక్ పేషంట్ని. ఈ మధ్య నాకు షుగర్ ఎక్కువగా ఉందని డాక్టరు మందుల మోతాదు ఎక్కువ చేసారు. అందువల్ల దాదాపు 6 నెలల నుండి మందులు ఎక్కువగా వాడుతున్న నేను 2002, మార్చి 27న షుగర్ పరీక్ష చేయించుకోవడానికి వెళ్లి, "షుగర్ లెవల్స్ తక్కువగా ఉంటే, మీ అనుగ్రహాన్ని తోటి సాయి భక్తులతో పంచుకుంటాన"ని బాబాకు చెప్పుకున్నాను. బాబా దయతో షుగర్ అదుపులో ఉందని డాక్టరు చెప్పారు. సంతోషంగా బాబాకు కృతజ్ఞతతో శతకోటి ధన్యవాదాలు చెప్పుకుని, "నా కూతురు సమస్యను కూడా పరిష్కరించండి" అని ఆ తండ్రిని వేడుకున్నాను.
మా అమ్మాయి హైదరాబాదులో ఉంటుంది. తనకు దాదాపు ఒక నెల రోజుల నుంచి నడుము నొప్పి చాలా ఎక్కువగా ఉంది. ఎంతమంది డాక్టర్లకు చూపించినా ఫలితం లేదు. చివరికి నేను మా అమ్మాయితో నొప్పి ఉన్నచోట బాబా ఊదీ రాసుకుని సాయి నామాన్ని చెప్పుకోమన్నాను. నేను కూడా, "బాబా! ఈ గురువారంలోగా(2022, మార్చి 31) మా అమ్మాయికి నడుము నొప్పి తగ్గితే, నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను" అని బాబాను వేడుకున్నాను. బాబా దయతో మా అమ్మాయి నడుము నొప్పి తగ్గించారు. "బాబా! మీకు వేలవేల నమస్కారాలు. ఇలాగే అందరినీ సర్వదా కాపాడండి బాబా. ఇంకొక అనుభవంతో మరలా మీ ముందుకు వస్తానని తెలియజేస్తూ బాబా మనకు అనుగ్రహిస్తున్న అనుభవాలను తోటి భక్తులతో పంచుకునే అవకాశమిస్తున్న సాయికి మరోమారు హృదయపూర్వక కృతజ్ఞతలు తెలుపుకుంటున్నాను.
వేడుకుంటే ఏదీ కాదనరు బాబా!
ముందుగా సాయి బంధువులకు, ఈ బ్లాగు నిర్వహిస్తున్న సాయికి నా హృదయపూర్వక నమస్కారాలు. నాపేరు శ్రావణి. నేను సాయి భక్తురాలిని. నేను ఇంతకుముందు బాబా నాకు ప్రసాదించిన కొన్ని అనుభవాలను మీతో పంచుకున్నాను. ఇప్పుడు సాయి తండ్రి దయవల్ల మళ్ళీ నా అనుభవాలు పంచుకుంటున్నాను. మా అమ్మగారి పేరు లక్ష్మి. తనకి కిడ్నీ మరియు లివర్ ప్రాబ్లమ్స్ ఉన్నాయి. ఒకరోజు తనకి కడుపు మరియు నడుము ఒకటే నొప్పి పెట్టడంతో తను చాలా ఇబ్బంది పడింది. దానికి తోడు ఏమి తిన్నా జీర్ణంకాక అమ్మకి వాంతులు అవుతుంటే ఇంట్లో ఉన్న మందులు ఇచ్చాము. కానీ ఎలాంటి ఉపయోగం లేకుండా పోయింది. తన బాధ చూసి నాకు, మా నాన్నగారికి ఒకటే టెన్షన్గా అనిపించింది. సమయానికి మా దగ్గర హాస్పిటల్కి వెళ్లే స్తోమత లేదు. కరోనా వలన ఇంట్లో పరిస్థితులు చాలా దారుణంగా ఉన్నాయి. నాకు ఏమి చేయాలో తోచక ఏడుస్తూ బాబా దగ్గర కూర్చుని, "సాయి తండ్రీ! నువ్వే మాకు దిక్కు. మా కుటుంబ పరిస్థితులు, మేము ఎలాంటి స్థితిలో ఉన్నామో మీకు తెలుసు" అని బాబాకు చెప్పుకుని 'ఓం శ్రీసాయి ఆరోగ్యక్షేమదాయ నమః' అనే నామాన్ని ఆ రాత్రంతా స్మరిస్తూ ఉన్నాను. మన బాబాను వేడుకుంటే ఏదీ కాదనరుగా! తెల్లవారుఝామున నాలుగు గంటలకల్లా అమ్మ సమస్య సమసిపోయింది. "ధన్యవాదాలు తండ్రి. ఏమైనా తప్పులు ఉంటే మనస్ఫూర్తిగా క్షమాపణలు వేడుకుంటున్నాను బాబా".
రెండు సంవత్సరాలుగా అమ్మవాళ్లు తిరుపతి వెళ్దామని అనుకుంటున్నారు. ఎప్పుడు వెళదామనుకున్నా ఏదో ఒక సమస్య వచ్చి వెళ్ళే సమయానికి వాళ్ళ ప్రయాణం క్యాన్సిల్ అయిపోతుండేది. దాంతో అమ్మానాన్న, 'మొక్కు ఉంది, ఎప్పుడు వెళదామన్నా స్వామి కరుణించడం లేద'ని చాలా బాధపడేవారు. ఇంకా నేను అమ్మతో, " 'ఎలాగైనా తిరుపతి వెళ్లి, స్వామి దర్శనం చేసుకునేలా అనుగ్రహించు బాబా' అని బాబాను వేడుకోమ్మా" అని చెప్పాను. నేను కూడా, "బాబా! అమ్మవాళ్ళు తిరుపతికి వెళ్లేలా చేయండి. నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను సాయితండ్రి" అని అనుకున్నాను. అమ్మ బాబాను వేడుకుందో లేదో నాలుగు రోజుల్లో వాళ్ళు తిరుపతి ప్రయాణానికి సిద్ధమయ్యారు. బాబా దయవల్ల వాళ్ళు తిరుపతి వెళ్లి, స్వామి దర్శనం చేసుకుని ఏ ఆటంకాలు లేకుండా క్షేమంగా ఇంటికి తిరిగి వచ్చారు. బాబాని నమ్ముకున్న వాళ్ళకి ఏ కష్టం రాదు. బాబా చల్లని చూపు మా కుటుంబం మీద ఎప్పుడూ ఇలానే ఉండాలని మనస్ఫూర్తిగా వేడుకుంటున్నాను. నా అనుభవాలను ఆలస్యంగా పంచుకున్నందుకు ఈ బ్లాగు ద్వారా బాబాకు క్షమాపణలు చెప్పుకుంటున్నాను.
గంటలోనే కోరుకున్నది అనుగ్రహించిన బాబా
శ్రీసచ్చిదానంద సద్గురు సాయినాథ్ మహరాజ్ కీ జై!!!
నా పేరు సత్యసాయి. అందరూ 'సాయి' అంటారు. నాకు కూడా ఆ పేరు అంటే ఇష్టం. ప్రస్తుతం నా వయస్సు 52 సంవత్సరాలు. నేను 8వ తరగతి చదువుతున్నప్పటి నుంచి మా అమ్మమ్మవాళ్ళ ఇంట్లో ఉండి చదువుకున్నాను. ప్రతి ఆదివారం అమ్మమ్మ నన్ను సత్సంగం జరిగే చోటుకి తీసుకుని వెళ్ళేది. అక్కడ నిలువెత్తు బ్లాక్&వైట్ బాబా ఫోటో ఉండేది. నెమ్మదిగా నాకు ఆయన మీద భక్తిప్రపత్తులు కుదిరాయి. అప్పటినుంచి నేను ఆయన భక్తురాలిని. బాబా నాకు చాలా విషయాలలో సహాయం చేసారు. నేను ప్రతి క్షణం బాబా నాతోనే ఉన్నారని అనుభూతి చెందుతూ ఎక్కడున్నా, ఏ పని చేస్తున్న అన్నీ బాబాతో పంచుకుంటూ ఉంటాను. ఒక్క మాటలో చెప్పాలంటే బాబా లేనిదే నేను లేను. నేను ప్రతిరోజూ మా ఇంటి దగ్గర ఉన్న బాబా గుడిలో కాకడ ఆరతికి వెళ్తుంటాను. నేను శిరిడీ కూడా వెళ్ళాను. అప్పుడు బాబా నాకు చాలా అనుభవాలు ప్రసాదించారు. ఇక ప్రస్తుత అనుభవానికి వస్తే... ఈమధ్య మా పాపకు, వాళ్ళ నాన్నకు మధ్య చిన్న గొడవ జరిగి నెలరోజులవుతున్నా వాళ్లిద్దరూ సరిగా మాట్లాడుకోలేదు. అప్పుడు నేను బాబాను తలుచుకుని, "బాబా! తండ్రీకూతుళ్ళు మునుపటిలా మంచిగా మాట్లాడుకుంటే, నా అనుభవాన్ని 'సాయి మహారాజ్ సన్నిధి' బ్లాగులో పంచుకుంటాను" అని చెప్పుకున్నాను. అంతే, ఒక్క గంటలో నేను కోరుకున్నది జరిగింది. తండ్రీకూతుళ్ళు మాట్లాడుకోవడం చూసి నాకు చాలా ఆనందమేసింది. "చాలా చాలా ధన్యవాదాలు బాబా". నాకు ఈ అవకాశం ఇచ్చిన బ్లాగు వారికి కూడా ధన్యవాదాలు.
