ఆటోడ్రైవర్ రూపంలో ఆదుకున్న సాయి

---

విజయవాడ నుండి సాయిభక్తురాలు సుజాత తన అనుభవాన్ని ఇలా తెలియజేస్తున్నారు. 

సాయిభక్తులందరికీ నా వందనాలు. ఎంతోమంది బాబా కృప వలన వారికి జరిగిన అనుభవాలను సాయిభక్తులందరితో పంచుకుని ఆనందం పొందుతున్నారు. నాకు కూడా బాబా వారి దయవలన ఎన్నో అనిర్వచనీయమైన అనుభవాలు జరిగాయి. అందులో ముచ్చటగా ఒకటి మీతో పంచుకోవాలనే ఉద్దేశ్యంతో నా అనుభవాన్ని మీకు తెలియచేస్తున్నాను.

2003వ సంవత్సరంలో నేను బి.కామ్. చివరి సంవత్సరం పరీక్షలు రాస్తున్నాను. ఒకరోజు ఎగ్జామ్ సెంటర్‌కి తొందరగా వెళ్ళి, అక్కడే చదువుకుంటూ కూర్చున్నాను. కొంతసేపైన తరువాత వార్నింగ్ బెల్ కొట్టారు. బుక్స్ అన్నీ బయట పెట్టి హాల్‌టికెట్ కోసం చూసుకుంటే పర్సులో లేదు. ఇంటిలో మరచిపోయాను. నా దగ్గర మొబైల్ లేదు. ఇంట్లో కూడా ఫోన్ లేదు. మా నాన్నగారి దగ్గర ఫోన్ ఉన్నప్పటికీ ఆయన వేరే ఊరు వెళ్ళారు. ఏమి చేయాలో అర్థం కాలేదు. నేను ఎగ్జామ్ రాసే గాంధీ మహిళా కాలేజీ మార్కెట్ దగ్గర వుంటుంది. మేము ఉండేది హెచ్.బి.కాలనీ, భవానీపురం. ఏమి చేయాలో అర్థంకాక కాలేజీ గేటు బయటికి వచ్చి నిలుచుని ఆలోచిస్తున్నాను. బాబాని తలచుకొని టెన్షన్ పడుతున్నాను. ఇంతలో ఒక ఆటోడ్రైవర్ నా దగ్గరికి వచ్చి, "ఏంటమ్మా, ఏమయింది?" అని అడిగాడు. విచిత్రం ఏమిటంటే, కాలేజీ దగ్గరకి ఎప్పుడూ ఆటోలు రావు. కొంచెం దూరం నడిచి వెళ్ళి ఆటో ఎక్కాల్సి ఉంటుంది. అలాంటిది ఆటోడ్రైవరే నన్ను వెతుక్కుంటూ వచ్చాడు.

ఆటో ఆయనకి మొత్తం వివరించి, "15 నిమిషాలలో నేను ఇంటికి వెళ్ళి మళ్ళీ తిరిగి రావాలి" అని చెప్పాను. అందుకు ఆటో ఆయన, "నీకెందుకమ్మా, నేను తీసుకొని వెళతాన"ని అన్నాడు. అది అసలే చిట్టినగర్ మార్కెట్, మంచి ట్రాఫిక్ రోడ్. ఆటో ఆయన మెయిన్ రోడ్డులో కాకుండా షార్ట్‌కట్‌లో సందులు సందులు తిప్పి తీసుకువెళ్తుంటే మోసం చేస్తాడేమోనని భయమేసింది. కానీ ఆయన నన్ను త్వరగా ఇంటికి తీసుకొని వెళ్ళి, నేను హాల్‌టికెట్ తీసుకొన్నాక మళ్ళీ 15 నిమిషాలలో లాస్ట్ వార్నింగ్ బెల్ కొట్టే లోపల కాలేజీలో దించాడు. ఆటో ఆయన రాకపోతే నాకు ఒక సంవత్సరం వేస్ట్ అయ్యుండేది. ఆటో ఆయనకి థాంక్స్ చెప్పి, "డబ్బులు తీసుకోండి, మీరు చేసిన సహాయానికి ఎంత ఇచ్చినా సరిపోదు" అన్నాను. అందుకాయన, "నాకెందుకమ్మా? నువ్వు నమ్ముకున్న దేవుడికి సమర్పించుకో! ఆ దేవుడే నీకు నా రూపంలో సహాయం చేశాడు" అని చెప్పి ఏమీ తీసుకోకుండానే వెళ్ళిపోయాడు. నేను 4 అడుగులు ముందుకు వేసి మళ్ళీ వెనక్కి తిరిగి చూస్తే, ఆటోగానీ, ఆటో ఆయనగానీ కనిపించలేదు. ఆ రూపంలో వచ్చి నా సమస్య తీర్చినది నా సాయినాథుడే!

---