- బాబా కరుణ
నేను ఒక సాయిభక్తుడిని. సంవత్సరం 5 నెలల వయసున్న మా బాబుకి దగ్గు చాలా రోజులు ఇబ్బందిపెట్టింది. మందులు వాడుతున్నా తగ్గలేదు. ఒకరోజు తను అన్నం అస్సలు సరిగా తినలేదు. అలాగని పాలు పడితే రాత్రి దగ్గుతూ వాంతులు చేసుకొని తిన్నదంతా/తాగినదంతా కఫంతో సహా కక్కేసాడు. నేను బాబు ఖాళీ కడుపుతో ఉన్నాడని అర్థరాత్రివేళ పాలు కలిపి పట్టాను. కానీ కాసేపటికే మళ్ళీ దగ్గుతూ మొత్తం వాంతి చేసుకున్నాడు. తర్వాత కడుపునొప్పి పెడుతుందో ఏమోగానీ తాను కడుపు పట్టుకుని ఏడవసాగాడు. నేను వెంటనే బాబాని తలుచుకొని సంజీవని వంటి ఊదీ బాబుకి పెట్టి, మరికొంత ఊదీ నోట్లో వేసి, "బాబా! ఉదయం కల్లా బాబు ఆరోగ్యం చక్కగా అయ్యేలా కరుణించండి. మీకు 101 రూపాయల దక్షిణ సమర్పించుకుంటాను" అని బాబాను ప్రార్థించాను. తర్వాత దగ్గు మందు, కడుపునొప్పి మందు కొంచెం బాబుకి వేసి 'ఓం శ్రీసాయి ఆరోగ్యక్షేమదాయ నమః' అని 108 సార్లు జపించాను. బాబా దయవల్ల బాబు ఒక గంటలో నిద్రపోయాడు. ఉదయానికి తన ఆరోగ్యం కుదుటపడింది. "ధన్యవాదాలు బాబా".
మేము శిరిడీ వెళ్లి బాబా ఆశీస్సులు తీసుకుందామనుకొని 2024, ఏప్రిల్ 12 రాత్రి షోలాపూర్ నుండి శిరిడీ వెళ్లేందుకు, ఏప్రిల్ 14 రాత్రి శిరిడీ నుండి షోలాపూర్ తిరిగి వచ్చేందుకు బస్సు టిక్కెట్లు చేసుకున్నాం. నేను రైల్వేలో పనిచేస్తున్నాను. ఏప్రిల్ 12న మాకు రైల్వే మాక్ డ్రిల్ ఉంది. అదెక్కడ ఆలస్యమవుతుందో, అప్పుడు శిరిడీ వెళ్ళే బస్సు అందుకోగలనో, లేదో అని నేను కంగారుపడి, "బాబా! ఎటువంటి ఆటంకాలు లేకుండా మీ దర్శన భాగ్యం మాకు లభించేలా అనుగ్రహించండి" అని బాబాను వేడుకున్నాను. బాబా కరుణ వల్ల మధ్యాహ్నం 1కి మాక్ డ్రిల్ల్ పూర్తింది. ఇకపోతే, నా భార్యకి, బాబుకి బస్సు పడదు. ఇదివరకు కేరళలో బస్సులో తిరిగినప్పుడు వాళ్లిద్దరూ వాంతులు చేసుకున్నారు. నాకు కూడా తెల్లవారుజామున టాయిలెట్కి వెళ్ళే సమస్య ఉంది. అందువల్ల 'ఎలా?" అని చింతిస్తూ, "బాబా! మా ఈ శిరిడీ ప్రయాణంలో మాకు ఎటువంటి ఆటంకాలు కలగకుండా క్షేమంగా వచ్చి, మీ దర్శనం చేసుకుని తిరిగి షోలాపూర్ వచ్చేలా కరుణించండి. మీ మందిరంలో 101 రూపాయల దక్షిణ సమర్పించుకుంటాను" అని బాబాకి చెప్పుకున్నాను. బాబా కృపతో ప్రయాణంలో ఎప్పుడూ అల్లరిపెట్టే మా బాబు ఈసారి ఏ మాత్రమూ ఇబ్బంది పెట్టలేదు. ఇంకా మేము ముందుగా రూమ్ బుక్ చేసుకోనప్పటికీ ఆ రోజు ఉదయం సాయి భక్తనివాస్లో నాన్-ఏసీ రూమ్, అదేరోజు రాత్రి సాయి ఆశ్రమంలో ఏసీ రూమ్ దొరకడంతో సంవత్సరం 5 నెలల మా బాబుతో రెండు రోజులు ఎటువంటి ఇబ్బందీ లేకుండా బాబా సన్నిధిలో ఆనందంగా గడిపాము. బాబా కృపతో మాకు అద్భుతమైన దర్శనాన్ని అనుగ్రహించారు. ఇకపోతే తిరుగు ప్రయాణంలో మేము బుక్ చేసుకున్న డైరెక్ట్ బస్ క్యాన్సల్ అయినప్పటికీ బాబా దయవల్ల కనెక్టింగ్ బస్ సర్దుబాటు అయి చేరుకోవాల్సిన సమయానికే షోలాపూర్ చేరుకున్నాము. "చాలా చాలా ధన్యవాదాలు బాబా. మా అందరికీ ఉన్న ఆరోగ్య సమస్యలు తొందరగా సమసిపోయేలా చూడు తండ్రీ. మళ్ళీ తొందరలోనే కుటుంబ సమేతంగా శిరిడీలో మిమ్మల్ని దర్శించుకునేలా అనుగ్రహించండి బాబా".
తర్వాత నా భార్య అమ్మమ్మ హైదరాబాద్లో ఉన్న తన కొడుకు ఇంట్లో మృతి చెందారు. ఆరోజు వెళ్ళడానికి మాకు కుదరలేదు. దాంతో పెద్ద కార్యమైన గురువారంనాడు ఎలాగైనా వెళ్ళాలి, లేదంటే బాగోదనుకొని మంగళవారం రాత్రి నా భార్యను ట్రైన్ ఎక్కించి, నేను బుధవారం డ్యూటీ చూసుకుని ఆ రాత్రి ట్రైన్ ఎక్కుదామనుకున్నాను. అయితే నేను పని చేస్తున్న డిపార్టుమెంటులో బుధవారంనాడు ఆక్సిడెంట్ రిలీఫ్ ట్రైన్ వీక్లీ మైంటెనెన్సు షెడ్యూల్స్ ఉంటాయి. ఆరోజు ఇంజన్ సెక్షన్లో ఒక పెద్ద సమస్య వచ్చింది. ఇంజన్ నిలకడగా ఉన్న స్థితిలో కూడా RPM స్పీడ్ పెరిగసాగింది. నిజానికి అలా జరగకూడదు. ఆరోజు ఉదయం నుండి ఆ సమస్య పరిష్కారానికి ప్రయత్నిస్తున్నా కూడా ఆ సమస్య పూర్తిగా సమసిపోలేదు. ఆ సమస్య పరిష్కరించకుండా షెడ్యూల్ పూర్తవ్వదు. అందువల్ల నాకు, 'ఇక హైదరాబాద్ వెళ్ళడం కుదరదేమో! చనిపోయినప్పుడు రాలేదు, పెద్ద కార్యంకి కూడా రాలేదని బంధువులతో మాటపడాల్సి వస్తుంది. అందరూ నా భార్యని మాటలు అంటారు' అనిపించి బాబాని తలుచుకొని, "బాబా! ఈ సమస్య తొలగిపోయి నేను ఎటువంటి ఆటంకాలు లేకుండా హైదరాబాద్ వెళ్లి పెద్ద కార్యంలో పాల్గొనేలా చూడండి. ఒకరికి అన్నదానం చేస్తాను" అని బాబాను ప్రార్థించాను. బాబా దయ చూపారు. సాయంత్రం 5 గంటలకి మరోసారి ఇంజన్ టెస్ట్ చేస్తే, సమస్య 90% సమసిపోయినట్టు తేలింది. అంతేకాదు, అత్యవసర పరిస్థితుల్లో వెళ్ళడానికి ట్రైన్ కదలికకు ఎటువంటి ఇబ్బందీ ఉండదని కూడా తెలిసి చాలా సంతోషించాను. బాబాకి మాటిచ్చినట్టు అన్నదానం చేసి ఆరోజు రాత్రి హైదరాబాద్కి బయల్దేరాను. తరువాత రోజు అందర్నీ కలిసి పెద్ద కార్యం నిర్వహణలో నా వంతు కృషి చేశాను. "చాలా ధన్యవాదాలు బాబా. మీ దీవెనలు ఎల్లప్పుడూ మీ భక్తులపై ఉండాలని కోరుకుంటున్నాను బాబా".
