1. శిరిడీ దర్శనంతో తీరిన సమస్యలు2. కేవలం బాబా అనుగ్రహంతో ఉపశమనం
శిరిడీ దర్శనంతో తీరిన సమస్యలు
సాయిబంధువులందరికీ నమస్కారం. నా పేరు శంకర్. నేను హైదరాబాదు నివాసిని. నేను చాలా సంవత్సరాల నుండి సాయి భక్తుడిని. నాలో చాలా తప్పులు ఉన్నప్పటికీ అడుగడుగునా బాబా నన్ను రక్షిస్తున్నారు. నేను 2023లో దసరా సెలవులకి శిరిడీ వెళ్లాలని టికెట్లు బుక్ చేసుకున్నాను. అయితే చాలా వెయిటింగ్ లిస్టు ఉండి కన్ఫర్మ్ కాలేదు. తెలిసిన రైల్వే టీసీతో సిపారస్ చేయించినా ప్రయోజనం లేకపోయింది. అయినా బాబా మీద భారమేసి టీసీని కలిసి మాట్లాడదామని బయలుదేరి వెళ్ళాను. టీసీని కలిసి మాట్లాడితే, "దసరా సెలవులు కావడం వల్ల ట్రైనులో అస్సలు ఖాళీ లేదు. సరే, చూద్దాం. కూర్చోండి!" అని అన్నారు. కాసేపటి తర్వాత మళ్లీ టీసీని కలిస్తే, "ఖాళీ లేదు" అన్నారు. ఇక చేసేదిలేక బాబాని తలుచుకొని స్లీపర్ కోచ్లో కింద కూర్చొని శిరిడీ వెళ్లాను. శిరిడీలో నాలుగు రోజులు గడిపి ఎంతో అనుభూతి పొందాను.
ఇకపోతే, నా వయసు 40 సంవత్సరాలు. నాకు పని ఎక్కువైనప్పుడు మోకాలు కింద బాగా నొప్పి వస్తుంటుంది. ఆ సమయంలో బండి కిక్ కొట్టాలంటే చాలా కష్టంగా అనిపిస్తుంది. నేను ఆ నొప్పి తగ్గడానికి పెయిన్ ఆయిల్ వాడుతుండేవాడిని. ఆ ఆయిల్ వాడినప్పుడు నొప్పి తగ్గుతుండేది. శిరిడీ వెళ్ళక ముందు కూడా నొప్పి బాగా వచ్చింది. ఈసారి ఆ ఆయిల్ వాడినా నొప్పి తగ్గలేదు. డాక్టర్ని కలిసి టాబ్లెట్లు తెచ్చుకొంటే కొంత ఉపశమనం లభించింది కానీ, పూర్తిగా తగ్గలేదు. అలాగే శిరిడీ వెళ్ళాను. శిరిడీలో నాసిక్ అవి తిరిగేసరికి సాయంత్రానికి నొప్పి ఎక్కువగా వచ్చింది. నాకు చాలా బాధ, భయం కలిగాయి. నేను, "బాబా! నా కాలి నొప్పి పూర్తిగా తగ్గేలా దయ చూపండి” అని అనుకున్నాను. అలా అనుకొని శిరిడీ నుండి తిరుగు ప్రయాణానికి బయలుదేరాను. బాబా దయవల్ల రిటర్న్ టికెట్ ఆర్ఏసి వచ్చి కన్ఫర్మ్ అయింది. నేను చాలా సంతోషంగా ట్రైన్ ఎక్కి ఇంటికి వచ్చాను. రెండు రోజుల తర్వాత నొప్పి పూర్తిగా తగ్గిపోయింది. బండి స్టార్ట్ చేయడానికి కూడా ఇబ్బంది అనిపించలేదు(అదివరకు బండి కిక్కు కొట్టాలంటే భయపడిపోయేవాడిని). అంతేకాదు, మళ్ళీ ఇప్పటివరకు ఆ నొప్పి కనిపించలేదు. అంతా బాబా దయ.
ఇంకో విషయం నాకు ఆర్థిక ఇబ్బందులు చాలా ఉన్నాయి. శిరిడీలో ఉండగా, "బాబా! నా ఆర్థిక ఇబ్బందులు తొలగిపోవాలి" అని అనుకున్నాను. శిరిడీ నుండి వచ్చిన తర్వాత రెండు నెలల్లో ఒక వ్యక్తి ద్వారా నేను చేసిన పనికి 3 లక్షల వరకు అందించారు బాబా. దాంతో చాలావరకు అప్పుల నుండి బయటపడ్డాను. ఇదంతా బాబా దయతోనే జరిగిందని భావిస్తున్నాను. మిగతా ఋణ భారాన్ని కూడా బాబా ఏదో రూపంలో తొలగిస్తారని ఎదురు చూస్తున్నాను. బాబా తన భక్తులను ఎన్నడూ వదిలిపెట్టరు. బాబా తోడుంటే జీవితంలో అన్నీ ఉన్నట్లే. నా తప్పులు మన్నించి బాబా నన్ను నా జీవితంలో ఉన్నత స్థాయిలో ఉంచుతారని భావిస్తూ..
ఓం శ్రీసాయినాథాయ నమః!!!
కేవలం బాబా అనుగ్రహంతో ఉపశమనం
సాయి బంధువులందరికీ నమస్కారం. నేను ఒక సాయిభక్తురాలిని. ఈ మధ్యకాలంలో ఆఫీస్ పని ఎక్కువగా చేయడం వల్ల నాకు మెడనొప్పి బాగా ఉండింది. దానివల్ల తలనొప్పి కూడా ఎక్కువగా వచ్చింది. కొద్దిరోజులు నొప్పి ఎందుకు వస్తుందో అని ఎంత ఆలోచించినా కారణం తెలీలేదు. ఇక చివిరికి బాబాను తలచుకొని ఆయనను ప్రార్థించానో, లేదో నొప్పి తగ్గిపోయింది. ఇంకోరోజు అకారణంగా నా ఒళ్లంతా దురద పెట్టడం మొదలయ్యింది. చాలాసేపు ఇబ్బందిపడ్డాక బాబాను తలచుకొని దురద అనిపించిన చోట ఊదీ రాసుకుంటే, వెంటనే దురద తగ్గింది. మరోసారి తల భాగమంతా ఎవరో ఊపేసినట్టుగా ఉండింది. అప్పుడు బాబాను మనస్పూర్తిగా తలచుకోగానే అంతా బాగైపోయింది. పై ఏ సందర్భంలోనూ నేను డాక్టరుని సంప్రదించడం, మందులు వాడటం చేయలేదు. కేవలం బాబా అనుగ్రహంతో ఉపశమనం పొందాను. "ధన్యవాదాలు బాబా. ఎప్పటికీ మీ దయ మాపై ఇలాగే వుంచి మేము ఆరోగ్యంగా ఉండేలా అనుగ్రహించు బాబా".
