సాయిభక్తుల అనుభవమాలిక 1828వ భాగం....

---

ఈ భాగంలో అనుభవాలు:

1. దయతో అనుకున్నవి నెరవేర్చిన బాబా

2. సాయి మహిమ

---

దయతో అనుకున్నవి నెరవేర్చిన బాబా

నేను ఒక సాయిభక్తుడిని. మేము షోలాపూర్‌లో నివాసముంటున్నాము. ఇక్కడ ప్రతి బుధవారం శివాలయం నందు పిల్లలకి తాయత్తు కడుతుంటారు. పిల్లలకి ఏమైనా గాలి సోకితే, అది తొలగిపోయి వాళ్ళ ఆరోగ్యం చక్కబడుతుందని ఇక్కడి వాళ్ళకి ఏన్నో ఏళ్లుగా ఉన్న నమ్మకం. అందుకని నేను ఒక బుధవారం సాయంత్రం మా బాబుని తీసుకొని ఆ గుడికి వెళదామని అనుకున్నాను. అయితే ఆ రోజు మధ్యాహ్నం 3 గంటలకి మా సార్ ఒకరు నాకు ఫోన్ చేసి, "అగ్ని ప్రమాదం జరిగింది. నువ్వు నీ బృందాన్ని తీసుకొని వెళ్లాల్సి ఉంటుంది" అని అన్నారు. నేను ఆ పని మీద వెళ్తే, బాబుని తీసుకొని శివాలయంకి వెళ్లడం కుదరదు. మరో వారం రోజులు వేచి చూడాల్సి వస్తుంది. అందువల్ల నేను వెంటనే బాబాని తలుచుకొని, "బాబా! ఈ అత్యవసర విధులు రద్దయ్యేలా చేసి, నేను బాబుని తీసుకొని గుడికి వెళ్లి, తాయత్తు కట్టించి తెచ్చేలా అనుగ్రహించండి" అని వేడుకున్నాను. బాబాని నమ్ముకుంటే కానిది అంటూ ఏమైనా ఉందా? బాబా దయవల్ల నేను శివాలయంకి వెళ్ళాను. అక్కడ రద్దీగా ఉంది. అంత రద్దీలో కూడా బాబుకి తాయెత్తు కట్టించి తిరిగి ఇంటికి వచ్చేవరకు ఆఫీస్ నుండి నాకు ఏ కాల్ రాలేదు. అంతా బాబా దయ. 

ఇంకోసారి కాస్త జలుబు, దగ్గు వల్ల కాబోలు మా బాబు సరిగా తినేవాడు కాదు. తినిపిస్తుంటే బాగా ఏడవటం, సగం తిని మిగతాది ఊసేయడం చేస్తుండేవాడు. అప్పుడు నేను, "బాబా! బాబు రేపటినుండి ఇబ్బంది పెట్టకుండా చక్కగా తినేటట్లు చేయండి. లేదంటే వాడు నిరసించిపోతాడు. మీ దయవల్ల వాడు సరిగా తింటే మీకు పాలకోవా నివేదిస్తాను" అని బాబాను ప్రార్థించాను. ఇక బాబా అద్భుతం చూడండి. మరుసటిరోజు నుండి బాబు ఏడవకుండా చక్కగా తినడం మొదలుపెట్టాడు. బాబాకీ మొక్కుకున్నట్లు గురువారంనాడు మందిరంలో బాబాకి పాలకోవా సమర్పించుకున్నాను. "ధన్యవాదాలు బాబా. ఇక మీదట కూడా బాబు ఇబ్బంది పెట్టకుండా చక్కగా తినేలా చూడండి బాబా. ఇలాగే నా భార్యాబిడ్డలను కాపాడుతూ ఉండండి తండ్రీ”.

ఒకసారి నేను నా ఆఫీస్ పనయ్యాక వేరే ఆఫీసుకి వెళ్ళాను. అక్కడ వాళ్ళతో మాట్లాడుతున్నప్పుడు నా కుడిచేతి వేలికి ఉండాల్సిన బంగారు ఉంగరం లేదని గమనించాను. ఒక్కసారిగా నా మైండ్ బ్లాక్ అయింది. నిజానికి ఆ ఉంగరం చాలా టైట్‌గా ఉంటుంది. అలాంటిది ఎలా పడిపోయిందో నాకు తెలియలేదు. వెంటనే బాబాని తలుచుకొని, "బాబా! విలువైన ఆ బంగారు ఉంగరం దొరికేలా అనుగ్రహించండి. అది దొరికితే మీ పేరు మీద ఇద్దరు అభాగ్యులకు అన్నదానం చేస్తాను" అని అనుకున్నాను. తర్వాత ఇంటికెళ్లి మధ్యాహ్న భోజనానికి వచ్చినపుడు పడిపోయిందేమోనని ఇల్లంతా ఆ ఉంగరం కోసం వెతికాను. నా భార్యకి కూడా విషయం చెప్పి తనని కూడా వెతకమన్నాను. తను కూడా విలువైన వస్తువని చాలా బాధపడుతూ వెతికింది. కానీ ఎక్కడా దొరకలేదు. చివరికి ఎందుకైనా మంచిదని నా బ్యాగులో వెతికితే, అందులో ఆ ఉంగరం దొరికింది. నేను ఆశ్చర్యపోయాను. ఆ ఉంగరం అందులో ఎప్పుడు, ఎలా పడిందో నాకు అస్సలు తెలీదు. కానీ బాబానే అందులో దొరికేలా అనుగ్రహించారు. "ధన్యవాదాలు బాబా. మిమ్మల్ని మనసారా భక్తితో అడిగితే జరగనిది అంటూ ఏమీ ఉండదు. మీ దీవెనలు ఎల్లప్పుడూ మీ భక్తులపై ఉండాలని కోరుకుంటున్నాను బాబా".

---

సాయి మహిమ

సాయిబంధువులకు నమస్కారం. నా పేరు స్వాతి. మా ఇంటి బాల్కనీలో మొక్కలకు ఎన్ని మందులు వేసినా వాడిపోయినట్లు ఉంటుండేవి. నాకు చాలా బాధేసి బాబాకి దణ్ణం పెట్టుకొని ఊదీ మొక్కలకు వేసాను. కొన్ని రోజుల్లోనే ఆ వాడిన మొక్కలు చిగురించి పూలు కూడా వచ్చాయి. ఏమి నా సాయి మహిమ?

ఈమధ్య నా ఆరోగ్యం బాగుండటం లేదు. దానికి తోడు మా ఇంట్లో పనిచేసే అమ్మాయి సరిగా సమయానికి రాకుండా ఆలస్యం చేస్తుండేది. నాకు కోపమొచ్చి అడిగితే, "మీకు ఇష్టం లేకుంటే పనికి రాన"ని అంది. నేను కూడా రావద్దని చెప్పాను. తర్వాత బాబాకి నా పరిస్థితి చెప్పుకొని, 'సాయి అసహాయసహాయాయ నమ:' అని జపించసాగాను. బాబా దయతో 2వ రోజు వేరే పని అమ్మాయి వచ్చింది. బాబానే నా ఇబ్బందిని అర్థం చేసుకొని ఆ అమ్మాయిని పంపారు. "కోటి నమస్కారాలు సాయి. దయతో ఆ  అమ్మాయి మంచిగా చేసేలా చూడండి. నేను ఎదుర్కొంటున్న సమస్యల మూలన మీరు నాకు సహాయం చేయటం లేదనే భావన నన్ను వెంటాడుతోంది. నన్ను క్షమించండి సాయి. మీ సమక్షంలో నా కర్మఫలం అనుభవించనివ్వు సాయి. నా మనసు మీ పాదాల వద్ద వుంచే శక్తి ఇవ్వు".

---