సాయిభక్తుల అనుభవమాలిక 1664వ భాగం....

---

ఈ భాగంలో అనుభవాలు:

1. బాబా దయతో తిరుమలలో స్వామివారి దర్శనం

2. సరుకులన్నీ అమ్ముడుపోయేలా అనుగ్రహించిన బాబా

---

బాబా దయతో తిరుమలలో స్వామివారి దర్శనం

అందరికీ నమస్తే. నా పేరు ఝాన్సీ. మా అమ్మ, అమ్మమ్మ సాయిబాబా భక్తులు. కానీ నేను చిన్న వయసు నుంచి వేంకటేశ్వరస్వామిని ఆరాధిస్తుండేదాన్ని. నేను M.Sc చదువుతున్నప్పుడు ఒక ల్యాబ్ పరీక్ష విషయంలో నాకు చాలా కష్టంగా అనిపించి చాలా ఆందోళన చెందాను. ఆ సమయంలో ఎవరో పిలిచినట్లనిపించి బాబా ఫోటో వైపు చూస్తే, ఆయన కళ్ళతో "నన్ను అడుగు తల్లీ. నీకు నేను సహాయం చేస్తాను" అని అన్నట్లు అనిపించింది. అప్పుడు నేను, "బాబా! నాకు పరీక్షలో ఏటువంటి ఇబ్బంది లేకుండా చూడు" అనే అనుకున్నాను. అత్యంత అద్భుతం! ఆ రోజు పరీక్ష చాలా తేలికగా జరిగింది. మార్కులు బాగా వేసారు. నేను చాలా సంతోషించాను. ఆ రోజు నుంచి నేను ఎంత పెద్ద కష్టమైనా, చిన్న కష్టమైనా బాబాతో చెప్పుకోవడం మొదలుపెట్టాను. నాకు ఏదో రూపంలో ఆ సమస్యకు పరిష్కారం దొరికేలా బాబా అనుగ్రహిస్తున్నారు.

ఇప్పుడు నా జీవితంలో మర్చిపోలేని ఒక అద్భుతమైన సంఘటన గురించి చెప్తాను. నాకు దూరంగా ఉండేవి కనిపించవు. అందువల్ల నేను కళ్ళజోడు వాడతాను. ఒకసారి తిరుమల వెళ్ళినప్పుడు క్యూలైన్లో నేను తప్పిపోయాను. నా కళ్లద్దాలు మా అమ్మ దగ్గర ఉండిపోయాయి. అందువల్ల కళ్ళద్దాలు లేకుండా నేను క్యూలైన్లో లోపలి వరకు వెళ్ళిపోయాను. కళ్లద్దాలు లేనందున దూరం నుండి స్వామివారిని దర్శించుకోలేక నాకు దుఃఖం ఆగక కళ్ళ నిండా నీళ్లతో బయటకు వచ్చాను. ఆ బాధలో బాబాను, "నా స్వామి దర్శనమయ్యేలా చూడండి బాబా" అని గట్టిగా ప్రార్థించాను. ఈలోగా మా అమ్మ వస్తే, కళ్ళద్దాలు తీసుకుని దైవ సహాయం కన్నా ముందు నా వంతు మానవ ప్రయత్నం చేయాలని అక్కడున్న సెక్యూరిటీతో, "ఇదివరకు నా దగ్గర నా కళ్లద్దాలు లేనందున నాకు స్వామి దర్శనం కాలేదు. ఇప్పుడు నా దగ్గర కళ్లద్దాలు ఉన్నాయి. ఇప్పుడు నన్ను ఒకసారి లోపలికి వెళ్ళడానికి అనుమతించండి" అని అభ్యర్థించాను. కానీ తను ఒప్పుకోలేదు. అయినా నేను ఆగకుండా చొరవ తీసుకొని బయటకు వచ్చే మార్గం గుండా లోపలికి వెళ్ళిపోయాను. లోపల సేవ చేస్తున్నవాళ్ళు నన్ను ఏమీ అనలేదు, పైగా దర్శనం చేసుకో అని ఒక పక్కగా నిలబెట్టారు. నేను స్వామిని బాగా దర్శించుకొని మనసు నిండా ఆనందంతో, కళ్ళ నిండా ఆనందబాష్పాలతో బయటకు వచ్చి బాబాకు చాలా చాలా ధన్యవాదాలు చెప్పుకున్నాను. థాంక్స్ అనేది చిన్న మాటే కానీ, ప్రేమగా నమ్మకంతో చెప్తే, బాబా ప్రేమగా స్వీకరిస్తారు.

---

సరుకులన్నీ అమ్ముడుపోయేలా అనుగ్రహించిన బాబా

సాయిబంధువులకు నమస్కారాలు. పిలవగానే పలికే మన సాయితండ్రికి శతకోటి వందనాలు. నేను ఒక సాయి భక్తురాలిని. వినాయకచవితి పండగ సందర్భంగా మావారు అమ్మకం కోసం కొన్ని సరుకులు తీసుకొచ్చి పండగ ముందురోజు వాటిని అమ్మకానికి పెట్టారు. అయితే ఆరోజు మావద్ద ఎవరూ ఏమీ తీసుకోలేదు. చుట్టుపక్కల ఉన్నవాళ్ళందరికీ వ్యాపారం బాగా జరుగుతున్నప్పటికీ మాకు ఏమాత్రమూ వ్యాపారం జరగలేదు. దాంతో మావారు చాలా దిగులుగా అయిపోయారు. తనని చూస్తే నాకు బాధగా అనిపించి, "అందరిలాగే మాకు కూడా వ్యాపారం చక్కగా జరిగితే బాగుండు బాబా" అని బాబాతో చెప్పుకున్నాను. తర్వాత, "బాధపడకండి ఏమీ కాదు. ఇంకోరోజు ఉంది కదా! అన్నీ సరుకులు అమ్ముడైపోతాయేమో లెండి. మీరు బాధపడకండి" అని మావారికి కూడా కాస్త ధైర్యం చెప్పాను. నా మనసులో, "బాబా! మాక్కూడా వ్యాపారం జరిగేలా చూడు తండ్రీ" అని బాబాకి అనుక్షణం దణ్ణం పెట్టుకుంటూ గడిపాను. బాబా నా మోర విన్నారు. పండగరోజు సాయంత్రం కల్లా తెచ్చిన సరుకులన్ని అమ్ముడైపోయాయి. బాబా దయకు మాకు చాలా సంతోషంగా అనిపించింది. మనసులోనే బాబాకు చాలా చాలా కృతజ్ఞతలు తెలుపుకున్నాను. "మీరు చూపిన ప్రేమకు చాలా కృతజ్ఞతలు బాబా. ఎల్లప్పుడూ మీ ప్రేమ మీ బిడ్డలపై చూపు తండ్రీ".

శ్రీ సచ్చిదానంద సద్గురు సాయినాథ్ మహారాజ్ కీ జై!!!

---