సాయిభక్తుల అనుభవమాలిక 1639వ భాగం....

---

ఈ భాగంలో అనుభవాలు:

1. హృదయపూర్వకమైన ప్రార్థనలకు సహాయం అందించిన బాబా

2. ప్రతిసారీ అండగా ఉండే బాబా

---

హృదయపూర్వకమైన ప్రార్థనలకు సహాయం అందించిన బాబా

నా పేరు మల్లికార్జునరావు. మాది వైజాగ్. నా భార్య బాబా భక్తురాలైనప్పటికీ ఇటీవల కాలం వరకు నేను బాబాని నమ్మేవాడిని కాదు. ఈమధ్యనే బాబాని నమ్మడం మొదలుపెట్టి మనసులో ఏ కోరిక లేకుండా ఆయన్ని ప్రార్థిస్తున్నాను. 2023, జూలైలో ఒక ముఖ్యమైన ఆఫీసు పని విషయంగా నేను రాంచీ వెళ్లాల్సి వచ్చింది. రాంచీలోని నా గమ్యస్థానానికి ఉదయం 11 గంటలకల్లా చేరుకోవాల్సి ఉన్నందున నేను ముందుగా ఉదయం 7 గంటలకి వైజాగ్‌లో విమానం ఎక్కి హైదరాబాదు చేరుకొని, అక్కడ 9 గంటలకున్న రాంచీ వెళ్ళే విమానాన్ని అందుకోవాలని అనుకున్నాను. అయితే నా ట్రావెల్ సలహాదారుడు, "హైదరాబాద్‌లో విమానం దిగి, తదుపరి విమానం ఎక్కడానికి మధ్య కనీసం 2 గంటల వ్యవధి ఉండాలి. కాబట్టి ముందురోజే వైజాగ్ నుండి బయలుదేరి హైదరాబాదు చేరుకోమ"ని సలహా ఇచ్చాడు. కానీ నేను తనని బలవంతపెట్టి నేను అనుకున్నట్లు అదేరోజు వైజాగ్ నుండి బయలుదేరేలా టిక్కెట్లు బుక్ చేయమని చెప్పాను. తన అలాగే చేసాడు. దురదృష్టవశాత్తూ నేను ప్రయాణమయ్యే రోజు భారీ వర్షం కురవడంతో వైజాగ్ నుండి విమానం 40 నిమిషాలు ఆలస్యంగా బయలుదేరింది. దాంతో నేను హైదరాబాదులో విమానం అందుతుందనే ఆశ పూర్తిగా కోల్పోయాను. అయితే అది చాలా ముఖ్యమైన బిజినెస్ మీటింగు. నేను ఆ మీటింగ్‌కి హాజరుకాకపోతే నా కంపెనీకి సమస్యలు వచ్చే అవకాశం ఉండటంతోపాటు కంపెనీలో నా విశ్వసనీయతపై ప్రభావం పడే అవకాశముంది. అందువల్ల నేను హృదయపూర్వకంగా, "నాకు సహాయం చేయమ"ని బాబాను ప్రార్థించాను. ఆ సమయంలో బాబాపై ప్రగాఢ విశ్వాసం తప్ప నా మనసులో ఏమీ లేదు. బాబా దయవల్ల నేను హైదరాబాదులో ఉదయం 8:40కి విమానం దిగాను. తదుపరి నేను ఎక్కాల్సిన విమానం 9 గంటలకే ఉన్నందున ఆలస్యం చేయకుండా వెళ్లి సెక్యూరిటీ చెకప్ పూర్తి చేసుకొని బోర్డింగ్ గేట్ దగ్గరకి వెళ్ళాను. ఆశ్చర్యం! విమానం ఇంకా బయలుదేరలేదు. సంతోషంగా వెళ్లి విమానం ఎక్కాను. రాంచీలోని నా గమ్యస్థానానికి చేరుకొని మీటింగ్‌కి హాజరై నా పని పూర్తి చేసుకొని వచ్చాను. ఇంతకాలం నేను బాబా మహిమల గురించి పట్టించుకోలేదుగానీ నా ఈ అనుభవం ద్వారా బాబా మన చుట్టూ ఉన్నారని, హృదయపూర్వకమైన మన ప్రార్థనలను వింటారని, భక్తులకు సహాయం చేస్తారని హృదయపూర్వకంగా విశ్వసిస్తున్నాను.

---

ప్రతిసారీ అండగా ఉండే బాబా

సాయిభక్తులందరికీ నమస్కారం. నేను ఒక సాయిభక్తురాలిని.  2005లో బాబా నాకు పరిచయమయ్యారు. అప్పటినుండి నేను బాబాని నమ్ముతున్నాను. 2023, మేలో నాకు మెడ భాగంలో థైరాయిడ్ గడ్డ అయింది. డాక్టర్ దగ్గరకి వెళితే, "తప్పనిసరిగా సర్జరీ చేయాలి" అన్నారు. నాకు భయమేసి, "బాబా! ఏదో ఒకటి చేసి సర్జరీ లేకుండా గడ్డ తగ్గేటట్లు చూడు" అని వేడుకొని రోజూ గడ్డపై ఊదీ రాసి, మరికొంత ఊదీ నీళ్లలో కలుపుకొని త్రాగుతూ ఉండేదాన్ని. ఇలా రోజులు గడుస్తుండగా 2023, జూలైలో ఒకరోజు నేను సర్జరీ చేయించుకోడానికి హాస్పిటల్‌కి వెళ్ళాను. అప్పుడు అక్కడ నాకు  బాబా ఫోటో దర్శనమిచ్చింది. అంతకు ముందు నేను రెండుసార్లు ఆ హాస్పిటల్‌కి వెళ్ళాను కానీ, అప్పుడెప్పుడు నేను ఆ ఫోటోను అక్కడ చూడలేదు. వెంటనే నేను బాబాని, "నిజంగా నువ్వు నా దగ్గర ఉంటే ఇంకోసారి కనిపించు బాబా" అని అడిగాను. తరువాత నా పక్కనున్న అమ్మాయి మొబైల్లో బాబా నాకు కనిపించారు. బాబా దయవల్ల సర్జరీ మంచిగా జరిగింది. కానీ తర్వాత నాకు విపరీతమైన దగ్గు రావడం మొదలైంది. అప్పుడు నేను, 'ఓం శ్రీసాయి ఆరోగ్యక్షేమదాయ నమః' అనే మంత్రం జపించుకున్నాను. రాత్రికల్లా దగ్గు కొంచంగా తగ్గడం మొదలై రెండురోజుల్లో పూర్తిగా తగ్గింది. దగ్గు తగ్గుతూనే నన్ను హాస్పిటల్ నుండి డిశ్చార్జ్ చేసారు. హాస్పిటల్ నుండి మా ఇంటికి వెళ్లాలంటే 25 కి.మీ దూరం ప్రయాణం చేయాల్సి ఉండగా దారిలో మా ఇంటికి 5 కిలోమీటర్ల దూరంలో ట్రాఫిక్ చాలా ఎక్కువగా ఉంటుంది. అందువల్ల నేను బాబాని, "ఆ చోట ట్రాఫిక్ లేకుండా ఉండేలా చూడమ"ని వేడుకున్నాను. సరిగ్గా ట్రాఫిక్ మొదలయ్యే చోటుకు మేము చేరుకునేసరికి పెద్ద వర్షం వచ్చి చాలా వాహనాలు ఎక్కడివి అక్కడే అగిపోయాయి. దాంతో మేము ట్రాఫిక్‌తో ఇబ్బంది పడకుండా ఇంటికి వచ్చేసాము. సర్జరీకి ముందు డాక్టర్లు 15 రోజులలో నాకు నయమవుతుందని చెప్తే నాకు నమ్మబుద్ధికాక వాళ్ళు అలాగే చెప్తారని, "బాబా! నిజంగా 15 రోజులలో నాకు నయమైతే నా అనుభవాలు బ్లాగులో పంచుకుంటాను" అని బాబాకి మ్రొక్కుకున్నాను. బాబా దయవల్ల నిజంగానే నాకు 15 రోజులలో నయమైంది. "ధన్యవాదాలు బాబా. ప్రతిసారీ నాకు ఇంత అండగా ఉండే మీరు ఒక పెద్ద విషయంలో మాత్రం నా కోరిక తీర్చడం లేదు. అది కూడా త్వరగా జరిగేలా అనుగ్రహించండి బాబా".

---