సాయిభక్తుల అనుభవమాలిక 1623వ భాగం....

---

ఈ భాగంలో అనుభవాలు:

1. బాబా దయతో ఆరోగ్యం

2. బాబా దయ

---

బాబా దయతో ఆరోగ్యం

సాయిభక్తులందరికీ నమస్కారం. నా పేరు వెంకటేష్. 2023, జూలై 18న ఉదయం నుండి నాకు కడుపునొప్పిగా ఉండటంతోపాటు విరోచనాలు అవుతుంటే టాబ్లెట్లు వేసుకొని డ్యూటీ చేసాను. ఆరోజు సాయంత్రం డ్యూటీ పూర్తి చేసుకొని ఇంటికి వచ్చేసరికి జ్వరం, ఒప్పునొప్పులు, చలి, నీరసంగా అనిపించింది. నేను టాబ్లెట్లు వేసుకొని, "బాబా! నాకు నయమై రేపు డ్యూటీకి వెళ్లాలా దయచూపు తండ్రీ" అని బాబాకి చెప్పుకొని పడుకున్నాను. తర్వాత మా పాప, "నాన్నా! ఈ ఊదీ నీళ్ళు త్రాగు" అని ఊదీ నీళ్ళు ఇచ్చింది. నేను అవి త్రాగి పడుకున్నాను. రాత్రి 11 గంటలప్పుడు నా ఒళ్ళంతా అలర్జీలా వచ్చి గుచ్చుకుంటున్నట్లు అనిపించింది. ఆ సమయంలో చుట్టుపక్కల మశూచి(అమ్మవారు) ఉన్నందువల్ల నాకు భయమేసి, "బాబా! నాకు అవేమీ లేకుండా చూడు తండ్రీ. మీ అనుగ్రహాన్ని మీ బ్లాగులో పంచుకుంటాని" అని బాబాను ప్రార్థించాను. బాబా దయవలన గుచ్చుకోవడం, జ్వరం, ఒళ్లునొప్పులు మొదలైన అన్నీ తగ్గాయి. దాంతో నేను సంతోషంగా ఆఫీసుకి వెళ్ళాను. "ధన్యవాదాలు సాయి".

మాకు 8 నెలల వయసున్న బాబు ఉన్నాడు. తను మాకు బాబా వరప్రసాదం. 2023, జూలై 21న నేను డ్యూటీ నుంచి ఇంటికి వచ్చేసరికి బాబు డల్‌గా ఏడుస్తున్నాడు. సరేనని ఎత్తుకుంటే వాడి ఒళ్ళు, తల వేడిగా వున్నాయి. మా ఇంటి యజమాని RMP డాక్టర్. అతను టెంపరేచర్ చెక్ చేస్తే, 102 డిగ్రీల జ్వరం ఉంది. నేను వెంటనే, "బాబా! బాబుకి జ్వరం తగ్గేలా చూడు తండ్రీ" అని బాబాను ప్రార్థించాను. మరుసటిరోజు ఉదయం బాబుని నా భార్యతో గుంటూరులోని డాక్టర్ దగ్గరకి పంపాను. డాక్టరు చెక్ చేసి, "రెండు రోజులకి మందులు ఇస్తున్నాను. వీటిని వాడి తగ్గకపోతే మళ్ళీ రండి" అని అన్నారు. నేను, "సాయినాథా! బాబుకి తగ్గితే మీ అనుగ్రహం 'సాయి మహారాజ్ సన్నిధి' బ్లాగులో పంచుకుంటాను" అని మొక్కుకున్నాను. బాబా దయవలన బాబుకి జ్వరం తగ్గిపోయింది. తర్వాత బాబు శరీరంపై ఎర్రటి దద్దుర్లు వచ్చాయి. ఆ సమయంలో పిల్లలకు అమ్మవారు పోస్తున్నందున నాకు భయమేసి, "బాబా! మీ దయతో బాబుకి అమ్మవారు రాకుండా వుంటే తోటి భక్తులతో పంచుకుంటాను" అని అనుకున్నాను. తర్వాత మా పెద్దమ్మని పిలిచి చూపిస్తే, "అది అమ్మవారు కాదులే" అన్నారు. "చాలా చాలా ధన్యవాదాలు సాయి".

---

 బాబా దయ

సాయిభక్తులకు నా హృదయపూర్వక నమస్కారం. నా పేరు భవాని. నాకు ఇద్దరు బాబులు. పెద్దవాడిక ఐదు సంవత్సరాలు. చిన్నవాడికి రెండు సంవత్సరాలు. 2023, మేలో పెద్దబాబుకి జాండీస్ వచ్చి 15 రోజులకి తగ్గింది. తర్వాత 2023, జూలై 8న చిన్నబాబుకి కూడా జాండీస్ పాజిటివ్ వచ్చింది. డాక్టర్, "జాండీస్ పెరిగాక తగ్గుతుంది" అని చెప్పారు. నేను అప్పుడు, "బాబా! చిన్నబాబుకి జాండీస్ పెరగకుండా తగ్గిపోవాలి. మళ్ళీ డాక్టరు దగ్గరకి వెళ్ళినప్పుడు టెస్ట్ అవసరం లేకుండానే జాండీస్ తగ్గాయని చెప్పేలా చేయండి" అని బాబాని వేడుకున్నాను. తర్వాత జూలై 14న మేము డాక్టర్ దగ్గరకి వెళ్ళాము. అప్పుడు డాక్టర్ టెస్టు అవసరం లేకుండానే జాండీస్ తగ్గాయని చెప్పారు. బాబా దయవల్లనే 15 రోజులకి తగ్గాల్సిన జాండిస్ 5 రోజుల్లోనే తగ్గిపోయాయి.

2023, జూలై 15న మా నాన్న ఆరోగ్యం బాగా లేకపోతే నాన్నని తీసుకొని ఆటోలో హాస్పిటల్‌కి ఆటోలో బయలుదేరాము. దారిలో ఆటో సాయిబాబా గుడి ముందుగా వెళ్తున్నప్పుడు నేను మనసులో బాబాని తలుచుకొని దణ్ణం పెట్టుకున్నాను. అదే సమయంలో మేము వెళ్తున్న ఆటో టైర్ ఊడిపోయింది. కానీ బాబా దయవల్ల మాకెవరికీ ఏమీ కాలేదు. "చాలా చాలా ధన్యవాదాలు బాబా".

---