సాయిభక్తుల అనుభవమాలిక 1632వ భాగం....

---

ఈ భాగంలో అనుభవాలు:

1. బాబా దయతో మంచి ప్యాకేజీతో ఉద్యోగం

2. ఎంబ్రియో ట్రాన్స్ఫర్ అయ్యేలా దయచూపిన బాబా

---

బాబా దయతో మంచి ప్యాకేజీతో ఉద్యోగం

సాయిబంధువులందరికీ నా నమస్కారాలు. నా పేరు నందిత. నేను మా తల్లిదండ్రులకి మొదటి సంతానాన్ని. నాకు ఇద్దరు చెల్లెళ్ళు, ఒక తమ్ముడు ఉన్నారు. మాది మధ్య తరగతి కుటుంబం. నాన్న వ్యవసాయం చేస్తారు. అమ్మ గృహిణి. నాన్న నలుగురు పిల్లల్ని చదివించాలని చాలా కష్టపడుతుంటే, "అమ్మాయిలకి చదువు ఎందుకు? పెళ్లి చెయ్యండి" అని బంధువులు, కుటుంబసభ్యులు అంటుండేవారు. మా నాన్న మాత్రం కూతురైనా, కొడుకైనా వాళ్లకు మనం ఇవ్వగలిగింది చదువు ఒకటే అని అనుకునేవారు. అందుచేతనే ఎంతమంది చెప్పినా ఎవరి మాట వినకుండా నన్ను బి.టెక్‌లో జాయిన్ చేసారు. నేను బి.టెక్ రెండవ సంవత్సరంలో వున్నప్పుడు నాన్నకి కోవిడ్ వచ్చి హాస్పిటల్లో చేరారు. బాబా ఆశీస్సులతో నాన్నకి నయమై ఇంటికి వచ్చారుగాని, హాస్పిటల్ బిల్లుల కారణంగా మాకు అప్పులు పెరిగాయి. నేను బాగా చదువుతానని నా తల్లిదండ్రులకి నా మీద చాలా నమ్మకం. చూస్తుండగానే నేను ఫైనల్ ఇయర్‌కి వచ్చాను. కానీ నాకు ఉద్యోగం రాలేదు. నా తల్లిదండ్రులు నాపై పెట్టుకున్న నమ్మకం వల్లనో లేక నాపై ఉన్న బాధ్యతలు వల్లనో తెలీదుకానీ నాకు ఉద్యోగం రావట్లేదని నేను చాలా ఒత్తిడికి లోనయ్యాను. అలాంటి సమయంలో నేను రెండు కంపెనీలలో సెలెక్ట్ అయ్యాను. కానీ తక్కువ ప్యాకేజీ(జీతం). మా ఇంట్లో ఉన్న సమస్యల వల్ల నాకు ఆ ప్యాకేజీ సరిపోదనిపించి, "బాబా! ఇంకా మంచి ప్యాకేజీతో మంచి ఉద్యోగం రావాలి" అని బాబాని అడిగాను. బాబా దయవలన మంచి ప్యాకేజీ ఆఫర్ చేసే క్యాప్‌జెమినీ అనే సాఫ్ట్‌వేర్ కంపెనీలో నాకు ఇంటర్వ్యూ షెడ్యూల్ అయింది. అంతకుముందు రెండు ఇంటర్వ్యూలకి వెళ్ళినప్పుడు నేను నా ప్రతిభను 100% ప్రదర్శించి ఖచ్చితంగా నాకు ఉద్యోగం వస్తుందనుకున్నాను, అలానే వచ్చింది కూడా. కానీ ఈసారి ఇంటర్వ్యూలో నేను ఎందుచేతనో అంత బాగా నా ప్రతిభను ప్రదర్శించలేకపోయాను. సగటున 80% మాత్రమే చేయగలిగానని డల్ అయిపోయాను. నాకు ఆ ఉద్యోగం వస్తుందన్న నమ్మకం లేక, "నాకు ఈ ఉద్యోగం చాలా అవసరమని మీకు తెలుసు కదా బాబా! ఎలాగైనా నాకు ఈ ఉద్యోగం వచ్చేలా చేయి బాబా. మీ అనుగ్రహం బ్లాగు ద్వారా తోటి సాయి భక్తులతో పంచుకుంటాను" అని బాబాకి చెప్పుకున్నాను. తర్వాత కొన్ని రోజులకి నేను సెలెక్ట్ అయ్యానని క్యాప్‌జెమినీ కంపెనీ నుండి మెయిల్ వచ్చింది. అది చూసిన నాకు ఎంత సంతోషంగా అనిపించిందో మాటల్లో చెప్పలేను. ఇది బాబా ఆశీస్సులతోనే సంభవమైందని నేను గట్టిగా నమ్ముతున్నాను. "థాంక్యూ బాబా. థాంక్యూ సో మచ్..!!".

---

ఎంబ్రియో ట్రాన్స్ఫర్ అయ్యేలా దయచూపిన బాబా

బాబా భక్తులకు నా నమస్కారములు. నేను ఈమధ్యనే బాబాని నమ్ముకున్నాను. నేను ivf చికిత్స చేయించుకుంటున్నాను. ఒకరోజు ఫైనల్ స్కాన్ చేసి ఆ రిపోర్టు ఆధారంగా ఎంబ్రియో ట్రాన్స్ఫర్ చేయాలా, వద్దా అన్నది నిర్ధారణ చేస్తారనగా నేను ఆరోజు ఉదయం నుండి ఎంబ్రియో ట్రాన్స్ఫర్ అవుతుందో, లేదో అని ఒకటే టెన్షన్ అనుభవించాను. అప్పుడు బాబా ఊదీ నీళ్లలో కలుపుకొని తాగి, "బాబా! మీ మీద భారం వేస్తున్నాను" అని బాబాతో చెప్పుకున్నాను. అప్పటికి నా టెన్షన్ తగ్గింది. కానీ స్కానింగ్ చేసే గదికి వెళ్ళాక డాక్టర్ చెప్పింది విన్నాక నాకు ఈ నెలలో ఎంబ్రియో ట్రాన్స్ఫర్ జరగదనిపించింది. అంతే, ఒక్కసారిగా నాకు ఏడుపొచ్చింది. తర్వాత డాక్టరు పిలుపుకోసం ఎదురుచూస్తుంటే, అందరినీ పిలుస్తున్నారు కానీ నన్ను మాత్రం ఎంతకీ పిలువలేదు. అప్పుడు నేను, "బాబా! భారమంతా మీదే. అంత మంచి జరిగేలా చూడు" అని గట్టిగా బాబాను వేడుకున్నాను. సరిగ్గా అప్పుడే డాక్టర్ నన్ను పిలిచి, "ఎంబ్రియో ట్రాన్స్ఫర్ చేస్తాను. పెద్ద డాక్టర్ ఏం సమస్య లేదు. FET ప్రాసెస్‌కి వెళ్లొచ్చు అన్నారు" అని చెప్పి ప్రాసెస్ మొదలుపెట్టారు. "ధన్యవాదాలు బాబా! మీ దయవల్ల నాకు FET అయితే అయింది. ఫలితం కోసం వేచి చూస్తున్నాను బాబా. నీదే భారం. FET విజయవంతమై నేను గర్భవతినయ్యేలా చూడు బాబా".

---