సాయిభక్తుల అనుభవమాలిక 1637వ భాగం....

---

ఈ భాగంలో అనుభవాలు:

1. నమ్ముకున్న బిడ్డలకు ఏది సరైనదో బాబాకు తప్ప ఇంకెవరికి తెలుస్తుంది

2. ఐఐటి సీటు అనుగ్రహించిన బాబా

---

నమ్ముకున్న బిడ్డలకు ఏది సరైనదో బాబాకు తప్ప ఇంకెవరికి తెలుస్తుంది

ఓంసాయి శ్రీసాయి జయజయసాయి!!! సాయిభక్తులందరికీ నమస్కారములు. నా పేరు శ్రీలక్ష్మీ. సాయి నా జీవితంలో చేసిన అద్భుతాలు అనేకం. వాటిలో ఒకటి మీతో పంచుకోవాలనుకుంటున్నాను. మా బాబు పదవ తరగతిలో స్కూల్ ఫస్ట్ వచ్చాడు. తనకి ఐఐఐటి చదవాలని కోరిక. అది నాకు ఇష్టం లేదు. ఎందుకంటే, మాకు దూరంగా హాస్టల్లో ఉండి చదువుకోవాలి. అయినప్పటికీ వస్తే వస్తుంది, లేకపోతే లేదని మా బాబు ఐఐఐటికి అప్లై చేశాడు. తర్వాత ఐఐఐటి కాలేజీవాళ్ళు సెలెక్ట్ అయినవాళ్ల లిస్ట్ పెట్టినప్పుడు అందులో మాబాబు పేరు ఉందేమోనని చూస్తే, లేదు. దాంతో మా బాబు, 'నేను మామూలు కాలేజీలో చదవను' అని చాలా బాధపడ్డాడు. "నేను ఐఐఐటిలోనే చదువుతాన"ని పట్టుపట్టాడు. దాంతో మావారు తెలిసినవాళ్ళ ద్వారా అయిన వస్తుందేమోనని ప్రయత్నించసాగారు. నేను మా బాబు బాధ చూడలేక, "బాబా! మీ దయతో మా బాబుకి ఐఐఐటిలో సీటు వేస్తే, మీ అనుగ్రహాన్ని బ్లాగు ద్వారా తోటి సాయిభక్తులతో పంచుకుంటాన"ని సాయిని వేడుకున్నాను. అప్పుడు సాయిబాబా చేసిన అద్భుతం చూడండి!

నేను అలా వేడుకున్న వెంటనే మా బాబు ఫ్రెండ్,  'ఒంగోలు ఐఐఐటిలో సీటు వచ్చిందిగా' అని మెసేజ్ చేసాడు. మా బాబు తన ఫ్రెండ్‌కి సీటు వచ్చిందనుకొని కంగ్రాట్స్ అని విష్ చేశాడు. అందుకు ఆ అబ్బాయి, 'నీకు ఒంగోలు ఐఐఐటిలో సీటు వచ్చిందిగా, కాంగ్రాట్స్' అని విష్ చేస్తూ రిప్లై ఇచ్చాడు. మాకు అర్థం కాలేదు. మా బాబు, 'నాకు సీటు రాలేదు' అని తన ఫ్రెండ్‌తో చెప్పాడు. ఆ అబ్బాయి, 'నీకు సీటు వచ్చింది. నీ పేరు ఒంగోలు క్యాంపస్‌లో చూశాను' అని చెప్పాడు. అప్పుడు మేము మళ్లీ ఒంగోలు ఐఐఐటి క్యాంపస్‌లో వెతికితే మా బాబు పేరు ఉంది. అంతా ఆ సాయి లీలే. మా బాబు చాలా ఆనందపడ్డాడు. అయితే మాకు నూజివీడు క్యాంపస్ దగ్గర. అందువల్ల నేను సాయిని, "నూజివీడు క్యాంపస్‌లో వచ్చేలా దయ చూపండి బాబా" అని అనుకున్నాను. తర్వాత కాలేజీవాళ్ళు క్యాంపస్ చేంజ్ కోసం మెసేజ్ పెట్టారు. మా బాబు నూజివీడు క్యాంపస్‌కి అప్లై చేశాడు. కాని క్యాంపస్ చేంజ్ కాలేదు. మేము కొంత బాధపడినప్పటికీ తప్పనిసరై బాబుని ఒంగోలు క్యాంపస్‌లో జాయిన్ చేశాం. తరువాత నూజివీడు క్యాంపస్‌లో కన్నా ఒంగోలు క్యాంపస్‌లో చదువు బాగుందని తెలిసింది. అందుకే బాబా మా బాబు క్యాంపస్‌ మార్చలేదేమోనని అనిపించింది. ‌‌‍"ధన్యవాదాలు సాయిబాబా. మిమ్మల్నే నమ్ముకున్న మీ బిడ్డలకు ఏది సరైనదో మీకు తప్ప ఇంకెవరికి తెలుస్తుంది బాబా? మీకు శతకోటి వందనాలు. మీ చల్లని దీవెనలు మా అందరిపై ఎల్లప్పుడూ ఇలాగే ఉంచండి బాబా".

---

ఐఐటి సీటు అనుగ్రహించిన బాబా

అఖిలాండకోటి బ్రహ్మండనాయక రాజాథిరాజ యోగిరాజ పరబ్రహ్మ శ్రీ సచ్చిందానంద సద్గురు సాయినాథ్ మహారాజ్ కి జై!!!

సాయిబాబా పాదపద్మములకు నమస్కారాలు. నా పేరు రాంబాబు. మాది విజయవాడ. మా అబ్బాయి పేరు కృష్ణకౌశిక్. ఇంటర్ రెండవ సంవత్సరం పూర్తిచేసి JEE మెయిన్స్, JEE అడ్వాన్స్‌కు ప్రిపేరు అవుతున్నాడు. నేను ఎప్పుడైనా ఏదైనా పని చేయాలనుకుంటే బాబా ముందు చీటీలు వేసి అడిగి చేస్తాను. మా బాబు చదువు విషయంలో కూడా "బాబుకి ఐఐటి సీటు వస్తుందా బాబా?" అని అడిగి బాబా ఫోటో ముందు చీటీలు వేస్తే, 'వస్తుంది' అని వచ్చింది. నేను 'అదెలా సాధ్యం? బాబు యావరేజ్ స్టూడెంట్ కదా!' అని అనుకున్నాను. కానీ బాబాపై నమ్మకంతో వస్తుందని ఆశగా పరీక్షల వరకు ఎదురుచూసాను. బాబు పరీక్షలు రాసొచ్చి బాగా వ్రాసానని చెప్పాడు. తర్వాత వెలువడిన ఫలితాల్లో మా బాబుకి ఐఐటిలో సీటు వచ్చింది. నాకు తెలుసు, 'ఇది బాబా చేసిన అద్భుతమ'ని. 'ఇది ఆయన ప్రసాదించిన సీటు అని నేను గట్టిగా నమ్ముతున్నాను. "బాబా! ఒక నార్మల్ స్టూడెంట్‌కి ఐఐటిలో సీటు రావడం మీరు చేసిన అద్భుతం తండ్రీ. శతకోటి వందనాలు బాబా. తొందరగా శిరిడీ దర్శించే భాగ్యం మాకు కలిగించు తండ్రీ".

---