సాయిభక్తుల అనుభవమాలిక 1638వ భాగం....

---

ఈ భాగంలో అనుభవాలు:

1. బాబానే దిక్కు

2. సాయి కృప

---

బాబానే దిక్కు

సాయిబంధువులకు నా నమస్కారాలు. నా పేరు కుమారి. మా అన్నయ్యవాళ్ల పాపకి పుట్టినప్పటినుండి ఆరోగ్యం బాగాలేదు. తరచూ తనకి చాలా ఆరోగ్య సమస్యలు వస్తూ ఉండేవి. గత సంవత్సరంలో ఒకరోజు హఠాత్తుగా తనకి జ్వరం వచ్చి, దాంతోపాటు ఫీట్స్ వచ్చాయి. దాదాపు 30 నిముషాల వరకు తను స్పృహలో లేదు. తనని హాస్పిటల్‌కి తీసుకొని వెళ్ళాముకానీ, ఆరోజు ఆదివారం అవ్వడం వల్ల  డాక్టర్లు లేరు. అయినప్పటికీ పాపని అడ్మిట్ చేసుకొని నర్స్ చికిత్స చేసింది. తరువాత డాక్టరు వచ్చి, పాపని చూసి, "బ్లడ్ ఇన్ఫెక్షన్ అయింది. ఒక ఐదు రోజులు హాస్పిటల్లో ఉండాల"ని చెప్పారు. ఒకరోజు అంతా పాపని ఐసీయూలో ఉంచారు. మా అన్నయ్య దగ్గర డబ్బులు లేక అప్పు చేసి మరీ ట్రీట్మెంట్ చేయించసాగాడు. బ్లడ్ టెస్ట్ వ్రాస్తే, టెస్టు చేయించాము. రిపోర్టులో ప్రాబ్లం ఏమీ లేదని వచ్చింది. దాంతో ఫీట్స్ వచ్చిన కారణంగా బ్రెయిన్‌లో ప్రాబ్లం ఉందేమోనని బ్రెయిన్ స్కాన్ వ్రాశారు. అప్పుడు మా అందరికీ భయమేసింది. నేను, "చిన్నపిల్ల బాబా. తన బాధ చూడలేకపోతున్నాను" అని నా బాధంతా బాబాతో చెప్పుకున్నాను. తర్వాత బాబా  మీద భారమేసి బ్రెయిన్ స్కాన్ చేయించారు. బాబా దయవల్ల రిపోర్టు నార్మల్ వచ్చింది. బాబాకి ధన్యవాదాలు చెప్పుకొని, "హాస్పిటల్ బిల్ కట్టడం అన్నయ్యవాళ్లకి కష్టంగా ఉంది బాబా. తొందరగా పాపని ఇంటికి పంపేలా చూడండి. మీ దయతో తను బాగుండాలి బాబా" అని బాబాకి చెప్పుకున్నాను. రెండు రోజుల తర్వాత డాక్టరు, "మళ్లీ టెస్టు చెందాం. రిపోర్టులు నార్మల్ వస్తే ఇంటికి పంపిస్తాం" అన్నారు. నేను, "బాబా! టెస్టు రిపోర్టు నార్మల్ రావాలి. పాపని ఇంటికి పంపించాలి" అని బాబాకి చెప్పుకున్నాను. బాబా దయవల్ల ఆరోజు సాయంత్రం నార్మల్ అని రిపోర్టులు వచ్చాయి. డాక్టరు, "రేపు ఉదయం పంపిస్తాం" అన్నారు. మరుసటిరోజు గురువారం కావడంతో నాకు చాలా సంతోషంగా అనిపించింది. కానీ హాస్పిటల్ బిల్ కట్టడానికి డబ్బులు లేవు. బిల్ కడితేనే పాపని ఇంటికి పంపిస్తారు. మాకు ఏం చేయాలో అర్థం కాలేదు. ఆ సమయంలో నేను, "ప్లీజ్ బాబా, ఈరోజు ఎలాగైనా ఇంటికి వెళ్ళాలి. డబ్బు సర్దుబాటు అయ్యేలా చేయండి సాయి" అని బాబాని వేడుకున్నాను. బాబా దయవల్ల సాయంత్రం వేరే వాళ్ళు డబ్బు ఇవ్వడంతో పాప ఇంటికి వచ్చేసింది. సాయిబాబాకి చాలా చాలా ధన్యవాదాలు చెప్పుకున్నాను. "పాప ఆరోగ్యం బాగుండేలా మీరే చూసుకోవాలి బాబా. అమ్మ ఆరోగ్యం కూడా అస్సలు బాగుండట్లేదు. మీరే మాకు దిక్కు బాబా. నా కష్టం మీకు తెలుసు, సహాయం చేయండి బాబా. నాకు మీరు తప్ప ఎవరూ లేరు. నిన్ను నమ్మినవాళ్ళకి ఎప్పుడూ తోడుగా ఉండు బాబా".

ఓంసాయి శ్రీసాయి జయజయసాయి!!!

---

సాయి కృప

నేను ఒక సాయిభక్తురాలిని. సాయి కృపతో ఈమధ్య మావారికి మంచి ఉద్యోగం వచ్చింది. కానీ మావారు చిన్న విషయాలకే చిరాకు పడి ఉద్యోగం వదిలేస్తుంటారు. ఇంతకు ముందు అలా చాలాసార్లు జరిగింది. ఇప్పుడు సాయి దయతో మళ్ళీ కొత్త ఉద్యోగంలో చేరారు. కానీ ఏదో ఒక విషయంగా మానేస్తానంటారని భయపడ్డాను. నేను భయపడినట్లే ఆఫీసులో ఎవరో ఏదో అన్నారని ఉద్యోగం వదిలేస్తాననడం మళ్ళీ మొదలుపెట్టారు. నాకు చాలా అభద్రతగా అనిపించి, "బాబా! ఈ సమస్య ముగిసిపోయేలా చేయండి. ఆయన ప్రశాంతంగా ఉద్యోగం చేసేలా చూడండి" అని బాబాను ప్రార్థించాను. అంతే, రెండు రోజుల్లో మావారు నార్మల్ అయ్యారు. కానీ నాకు ఎప్పుడూ ఈ టెన్షన్ ఉంటుంది. "బాబా! దయచేసి నాకు సహాయం చేయండి". 

కొన్నాళ్ల క్రితం సర్జరీ అయిన నా కుడిచెవిలో ఈమద్య హఠాత్తుగా నొప్పి మొదలైంది. ఏవో ఇయర్ డ్రాప్స్ వేసుకున్నా 3 రోజులు వరకు తగ్గలేదు. ఇక అప్పుడు, "బాబా! నా చెవి నొప్పి తగ్గితే, మీ అనుగ్రహం బ్లాగు ద్వారా తోటి సాయి భక్తులతో పంచుకుంటాను" అని అనుకున్నాను. విచిత్రంగా అప్పటినుండి చెవినొప్పి పూర్తిగా తగ్గిపోయింది. "నా జీవితంలో ఎన్నో అద్భుతాలు చేసిన మీకు శతకోటి వందనాలు బాబా".

---