ఈ భాగంలో అనుభవాలు:
1. మ్రొక్కుకున్నంతనే ప్రతి సమస్యని పరిష్కరిస్తున్న బాబా
2. బాబా అనుగ్రహం
3. కనిపించకుండాపోయిన రెండు ఉంగరాలను తిరిగి అప్పగించిన బాబా
మ్రొక్కుకున్నంతనే ప్రతి సమస్యని పరిష్కరిస్తున్న బాబా
సాయిభక్తులందరికీ నమస్కారం. నేనొక సాయిభక్తురాలిని. నా జీవితంలో వచ్చిన ప్రతి సమస్యలోనూ బాబా నాకు తోడుగా ఉన్నారు. నాకు ఏ సందేహం వచ్చినా బాబా నాకు ఏదో రూపంలో సమాధానమిస్తారు. ఒకరోజు నేను స్కూటీపై వెళుతుండగా అనుకోకుండా స్కూటీతో సహా క్రింద పడిపోయాను. స్కూటీ రిపేరుకు వచ్చింది. మెకానిక్ దగ్గర చూపిస్తే, ‘రిపేర్ చేయడానికి 15,000 రూపాయలు ఖర్చవుతుంద’ని అన్నాడు. దాంతో నాకు చాలా బాధవేసి, “బాబా! ఇప్పటికే అప్పులతో సతమతమవుతున్నాము. ఇప్పుడు స్కూటీ రిపేర్ కోసం 15 వేల రూపాయలు ఎక్కడినుండి తీసుకురావాలి బాబా?” అంటూ బాబా ముందు కూర్చుని చాలా ఏడ్చాను. తరువాత, “బాబా! మీ దయవల్ల 5 వేల రూపాయల లోపు స్కూటీ రిపేరవ్వాలి” అని బాబాను వేడుకున్నాను. బాబా దయవల్ల 2,500 రూపాయలకే స్కూటీ రిపేర్ అయింది. “థాంక్యూ బాబా!”
2022, మార్చ్ నెల మధ్య నుండి సుమారు నెలరోజుల వరకు నా భుజాలు, చేతులు చాలా నొప్పి పెడుతుండేవి. ఆ కారణంగా నాకు పడుకోవడానికి చాలా ఇబ్బందిగా ఉండేది. ‘ఎందుకిలా ఇంతలా నొప్పిపెడుతున్నాయి?’ అని ఆలోచిస్తే, ‘ఫోన్లో గేమ్ ఎక్కువగా ఆడటం వల్లనేమో’ అని నా మనసులో అనుమానం వచ్చింది. నాకు వచ్చిన అనుమానం నిజమో కాదో తెలుసుకుందామని నేను బాబాకు నమస్కరించుకుని, “బాబా, నాకు వచ్చిన అనుమానం నిజమే అయితే ఈరోజు శేజ్ ఆరతిలో మీరు గ్రీన్ కలర్ డ్రెస్సులో దర్శనమివ్వండి” అని అనుకున్నాను. ఆరోజు బాబా గ్రీన్ కలర్ డ్రెస్సులో దర్శనమిచ్చారు. దాంతో, నా అనుమానం నిజమేనని బాబా చెబుతున్నారని రూఢి చేసుకుని, బాబాకు నమస్కరించుకుని, “బాబా! మీ దయవల్ల నేను ఫోనులో గేమ్ ఆడడం తగ్గించాలి. చేతులు, భుజాలు నొప్పి తగ్గి నేను హుషారుగా పనిచేసుకోవాలి” అని బాబాను వేడుకున్నాను. ఆ తరువాత బాబా దయవల్ల నేను ఫోన్ చూడటం, గేమ్ ఆడటం తగ్గిపోయింది. చేతులు, భుజాల నొప్పులు కూడా చాలావరకు తగ్గిపోయాయి. “ధన్యవాదాలు బాబా”
మావారికి ఇదివరకు ఒకసారి కంటికి కురుపు రావడంతో తనకు ఆపరేషన్ అయింది. ఇటీవల మళ్ళీ ఇంకొక కురుపు వచ్చింది. దాంతో, మళ్ళీ తనకు ఆపరేషన్ చేయాల్సివస్తుందేమోనని భయపడి నేను బాబాకు నమస్కరించుకుని, “బాబా! మీ దయవల్ల ఏ సమస్యా లేకుండా కురుపు పగిలిపోవాలి” అని బాబాను వేడుకున్నాను. నేను అలా బాబాకు వేడుకున్నరోజు సాయంత్రం ఆ కురుపు పగిలిపోయింది. బాబా చూపిన కరుణకు ఎంతో ఆనందంతో బాబాకు మనసారా కృతజ్ఞతలు తెలుపుకున్నాను.
నాకు చాలా సంవత్సరాలనుండి మూత్రాశయం దగ్గర దురద వస్తోంది. ఎన్నో హాస్పిటల్స్ తిరిగి ఎంతోమంది డాక్టర్లను సంప్రదించాను. వాళ్ళిచ్చిన మందులు వాడాను. అయినా దురద తగ్గలేదు. పైగా ఒళ్ళంతా కూడా దురద వస్తుండేది. ఆ దురద భరించలేక ఒకరోజు బాబాకు నమస్కరించుకుని, “బాబా! మీ దయవల్ల దురద తగ్గిపోవాలి” అని చెప్పుకున్నాను. అంతే! బాబా అనుగ్రహంతో దురద చాలావరకు తగ్గిపోయింది. “ధన్యవాదాలు బాబా! మీ దయవల్ల ఇప్పుడు దురద అంతగా లేదు. మిగిలిన ఆ కొంచెం దురద కూడా తగ్గేలా చేయి తండ్రీ!”.
సర్వేజనాః సుఖినో భవంతు!!!
బాబా అనుగ్రహం
సాయి బంధువులకు నా నమస్కారాలు. నేను ఒక సాయి భక్తురాలిని. నేనిప్పుడు బాబా నాపై వర్షించిన అనుగ్రహాన్ని మీతో పంచుకుంటాను. 2022లో నా సర్టిఫికెట్స్ కోసమని నేను అదివరకు చదివిన కాలేజీకి వెళితే, కాలేజీవాళ్ళు కొన్నిరోజుల తర్వాత రమ్మన్నారు. నేను మళ్లీ 20 రోజుల తర్వాత వెళ్ళాను. అప్పుడు అక్కడ బాబా ఫోటో రూపంలో నాకు దర్శనం ఇచ్చారు. నేను బాబాకి నమస్కరించుకుని, "బాబా! ఏ ఇబ్బంది పెట్టకుండా నా సర్టిఫికెట్స్ నాకు ఇచ్చేలా అనుగ్రహించండి" అని బాబాని వేడుకున్నాను. బాబా దయవల్ల కాలేజీవాళ్ళు వెంటనే నా సర్టిఫికెట్స్ నాకు ఇచ్చేసారు. "థాంక్యూ సో మచ్ బాబా. మమ్మల్ని ఎల్లవేళలా కాపాడు తండ్రి".
కనిపించకుండాపోయిన రెండు ఉంగరాలను తిరిగి అప్పగించిన బాబా
నా పేరు మాలతి. నేను సాయినాథునికి నా శిరస్సు వంచి పాదాభివందనం చేస్తూ నా అనుభవం ఒకటి తోటి సాయిబంధువులతో పంచుకుంటున్నాను. 2022, ఏప్రిల్ 26న నా ఉంగరాలు రెండు కనిపించలేదు. ఇళ్ళంతా వెతికినా ప్రయోజనం లేకపోయింది. వాటిలో ఒకటి నా పెళ్లి ఉంగరం కాగా ఇంకొకటి మా అమ్మ ఇచ్చిన ఉంగరం. అమ్మ ఇప్పుడు లేరు. ఆమె బాబా చరిత్ర పారాయణ చేస్తూ వారి సన్నిధికి చేరుకుంది. ఆమె గుర్తుగా నాకు మిగిలింది ఆ ఉంగరం ఒక్కటే. అలాంటిది ఆ రెండు ఉంగరాలు కనిపించకపోయేసరికి నాకు చాలా బాధగా అనిపించింది. అయినప్పటికీ బాబా నేను వాటిని ఎక్కడ పెట్టానో, నాకు గుర్తు చేసి నాకు అప్పజెప్తారనే నమ్మకంతో "అవి దొరికేలా చూడమ"ని బాబాతో చెప్పుకున్నాను. తరువాత విచిత్రంగా ఆ రెండు ఉంగరాలు బాబా పాదాల చెంతనే కనిపించాయి. "ధన్యవాదాలు బాబా".
