సాయిభక్తుల అనుభవమాలిక 664వ భాగం.....

---

ఈ భాగంలో అనుభవాలు:

1. భారం బాబా మీద వేస్తే, అంతా ఆయన చూసుకుంటారు
2. ఎంత చెప్పినా బాబా ప్రేమ ముందు అన్నీ తక్కువే!

---

భారం బాబా మీద వేస్తే, అంతా ఆయన చూసుకుంటారు

సాయిభక్తురాలు అంజలి తనకు బాబా ప్రసాదించిన అనుభవాలను మనతో పంచుకుంటున్నారు.

నమస్తే! నా పేరు అంజలి. ముందుగా బాబాకు వేలవేల ప్రణామాలు. ఈ సాయి మహరాజ్ సన్నిధి బ్లాగ్ నిర్వహిస్తున్న సాయికి నా కృతజ్ఞతలు. ఈమధ్య నాకు కలిగిన అనుభవాలను మీతో పంచుకుంటున్నాను.

2020, డిసెంబరు నెల చివరిలో నా ఎడమకాలు బాగా నొప్పి పెట్టింది. బాబా ఊదీ రాసుకొని, "నొప్పి తగ్గితే, నా అనుభవాన్ని బ్లాగులో పంచుకుంటాన"ని అనుకున్నాను. బాబా దయవల్ల వెంటనే నొప్పి తగ్గింది. అయినప్పటికీ ఒక మూడుసార్లు బాబా ఊదీ కలిపిన నీళ్లు త్రాగాను. ఆ తర్వాత మా స్వస్థలానికి వెళ్లి చాలా హుషారుగా తిరిగాను. అప్పుడే నా అనుభావాన్ని బ్లాగులో పంచుకుందామనుకున్నానుగానీ, ఆలస్యమైంది. అంతలో మరలా ఆ నొప్పి మొదలయింది. "మీ బిడ్డను క్షమించండి బాబా. బ్లాగులో పంచుకుంటానని మాటిచ్చి వెంటనే పంచుకోలేదు. నన్ను క్షమించు బాబా. ఈ దీనురాలికి నీవే దిక్కు. నన్ను, నా కుటుంబాన్ని, ఇంకా అందరినీ చల్లగా చూడు తండ్రీ!"

మరో అనుభవం:

నేను ఇంతకుముందు పంచుకున్న ఒక అనుభవంలో బాబా నాతో శ్రీశైల దర్శనం ఎలా చేయించారో పంచుకున్నాను. నాకు డిసెంబరు 8న శ్రీశైలం వెళ్లాలని ఉన్నప్పటికీ డిసెంబరు 7నే వెళ్లేలా బాబా చేశారు. 'బాబా ఎందుకలా చేశారు? ఆయన ప్రణాళిక ఏదో ఉండే ఉంటుంది' అనుకొని అంతా ఆయనకే వదిలేసి డిసెంబరు 7న శ్రీశైలం వెళ్లి, దర్శనానంతరం అదేరోజు రాత్రి తిరిగి ఇంటికి వచ్చాము. ఇంటికి వచ్చాక డిసెంబరు 8న భారత్ బంద్ అని మాకు తెలిసింది. మేముండే ప్రాంతంలో బంద్ చాలా స్ట్రిక్ట్‌గా జరిగింది. దాదాపు సాయంత్రం వరకు రోడ్లు, హైవేలు అన్నీ బ్లాక్ అయ్యాయి. మా ఇంటి నుండి కేవలం 5 కిలోమీటర్ల దూరంలో ఉన్న మా ఆఫీసుకి కూడా నేను వెళ్లలేకపోయాను. మేము ఆరోజు శ్రీశైలం ప్రయాణం పెట్టుకునుంటే చాలా ఇబ్బందిపడేవాళ్లం. అందుకే బాబా మేము ముందురోజే శ్రీశైలం వెళ్లేలా చేశారు. భారం బాబా మీద వేస్తే, అంతా ఆయన చూసుకుంటారు. "ఈ అనుభవం కూడా పంచుకోవడం ఆలస్యమైంది. నన్ను క్షమించండి బాబా!"

ఇంకో చిన్న అనుభవం:

2020 డిసెంబరు నెల చివరివారంలో మావారికి, మా అబ్బాయికి జ్వరం వచ్చింది. నేను బాబాను తలచుకొని, "తెల్లవారేసరికి ఇద్దరికీ జ్వరం తగ్గిపోయేలా అనుగ్రహించమ"ని వేడుకున్నాను. తరువాత వాళ్ళిద్దరికీ మందులతో పాటు బాబా ఊదీ ఇచ్చాను. బాబా దయవల్ల ఇద్దరికీ తెల్లవారేసరికి పూర్తిగా నయమైంది. "బాబా! మీకు చాలా చాలా ధన్యవాదాలు". బాబా ప్రసాదించిన మరో అనుభవంతో మరలా మీ ముందుకు రావాలని కోరుకుంటున్నాను.

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్ధ సద్గురు సాయినాథ్ మహరాజ్ కీ జై!

ఓం సాయిరామ్!

---

ఎంత చెప్పినా బాబా ప్రేమ ముందు అన్నీ తక్కువే!

పేరు వెల్లడించని ఒక సాయిభక్తురాలు బాబా తమకు ప్రసాదించిన అనుభవాన్ని ఇలా పంచుకుంటున్నారు:

అఖిలాండకోటి బ్రహ్మాండనాయకునికి అభివందనాలు. ఈ బ్లాగ్ నిర్వాహకులకు వందనాలు. కరోనా కారణంగా ఏ ఇబ్బందీ లేకుండా మేమంతా ఇండియా వస్తే నా అనుభవాన్ని ఈ బ్లాగులో పంచుకుంటానని బాబాకు చెప్పుకున్నాను. బాబాకి పని అప్పజెప్పితే ఇక మనకు భయమేల? బాబా ఆజ్ఞతో అన్నీ చక్కగా జరిగాయి. ఎయిర్‌పోర్టులో మాకు ఎలాంటి ఇబ్బందీ కలుగలేదు. మేము క్వారంటైన్లో ఉండాల్సిన అవసరం లేకుండా, కస్టమ్స్‌కు సంబంధించిన ఇబ్బందులు ఏమీ ఎదురవకుండా సమయానికి అన్నీ బాబానే చూసుకున్నారు. ఇంటికి వచ్చిన తరువాత మా మనవడితో సహా అందరం సాయి రక్షణలో ఆరోగ్యంగా ఉన్నాము. ఫ్లైట్‌లో అయితే మాకు రాజభోగాలే. పన్నెడుమంది ఉండవలసిన ఒక బ్లాక్ మొత్తం మేము అయిదుగురం మాత్రమే ఉన్నాము. మేము ఉన్నది ఒక ప్రత్యేక కూపే, మాకు ఆతిథ్యమివ్వడానికి నలుగురు ఎయిర్ హోస్టెస్‌లు. ఇవన్నీ బాబా ఏర్పాట్లే. ఎంత చెప్పినా, ఎన్ని వ్రాసినా బాబా ప్రేమ ముందు అన్నీ తక్కువే. “బాబా! నేను ఏమైనా మర్చిపోతే నన్ను క్షమించు. ఏదైనా పంచుకోవాలనుకుని మర్చిపోయినా నీదే భారం బాబా!”

బాబా దయతో మా అబ్బాయి గ్రీన్ కార్డు ఫింగర్ ప్రింట్స్ కూడా అప్రూవ్ అయ్యాయి. చిన్నబ్బాయికి, కోడలికి బాబా దయతో వీసా స్టాంపింగ్ అవ్వాలని మనస్ఫూర్తిగా కోరుకుంటున్నాను. స్టాంపింగ్ వేసేది కూడా బాబానే. ఇంతకుముందు మాకు కొంతమంది పొలాలు, స్థలాలు, ఫ్లాట్లు, డబ్బు బాకీ ఉన్నారని పంచుకున్నాను కదా! బాబా దయవలన వాళ్ళందరూ ఇప్పుడిప్పుడే బాకీ తీర్చడానికి సిద్ధపడుతున్నారు. బాబా ఆశీస్సులతో పాటు మీ అందరి ఆశీస్సులు కూడా మాపై ఉండాలని కోరుకుంటున్నాను. 

త్వరలోనే మమ్మల్నందరినీ శిరిడీ రప్పించుకుని తమ దర్శనాన్ని అనుగ్రహించమని బాబాను మనసారా వేడుకుంటున్నాను. తిరుపతి, గాణ్గాపురం మొదలైన పుణ్యక్షేత్రాల దర్శనం కూడా ప్రసాదించమని బాబాను కోరుకుంటూ..

ఇట్లు..

బాబా పాదసేవకురాలు.

---