సాయిభక్తుల అనుభవమాలిక 647వ భాగం....

---

ఈ భాగంలో అనుభవాలు:

1. ఎన్ని ఇబ్బందులు వచ్చినా బాబా నామస్మరణ మాత్రం వదలకూడదు
2. సాయితండ్రి నా మొర విన్నారు
3. సాయి చాలాసార్లు రక్షణనిచ్చారు

---

ఎన్ని ఇబ్బందులు వచ్చినా బాబా నామస్మరణ మాత్రం వదలకూడదు 

బెంగుళూరు నుండి ఒక అజ్ఞాత సాయిభక్తురాలు తన అనుభవాలను మనతో పంచుకుంటున్నారు.

సాయిబంధువులందరికీ నా నమస్కారం. ఈ బ్లాగ్ నిర్వహిస్తున్నవారందరికీ నా నమస్కారాలు. నేను బెంగళూరులో నివసిస్తున్నాను. బాబా దయవల్ల నేను సాఫ్ట్‌వేర్ ఇంజనీరుగా ఉద్యోగం చేస్తున్నాను. ప్రతిరోజూ ఆఫీసుకి వెళ్ళి వచ్చాక మా ఇద్దరబ్బాయిల స్కూల్ విశేషాలు అడిగి తెలుసుకుంటూ, వాళ్ళను చదివిస్తూ ఉంటాను. బాబా దయవల్ల జీవితం సాఫీగా గడుస్తూ ఉండేది. ఒకరోజు ఆఫీసులో, “రాబోయే 6 నెలల్లో ఆఫీసును వేరేచోటికి తరలిస్తున్నామ”ని చెప్పారు. ఆఫీసును తరలించబోయే ప్రదేశం మా ఇంటికి చాలా దూరం. బెంగళూరు ట్రాఫిక్‌లో అంత దూరం ప్రయాణించాలంటే చాలా సమయం పడుతుంది. దాంతో నాకు చాలా బాధేసింది. కానీ, ఏదో నమ్మకం, ‘బాబా ఉన్నారు, చూసుకుంటారు’ అని. ఎప్పుడు సమయం దొరికినా సాయి నామాన్ని స్మరిస్తూ ఉండేదాన్ని. “నువ్వే దారి చూపించాలి తండ్రీ!” అంటూ బాబాను వేడుకునేదాన్ని. సరిగ్గా ఆఫీసు తరలించబోయే సమయానికి కరోనా కారణంగా లాక్‌డౌన్ మొదలైంది. నాకు ఇంటినుంచి పనిచేసే అవకాశం ఇచ్చారు ఆఫీసువాళ్ళు. సాయి చూపిన ప్రేమకు మనసులోనే సాయికి ఎన్నిసార్లు కృతజ్ఞతలు చెప్పుకున్నానో నేను. సాయిని తలచుకోగానే కన్నీళ్ళు వచ్చేవి. 

ఇటీవల ఒకసారి ఆర్థికంగా కొంచెం ఇబ్బంది వచ్చింది. అప్పుడు కూడా బాబాను తలచుకోగానే సహాయం చేశారు. తనను నమ్మినవారికి తానెప్పుడూ తోడుగా ఉంటానని బాబా నా విషయంలో ఎన్నోసార్లు ఋజువు చేశారు. నా అనుభవం ద్వారా నాకు తెలిసింది ఒక్కటే, ఎన్ని ఇబ్బందులు వచ్చినా బాబా నామస్మరణ మాత్రం వదలకూడదని. నేను ఎప్పుడూ బాబాను కోరుకునేది ఒక్కటే, “ఎన్ని ఇబ్బందులైనా, ఎన్ని కష్టాలైనా ఇవ్వు స్వామీ. కానీ, నీ నామస్మరణ మాత్రం నా చివరి ఊపిరి వరకు నా మనసులో నడిచేలా చూడు” అని. “నా అనుభవాన్ని పంచుకోవడం ఆలస్యమైనందుకు నన్ను క్షమించు బాబా. ఎల్లప్పుడూ అందరికీ తోడునీడగా ఉంటూ అందరినీ కాపాడాలని మనసారా కోరుకుంటున్నాను తండ్రీ! అందరికీ సాయిరాం!

---

సాయితండ్రి నా మొర విన్నారు

విశాఖపట్నం నుండి సాయిభక్తురాలు శ్రీమతి శ్రీలత తనకు బాబా ప్రసాదించిన అనుభవాన్ని మనతో పంచుకుంటున్నారు.

సాయి మహరాజ్ సన్నిధి బ్లాగ్ నిర్వహిస్తున్న సాయికి మరియు సాయిబంధువులందరికీ నా నమస్కారాలు. నా పేరు శ్రీలత. మేము విశాఖపట్నంలో నివసిస్తున్నాము. నాకు బాబాతో చాలా అనుబంధం ఉంది. బాబా నాకు ప్రసాదించిన అనుభవాలు ఎన్నెన్నో ఉన్నాయి. వాటిలో నుండి ఇటీవల బాబా చేసిన ఒక అద్భుతాన్ని ఇప్పుడు మీతో పంచుకోబోతున్నాను.

2020 సంవత్సరం, దీపావళిరోజు సాయంకాలం హఠాత్తుగా నాకు కొద్దిగా జ్వరం, జలుబు, దగ్గు, విపరీతమైన నీరసం వచ్చేశాయి. జ్వరం, జలుబు తగ్గటానికి రెండు రోజుల పాటు ఏవో మందులు వేసుకున్నాను. కానీ, కొంచెం కూడా తగ్గలేదు. దాంతో నన్ను డాక్టర్ దగ్గరకు తీసుకెళ్ళారు మావారు. డాక్టర్ నన్ను ముందుగా కోవిడ్ టెస్ట్ చేయించుకోమన్నారు. నాకు చాలా భయమేసింది. తరువాత కోవిడ్ టెస్ట్ కోసం శాంపిల్స్ ఇచ్చి ఇంటికి వచ్చాను. కానీ, భయంతో ఆ రాత్రి నాకు నిద్రపట్టలేదు. “సాయి తండ్రీ! కోవిడ్ టెస్ట్ రిపోర్టు నెగిటివ్ వచ్చేలా చేయండి” అని అనుక్షణం సాయిని వేడుకుంటూనే ఉన్నాను. నా సాయితండ్రి నా మొర విన్నారు. తన బిడ్డలు బాధపడుతుంటే చూడలేని నా సాయితండ్రి తన లీల చూపించారు. ఆ రాత్రి నా కోవిడ్ టెస్ట్ రిపోర్టు వచ్చింది. ఆశ్చర్యం! టెస్ట్ రిపోర్టు నెగిటివ్ వచ్చింది. ఎంతో సంతోషంతో బాబాకు మనసారా కృతజ్ఞతలు తెలుపుకున్నాను. కోవిడ్ పరీక్షలో నెగిటివ్ వచ్చినట్లయితే నా అనుభవాన్ని ఈ బ్లాగులో పంచుకుంటానని బాబాకు చెప్పుకున్నాను. “ఈ అనుభవాన్ని పంచుకోవడంలో ఆలస్యమైనందుకు నన్ను క్షమించండి బాబా! ఎల్లప్పుడూ ఇలానే మమ్మల్ని కాపాడు తండ్రీ. మాతోనే ఉండు, మాలోనే ఉండు. ఎల్లప్పుడూ నీ నామం జపించుకునేలా మమ్మల్ని ఆశీర్వదించు తండ్రీ. నీకు శతకోటి నమస్కారాలు తండ్రీ!”

---

సాయి చాలాసార్లు రక్షణనిచ్చారు

USA నుండి అజ్ఞాత సాయి భక్తురాలు తన అనుభవాన్నిలా పంచుకుంటున్నారు:

ఈ వైరస్ కాలంలో రక్షణ కోసం నేను "సాయి రక్షక శరణం దేవ" అను మంత్రాన్ని జపిస్తున్నాను. కరోనా వైరస్ మహమ్మారి కారణంగా ఆర్థిక సంక్షోభం ఏర్పడింది. దాంతో నేను, నా భర్త మా ఉగ్యోగాలను కోల్పోతామేమోనని భయపడ్డాము. మేము సచ్చరిత్ర చదివి, "మా ఉద్యోగాలను కాపాడమ"ని బాబాను వేడుకున్నాము. బాబా కృప చూపించారు. ఆఫీసు నుండి మావారికి ఫోన్ చేసి, "ఎటువంటి తొలగింపు చర్యలు తీసుకోవడం లేదని, అందుకు బదులుగా జీతంలో కొంత శాతాన్ని తగ్గిస్తున్నామ"ని చెప్పారు. ఇది ఖచ్చితంగా ఎంతో మంచి నిర్ణయం. ఆ వార్త విన్న తరువాత సంతోషంగా బాబా చేసిన లీలాకు కృతజ్ఞతలు చెప్పుకున్నాము.

ఈ వైరస్ సమయంలో ఒకసారి నా భర్త జ్వరంతో అనారోగ్యం పాలయ్యారు. నేను భయపడి బాబాను ప్రార్థించాను. ఆయన దయవలన జ్వరం తగ్గింది కానీ కొన్నిరోజులపాటు దగ్గు ఉంది. నేను బాబాను ప్రార్థించి, ఊదీ నీటిలో కలిపి ఇచ్చాను. దాంతో మావారు పూర్తిగా కోలుకున్నారు. "ధన్యవాదాలు బాబా".

నా సోదరి కుటుంబం తమ ఉద్యోగరీత్యా ఈ వైరస్ సమయంలో ప్రయాణించాల్సిన అవసరం ఏర్పడింది. ఆ ప్రయాణాన్ని తప్పించుకోలేని పరిస్థితి. అప్పుడు నేను, "వాళ్ళకి ఏ కష్టం లేకుండా రక్షించమ"ని బాబాను ప్రార్థించాను. 15 రోజులు విమానాల్లో ప్రయాణం చేసి, హోటళ్లలో ఉండి వచ్చిన తరువాత కూడా వాళ్ళు క్షేమంగా ఉన్నారు. బాబానే వాళ్ళని ఈ వైరస్ బారినుండి రక్షించారు. ఆయన ఎల్లప్పుడూ తన భక్తులను రక్షిస్తారు. మనం చేయవలసినది ఆయనపై విశ్వాసాన్ని కలిగి ఉండటమే.

source : http://www.shirdisaibabaexperiences.org/2020/04/shirdi-sai-baba-miracles-part-2704.html

---