సాయిభక్తుల అనుభవమాలిక 653వ భాగం.....

---

ఈ భాగంలో అనుభవాలు:

1. బాబా అనుగ్రహించుటలో లేదు ఆలస్యం
2. మాకు అన్నీ నువ్వే బాబా

---

బాబా అనుగ్రహించుటలో లేదు ఆలస్యం

సాయిభక్తురాలు శ్రీమతి అరుణ ఇటీవల బాబా తనకు ప్రసాదించిన అనుభవాలను మనతో పంచుకుంటున్నారు.

సాయిబంధువులకు నమస్కారం. నా పేరు అరుణ. నేను ఎప్పటినుంచో సాయిభక్తురాలిని. కానీ కొన్ని కారణాలవల్ల ఐదు సంవత్సరాలు బాబాకు దూరంగా ఉండిపోయాను. అయినా బాబా ప్రేమతో మళ్ళీ నన్ను అక్కున చేర్చుకున్నారు. బాబా నాకు చాలా అనుభవాలను ప్రసాదించారు. వాటిలో ఈమధ్యకాలంలో జరిగిన రెండు అనుభవాలను నేనిప్పుడు మీతో పంచుకోవాలనుకుంటున్నాను.

మొదటి అనుభవం:

2020, సెప్టెంబరులో 63 సంవత్సరాల వయస్సున్న మా మామయ్యగారికి కరోనా వచ్చి చాలా ప్రమాదకరంగా పరిణమించింది. ఆయన హాస్పిటల్లో ఉన్నన్ని రోజులు నేను పగలు, రాత్రి సాయిని ధ్యానిస్తూ ఉండేదాన్ని. బాబా ఎంతో దయచూపారు. బాబా దయవల్ల మామయ్యగారికి ప్రమాదకర పరిస్థితి తప్పింది. కానీ, కరోనా కారణంగా వచ్చిన ఇతరత్రా ఆరోగ్య సమస్యలు మామయ్యగారిని చాలా ఇబ్బందిపెట్టసాగాయి. అప్పుడు నేను, “మామయ్యగారి ఆరోగ్య సమస్యలు తగ్గుముఖం పడితే, ఈ అనుభవాన్ని బ్లాగులో పంచుకుంటాను” అని బాబాకు మొక్కుకున్నాను. అప్పటినుండి నెమ్మదిగా ఆ ఆరోగ్య సమస్యలు తగ్గుతూ వచ్చాయి. మామయ్యగారి ఆరోగ్యం కుదుటపడింది. “బాబా! మా మామయ్యగారిని నువ్వే కాపాడావని నేను మనస్ఫూర్తిగా నమ్ముతున్నాను. మమ్మల్ని ఎల్లప్పుడూ ఇలాగే కాపాడండి తండ్రీ! చాలా చాలా ధన్యవాదాలు బాబా!”

 

రెండవ అనుభవం:

ప్రస్తుతం నేను ఆరునెలల గర్భవతిని. 2020, డిసెంబరు మూడవ వారంలో నేను బాబా గురించి ఆలోచిస్తూ, “నాకు కాన్పు అయ్యాక త్వరగా మీ దర్శనానికి వచ్చేలా ఆశీర్వదించండి సాయీ” అని సాయిని కోరుకున్నాను. అదే సమయంలో, ‘ఎవరైనా శిరిడీ నుండి బాబా ఊదీ తెచ్చి నాకు ఇస్తే బాగుండు’ అని మనసులో అనుకున్నాను. తరువాత 2020, డిసెంబరు 22న నా మరదలు నా వద్దకు వచ్చి, “వదినా! నాకు ఒక కల వచ్చింది. అందులో మీరు ఊదీ తెచ్చివ్వమని అడుగుతున్నారు” అని చెప్పింది. ఆ నిమిషంలో నేను కేవలం ‘అవునా!’ అని ఊరుకున్నాను. ఆరోజు మంగళవారం. నా మరదలు సుబ్రహ్మణ్యేశ్వరస్వామికి అభిషేకించిన విభూతి తీసుకొచ్చి నాకిచ్చి వెళ్ళింది. అప్పుడు ‘మనసులో అనుకున్నదానికి, నేను ఊదీ అడుగుతున్నట్లు కలలో నా మరదలికి చూపించి, తరువాత తనచేత సుబ్రహ్మణేశ్వరస్వామికి అభిషేకించిన విభూతిని పంపించింది నా బాబానే!’ అనిపించి నా కళ్ళలో నీళ్ళు తిరిగాయి. కాన్పు అయ్యేలోపు ఊదీ ఇవ్వమని అడగటమే నా ఉద్దేశ్యం. కానీ బాబా వెంటనే నా కోరిక తీర్చారు. “చాలా చాలా ధన్యవాదములు బాబా! ఎప్పటినుంచో నాకు ఒక కోరిక ఉంది బాబా. అది కూడా తీరితే, ఆ అనుభవాన్ని కూడా ఈ సాయి మహారాజ్ సన్నిధి బ్లాగులో పంచుకుంటాను. సాయి తండ్రీ! మీ ఆశీస్సులు ఎప్పటికీ నాపై ఉండనివ్వండి. తెలిసీ తెలియక ఏమైనా తప్పులు చేసి ఉంటే క్షమించండి సాయీ!”

---

మాకు అన్నీ నువ్వే బాబా

పేరు వెల్లడించని ఒక సాయి భక్తురాలు తనకు బాబా ఇటీవల ప్రసాదించిన అనుభవాన్ని మనతో పంచుకుంటున్నారు:

 

ఓం సాయిరాం! ఈ బ్లాగ్ నిర్వహిస్తున్న సాయికి నా నమస్కారాలు. నేనొక చిన్న సాయిభక్తురాలిని. ఇటీవల నాకు కలిగిన ఒక చిన్న అనుభవాన్ని మీ అందరితో పంచుకుంటాను.

నేను ఇంట్లోనే ఒక చిన్న వ్యాపారం చేస్తున్నాను. నేను ఎవరివద్దనైతే వ్యాపారానికి సంబంధించిన సామగ్రిని కొనుగోలు చేస్తానో వారికి ఆన్‌లైన్‌లో డబ్బులు చెల్లిస్తుంటాను. ఒకసారి నాకు తెలియకుండానే ఒకతనికి కాస్త పెద్ద మొత్తాన్ని రెండుసార్లు చెల్లించాను. తనకు రెండుసార్లు డబ్బు చెల్లించినట్లు అతను నాకు మెసేజ్ చేశారు. నేను అదే మొదటిసారి అతని వద్ద కొనుగోలు చేయడం. దాంతో నేను అదనంగా చెల్లించిన డబ్బులు తిరిగి వస్తాయో రావోనని నాకు చాలా భయమేసింది. వెంటనే బాబాకు నమస్కరించుకుని, “బాబా! మీ అనుగ్రహంతో నా డబ్బు నాకు తిరిగి వస్తే నా అనుభవాన్ని బ్లాగులో పంచుకుంటాను” అని చెప్పుకున్నాను. వెంటనే అతను నా అకౌంటులో డబ్బు జమచేసి, ఒకసారి అకౌంట్ చూసుకోమని నాకు మెసేజ్ చేశారు. బాబాకు చెప్పుకున్న వెంటనే ఇలా జరిగింది. అంతా బాబా దయ. అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

మరొక అనుభవం:

ఒకసారి మా నాన్నగారికి ఆరోగ్యం దెబ్బతింది. డాక్టర్ దగ్గరికి తీసుకెళ్తే కొన్ని టెస్టులు చేయించమన్నారు. మేము ఆ టెస్టులన్నీ చేయించాము. తరువాత నేను బాబాకు నమస్కరించుకుని, నాన్నగారికి ఏ సమస్యా లేకుండా కాపాడమని, రిపోర్టులన్నీ నార్మల్‌గా వచ్చేలా చూడమని వేడుకున్నాను. మరుసటిరోజు వచ్చిన రిపోర్టుల్లో నాన్నకి పెద్ద సమస్యలేవీ లేవని తెలిసింది. దానితో అందరికీ ఆందోళన తగ్గింది. “చాలా కృతజ్ఞతలు సాయీ! శతకోటి వందనాలు బాబా! నీవు లేకుంటే ఈ లోకంలో మాకు దారేది? మాకు అన్నీ నువ్వే బాబా. మమ్మల్ని సదా నీ నామస్మరణలో ఉండేలా అనుగ్రహించు తండ్రీ!”

జై సాయిరాం!

సద్గురు సాయినాథ్ మహరాజ్ కీ జై!

ఓం శ్రీ సాయినాథాయ నమః.

---