సాయిభక్తుల అనుభవమాలిక 606వ భాగం.....

---

ఈ భాగంలో అనుభవాలు:

1. అద్భుత రీతిన బాబా ప్రసాదించిన ఉద్యోగం
2. వర్షాన్ని ఆపి క్షేమంగా ఇంటికి చేర్చిన బాబా

---

అద్భుత రీతిన బాబా ప్రసాదించిన ఉద్యోగం

నా పేరు ధనలక్ష్మి. సాయిభక్తులందరికీ నా నమస్కారాలు. నా బాబా నాకు ప్రసాదించిన అనుభవాలు ఎన్నని చెప్పను? చెప్పాలంటే చాలానే ఉన్నాయి. వాటిలో నుండి కొన్ని అనుభవాలను ఇప్పుడు మీతో పంచుకుంటాను. 2020, జూన్ నెలలో మేము ఒక ఊరినుండి ఇంకో ఊరికి మారాము. కరోనా సమయంలో మేము ఊరు మారాల్సి వచ్చినా బాబా మీద భారం వేసి భయపడకుండా, మరేమీ ఆలోచించకుండా మారాము. ఊరు మారే సమయంలో ఏ ఇబ్బందిగానీ, శ్రమగానీ బాబా మాకు తెలియనివ్వలేదు. ఊరు మారిన తరువాత బాబా మమ్మల్ని అడుగడుగునా ఒక తండ్రిలా కాపాడుతూ అన్ని పనులూ ఒకదాని తర్వాత ఒకటి మాకు అనుకూలంగా నిర్వహించారు. ఊరు మారాక బాబా మాకు ఎన్నో అద్భుతాలు ప్రసాదించారు. ముఖ్యంగా నా ఉద్యోగం విషయంలో బాబా అద్భుతాన్ని సృష్టించారు. అదెలా అంటే, 9వ తారీఖున నేను సాయి సచ్చరిత్ర పారాయణ ప్రారంభించాను. 11వ తారీఖున నేను ఎంతోకాలం క్రితం ఉద్యోగం చేసిన కంపెనీ నుండి నాకు ఫోన్ వచ్చింది, ‘మా కంపెనీలో జాయిన్ అవుతావా?’ అని. నేను అది ఊహించనిది. ఎందుకంటే, నేను ఆ కంపెనీలో ఉద్యోగం మానేసి దాదాపు 9 సంవత్సరాలు అవుతోంది. మళ్ళీ అదే కంపెనీలో నన్ను ఉద్యోగంలో చేరమని అడుగుతారని నేను అస్సలు అనుకోలేదు. ఇది నా సాయి అద్భుతం. సచ్చరిత్ర పారాయణ పూర్తవకముందే, కేవలం పారాయణ ప్రారంభించిన ఒక వారంరోజులలోపే ఆ ఫోన్ వచ్చింది. ఇలా బాబా నా జీవితంలో ఎన్నో అద్భుతాలు చేశారు. 

అలాగే మరోసారి నేను బాబాకు ఒక విషయం గురించి మనసులోనే చెప్పుకుని, “బాబా! ఈ విషయంలో నాకు మంచి జరిగేట్టయితే ఈరోజు మీరు తెల్లని దుస్తుల్లో నాకు దర్శనమివ్వండి” అని ప్రార్థించాను. నా ప్రార్థన విన్న బాబా నేను మందిరానికి వెళ్ళినప్పుడు నాకు తెల్లని దుస్తుల్లో దర్శనమిచ్చారు. ఎంతో ఆనందంతో బాబాకు మనసారా కృతజ్ఞతలు తెలుపుకున్నాను.

---

వర్షాన్ని ఆపి క్షేమంగా ఇంటికి చేర్చిన బాబా

సాయిబంధువులకు నమస్కారం. నా పేరు శ్రీనివాసరావు. నేను నా కుటుంబంతో గుంటూరులో నివసిస్తున్నాను. నా తండ్రి బాబా నన్ను, నా కుటుంబాన్ని ఎల్లవేళలా కాపాడుతూ ఉన్నారు. 17.10.2020వ తేదీన నేను, నా భార్య పద్మావతి కలసి మా స్వగ్రామమైన బలిజేపల్లి వెళ్లి వద్దామని బయలుదేరాము. అప్పటికి మేము మా స్వగ్రామం వెళ్లి దాదాపు 10 నెలలు అయింది. మేము తిరిగి సాయంత్రం పెందలాడే 4 లేదా 5 గంటలకు బయలుదేరి ఇంటికి తిరిగి వద్దామని అనుకున్నాము. కానీ, మా బంధువులతో సరదాగా గడుపుతూ బయలుదేరటం ఆలస్యమైంది. అప్పటిదాకా బాగా ఎండగా కూడా ఉంది. సాయంత్రం 5 గంటల తరువాత మేము బయలుదేరే సమయానికి బాగా మబ్బులు పట్టాయి. 5.30-6 గంటల మధ్యలో బయలుదేరుదామని అనుకుని, తెనాలిలో ఉన్న నా మిత్రుడికి ఫోన్ చేసి, “అక్కడ వర్షం పడుతోందా, లేదా?” అని అడిగాను. అతను, “తెనాలిలో బాగా వర్షం పడుతోంది, మీరు బయలుదేరవద్ద”ని చెప్పాడు. కానీ, ఇంకా ఎక్కువసేపు అక్కడే ఉంటే చీకటిపడుతుందని భావించి, మేము బాబా మీద భారం వేసి బైక్ మీద బయలుదేరాము. మేము యడవూరు అడ్డరోడ్డు దాటిన తరువాత పెద్ద వర్షం వచ్చింది. వెంటనే మేము బాబాను స్మరించుకుని, వర్షాన్ని ఆపమని, మేము ఇంటికి చేరుకునేవరకు వర్షం పడకుండా చూడమని బాబాను వేడుకున్నాము. మీరు నమ్మండి, నమ్మకపొండి, మేము బాబాను వేడుకున్న మరుక్షణం అంత పెద్ద వర్షం పూర్తిగా ఆగిపోయింది. మేము ఇంటికి వచ్చేవరకు వర్షం కురవకుండా, మాకు ఎటువంటి అవాంతరాలు ఎదురవకుండా, ఏ ఇబ్బందీ లేకుండా బాబానే మాకు తోడుగా ఉండి మమ్మల్ని క్షేమంగా ఇంటికి చేర్చారు. పెద్ద విచిత్రం ఏమిటంటే, మేము తెనాలి దాటిన తరువాత దాదాపు 30, 40 నిమిషాలపాటు కుండపోతగా వర్షం కురిసిందని నా మిత్రుడు పద్మారావు ఫోన్ చేసి చెప్పాడు. మరి, మేము ఏ ఇబ్బందీ లేకుండా క్షేమంగా ఇంటికి చేరేలా మమ్మల్ని కాపాడింది బాబా కాక మరెవరు? పిలిచిన వెంటనే పలికే దేవుడు, కాపాడే దేవుడు బాబా కాక మరెవరు? “మమ్మల్ని ఎల్లవేళలా కాపాడుతూ మాకు తోడుగా ఉండే బాబా! మీకు శతకోటి పాదాభివందనాలు”.

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై!

---