సాయిభక్తుల అనుభవమాలిక 604వ భాగం....

---

ఈ భాగంలో అనుభవాలు:

1. అమ్మ ఆరోగ్య విషయంలో బాబా కృప
2. పెళ్ళికి బాబా, మారుతిల ఆశీస్సులు

---

అమ్మ ఆరోగ్య విషయంలో బాబా కృప

సాయిబంధువులందరికీ నా నమస్కారాలు. మన సద్గురు సాయినాథునికి శతకోటి నమస్కారాలు. నేను ఒక సాయి భక్తురాలిని. మాది హైదరాబాద్. 2020, సెప్టెంబరు నెలలో ఒకరోజు మేము మా అమ్మావాళ్ళింటికి వెళ్ళాము. అమ్మావాళ్ళింటి పక్కింట్లో ఉన్న ఆమెకి కోవిడ్ పాజిటివ్ వచ్చింది. దాంతో అమ్మ, అన్నయ్య కోవిడ్ టెస్ట్ చేయించుకున్నారు. అన్నయ్యకి నెగిటివ్ వచ్చిందిగానీ, అమ్మకి పాజిటివ్ వచ్చింది. దాంతో నేను, మావారు, మా అమ్మాయి కూడా కోవిడ్ టెస్ట్ చేయించుకున్నాము. బాబా దయవలన మా అందరికీ నెగిటివ్ వచ్చింది. అమ్మకి షుగర్ ఉన్నందువల్ల కోవిడ్ ప్రభావం తనపై ఎక్కువగా ఉంటుందేమోనని మాకు చాలా భయమేసింది. మేము ఎంతగానో ఆందోళన చెంది, "అమ్మ త్వరగా కోలుకునేలా అనుగ్రహించండి" అని బాబాను వేడుకొని ఊదీని నీళ్లలో కలిపి ఆమె చేత త్రాగిస్తూ రోజూ బాబాని ప్రార్థిస్తుండేవాళ్ళం. బాబా దయవల్ల ఇరవైరోజుల్లో అమ్మకి నెగిటివ్ వచ్చింది. ఎంతో ఉపశమనంగా అనిపించి బాబాకు కృతజ్ఞతలు తెలుపుకున్నాము. కానీ రెండురోజుల తర్వాత అమ్మకి విపరీతంగా ఒళ్ళునొప్పులు వచ్చాయి. టాబ్లెట్ వేసుకుంటే నొప్పులు ఉపశమించేవి, టాబ్లెట్ పవర్ తగ్గుతూనే మళ్ళీ మొదలయ్యేవి. మాకు భయమేసి తెలిసిన డాక్టరు వద్దకి వెళ్తే స్కానింగ్ చేయించమని చెప్పారు. స్కానింగ్ చేయించాక రిపోర్టు చూసిన డాక్టర్, 'కిడ్నీలో కొంచెం సమస్య ఉందని, అది మొదటిదశలో ఉంద'ని చెప్పారు. మాకు ఆందోళనగా అనిపించి రెండవ అభిప్రాయం కోసం ఆ రిపోర్టును తీసుకొని వేరే డాక్టర్ని సంప్రదించాము. ఆ డాక్టరు, "మళ్ళీ టెస్టులు చేయిద్దాం, రేపు రండి" అని చెప్పారు. ఆ రోజంతా బాబా ఊదీ కలిపిన నీళ్లు అమ్మ చేత త్రాగిస్తూ, 'ఓం శ్రీసాయి ఆరోగ్యక్షేమదాయ నమః' అని జపించాము. మరుసటిరోజు అమ్మకి టెస్టులు చేశారు. టెస్ట్ రిపోర్టులు నార్మల్‌గా రావాలని మేము 'ఓం శ్రీసాయి జయనే నమః' అనే మంత్రజపం చేశాము. బాబా అద్భుతం చేసి చూపించారు. మరుసటిరోజు డాక్టర్ అపాయింట్‌మెంట్ ఇవ్వడంతో వెళ్లి డాక్టరుని కలిశాము. ఆయన రిపోర్టులు మాకు చూపించి, "అన్నీ నార్మల్‌గా ఉన్నాయి. సమస్యేమీ లేదు. కేవలం ఇన్సులిన్ తగ్గింది. అంతే, అంతకుమించి ఏమీ లేదు. ఇంట్లోనే ఇన్సులిన్ తీసుకోండి. మళ్ళీ ఒక నెల తరువాత చెకప్‌కి రండి" అని చెప్పారు. "సాయినాథా! శతకోటి ధన్యవాదాలు తండ్రీ! అమ్మకి రక్షణగా ఉంటూ ఆమెకి సంపూర్ణ ఆరోగ్యాన్ని ప్రసాదించండి. మా తప్పులు ఏవైనా ఉంటే మన్నించి మా కుటుంబానికి తోడుగా ఉండండి సాయీ! మీ భక్తులందరినీ సంరక్షించండి తండ్రీ!"

---

పెళ్ళికి బాబా, మారుతిల ఆశీస్సులు

నా పేరు అనూష. బాబా ఆశీస్సులతో 2020, అక్టోబరు 28న నా వివాహం జరిగింది. ఎవరైనా ప్రేమతో పిలిస్తే బాబా వస్తారని నేను చాలామంది భక్తుల అనుభవాల్లో చదివాను. పెళ్ళికి రెండురోజుల ముందు నేను నా మనసులో, "మా పెళ్ళికి వచ్చి మమ్మల్ని ఆశీర్వదించండి బాబా" అని బాబాను ప్రార్థించాను. పెళ్లి రేపనగా ముందురోజు నా స్నేహితుని భార్య నాకు ఫోన్ చేసి, "నువ్వు ఏ దేవుడిని పూజిస్తావు?" అని అడిగింది. నేను తనతో 'బాబా' అని చెప్పాను. తరువాత తను నా పెళ్లికానుకగా నాకు గాజులు బహూకరించాలని అనుకుంటున్నట్లు మెసేజ్ పెట్టారు. కానీ ఆశ్చర్యంగా వెండి విగ్రహం రూపంలో బాబా మా పెళ్ళికి వచ్చారు. బాబాతో పాటు ఆంజనేయస్వామి అంటే కూడా నాకు ఇష్టం. ఆయన్ని కూడా "మా పెళ్ళికి రండి స్వామీ" అని పెళ్లికి ముందురోజు ప్రార్థించాను. మేము భోజనాలు చేస్తున్న సమయంలో ఆంజనేయస్వామి మారుతి (కోతి) రూపంలో వచ్చి ఆహారాన్ని తీసుకుని వెళ్లారు. నేను కోరుకున్నట్లే బాబా, ఆంజనేయస్వామి మా పెళ్ళికి వచ్చి మమ్మల్ని ఆశీర్వదించినందుకు నాకు చాలా చాలా సంతోషంగా అనిపించింది. వారిరువురికీ నా కృతజ్ఞతాపూర్వక నమస్కారాలు సమర్పించుకున్నాను.

---