సాయిభక్తుల అనుభవమాలిక 589వ భాగం.....

---

ఈ భాగంలో అనుభవాలు:

1. కష్టమేదైనా అడిగినంతనే ఆదుకునే తండ్రి నా సాయి
2. ఎంతైనా మన బాబా దయామయుడు

---

కష్టమేదైనా అడిగినంతనే ఆదుకునే తండ్రి నా సాయి

ఓం గణేశాయ నమః, ఓం శ్రీ సాయినాథాయ నమః

సాయిబంధువులందరికీ నా నమస్కారములు. ముందుగా ఈ బ్లాగ్ నిర్వహిస్తున్న సాయికి నా కృతజ్ఞతలు. బ్లాగులోని తోటి సాయిభక్తుల అనుభవాలు చదవడం వలన మంచి పాజిటివ్ ఎనర్జీతోపాటు మనశ్శాంతి కూడా చేకూరుతుంది. నా పేరు సౌజన్య. మేము అమెరికాలో నివసిస్తున్నాము. నేను సాయిభక్తురాలిని. నా చిన్నతనం నుండి నేను బాబా గుడికి వెళుతూ ఉండేదాన్ని. నా సాయితండ్రి నన్ను, నా కుటుంబాన్ని కంటికి రెప్పలా చూసుకుంటూ ఎన్నో అనుభవాలను ప్రసాదించారు. వాటిలో ఇటీవల జరిగిన రెండు అనుభవాలను నేనిప్పుడు మీతో పంచుకుంటాను.

నాకు ఇద్దరు పిల్లలు. వాళ్ళు ఇంట్లోనే ఉండడం వలన అనుక్షణం వాళ్ళను జాగ్రత్తగా గమనిస్తూ ఉంటాను. మనమెంత జాగ్రత్త వహిస్తున్నప్పటికీ అప్పుడప్పుడు అనూహ్య సంఘటనలు జరుగుతుంటాయి. ఒకరోజు రాత్రి పిల్లలిద్దరూ ఆడుకుంటుండగా హఠాత్తుగా నా కూతురు తలకి పదునుగా ఉన్న టేబుల్ కొన తగిలి గాయమైంది. తన తల బొప్పి కట్టి, రక్తం కూడా కారింది. రాత్రి పదకొండున్నర గంటల సమయంలో ఏమి చేయాలో తోచక భయంతో చాలా ఏడ్చాను. సహాయం కోసం నా సాయితండ్రిని ఎంతగానో వేడుకున్నాను. తరువాత బాబా ఊదీని పాప నుదుటిపై పెట్టి, కొద్దిగా ఊదీని నీటిలో కలిపి తనచేత త్రాగించాను. బాబా కృప అపారం. కొన్ని నిమిషాలలోనే నొప్పి తగ్గడం, బొప్పి తగ్గడం జరిగిపోయింది. అంత రాత్రివేళ ఆర్తిగా అడిగినంతనే హాస్పిటల్‌కి వెళ్ళనవసరం లేకుండా నా సాయితండ్రి నా కష్టాన్ని తీసేశారు. మా పాప ఇప్పుడు క్షేమంగా, ఆరోగ్యంగా ఉంది. “అంతా నీ దయవల్లనే బాబా. నిజంగా మీకు ఎన్నిసార్లు కృతజ్ఞతలు చెప్పినా తక్కువే తండ్రీ! అందరికీ దూరంగా అమెరికాలో ఉంటున్న నాకు తల్లి, తండ్రి, బంధువులు, స్నేహితులు, సర్వబంధాలు నీవే బాబా. లవ్ యు బాబా!” నా అనుభవం చదివిన ప్రతి ఒక్కరికీ నా ధన్యవాదాలు. ఇలాంటి మరెన్నో అనుభవాలను బాబా మనకు ప్రసాదించాలని కోరుకుంటున్నాను.

మరో అనుభవం:

2020, అక్టోబరు నెల మొదటివారమంతా ఛాతీ మరియు భుజం నొప్పితో నాకు చాలా అసౌకర్యంగా అనిపించింది. అసలే కరోనా సమయం. అందువల్ల నాకు చాలా భయం వేసింది. ఇంట్లో చెప్తే అందరూ ఆందోళనపడతారని నేను నా కష్టాన్ని బాబాకి చెప్పుకుని చాలా బాధపడ్డాను. తరువాత బాబా ఊదీ తీసుకుని నొప్పి ఉన్న భాగమంతా రాశాను. మరికొంత ఊదీని నీళ్ళలో కలుపుకుని త్రాగి, “బాబా! బాబా!’ అని చాలా ఆర్తిగా బాబా నామస్మరణ చేశాను. సాయంత్రానికల్లా నొప్పి సగానికి పైగానే తగ్గిపోయి నాకు ఉపశమనం కలిగింది. ఎవరికీ చెప్పలేక నా బాబాకు చెప్పుకున్నందుకు తల్లిలా ఆయన నా మొర ఆలకించి నాకు బాధ నుండి చాలావరకు విముక్తి ప్రసాదించారు. “థాంక్యూ సో మచ్ బాబా! మా ఆనందాలన్నీ నీవు ఇచ్చినవే. నాకు పూర్తిగా నయమయ్యేలా చేసి పూర్తి ఆనందాన్ని ప్రసాదించు. నీ దయ ఉంటే అన్నీ సాధ్యమే. తండ్రీ! మమ్మల్ని చల్లగా చూడు. నాకు నీవే దిక్కు. మరొక్కసారి థాంక్యూ బాబా! ఐ లవ్ యు బాబా! అందరినీ చల్లగా చూడు బాబా!” మరొక విషయం, నాకు నొప్పి తగ్గిన వెంటనే బ్లాగులో పంచుకుంటానని బాబాతో చెప్పుకున్నాను. ఆయన తప్పక అనుగ్రహిస్తారని నా పూర్తి విశ్వాసం. అందుకే ముందుగానే నా అనుభవాన్ని మీతో పంచుకున్నాను.

---

ఎంతైనా మన బాబా దయామయుడు

సాయిభక్తురాలు శ్రీమతి అంజలి తనకు బాబా ప్రసాదించిన అనుభవాన్ని మనతో పంచుకుంటున్నారు.

అందరికీ నమస్కారం. ఈ బ్లాగ్ నిర్వహిస్తున్న సాయికి ప్రత్యేక కృతజ్ఞతలు. నా పేరు అంజలి. మేము నకిరేకల్‌లో నివసిస్తున్నాము. ఇటీవల కొన్ని రోజుల క్రితం మా పాప ఆడుకుంటూ క్రింద పడింది. పెదవికి మంచం కొట్టుకుని పెదవి చీలింది. రక్తం కూడా చాలా పోయింది. ఆరాత్రి నకిరేకల్‌లోని హాస్పిటల్‌కి తీసుకుని వెళ్ళాము. డాక్టర్ పాపను పరీక్షించి, గమ్ పెట్టి పెదవిని అతికించారు. కానీ మరుసటిరోజు చూస్తే పెదవి అతకలేదు. మావారి కజిన్ గుంటూరులో డాక్టర్. తనకు విషయం చెప్పి పాప ఫోటో పంపిస్తే, “పాపను గుంటూరు తీసుకురండి, సర్జరీ చేయాల”ని చెప్పారు. మేము చాలా ఆందోళనపడ్డాము. నేను బాబాను ప్రార్థించి భారమంతా బాబాకే వదిలేశాను. మేము అక్టోబరు 2వ తారీఖున హాస్పిటల్‌కి వెళ్ళాలి. నేను అక్టోబరు 1వ తారీఖున సబ్‌స్టేషన్‌లో రీడింగ్స్ తీసి, మరుసటిరోజు గుంటూరు బయలుదేరాలి. అయితే ఎంతసేపటికీ లాప్‌టాప్‌లో రీడింగ్స్ రావడం లేదు. నేను బాబాను తలచుకుని, “బాబా! ఎలాగైనా నువ్వే రీడింగ్స్ తెప్పించు. ఎందుకంటే తెల్లారి పాపను హాస్పిటల్‌కి తీసుకుని వెళ్ళాలి” అని వేడుకున్నాను. నిజంగా బాబా అద్భుతం చేశారు. రీడింగ్స్ రావటం లేదు అనుకున్నది, బాబాను వేడుకోగానే లాప్‌టాప్‌లో రీడింగ్స్ వచ్చాయి. ఎంతైనా మన బాబా దయామయుడు. తన పిల్లలు కష్టపడుతుంటే ఆయన చూడలేరు. అలా నా రీడింగ్స్ సమస్యను బాబా పరిష్కరించారు. ఇంకో అద్భుతం ఏమిటంటే, మా పాపను హాస్పిటల్‌కి తీసుకెళ్ళినరోజు ‘సంకల్ప విజయ సాయి’ గ్రూపులో మా పాప పేరు మీద సంకల్ప పారాయణ చేయించాను. అది కూడా బాబానే ఏర్పాటు చేశారు. లేదంటే అంత త్వరగా ఆ గ్రూపులో ప్రార్థన పెట్టించలేము. మా పాపను పరీక్షించిన డాక్టర్, “ప్రస్తుతానికి సర్జరీ అవసరం లేదనిపిస్తోంది. మందులు ఇస్తాను, క్రమంతప్పకుండా వాడండి. రెండు నెలల తరువాత చూద్దాం” అని చెప్పి మందులిచ్చారు. అంతా బాబా దయ. ఈ విషయాన్ని (అనుభవాన్ని) నేను బ్లాగులో పంచుకుంటానని బాబాకు చెప్పుకున్నాను. “కొంచెం ఆలస్యమైంది, నన్ను క్షమించు బాబా! దయామయా! నీ కృప నా కుటుంబం మీద, అలాగే అందరిమీదా ఉండాలని కోరుకుంటున్నాను”. జై సాయిరాం!

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

---