సాయిభక్తుల అనుభవమాలిక 607వ భాగం.....

---

ఈ భాగంలో అనుభవాలు:

1. శ్రీసాయి లీల - ఊదీ మహిమతో తగ్గిన వేలినొప్పి
2. సాయిబాబా ఊదీ మహిమ

---

శ్రీసాయి లీల - ఊదీ మహిమతో తగ్గిన వేలినొప్పి

సాయిభక్తురాలు జ్యోతి తనకు బాబా ప్రసాదించిన అనుభవాన్ని మనతో పంచుకుంటున్నారు.

సాయిభక్తులందరికీ నమస్కారములు. ఈ బ్లాగు నిర్వహిస్తున్న సాయికి నా హృదయపూర్వక కృతజ్ఞతలు. బాబా ఆశీస్సులు మీకు ఎల్లవేళలా ఉండాలి. నా పేరు జ్యోతి. బాబా నాకు ఎన్నో అనుభవాలు ఇచ్చారు. ఇంతకుముందు కూడా ఒక అనుభవాన్ని ఈ బ్లాగ్ ద్వారా మీతో పంచుకున్నాను. బాబా అనుగ్రహంతో మరలా ఇంకొక అనుభవాన్ని మీతో పంచుకుంటున్నాను. 

2020, మే నెలలో ఒకరోజు నా కుడిచేతి బొటనవేలు నొప్పిపెట్టసాగింది. ఆ వేలు నిటారుగా తయారైంది. ఆ వేలిని నేను వంచలేకపోయేదాన్ని. దాంతో నేను ఏ పనీ చేయలేకపోయేదాన్ని. లైటర్ వెలిగించలేని, కూరలు తరగలేని పరిస్థితి. చాలా పనులకి ఆ వేలు మీదే ఒత్తిడి పడుతుంది. వేలినొప్పి ఎక్కువగా ఉండటంతో డాక్టరుకి చూపించుకున్నాను. ఆయన వేలిని పరీక్షించి చూసి, “ఒక నెలరోజులు వేచి చూడండి, దానంతటదే తగ్గుతుంది. ఒకవేళ తగ్గకపోతే చిన్న ఆపరేషన్ చెయ్యాల్సి వుంటుంది” అన్నారు. నాకసలే ఆపరేషన్ అంటే భయం. నొప్పి తగ్గకపోతే ఆపరేషన్ చేయించుకోవాలేమోనన్న ఆందోళనతో, “బాబా! నాకు ఆపరేషన్ అంటే చాలా భయం. నువ్వే ఎలాగైనా నా వేలి నొప్పి తగ్గించు” అని బాబాను వేడుకున్నాను. రెండు మూడు నెలలు గడిచినా నొప్పి తగ్గలేదు. ఇంట్లోవాళ్ళందరూ నన్ను ఆపరేషన్ చేయించుకోమని అనేవారు. నేను బాబాకు నమస్కరించుకుని, “బాబా! నేను మాత్రం ఆపరేషన్ చేయించుకోను. నువ్వే ఈ నొప్పిని తగ్గించాలి. నీ ఇష్టం, నువ్వు ఈ నొప్పిని తగ్గించకపోయినా నేను ఇలాగే ఉంటాను కానీ, ఆపరేషన్ మాత్రం చేయించుకోను” అని బాబాకి చెప్పుకుని, ఇంక ఆ నొప్పి విషయాన్ని బాబాకే వదిలేశాను.

ఇటీవల నేను మా ఇంట్లోకిగానీ, మాలో ఎవరికీగానీ కరోనా రాకూడదని ప్రతిరోజూ బాబా ఊదీని ఇంటి గుమ్మం దగ్గర, గేటు దగ్గర ఒక గీతలాగా వేయటం ప్రారంభించాను. కొన్ని రోజుల తరువాత చేతికి అంటిన ఆ ఊదీని నొప్పి ఉన్న వేలికి రాసుకోవటం మొదలుపెట్టాను. అలా ప్రతిరోజూ ఊదీ రాసుకునేదాన్ని. బాబా దయవల్ల నెమ్మదిగా వేలి నొప్పి తగ్గడం మొదలుపెట్టింది. ఒకరోజు అనుకోకుండా లైటర్ను కుడిచేత్తో (ఆ నొప్పి ఉన్న వేలితోనే) వెలిగించాను. ఆశ్చర్యం! నాకు నొప్పి అనిపించలేదు. అంతకుముందు ఆ వేలుతో లైటర్ను నొక్కలేకపోయేదాన్ని. ఇప్పుడు అన్ని పనులూ చేసుకోగలుగుతున్నాను. దాదాపు 90 శాతం నొప్పి తగ్గిపోయింది. ఇంకా 10 శాతం మాత్రమే నొప్పి ఉంది. బాబా ఊదీ మహిమతో ఆపరేషన్ అవసరం లేకుండానే నా వేలినొప్పి తగ్గిపోయింది.

శ్రద్ధ, సబూరి కలిగి ఉండాలే గానీ ఏ సమస్యనైనా బాబా ఇట్టే తొలగిస్తారు. ఇలాంటి బాబా మహిమల్ని ఎన్నని వర్ణించను? సర్వస్య శరణాగతి చేస్తూ, శ్రద్ధ, సబూరిలతో బాబాకి మన జీవితాన్ని అర్పించడమే బాబాకి మనమిచ్చే దక్షిణ.

అఖిలాండకోటి బ్రహ్మాండనాయక రాజాధిరాజ యోగిరాజ పరబ్రహ్మ శ్రీ సచ్చిదానంద సద్గురు సాయినాథ్ మహరాజ్ కీ జై!

---

సాయిబాబా ఊదీ మహిమ

నా పేరు సుమంత్ కుమార్. నేను హోమియో వైద్యుడిని. 2020, సెప్టెంబరు నెలలో బాబా ఊదీ మహిమ వల్ల మేము పొందిన అనుభవాన్ని మీతో పంచుకోవాలనుకుంటున్నాను. సెప్టెంబరు నెల మొదటివారంలో మా ఆరు సంవత్సరాల పాప జ్వరం, కాళ్ళనొప్పులు, తలనొప్పి, నీరసంతో బాధపడసాగింది. తను మాతో, “నేను బాబా ఊదీనే వేసుకుంటాను, నాకు హోమియో మందు ఏమీ వద్దు” అని అన్నది. మేము మాత్రం, “బాబా ఊదీతో పాటు మా తృప్తి కోసం హోమియో మందు కూడా వేసుకో”మని నచ్చజెప్పి తనకు బాబా ఊదీని నోట్లో వేసిన తర్వాత హోమియో మందు కూడా వేశాము. బాబా అనుగ్రహం వల్ల కేవలం రెండు గంటల్లో మా పాపకు జ్వరం, కాళ్ళనొప్పులు, తలనొప్పి, నీరసం అన్నీ పూర్తిగా తగ్గిపోయి తను చాలా చురుకుగా అయ్యింది. నేను తనకు వేసిన మందు పనిచేయటానికి కనీసం పన్నెండు గంటలు పడుతుంది. ఆ తర్వాతగానీ ఆ మందు పనితనం తెలియదు. తనకు కేవలం బాబా ఊదీ వల్లనే పూర్తిగా తగ్గిపోయింది. మా పాప, “బాబా ఊదీనే వేసుకుంటాను, హోమియో మందు వేసుకోను” అని అనటం, అది కూడా కరోనా సమయంలో తను అలా అనటం నిజంగా బాబా అనుగ్రహం. బాబా అనుగ్రహం ఎప్పుడూ మాపై ఇలానే ఉండాలని కోరుకుంటూ బాబాకు మా నమస్కారాలు తెలుపుకుంటున్నాను.

---