సాయిభక్తుల అనుభవమాలిక 1934వ భాగం....

---

ఈ భాగంలో అనుభవాలు:

1. టెన్షన్స్ చిన్నవైనా, పెద్దవైనా తండ్రికి చెప్తే ఖచ్చితంగా పరిష్కారం దొరుకుతుంది - ఆ తండ్రే మన సాయినాథుడే

2. ఎంత పుణ్యం చేసుకుంటే ఇలాంటి నాన్న(బాబా) లభిస్తారు?

---

టెన్షన్స్ చిన్నవైనా, పెద్దవైనా తండ్రికి చెప్తే ఖచ్చితంగా పరిష్కారం దొరుకుతుంది - ఆ తండ్రే మన సాయినాథుడే 

సాయి బంధువులకు నమస్కారములు. నా పేరు ఝాన్సీ. మాది నెల్లూరు. నేను బీఈడీ చేశాను. తర్వాత స్కూల్ టీచర్ అర్హతకోసం టెట్ పరీక్షకు అప్లై చేస్తే హైదరాబాద్ సెంటర్ వచ్చింది. నా భర్త తనకి సెలవు దొరకదని, నన్ను ఒక్కదాన్నే వెళ్లమన్నారు. నేను అంతదూరం ఒక్కదాన్నే వెళ్లి పరీక్ష ఎలా వ్రాయాలని టెన్షన్ పడ్డాను. మనసులో, "ఎలాగైనా నేను ప్రశాంతంగా వెళ్లి పరీక్ష వ్రాసొచ్చేలా చేయండి బాబా" అని బాబాని అర్థించాను. బాబా అద్భుతం చేసారు. నా భర్త తన స్నేహితునికి చెప్తే, అతను నా ప్రయాణానికి టిక్కెట్లు బుక్ చేసారు. అదే ట్రైన్‌లో నా భర్త ఫ్రెండ్, అతని కొడుకు తిరుపతి నుంచి హైదరాబాద్‌కి బయలుదేరారు. కాకపోతే, వాళ్ళది వేరే కోచ్. నేను ఎక్కిన కోచ్‌లో ప్రశాంతంగా ఉండటంతో సంతోషంగా పరీక్షకి ప్రిపేరయ్యాను. ట్రైన్ ఆలస్యమై ఉదయం 2 గంటలకి హైదరాబాద్ చేరుకుంది. నా భర్త ఫ్రెండ్, అతని కొడుకు ట్రైన్ దిగి, నాకోసం వేచి ఉండి నన్ను క్యాబ్‌లో వాళ్ళ ఇంటికి తీసుకెళ్లారు. ఉదయం పరీక్ష నేనున్న ప్రాంతానికి చాలా దూరంగా ఎల్‌బినగర్‌లో ఉండగా మావారి ఫ్రెండ్ భార్య తన ఆఫీసుకి సెలువుపెట్టి, మెట్రో రైలులో నన్ను తీసుకెళ్లి పరీక్షా కేంద్రం వద్ద వదిలిపెట్టారు. ఆమె నేను పరీక్ష జరిగే హాల్‌లోకి వెళ్ళేవరకు ఉండి తిరిగి వెళ్లారు. నేను పరీక్ష వ్రాసి మెట్రోస్టేషన్‌కు వెళ్ళాను. అక్కడికి నా భర్త ఫ్రెండ్ వచ్చారు. అతను నన్ను సికింద్రాబాద్ స్టేషన్‌కు చేర్చారు. దసరా సెలవులు పూర్తైనందున స్టేషన్‌లో చాలా రద్దీగా వుంది. మేము ఒక చోట కూర్చున్నాము. నేను ఎక్కాల్సిన ట్రైన్ స్పెషల్ ట్రైన్ అయినందున అది బయలుదేరడానికి బాగా ఆలస్యమైంది. నా భర్త ఫ్రెండ్ చాలాసేపు వేచి ఉన్నాక, "కాసేపట్లో చివరి మెట్రో రైలు వెళ్ళిపోతుంది" అన్నారు. నేను అతనితో సరే మీరు వెళ్ళండి. నేను ట్రైన్ ఎక్కేస్తాను అని చెప్పి పంపించాను. తర్వాత నేను ఎక్కాల్సిన ట్రైన్ కాసేపట్లో వస్తుందని అనౌన్స్ చేసారు. తర్వాత నేను ఎక్కాల్సిన కోచ్ నేను ఎక్కడ అయితే కూర్చున్నానో అక్కడికే వచ్చింది. నేను చాలా ప్రశాంతంగా రైలు ఎక్కి మర్నాడు ఉదయం 11 గంటలకి నెల్లూరు చేరుకున్నాను. హైదరాబాద్ వెళ్లి రావడం చాలా సామాన్యమైన విషయం. కానీ ఒక్కదాన్నే తెలియని వూరు, అది కూడా పరీక్షకోసం అని టెన్షన్ పడ్డాను. కానీ మన టెన్షన్స్ చిన్నవైనా, పెద్దవైనా తండ్రికి చెప్తే ఖచ్చితంగా పరిష్కారం దొరుకుతుంది. ఆ తండ్రే మన సాయినాథుడు. ఆయన నాకు ఏ మాత్రమూ కష్టం లేకుండా హైదరాబాద్ తీసుకెళ్లి తెచ్చారు. "బాబా! చాలా చాలా ధన్యవాదాలు. పరీక్షలో 90 మార్కులు వస్తే గాని క్వాలిఫై అవ్వలేను. పోయినసారి 2 మార్కుల తక్కువ వచ్చి క్వాలిఫై అవ్వలేదు. ఈసారైనా నన్ను క్వాలిఫై అయ్యేలా ఆశీర్వదిస్తారని నమ్ముతున్నాను బాబా".

---

ఎంత పుణ్యం చేసుకుంటే ఇలాంటి నాన్న(బాబా) లభిస్తారు?  

సాయి బంధువులకు నమస్కారం. నా పేరు స్వాతి. నా జీవితంలో బాబా చాలా అద్భుతాలు చేశారు. వాటి గురించి ఎంత చెప్పినా తక్కువే. ఇప్పుడు ఇటీవల జరిగిన కొన్ని అనుభవాలు చెప్తాను. నా గ్రహచరమేమోగాని ఈ మధ్యకాలంలో ప్రతి పండక్కి నాకు నెలసరి సమస్య వస్తుండేది. 2024, అక్టోబర్‌లో వచ్చిన దసరా పండుగకు కూడా అదే ఇబ్బంది ఎదురయ్యే పరిస్థితి వచ్చింది. అప్పుడు నేను బాబాకి దణ్ణం పెట్టుకొని, 'ఓం శ్రీసాయి అసహాయ సహాయాయ నమః' అనే నామాన్ని జపించాను. నా దేవుని దయతో పండుగ సంతోషంగా జరుపుకున్నాను.

ఈమధ్య మా కారులో ఏదో సమస్య వచ్చి ఏసీ సరిగా పని చేసేది కాదు. అటువంటి సమయంలో ఒకరోజు మధ్యాహ్నం మేము  ప్రయాణం చేయవలసి వచ్చింది. ఏసీ పని చేయకపోవడం, బయట ఎండ వేడి వల్ల నాకు చాలా ఇబ్బందిగా అనిపించింది. బాబా పుస్తకం చదువుతూ అలా కళ్లు మూసుకొని, "బాబా! ఈ వేడి తాళలేకున్నాను. ఏసీ బాగుచేయి నాన్నా" అని అనుకుంటూ ఉండగానే ముఖానికి చల్లటి గాలి తగిలింది. కళ్లు తెరిచి చూస్తే, మావారు ఆశ్చర్యానికి గురవుతూ, "ఏసీ పని చేస్తోంది" అన్నారు. ఇక నా ఆనందం ఏమని చెప్పను?

మేము అపార్టుమెంట్‌లో ఉంటున్నాము. మా క్రింది అంతస్తులో వుండే ఆంటీకి, నాకు మంచి స్నేహం ఏర్పడింది. దాన్ని చూసి ఓర్వలేని మా పక్కింటి ఆమె ఆంటీకి నా మీద చాడీలు చెప్పింది. ఆంటీ వాటిని నమ్మి నాతో సరిగా వుండేవారు కాదు. నేను చాలా బాధపడ్డాను. కానీ ఏమీ చేయలేక బాబాతో నా బాధ చెప్పుకొని ఆయననే శరణువేడాను. కొన్ని రోజులకి ఆంటీ తనకి తానే విషయం అర్థం చేసుకొని నాతో మునపటిలా వుండడం మొదలుపెట్టారు. ఇదంతా సాయినాన్న వల్లనే. ఎంత పుణ్యం చేసుకుంటే ఇలాంటి నాన్న లభిస్తారు? "ధన్యవాదాలు బాబా. నా మీద పడిన ఇంకో అపనింద కూడా తొలగించండి బాబా. నాన్న ఆరోగ్యం బాగు చేయి నాన్న".

---