సాయిభక్తుల అనుభవమాలిక 1935వ భాగం....

---

ఈ భాగంలో అనుభవాలు:

1. బాబా కరుణ

2. నమ్మితే మనల్ని వదిలిపెట్టరు నా సాయి

---

బాబా కరుణ

నేను ఒక సాయి భక్తురాలిని. బాబా నా మీద చూపించిన కరుణను నేనిప్పుడు మీతో పంచుకుంటున్నాను. 2024, మే నెలలో నేను ఊరు వెళ్ళినప్పుడు మా డాడీ నాకు ఫోన్ చేసి, "మా ఆఫీసులో తెలిసినవాళ్ళు పది రోజులు తమిళనాడు యాత్రకు వెళ్తున్నారు. నువ్వు వస్తావని వాళ్లతో చెప్పాను. వెళ్తావు కదా!" అని అన్నారు. సాధారణంగా మా డాడీ అలా యాత్రలంటే అంత తొందరగా ఇష్టపడరు, 'మనసు మంచిదవ్వాల'ని అంటారు. అలాంటిది ఆయనే వెళ్ళమంటుంటే నాకు ఆశ్చర్యమేసింది. డాడీ కూడా అదే అని, "ఎందుకో తెలియదు కానీ, నిన్ను పంపించాలనిపించింది" అన్నారు. నాకు కూడా వెళ్లాలనున్నా ఒక్కదానినని ఆలోచిస్తుంటే డాడీ, "పరవాలేదు వెళ్ళమ్మా. అందరూ నాకు బాగా తెలిసినవాళ్ళు" అని చెప్పారు. ఇంకా నేను, "సరే వెళ్తాన"ని చెప్పాను. నేను వెళ్లేముందు, "బాబా! యాత్ర అంతా బాగా జరిగేలా చూడండి. యాత్రలో ఎక్కడైనా మీరు కనిపించి ప్రత్యేకంగా మహిమ చూపించండి" అని అనుకొని మొత్తం 40 మందిమి బయలుదేరాము. అప్పుడు నాకు తెలిసిన విషయమేమిటంటే, వాళ్లంతా సాయిభక్తులు. వాళ్ళందరూ మొదటి పరిచయమే అయినప్పటికీ నన్ను ఎంతో ప్రేమగా చూసారు, సరదాగా ఉన్నారు. మాకు అన్ని చోట్లా దర్శనాలు చాలా అంటే చాలా బాగా జరిగాయి. ముఖ్యంగా రెండు చోట్ల బాగా గుర్తుండేలా జరిగాయి.

మేము ఏ గుడికి వెళ్లినా అందరం కలిసి వెళ్ళేవాళ్ళం. అలాగే వైద్యనాథ్ గుడికి వెళ్ళాము. అక్కడ మేము సరిగ్గా లోపలికి వెళ్తుండగా ఒక సెక్యూరిటీ నా దగ్గరకు వచ్చారు. ఆయన పిలవగానే నేను ఆయన వెనక అలా వెళ్ళిపోయాను. ఆయన మధ్యలో ఓ చోట తాళం తీసిమరీ ప్రత్యేక ప్రవేశం గుండా నన్ను గర్భగుడి గడప వరకు తీసుకెళ్లి దణ్ణం పెట్టుకోమన్నారు. అప్పుడు నేను వెనక్కి తిరిగి చూస్తే, నాతో వచ్చిన వాళ్ళందరూ క్యూలైన్లో ఉన్నారు. నేను ఒక్కదాన్నే అందరికంటే ముందున్నాను. ఒక నిమిషం నాకు ఏమీ అర్థం కాలేదు. కానీ నాకు చాలా అద్భుత దర్శనమైంది. నిజంగా ఇది సాయి దయ.

పళనిలో దైవ దర్శనమయ్యాక మేము బయటికి వచ్చి అక్కడున్న మరొక గుడిలో దణ్ణం పెట్టుకొని వస్తుంటే ఒక స్వామీజీ నాకు విభూతి ఇచ్చారు. కొంచెం ముందుకి వెళ్ళాక ఆ స్వామికి డబ్బులు ఇవ్వాలనిపించి తిరిగి వెనక్కి వెళ్లి డబ్బులిస్తే, ఆయన నాకు తిరిగి రెండు రూపాయి నాణేలు ఇచ్చారు. ఆ స్వామిజీ, సెక్యూరిటీల రూపంలో బాబానే అనుగ్రహించారని నాకు అనిపించింది.

ఒకసారి ఏమైందో తెలియదు కానీ, నా ఒళ్లంతా దద్దుర్లు రావడం మొదలై మందులు వాడుతున్నప్పుడు తగ్గడం, మళ్ళీ తర్వాత వచ్చేయడం జరుగుతుండేది. నాకు ఏం చేయాలో అర్థం కాలేదు. నెల రోజులకు పైనే బాధపడ్డాను. అప్పుడొకరోజు 'అవును కదా! సాయి బ్లాగులో పంచుకుంటానని మొక్కుకుంటే నా సమస్య తీరుతుంద'ని మొక్కుకున్నాను. నిజంగానే ఆ సమస్య తగ్గింది. "ధన్యవాదాలు బాబా".

---

నమ్మితే మనల్ని వదిలిపెట్టరు నా సాయి  

ఓం శ్రీసాయినాథాయ నమః. సాయినాథునికి నమస్కారాలు. నా పేరు సుబ్బమ్మ. ఒకసారి ఉన్నట్టుండి నా మొబైల్ ఆఫ్ అయింది. బటన్స్ ఏవీ పని చేయలేదు. అప్పుడు నేను "రిపేర్‌కు ఇవ్వకుండా బాగా అవ్వాలి బాబా" అని అనుకున్నాను. తర్వాత మా మనవడు ఏదో చేస్తే ఆన్ అయింది.

మా మనవరాలికి సైనస్ బాగా ఎక్కువై అదంతా కుడికన్ను వెనకకు చేరి విపరీతమైన మాడు నొప్పి, కన్నునొప్పితో కొన్నేళ్లు బాధపడింది. కానీ మాకెవరికీ చెప్పలేదు. చివరికి 2024, జూలైలో మాకు చెప్పింది. వెంటనే ఒక డాక్టర్‌కి చూపిస్తే మందులు వ్రాసిచ్చి వాడమని, తగ్గకపోతే సర్జరీ చేయాలన్నారు. అయితే మందులతో తగ్గలేదు. అప్పుడు ఇంకో డాక్టర్ని సంప్రదిస్తే, ఆపరేషన్ చేయాలని సెప్టెంబర్‌లో ముక్కు ద్వారా ఆపరేషన్ చేసారు. 3 గంటల సమయం పట్టింది. అమ్మాయి ఒక 2, 3 రోజులు చాలా బాధపడింది. నేను సాయి నామస్మరణ చేస్తూ, "పాపకి తగ్గిపోయావాలి. నేను స్తవనమంజరి 48 రోజుల పారాయణ చేస్తాన"ని బాబాకి మ్రొక్కుకొని పారాయణ మొదలుపెట్టాను. బాబా దయవల్ల నొప్పి చాలావరకు తగ్గింది. అప్పుడప్పుడు తలనొప్పి మాత్రం వస్తుంది. బాబా దయవల్ల తొందర్లో అది కూడా తగ్గుతుందని అనుకుంటున్నాను. మనస్ఫూర్తిగా అర్థించి తప్పకుండా కాపాడతారని గట్టిగా నమ్మితే మనల్ని వదిలిపెట్టరు నా సాయి. "ధన్యవాదాలు బాబా. ఇలాగే అందరినీ కాపాడు తండ్రీ".

---