శ్రీ సచ్చిదానంద సద్గురు సాయినాథ్ మహారాజ్ కీ జై
శ్రద్ధ - సబూరి
నార్త్ ఇండియా నుండి సాయిభక్తురాలు సగుణ్ గారి 2018 విజయదశమి నాటి అనుభవం:
నేను నా రీసెంట్ అనుభవాన్ని సాయిబంధువులందరితో పంచుకోవాలనుకుంటున్నాను. నేను ప్రతి గురువారం మాకు దగ్గరగా ఉన్న బాబా మందిరానికి వెళ్తూ ఉంటాను. ఆ మందిరంతో నాకు చాలా అనుబంధం ఉంది. ఆ మందిరమే నాకు శిరిడీ. ఎందుకంటే ఎప్పుడు పడితే అప్పుడు మన భావాలు బాబాతో పంచుకోవడానికి శిరిడీ వెళ్లలేము కదా! నా సంతోషం, దుఃఖం అన్నీ ఇక్కడి బాబాతోనే పంచుకుంటూ ఉంటాను. అందుకే ఈ మందిరం నాకు శిరిడీ కంటే తక్కువ కాదు. నాకెటువంటి ఫీలింగ్ కలిగినా మొట్టమొదటగా గుర్తు వచ్చేది ఈ బాబానే. ఆయనతోనే అన్నీ పంచుకుంటాను. అంతలా ఆ మందిరంలోని బాబాతో నా అనుబంధం ముడి వేసుకొని ఉంది. అటువంటిది ఈ శతాబ్ది సంవత్సరంలో ఆ మందిరంలో బాబాకు ప్రత్యేకంగా ఏమీ చేయట్లేదని తెలిసి నేను చాలా బాధపడ్డాను. అంతటా ఉన్న చిన్న చిన్న మందిరాలలో సైతం శతాబ్ది ఉత్సవాలు చేసుకుంటూ ఉంటే ఈ మందిరంలో మాత్రమే చేసుకోకపోవడం ఏమిటన్న ఆలోచనే నా మనస్సుని కుదిపేసింది. అన్ని మందిరాలూ జనంతో కిటకిటలాడుతూ ఉంటే ఇక్కడ మాత్రం ఏ ఉత్సవం లేక వెలవెలబోతుందని నా మనస్సులో విపరీతమైన బాధను అనుభవించాను. "ఇలా జరగడం ఏమైనా బాగుందా బాబా?" అనుకున్నాను. అంతే! బాబా నా మనసులో ఒక ఆలోచన కలిగించారు. ఆరోజు ప్రత్యేకమైనదిగా చేయడానికి నేనే ముందడుగు వేద్దామనుకున్నాను. కాని ఒకరు, "మీరు ఒక్కరు చెప్పడం వలన ఏమవుతుంది? ఎవరు వింటారు?" అన్నారు. ఆ మాట నాలో విద్యుత్ ప్రవాహాన్ని కలిగించింది. అంతే! వేగంగా సాయి మందిరానికి వెళ్లి అక్కడ డెకరేషన్ వర్క్స్ చేసే వ్యక్తిని కలిసి మాట్లాడాను. అతను 100వ సంవత్సర బ్యానర్, బాబాకు పుష్పాలంకరణకు అంగీకరించాడు. నేను అతనికి చాలా ధన్యవాదాలు చెప్పాను. తరువాత నేను ప్రతిరోజూ మందిరానికి వచ్చే భక్తులతో మాట్లాడాను. వాళ్లు కూడా 19న విజయదశమి రోజున కీర్తనలు చేయాలని, ఖిచిడీ ప్రసాద వితరణ చేయాలనీ ఆలోచిస్తున్నామని చెప్పారు. అలా అన్నీ ఒక పద్ధతి ప్రకారం బాబా కృపతో అమరిపోయాయి. నేను అనుకున్నదానికంటే అద్భుతంగా వేడుకలు నిర్వహించబడ్డాయి. అవన్నీ చూసి నా కళ్ళనుండి ఆనందభాష్పాలు ప్రవహించాయి. మరో ముఖ్య విషయం - ఈ వేడుకలలో మైకులో బాబా భజనలు పాడే అవకాశం మొదటిసారిగా బాబా ఇచ్చారు. అంతేకాకుండా నా భుజాలపై బాబా పల్లకీ మోసే అవకాశం వచ్చింది. భక్తికి అపరిమితమైన శక్తి ఉందని ఋజువైంది. మంచి ఆలోచనలను బాబా 100% ప్రోత్సహిస్తారు. భక్తులంతా కలిసి బాబా ముందు భక్తిపారవశ్యంతో నృత్యం చేసాము. అంత అద్భుతమైన వేడుకలు నేను ఎప్పుడూ చూడలేదు. అంత గొప్పగా చేయించారు బాబా. నా ఊహకు మించి అందరూ పనిచేశారు. అలంకరణలు, భజనలు గొప్పగా జరిగాయి. అమితమైన ఆనందోత్సాహాలతో భక్తులు బాబా ప్రేమలో తడిసి ముద్దైపోయారు. మనోహరమైన అనుభవాన్ని, మరపురాని అద్భుతమైన రోజును ఇచ్చినందుకు మీకు నా కృతజ్ఞతలు బాబా! ఎక్కడైతే ప్రణాళిక, కనీసం ఆలోచన లేదో అక్కడ బాబా అద్భుతమైన వేడుకలు చేయించారు. నా అనుభవాన్ని చదివినందుకు ప్రేమపూర్వక ధన్యవాదాలు.
ఓం సాయిరాం!
🕉 sai Ram
ReplyDelete