నవ గురువార వ్రత అనుభవాలు.....

---

శ్రీ సచ్చిదానంద సద్గురు సాయినాథ్ మహారాజ్ కీ జై

శ్రద్ధ  -  సబూరి

పేరు వెల్లడించని ఒక సాయిభక్తురాలు తన అనుభవాన్నిలా తెలియజేస్తున్నారు.

ఇది నా రెండవ అనుభవం, బ్లాగు ద్వారా సాయిబంధువులతో పంచుకోవాలని వ్రాస్తున్నాను. ఇదివరకు గర్భధారణ సమయంలో బాబా నాకు ఎలా సహాయం చేశారో మీతో పంచుకున్నాను. ఇప్పుడు నేను 'నవ గురవార వ్రతం' ద్వారా ఒక పెద్ద సంక్షోభం నుండి ఎలా బయటపడ్డానో తెలియజేస్తాను.

ఆఫీసులో నాకు చాలా క్లిష్టమైన పరిస్థితులు ఎదురు కావడంతో పని మీద శ్రద్ధ పెట్టలేకపోయాను. ఆ ఒత్తిడి కారణంగా పిల్లల్ని కూడా జాగ్రత్తగా చూసుకోలేకపోయాను. అలా నిద్రలేని రోజులు చాలా గడిపాను. ఇట్టి పరిస్థితులలో ఎన్నోసార్లు నేను నవ గురువార వ్రతం గురించి చదివినప్పటికీ, వ్రతం మొదలుపెట్టే ధైర్యం చేయలేకపోయాను. కానీ ధైర్యం కూడదీసుకుని వ్రతం చేయాలని నిర్ణయించుకొని వ్రతం మొదలుపెట్టాను. వ్రతం మొదలుపెట్టిన వెంటనే బాబా కృప చూపారు. మొదటి గురువారం పూజ అయినప్పటి నుంచి నిద్ర లేకపోవడమంటూ ఎప్పుడూ లేదు. నెమ్మదిగా మనస్సుకు శాంతి చేకూరింది. చివరకు ఆఫీసు పరిస్థితులలో కూడా మార్పు వచ్చింది. 7వ గురువారం పూజ చేసేసరికి బాబా నాకు సహాయం చేయడానికి ఒక వ్యక్తిని పంపారు. నేను అతన్ని మొదటిసారి కలిసాను. అతనితో మాట్లాడాక మీటింగ్ హాల్ నుండి నేను నవ్వుతూ బయటకు వచ్చాను. ఇదంతా బాబా చేసిన అద్భుతమే. ఆ మీటింగ్ నుండి ఇంటికి వచ్చిన వెంటనే నా ఈ అనుభవాన్ని టైప్ చేసాను. "బాబా! ఎప్పుడూ నాకు ఇలాగే తోడుగా ఉండండి. మిగిలిన వ్రతాన్ని కూడా పూర్తి చేసేలా నాకు సహాయం చేయండి. మేము శిరిడీ రావడానికి ప్లాన్ చేసుకుంటున్నాం. మేము అక్కడకు వచ్చి, మీ దర్శనభాగ్యం త్వరగా పొందేలా మమ్ము అనుగ్రహించండి. ధన్యవాదాలు బాబా!"

అమెరికా నుండి మరో అజ్ఞాత సాయిభక్తురాలు ఇలా చెప్తున్నారు.

అందరికీ సాయిరామ్. నేను, నా భర్త, 17 నెలల బాబుతో అమెరికాలో ఉంటున్నాము. పెద్దవాళ్లెవరూ లేకుండా, వాళ్ళ సహాయం లేకుండా ఇంటి పని అంతా చూసుకోవడం ఇక్కడ చాలా కష్టం. నేనిప్పుడు రెండు అనుభవాలను మీతో పంచుకుంటాను.

చెవి ఇన్ఫెక్షన్(అలెర్జీ)తో మొదలుపెట్టి మా బాబు రెండు వారాలపాటు ఏదో ఒక జబ్బుతో బాధపడ్డాడు. నేను డాక్టర్ ని కలవడానికి వెళ్లిన ప్రతిసారీ 'సాయిసచ్చరిత్ర' నాతో తీసుకుని వెళ్ళేదాన్ని. బాబా దయవలన ఎల్లప్పుడూ మాకు మంచి మార్గనిర్దేశం లభించింది. బాబా కృపవలన మా బాబు త్వరగా కోలుకున్నాడు.

నేను, నా భర్త ప్రతి గురువారం సాయి పూజ చేస్తాము. 9 వారాలు పూర్తైన తర్వాత ఆలయంలోని భక్తులకు ప్రసాదం పంపిణీ చేస్తాము. ప్రతి 9 వారాల పూజ తరువాత బాబా మమ్మల్ని శుభ పరిణామాలతో ఆశీర్వదించారు. ఒకసారి నా భర్త i140 (యు.ఎస్.ఏ లో వర్క్ చేయడానికి చాలా ముఖ్యమైనది)కి దాఖలు చేసి 8 నెలలు అయినా ఆమోదింపబడలేదు. 9 వారాల పూజ పూర్తైన తరువాత అది ఆమోదింపబడుతుందని నేను, నా భర్త అనుకున్నాం. కానీ మా అంచనా తప్పింది. ఎందుకంటే, మా పూజ ఎప్పుడూ బాబాపట్ల శ్రద్ధతో కాకుండా, లౌకిక పరమైనదిగా ఉండేది. నేను నా తప్పు తెలుసుకొని బాబాకు క్షమాపణ చెప్పుకొని మళ్ళీ తాజాగా 9 వారాల పూజను మొదలుపెట్టాను. ఈసారి లౌకికపరమైన ఆలోచనలేవీ మనసులో రానివ్వకుండా చాలా శ్రద్ధగా ప్రేమతో పూజ చేశాను. సరిగ్గా 9 వారాల తర్వాత మేము i140 ఆమోదం పొందాము. తన భక్తులకు ఏమి ఇవ్వాలో, ఎప్పుడు ఇవ్వాలో బాబాకు తెలుసు. మనం మాత్రం అన్ని పరిస్థితుల్లోనూ బాబా పట్ల శ్రద్ధ - సబూరీ కలిగి ఉండాలి.

ఓం సాయిరాం.

---