సాయిభక్తుల అనుభవమాలిక 1784వ భాగం....

---

ఈ భాగంలో అనుభవాలు:

1. బాబా లేకపోతే ఏదీ సాధ్యం కాదు

2. సాయి అనుగ్రహం

---

బాబా లేకపోతే ఏదీ సాధ్యం కాదు

సాయిబంధువులకు నమస్కారం. నేను ఒక సాయి భక్తురాలిని. నాకు తల్లి, తండ్రి, గురువు, దైవం, స్నేహితులు అన్ని బాబానే. మా చెల్లి వివాహానికి ముహూర్తం నిర్ణయించుకున్నాక మా నాన్నకు దాదాపు 15 లక్షల రూపాయలు కావాల్సి వచ్చింది. చిట్టీ డబ్బులు వస్తాయని చూస్తే, అవి సమయానికి చేతికి అందలేదు. అవతల మగపెళ్లివాళ్ళకి ముందుగా అనుకున్న సమయానికల్లా 12 లక్షలు అందజేయాల్సి ఉంది. నేను నా అలవాటు ప్రకారం ఎప్పటికప్పుడు బాబాతో అన్ని విషయాలు చెప్తూ, "ఎలాగైనా సమయానికి డబ్బు అందేలా చూడమ"ని వేడుకుంటూ ఉండేదాన్ని. కానీ ఎవరు ఇస్తారని ఒక చిన్న భయం కూడా ఉండేది. అయితే బాబా దయవల్ల మా నాన్న దగ్గర వడ్డీకి డబ్బులు తీసుకున్న ఒక అతను కొంత మొత్తాన్ని, మా మరిది మరికొంత మొత్తాన్ని, మిగతా డబ్బులు మా నాన్నకి తెలిసిన ఒక అంకుల్ ఇవ్వడంతో అనుకున్న సమయానికి మగపెళ్ళివారికి డబ్బు ఇవ్వగలిగాము. ఇకపోతే చిన్నచిన్న మొత్తాల్లో డబ్బు నాన్న సర్దుబాటు చేసుకోవడంతో పాటు కిరాణా షాపువాళ్లకి, టెంట్ వాళ్లకి, వంటవాళ్లకి కాస్త సమయం తీసుకుని ఇస్తానని మాట్లాడుకోవడం వల్ల ఏ సమస్య లేకుండా అంతా సవ్యంగా జరిగింది.

నేను మా అమ్మానాన్నలకు పెద్ద కూతుర్ని. నా చెల్లెళ్ళ పెళ్లి అప్పుడు పెళ్లి బొట్టు పెట్టడం, మంగళహారతి ఇవ్వడం వంటివి నేనే చేస్తాను. కానీ ఈ చెల్లి పెళ్లి సమయానికి నా నెలసరి సమయమైంది. టాబ్లెట్లు వేసుకుందామంటే పది వరకు వేసుకోవాలి. అన్ని వేసుకుంటే తర్వాత కడుపునొప్పి వస్తుందని భయం. అందువల్ల రోజూ బాబాని ఈ సమస్య నుండి తప్పించండి అని వేడుకుంటూ ఉండేదాన్ని. విచిత్రంగా అంతకుముందు ఎన్నడూ జరగని విధంగా ఆరు రోజుల ముందే నెలసరి వచ్చేయడంతో పెళ్లిలో సంతోషంగా పాల్గొన్నాను. ఇది కేవలం బాబా వల్లనే సాధ్యమైంది.

2023, సెప్టెంబర్ నెల చివరి వారంలో మేము తిరుమలలో అంగప్రదక్షిణకు టికెట్లు బుక్ చేసుకొని ట్రైన్ టికెట్లు కూడా తీసుకున్నాం. అది మాలో ఎవరికీ నెలసరి సమయం కాదు. కానీ మా చిన్నమ్మాయికి రావాల్సిన సమయానికి నెలసరి రాలేదు. తిరుమల వెళ్ళే సమయం దగ్గర పడుతున్న కూడా తనకి నెలసరి రాలేదు. అందుచేత నెలసరి రాకుండా టాబ్లెట్లు వేసుకోమంటే తను, "నేను రావడం మానేస్తాను గాని, టాబ్లెట్లు వేసుకోన"ని చెప్పింది. పోనీ, ప్రయాణాన్ని రద్దు చేసుకుందామంటే, మళ్ళీ ఎప్పుడు వెళ్తామో తెలియదు. అందువల్ల బాబాపై భారమేసి ధైర్యంగా వెళ్లాలని బయలుదేరాం. నాకు, మావారికి అంగప్రదక్షిణ టికెట్లు ఉన్నాయిగాని పిల్లలకి లేవు. అందువల్ల మెట్ల మార్గంలో టికెట్లు ఇస్తారని శ్రీవారి మెట్ల మార్గం గుండా తిరుమల కొండెక్కేందుకు బయలుదేరాం. మధ్య దారిలో గతంలో చిరుతపులి ఒక పాపను చంపేయడం గుర్తుకు వచ్చి చాలా భయమేసింది. అప్పుడు బాబా ఉన్నాక ఏదీ మనల్ని ఏమీ చేయలేదని అనుకొని ధైర్యంగా ముందుకు సాగాము. కొండపై పైకి వెళ్ళాక అందరం ప్రశాంతంగా స్వామివారి దర్శనం చేసుకున్నాము. గతంలో అంగప్రదక్షిణకి వెళ్లిన మా చెల్లి, మరిది ప్రదక్షిణ పూర్తిగా చేయలేక మధ్యలోనే లేచిపోయారు. అందువల్ల మా వాళ్ళందరూ మమ్మల్ని అంగప్రదక్షిణకు వెళ్లోద్దని చెప్పారు. నేను వాళ్లతో బాబా ఉండగా నాకేమీ కాదని చెప్పాను. బాబా దయవల్ల మాకు ఏ మాత్రం కష్టం అనిపించలేదు. ఇంకా ఇంటికి వచ్చిన వారం రోజులకి మా చిన్న అమ్మాయికి నెలసరి వచ్చింది. బాబా లేకపోతే ఏదీ సాధ్యమయ్యేది కాదు. 

మా చెల్లి పెళ్ళికి నెల ముందు నా కింద పళ్ళు రెండు పీకించి కొత్తవి పెట్టించాల్సిన అవసరం ఏర్పడింది. నాకేమో ఇంజక్షన్ అంటే భయం. అందువల్ల చాలా టెన్షన్ పడి బాబాతో ఎన్నోసార్లు, "నొప్పి లేకుండా చూడమ"ని వేడుకున్నాను. చివరికి ఒకరోజు నేను, మా అమ్మాయి హాస్పిటల్‌కి వెళదామని బయలుదేరాము. అప్పుడు ఒక ఆటో వెనక బాబా అభయహస్తంతో దర్శనమిచ్చారు. దాంతో బాబా తోడుగా వస్తున్నారని నాకు ధైర్యం వచ్చింది. బాబా దయవల్ల డాక్టరు ఏ నొప్పి లేకుండా చికిత్స చేసారు. ఇంతలా ఎంతో సహాయం చేస్తున్న నా తండ్రి సంవత్సరాల తరబడి మానసికంగా నలిగిపోతున్న ఒక క్లిష్టమైన సమస్య నుండి బయటపడేస్తే మరోసారి అందరితో ఆయన అనుగ్రహం పంచుకుంటాను. "ధన్యవాదాలు బాబా. ఏమిచ్చి మీ ఋణం తీర్చుకోవాలి తండ్రీ".

ఓంసాయి శ్రీసాయి జయజయసాయి!!!

---

సాయి అనుగ్రహం

సాయినాథుని పాదారవిందములకు ఆనంతకోటి ప్రణామాలు. తోటి సాయి బిడ్డలందరికీ నమస్కారాలు. నా పేరు సీత. చాలా ఏళ్లగా మా కుటుంబంలోని అందరం సాయి భక్తులం.  సాయినాథుని అనుగ్రహంతో మా అమ్మాయి పెళ్లి జరిగింది. కానీ తనకి పిసిఓఎస్  సమస్య ఉండడం వల్ల సంతానం విషయంలో ఏమైనా ఇబ్బంది అవుతుందేమోనని నేను భయపడ్డాను. అందువల్ల, "సాయినాథా! మీ అనుగ్రహంతో అమ్మాయికి సంతానం కలిగితే మీ అనుగ్రహం గురించి బ్లాగు ద్వారా తోటి భక్తులతో పంచుకుంటాన"ని సాయికి మొక్కుకున్నాను. అద్భుతం! సంవత్సరం లోపల మాకు మనవరాలు పుట్టింది. సాయినాథుని కృపను వర్ణించటానికి నాకు మాటలు చాలటం లేదు. "ధన్యవాదాలు బాబా. ప్రస్తుతం మేము మా అబ్బాయి ఆర్థిక, మానసిక, సంసారిక సమస్యలతో చాలా బాధపడుతున్నాము. తట్టుకునే శక్తిని మీరు ఇస్తున్నప్పటికీ సమస్యలు సానుకూలంగా పరిష్కారమై మేము ప్రశాంతంగా ఉండేటట్టు చూడు తండ్రీ. మీ అనుగ్రహం తోటి భక్తులతో తప్పకుండా పంచుకుంటాను".

---