1. అవాంతరాలను దాటించి సర్జరీ పూర్తి చేయించిన బాబా
2. బాబా దయతో తగ్గిన నొప్పి - పట్టిన నిద్ర
అవాంతరాలను దాటించి సర్జరీ పూర్తి చేయించిన బాబా
సాయిబంధువులందరికీ నమస్కారాలు. నా పేరు కీర్తన. మాది కర్నూలు. సాయి మా మీద చూపిస్తున్న ప్రేమను నేను మాటల్లో చెప్పలేను. బాబా నా భర్తను కరోనా నుండి, ఇంకోసారి పాంక్రియాటైటిస్ నుంచి క్షేమంగా కాపాడారు. ఇకపోతే నా భర్తకి కిడ్నీ సమస్య ఉంది. ఆ సమస్యకు పరిష్కారం చూపమని నేను బాబాను చాలా వేడుకున్నాను. దయగల సాయి సమస్యకి పరిష్కారం చూపారు. డాక్టర్లు కిడ్నీ మార్పిడి చేయాలన్నారు. మా ఆడబిడ్డ(మావారి అక్క) తన కిడ్నీ ఇవ్వడానికి ఒప్పుకుంది. ఇలా అంతా బాగా నడుస్తుందనుకున్న సమయంలో మా ఆడబిడ్డ భర్త(అన్నయ్య)కి క్యాన్సర్ అని తెలిసింది. ఆయనకి కీమోతెరఫీ కూడా మొదలుపెట్టారు. ఆ సమయంలో ఏం చేయాలో, ఎలా ఆలోచించాలి మాకు తెలియలేదు. మా పరిస్థితి పగవాడికి కూడా రాకూడదని నేను ఏడవని రోజంటూ లేదు. మా ఆడబిడ్డ భర్తకి రాకూడని జబ్బు వచ్చి కష్టంలో వుంటే నేను తనని నా భర్తకు కిడ్నీ ఇవ్వమని ఎలా అడిగేది? బాబా మా సమస్యను తీర్చినట్టే తీర్చి ఎందుకు ఇలా చేశాడని చాలా బాధపడ్డాను. ఏదేమైనా భారం ఆయన మీదే వేసాను. ఇలా ఉండగా డాక్టర్లు మావారికి కిడ్నీ మార్పిడి తొందరగా చేయాలని అనసాగారు. మరోపక్క మా ఆడబిడ్డ భర్త కీమో వల్ల చాలా నీరసించిపోయారు. డాక్టర్లు, "బతికినన్ని రోజులు బాగా చూసుకోండి" అని అన్నారు. కానీ అన్నయ్య సరిగా ఆహారం తీసుకోకపోవడం వల్ల చాలా సీరియస్ అయింది. దాంతో ఆయన్ని హాస్పిటల్లో అడ్మిట్ చేశాము. ఆయన నిజంగా దేవుడు. తనకు అంత బాగాలేకున్నా తన భార్యను టెస్టుల కోసం పంపించారు. మావారికి, మా ఆడబిడ్డకు అన్ని మ్యాచ్ అయి 2023, మే 5న సర్జరీ చేయడానికి నిర్ణయించారు. అయితే అన్నయ్య ఆహారం తినకపోవడం వల్ల చాలా నీరసంగా అయిపోయారు. భర్తని ఆ స్థితిలో వదిలి రాలేక మా ఆడబిడ్డ, తనతోపాటు మేము నరకం అనుభవించాము. డాక్టర్లు ఏమో నా భర్తకు ఎక్కువ రోజులు డయాలసిస్ వద్దని, వెంటనే కిడ్నీ మార్పిడి చేయాలని అన్నారు. మాకు ఏం చేయాలో అర్థం కాలేదు కానీ, బాబా అద్భుతం చేసారు. అన్నయ్య ఆహారం తీసుకోవడం మొదలుపెట్టారు. రోజురోజుకి ఆయన రికవర్ అవుతూ, "నాకు బాగుంది. నువ్వు హైదరాబాద్ వెళ్ళు" అని మా ఆడబిడ్డని పంపించారు. సర్జరీ అయ్యేవరకు మేమందరం చాలా టెన్షన్ పడ్డాం. కానీ బాబా దయవల్ల సర్జరీ సక్సెస్ అయి ఇద్దరూ త్వరగా కోలుకున్నారు. కానీ సర్జరీ అయిన 20 రోజులకి అన్నయ్యకు చాలా సీరియస్ అయి మే 26న చనిపోయారు. అంతా బాగా అయ్యిందన్న సమయంలో ఆవిధంగా జరిగేసరికి మా కుటుంబంలో అందరికీ చాలా బాధ కలిగింది. మా ఆడబిడ్డ బాధ అయితే వర్ణనాతీతం. బాబా ఎందుకిలా చేశారని నాకు చాలా కోపం వచ్చింది. కానీ కర్మఫలం అనుభవించక తప్పదుగా. ఇకపోతే మావారికి సర్జరీ అయి ఇప్పటికి 8 నెలలు అయింది, క్రియేటిన్ కాస్త పెరుగుతూ, తగ్గుతూ ఉంది. "బాబా! నాకు మీరు తప్ప ఎవరూ లేరు. ఒకవేళ నేను నా అనుభవం పంచుకోవడం ఆలస్యం చేసినందుకు మమ్మల్ని పరీక్షిస్తున్నావేమో అని ఇంకా ఆలస్యం చేయకుండా నా అనుభవాన్ని తోటి సాయిభక్తులతో పంచుకున్నాను. ఇంకా బాధలు, భరించే ఓపిక నాకు లేదు. మీ ఇష్టం బాబా, మీ మీదే భారమేసాను. మా జీవితాలను ఏం చేస్తావో మీదే భారం తండ్రి". నా ఈ అనుభవం చదివాక అంతా బాగా అవ్వాలని మీరంతా కూడా బాబాను ప్రార్థిస్తారని ఆశిస్తూ అందరికీ ధన్యవాదాలు.
ఓం శ్రీసాయినాథాయ నమః!!!
బాబా దయతో తగ్గిన నొప్పి - పట్టిన నిద్ర
ఓంసాయి శ్రీసాయి జయజయసాయి!!! నా పేరు లలిత. మాది రాజాం. సాయి నాకు ఎన్నో అనుభవాలు ప్రసాదించారు. ఈమధ్య ఒకరోజు రాత్రి మా ఆయనకి చేయి నొప్పి చాలా ఎక్కువగా వచ్చింది. దాంతోపాటు కాలు నొప్పి కూడా ఉందని అన్నారు. ఆ నొప్పి కారణంగా ఆయన అస్సలు నిద్రపోలేకపోయారు. నేను ఆయింట్మెంట్ రాసి, దానితోపాటు బాబా ఊదీ మావారి చేతికి రాసి, "బాబా! మావారికి నొప్పి తగ్గి నిద్రపోయేలా చేయి తండ్రీ" అని బాబాకి దణ్ణం పెట్టుకున్నాను. అలాగే మావారికి ఏ ఇబ్బంది లేకుండా ఉంటే, నా అనుభవం తోటి భక్తులతో పంచుకుంటానని అనుకున్నాను. బాబా దయవలన మావారి నొప్పి కొంచెం తగ్గి, నిద్ర కూడా బాగా పట్టింది. మరుసటిరోజు మావారు ఉదయం డాక్టర్ దగ్గరకి వెళితే, డాక్టరు చూసి, "చాలా నీరసంగా ఉండటం వలన ఇలా అయ్యింది" అని మందులు వ్రాసి, "ఏ ఇబ్బంది లేదు" అని అన్నారు. "ధన్యవాదాలు సాయి. ఏమిచ్చి మీ ఋణం తీర్చుకోవాలి తండ్రీ. మీ పాదాలందు స్థిరమైన నమ్మకం, భక్తి కలిగే ఉండేలా అనుగ్రహించు తండ్రీ".
బోలో సచ్చిదానంద సద్గురు సాయినాథ్ రాజ్ కి జై!!!
