సాయిభక్తుల అనుభవమాలిక 15వ భాగం....

---

ఈరోజు భాగంలో అనుభవాలు:

• కలలో ముందుగానే సూచించారు బాబా..

• ఊదీ చూపిన ప్రభావం.

---

కలలో ముందుగానే సూచించారు బాబా.

USA నుండి ఒక అజ్ఞాత సాయిభక్తురాలు తన అనుభవాన్ని పంచుకుంటున్నారు.

బాబా కృపవలన మా అమ్మాయి ఫస్ట్ స్టాండర్డ్‌లో ఉండగానే ఎన్రిచ్‌మెంట్ ప్రోగ్రాంకి ఎంపికైంది. అదే సంవత్సరం నేను శిరిడీతోపాటు మహారాష్ట్రలోని మరికొన్ని పుణ్యక్షేత్రాలు కూడా దర్శించాను. తర్వాత స్కూల్ నుండి, "మీ పాప ప్రతి సంవత్సరం ఇదే స్థాయి(పర్సెంటేజ్) కొనసాగిస్తే తన ఎలిమెంటరీ చదువు మొత్తం ఈ ప్రోగ్రాం క్రింద నడుస్తుంద"ని మెసేజ్ వచ్చింది. మేము చాలా సంతోషించాము. అయితే మా పాప సెకండ్ స్టాండర్డ్ వరకు ఆ స్థాయి కొనసాగించింది కానీ, థర్డ్ స్టాండర్డ్ మధ్యలోకి వచ్చేసరికి నిదానంగా తన పర్సెంటేజ్ పడిపోయింది. ఆ విషయమై నేను బాబాను ప్రార్థించాను. ఆయన కృపవలన తన పర్సెంటేజ్ పుంజుకుంది కానీ, మేము కొన్ని కుటుంబపరంగా అత్యవసర పరిస్థితులలో ఎక్కువగా ప్రయాణాలు చేస్తుండటంవలన అనుకున్న స్థాయిలో తన పర్సెంటేజ్ పెరగలేదు. నేను ఇంక ఆశ వదులుకుని మళ్లీ వేరే పనిమీద దేశం వదిలి వెళ్ళాను. తల్లి మనస్సు కదా! ఉండబట్టలేక నేను, "బాబా! మా పాప మునుపటిలా మంచి పర్సెంటేజ్ తెచ్చుకునేవరకు వంకాయకూర తినను" అని ప్రార్థించాను. అలా అనుకున్న తర్వాత ఒకరోజు కలలో నా ఫ్రెండ్ ఒక పాత్రనిండా వంకాయకూర నాకు తినడానికి ఇచ్చింది. రెండురోజుల తర్వాత నా భర్త ఫోన్ చేసి, "మన పాప మళ్ళీ ఎన్రిచ్‌మెంట్ ప్రోగ్రామ్‌కి సెలెక్ట్ అయింది" అని చెప్పారు. బాబా లీల చూసారా! ముందుగానే ఆయన నాకు కలలో నా ఫ్రెండ్ ద్వారా నాకు వంకాయకూర ఇచ్చి నా కోరిక నెరవేరుతుందని సూచించారు.

---

ఊదీ చూపిన ప్రభావం

సాయిభక్తురాలు సునందన తన అనుభవాన్ని పంచుకుంటున్నారు.

నేను బాబాకు చిన్న భక్తురాలిని. గత కొన్ని నెలలుగా బాబాకి నేను చాలా దగ్గరయ్యాను. బ్లాగులో భక్తుల అనుభవాలు చదవడంవలన బాబాపట్ల భక్తివిశ్వాసాలు పెరుగుతూ, రోజురోజుకీ బాబాకి ఎంతో దగ్గరవుతున్నాను. బ్లాగులు నిర్వహిస్తున్నవారికి నా ధన్యవాదములు.

మొదటి అనుభవం:

ఒకరోజు సంవత్సరం రెండునెలల వయసున్న నా సోదరి కొడుకు అర్థరాత్రి హఠాత్తుగా ఏడవడం మొదలుపెట్టాడు. కారణం ఏమిటో మాకు అర్థం కాలేదు. తనను ఉరుకోబెట్టడానికి మేమెంతగానో ప్రయత్నించాము కానీ, వాడు బిగ్గరగా ఏడుస్తూ ఉండటంతో మేము భయపడిపోయాము. ఆ సమయంలో నేను బాబాని ప్రార్థించి, వాడి నుదుట ఊదీ పెట్టాను. కేవలం 5 నిమిషాల్లో వాడు సాధారణ స్థితికి వచ్చి చక్కగా నవ్వడం మొదలుపెట్టాడు.

రెండవ అనుభవం: కొన్నిరోజులపాటు రోజూ ఉదయాన్నే యూరిన్ కి వెళ్లే సమయంలో మా మేనల్లుడు ఏడుస్తూ ఉండేవాడు. మేము డాక్టరుని సంప్రదిస్తే యూరిన్ టెస్టులు చేసారు. రిపోర్టులో బ్యాక్టీరియా ఇన్ఫెక్షన్ అని వచ్చింది. డాక్టర్ కొన్ని మందులు, క్రీమ్ వ్రాసి, "ఇన్ఫెక్షన్ పూర్తిగా పోవడానికి సమయం పడుతుంది. వారం తరువాత మళ్లీ టెస్టులు చేయించండి" అని చెప్పారు. ఆ వారంలో మేము ఊదీని నీళ్లలో కలిపి వాడికిస్తూ, "బాబా! వాడికి నయం చేయండి" అని ప్రార్థిస్తూ ఉండేవాళ్ళం. తర్వాత గురువారంనాడు పరీక్షలు చేయిస్తే రిజల్ట్స్ నార్మల్ గా వచ్చాయి. ఈ సంఘటనతో మా సోదరికి ఊదీ శక్తి అర్థమైంది. "థాంక్యూ సో మచ్ బాబా!"

---