సాయిబాబా సత్యం, ఆయన తన భక్తులకోసమే ఉన్నారు.
అజ్ఞాత సాయిభక్తురాలు తన అనుభవాన్నిలా పంచుకుంటున్నారు:
మొదటిసారి నేను నా అనుభవాన్ని బ్లాగులో పంచుకుంటున్నాను. భక్తుల అనుభవాలు చదవడం వలన మనసులోని ఆందోళనలు దూరం కావడం మాత్రమే కాకుండా, ఏదో తెలియని పాజిటివ్ ఎనర్జీ చేకూరి ప్రతికూల పరిస్థితులలో సైతం జీవితంపై ఆశ సంతరించుకుంటుంది. ఇటువంటి చక్కటి బ్లాగులు నిర్వహిస్తున్నవారికి ముందుగా నా ధన్యవాదాలు.
నేనుగానీ, మా కుటుంబంలోనివారు కానీ ఎవ్వరూ సాయిభక్తులు కాదు. అయినప్పటికీ పదేళ్లక్రితం శిరిడీ దర్శించే భాగ్యం లభించింది. అయితే అప్పుడు దాని ప్రాముఖ్యతను నేను అర్థం చేసుకోలేకపోయాను. మామూలుగా తీర్థయాత్రకు వెళ్లినట్లు శిరిడీ దర్శించామంతే! కానీ బాబా దర్శనం మాత్రం మర్చిపోలేనిది. ఆరోజు నేను పొందిన అనుభూతిని, భావోద్వేగాలను మాటలలో వివరించలేను. తరువాత మూడేళ్ళక్రితం మేమొక కొత్త ప్రాంతానికి మారాం. అక్కడికి దగ్గరలో ఉన్న చిన్న గుడికి తరచూ వెళ్తుండేదాన్ని. ఆ గుడిలో సాయిబాబా మూర్తి కూడా ఉంది. అందరి దేవుళ్ళతో పాటు బాబాను కూడా దర్శిస్తుండేదాన్ని. ఒకరోజు గుడినుండి తిరిగివచ్చేముందు కాసేపు కూర్చోవాలని అనుకున్నాను. అయితే జనసందోహం ఎక్కువగా ఉండటంతో కూర్చోవడానికి నాకు బాబా ముందు మాత్రమే చోటు దొరికింది. ఆయన ఎదురుగా ప్రార్థన ఏమీ చేయకుండా కన్నులు మూసుకుని కేవలం కూర్చున్నానంతే! ఏదో ప్రశాంతత, పాజిటివ్ ఎనర్జీ నాలో ప్రవహించి తెలియని సంతోషంలో ఎంతసేపు కుర్చున్నానో కూడా నాకు తెలియలేదు. తెలియని తన్మయత్వంలో సమయం గడిచిపోయింది. ఆ స్థితి నుండి బయటకు రావాలని అనిపించలేదు. కనులు తెరుస్తూనే నా మనసులోని ఆందోళనలకు, ప్రార్థనలకు సమాధానం దొరికినట్లు అనిపించింది. సమస్యలన్నీ వాటికై అవి తొలగిపోతాయని అనిపించింది. అటువంటి అనుభూతి మళ్ళీ ఇంతవరకు కలగలేదు. కానీ ఆ క్షణంనుండి సాయిబాబా సత్యం, ఆయన తన భక్తులకోసం ఉన్నారని నాకు అర్థమైంది. ఆరోజునుండి నేను మళ్ళీ వెనుకకు తిరిగి చూడాల్సిన అవసరం రాలేదు. ఇటీవల నా పూజ కాస్త మందంగా ఉన్నప్పటికీ బాబా నన్ను విడిచిపెట్టలేదు. నాకున్న చిన్న చిన్న ఆరోగ్య సమస్యలకు ఒకసారి బాబాని ప్రార్థించాను. మరుసటిరోజునుండి ఆ సమస్యలు పూర్తిగా పోయి, నేను నార్మల్ అయ్యాను. ఏ సమస్యకూ నేను బాబాని తప్ప ఇంకెవరినీ ప్రార్థించలేను. "థాంక్యూ సాయి! మేముండే అంధకారంలో ఎల్లప్పుడూ మా వెనుక ఉండే వెలుగు మీరే బాబా! జ్ఞానాన్ని ప్రసాదించి మీ చైతన్యాన్ని తెలియజేయడానికి మీరు అవతరించారు. థాంక్యూ సో మచ్ బాబా! నాకు సరైన మార్గాన్ని చూపిస్తున్నారు. మీ భక్తులందరూ ఇటువంటి అందమైన అనుభూతి పొందాలని ప్రార్థిస్తున్నాను బాబా!" ఈ ప్రయాణాన్ని అనుభూతి చెందవలసిందే గాని, మాటల్లో చెప్పలేనిది.
Ji sai ram ji ji sai ram
ReplyDelete