నా పేరు అనురాధ. నేను హైదరాబాదులోని అంబర్‌పేట నివాసిని. ఒకసారి నేను నా స్నేహితురాలితో కలిసి దిల్‌సుఖ్‌నగర్ బాబా గుడికి వెళ్ళినప్పుడు అక్కడ చాలా జనం ఉన్నారు. నేను నా స్నేహితురాలితో, "దర్శనానికి దాదాపు రెండుగంటల సమయం పట్టేలా ఉంది. అంతసేపు లైన్లో ఎవరుంటార"ని అన్నాను. మొదట్లో నా స్థితి అది. కానీ ఇప్పుడు బాబా నా ప్రాణం. ఇంతటి మార్పుకి కారణం ఒకే ఒక్క అనుభవం. దాన్నే నేనిప్పుడు మీతో పంచుకుంటాను.
నా స్నేహితురాలు మంచి సాయిభక్తురాలు. నేను కూడా తనలా బాబా తత్త్వంలోకి రావాలని ఆశిస్తూ, ఎప్పుడూ "అనురాధకి ఒకసారి కనిపించండి బాబా. తను మిమ్మల్ని నమ్మాలి" అంటూ బాబాని ప్రార్థిస్తూ ఉండేది. తనతోటే నేను బాబా గుడికి వెళ్తూ ఉండేదాన్ని. తను ఒకసారి నాతో, "ఇంకో వారంరోజుల్లో గురుపౌర్ణమి వస్తుంది కదా, బాబా నాకు గులాబీమాల ఇస్తారు" అని చెప్పింది. 'అది నీకెలా తెలుస'ని నేను అడిగితే, "నాకు తెలుసు. ఆయన ఇస్తారు. నేను మనసులో కోరుకుంటున్నానుకదా!" అని అంది. నాకు వింతగా అనిపించింది. తరువాత గురుపౌర్ణమిరోజు ఇద్దరం కలిసి బాబా గుడికి వెళ్ళాం. బాబా దర్శనానంతరం పూజారిగారు గులాబీమాల నాకిచ్చారు. నేను దాన్ని మా ఫ్రెండ్‌కి అందిస్తూ, "బాబా మాల కావాలని బాబాని అడుగుతున్నావు కదా, ఇదిగో తీసుకో!" అన్నాను. ఇక తన ఆనందానికి అవధులు లేవు. అయితే, నా మనసులో నాకొక గులాబిపువ్వు కావాలని ఉంది. కానీ నేను తనంత భక్తురాలిని కానని, బాబాకి నా కోరిక తీర్చాలని ఉండదని అనుకున్నాను. వాస్తవానికి గులాబీమాల బాబా నాకే ఇచ్చారు. కానీ నా మనసుకి ఎందుకో అప్పట్లో అది అర్థం కాలేదు. అది అర్థంకాక గులాబిపువ్వు ఇవ్వమని అడిగాను. అయితే, బాబా అద్భుతమైన అనుభవాన్ని ఇచ్చారు.
తరువాత కొన్నిరోజులకి ఇంట్లోని కొన్ని విషయాలవలన నా మనస్సు ఏమీ బాగాలేదు. ఆ సమయంలో, "ఏమిటి బాబా! 'నాపై నీ దృష్టి నిలుపు .. నేను నీపై నా దృష్టి నిలుపుతాను' అన్నావు. మరి నన్నెందుకు చూడట్లేదు? నాకెందుకు ఇన్ని బాధలు కలిగిస్తున్నావు?" అని అనుకున్నాను. తరువాత నా మనసుకెందుకో దిల్‌సుఖ్‌నగర్ బాబా మందిరానికి వెళ్ళాలనిపించి వెళ్ళి క్యూలో నిల్చున్నాను. క్యూలో నాకన్నా ఇద్దరిముందు ఆ మందిర కమిటీ మెంబర్ భార్య ఉన్నారు. ఆమెకి పూజారిగారు గులాబీమాల ఇచ్చారు. నేను వెంటనే బాబాతో, "నాకెందుకు ఇస్తావులే బాబా! కమిటీవాళ్లకు, డబ్బున్నవాళ్లకు ఇస్తావు" అనుకుని ఒక పక్కకి వెళ్ళి కూర్చున్నాను. మనసులో మాత్రం "ఏం బాబా! ఇవ్వవా?" అని బాబాని అడుగుతున్నాను. నా ముందు గులాబీమాల తీసుకున్న ఆవిడ ఉంది. తన జడలో పువ్వు కింద పడిపోతే, "చూసుకోండ"ని ఆమెకు చెప్పాను. తను వెనక్కి తిరగకుండా ఒక గులాబీపువ్వు నాకు అందించింది. నాకు ఆశ్చర్యంగా అనిపించి, "బాబా! తను నావైపు కనీసం తిరిగి చూడకుండా గులాబిపువ్వు ఇస్తుంది. నువ్వు నా మాటలు వింటున్నావని అర్థమయింది" అని మనసులో అనుకున్నాను. మరుక్షణం తను వెనక్కి తిరిగి నన్ను చూస్తూ ఒక అందమైన గులాబిపువ్వు ఇచ్చింది. నేను తన కళ్ళలోకి చూస్తే, ఆ కళ్ళు విగ్రహరూపంలో ఉన్న బాబా కళ్ళలాగా కనపడుతున్నాయి. నాకు మతిపోయింది. ఆశ్చర్యంతో ఒక 5 నిమిషాలపాటు ఏమి జరుగుతోందో అర్థంకాని ఒక తన్మయస్థితిలో ఉండిపోయాను. బాబా నా కోరిక తీర్చడానికి ఆమె రూపంలో వచ్చి నాకు గులాబీ ఇచ్చారు. ఆ సన్నివేశంతో బాబా నన్ను పూర్తిగా మార్చేశారు. అప్పటినుండి బాబాకి అంకిత భక్తురాలిగా మారిపోయాను. అంతా బాబా దయ. ఈ సన్నివేశాన్ని నేను నా జీవితంలో మర్చిపోలేను.
ఓం సాయి రామ్ 🙏🌹🙏
ReplyDeleteఓం శ్రీ సాయినాథాయ నమః!🙏
ఓం ఆరోగ్య క్షేమదాయ నమః!🙏
🕉 sai Ram
ReplyDelete