సాయిభక్తుల అనుభవమాలిక 1857వ భాగం....

---

ఈ భాగంలో అనుభవాలు:

1. సానుకూలంగా అనుగ్రహించిన బాబా

2. శిరిడీ ప్రయాణానికి ఆటంకం లేకుండా అనుగ్రహించిన బాబా

3. భక్తితో అడిగితే సమస్యని తీర్చిన బాబా

---

సానుకూలంగా అనుగ్రహించిన బాబా

ఓం శ్రీ సాయినాథాయ నమః. నేను ఒక సాయి భక్తుడిని. 2024, మే నెలలో నా భార్యకి నెలసరి రాలేదు. ఇంట్లోనే ప్రెగ్నెన్సీ టెస్ట్ చేసుకుంటే 'పాజిటివ్' వచ్చింది. అయితే మాకు సంవత్సరం ఐదు నెలల వయసు బాబు ఉన్నందున 'ఇది సరియైన సమయమేనా!' అని సందిగ్ధంలో పడ్డాము. కానీ నాకు ఎందుకో ‘బాబా ప్రెగ్నెన్సీ ఉంచుకోమని, అబార్షన్ చేసుకోవద్దని’ చెప్తున్నట్టు అనిపించింది. నా భార్య అక్క, అమ్మ కూడా అలానే చెప్పారు. అంతటితో బాబా వరమని ఆ ప్రెగ్నెన్సీ ఉంచుకుందామని నిర్ణయించుకున్నాము. రెండు రోజుల తరువాత నా భార్యకి నడుం నొప్పి మొదలైంది. ప్రెగ్నెన్సీ కన్ఫర్మ్ అవ్వడానికి ముందు వరకు తను రోజూ వ్యాయామాలు, జుంబా డాన్స్ చేస్తుండేది. దానివల్ల ప్రెగ్నెన్సీకి ఏమైనా సమస్య వచ్చిందేమో అని మాకు అనుమానం వచ్చింది. అప్పుడు ఎందుకైనా మంచిదని డాక్టర్ దగ్గరకి వెళ్ళాము. నేను బాబాని, "ఎటువంటి సమస్యలు రాకుండా చేయమ"ని ప్రార్థించాను. డాక్టర్ మొదట టెస్ట్ చేసి ప్రెగ్నెన్సీ కన్ఫర్మ్ చేశారు. 'హమ్మయ్య..' అనుకున్నాను. తర్వాత డాక్టరు, "విద్యుత్తు సమస్య వల్ల ఇప్పుడు స్కానింగ్ చేయడం కుదరదు. రాత్రి మళ్ళీ రండి" అని అన్నారు. స్కానింగ్ అనగానే నాకు టెన్షన్ మళ్ళీ మొదలై, "బాబా! స్కానింగ్‌లో అంతా బాగుండేలా చేయండి. మీకు 101 రూపాయల దక్షిణ సమర్పించుకుంటాను" అని బాబాను ప్రార్థించాను. బాబా దయ చూపారు. రాత్రి మళ్ళీ హాస్పిటల్‌‌కి వెళితే, స్కానింగ్ చేసి ఎటువంటి సమస్య లేదని డాక్టర్ నిర్ధారించారు. బిడ్డ గ్రోత్ కూడా బాగుందని చెప్పి చూపించారు. "ధన్యవాదాలు బాబా. మీరు ఎప్పటికీ ఇలానే మాకు తోడుగా ఉండి బిడ్డ పుట్టేవరకు ఎటువంటి సమస్యలు రాకుండా చూడండి. అలానే మా దృష్టి ఎప్పుడూ మీపై ఉండేలా అనుగ్రహించండి. మీ దీవెనలు ఎల్లప్పుడూ మీ భక్తులపై ఉండాలి బాబా".

---

శిరిడీ ప్రయాణానికి ఆటంకం లేకుండా అనుగ్రహించిన బాబా

సాయిభక్తులందరికీ నా హృదయపూర్వక నమస్కరాలు. నేను ఒక సాయి భక్తురాలిని. నేను హైదరాబాదు నివాసిని. మేము 2023, డిసెంబర్ నెలలో శిరిడీ వెళ్లేందుకు టికెట్లు బుక్ చేసుకొని శిరిడీ వెళ్ళడానికి బాబా అనుమతి లభించిందని చాలా ఆనందపడ్డాం. అయితే శిరిడీ ప్రయాణానికి నాలుగురోజుల ముందు మావారు తీవ్రమైన జలుబు, జ్వరంతో చాలా బాధపడ్డారు. దాంతో మేము ప్రయాణం గురించి చాలా ఆందోళనపడ్డాము. అప్పడు నేను, "మావారికి జలుబు, జ్వరం తగ్గి ఏ ప్రయాస లేకుండా శిరిడీ రాగలగాల"ని బాబాని వేడుకొని మావారికి ఊదీ పెట్టాను. బాబా దయవల్ల ప్రయాణానికి ముందురోజు మావారి ఆరోగ్యం చాలావరకు కుదుటపడింది. ఏ అంటకము లేకుండా మా శిరిడీ ప్రయాణం చాలా బాగా జరిగింది. శిరిడీ, శిరిడీ చుట్టుపక్కల ఉన్న క్షేత్రాలు దర్శించుకొని క్షేమంగా ఇంటికి తిరిగి వచ్చాము. "ధన్యవాదాలు బాబా. ఎల్లప్పుడూ మీ దయ మాపై ఇలాగే ఉండాలి తండ్రీ".

---

భక్తితో అడిగితే సమస్యని తీర్చిన బాబా

 

శ్రీ సమర్ధ సద్గురు సాయినాథ్ మహరాజ్ కీ జై. సాయి భక్తులందరికీ నమస్కారం. నా పేరు కుమార్ రాజ. నేను చాలా సంవత్సరాలుగా సాయి భక్తుడిని. మా చిన్నమ్మాయికి 2024, మే 17తో పరీక్షలు అయిపోతాయని మే 18వ తేదీన శిరిడీ వెళ్ళడానికి మా ఇంటిలో అందరికీ ట్రైన్ టిక్కెట్లు, రూము బుక్ చేసుకున్నాము. అయితే మే 11న, 'ఈరోజు జరగాల్సిన పరీక్షను 18వ తేదీకి వాయిదా వేసినట్లు' మాకు సమాచారం అందింది. అప్పుడు నేను, మా పాప, "17వ తేదీ లోపు పరీక్ష జరిగేటట్టు చేయి స్వామీ" అని బాబాకి చెప్పుకున్నాము. అలా బాబాని ఆడిగామో, లేదో 2 గంటలలో 12వ తేదీ ఆదివారంనాడు పరీక్ష జరుగుతుందని సందేశం వచ్చింది. దాంతో మా ఆనందానికి హద్దులు లేవు. బాబా ఎప్పుడూ మనతోనే వున్నారనడానికి ఇదే నిదర్శనం. "బాబా! మీకు శతకోటి వందనాలు. మమ్మల్ని దయతో రక్షించు తండ్రీ".

---