సాయిభక్తుల అనుభవమాలిక 1856వ భాగం....

---

ఈ భాగంలో అనుభవాలు:

1. శ్రీసాయి అనుగ్రహశీస్సులు

2. బిడ్డకి పెద్ద సమస్య లేకుండా చూసిన బాబా

---

శ్రీసాయి అనుగ్రహశీస్సులు

నా పేరు శాలిని. నేను మొదట బాబాని నమ్మేదాన్ని కాదు. కానీ ఇప్పుడు నేను సాయి నామాన్ని జపించని క్షణం లేదు. గత సంవత్సరం మేలో మా మేడంగారు నన్ను మహాపారాయణ గ్రూపులో చేర్చి సాయిబాబాని నాకు పరిచయం చేశారు. ఆమెకు నా ధన్యవాదాలు.

మా నాన్న చనిపోయాక మానసికంగా కలత చెందినందువల్ల నాకు నెలసరి సక్రమంగా రాలేదు. అప్పుడు నేను, "బాబా! నాకు నెలసరి సక్రమంగా వచ్చేలా చేయండి" అని బాబాకి చెప్పుకున్నాను. బాబా దయవలన తర్వాత నెల నెలసరి సక్రమంగా వచ్చింది. 

తరుచుగా యూట్యూబ్లో, "నీకు వచ్చేనెల జీతం పెరుగుతుంది. నాకు నైవేద్యం చేసి పెట్టు బిడ్డా!" అని నాకు మెసేజ్ వస్తుండేది. అది చూసి నేను 'నా జీతం పెరుగుతుందా?' అని అనుమానపడుతుండేదాన్ని. ఎందుకంటే, నా సీనియర్స్ నా జీతం పెరగదని చెప్పారు. అయినప్పటికీ నాకు బాబా మాట మీద నమ్మకం ఉండటంతో మరుసటి నెలకోసం ఎదురు చూస్తే, నా జీవితం పెరగడమే కాదు నాలుగు నెలల ఇంక్రిమెంట్ కూడా నా అకౌంటులో పడింది.

ఒకరోజు ఉన్నట్టుండి మా అక్క కొడుకుకి గొంతు వాచింది. అలా ఎందుకు వాచిందో మాకు అర్థం కాలేదు. ఆ వాపు మూడు రోజులైనా తగ్గలేదు. మూడోరోజు రాత్రి నేను వాపు ఉన్న చోట ఊదీ పూసి, "తగ్గిపోవాలి బాబా" అని అనుకున్నాను. అంతే, మరుసటిరోజు ఉదయానికి వాపు చాలావరకు తగ్గింది. కానీ ఎందుకలా అయిందని మేము అనుకుంటూ ఉండగా మా అక్కకి బాబు ఐస్ క్యూబ్స్ తింటూ కనిపించాడు. అలా ఆ వాపుకి కారణం కూడా బాబా చూపినందుకు మాకు ఎంతో సంతోషం కలిగింది.

ఇప్పుడు నేను చెప్పే అనుభవం నాకు బాబా మీద భక్తిని ఎంతో ఎక్కువ చేసింది. ఉగాది పండుగ ముందురోజు సాయంత్రం 6:30కి పూజకోసం షాపింగ్‌కని మా అక్క, పిల్లలు వెళ్లారు. వేరే పని ఉండి నేను, మా మేడమ్ ఒకరింటికి వెళ్ళాము. సుమారు 7:15 నిముషాలు అనుకుంటా మా అక్క, పిల్లలు ఇంటికి తిరిగి వచ్చేముందు ఒక పూల దుకాణానికి వెళ్లారు. అక్కడ అక్క పని చూసుకున్న తర్వాత తన ఫోన్ మరిచిపోయి అక్కడినుండి వెళ్ళిపోయింది. మా అక్కకు ఫోన్ అంటే చాలా ఇష్టం. ఒక పది నిమిషాల తర్వాత చూసుకుని వెనక్కి వెళ్లి ఆ పూల దుకాణం వాళ్ళని అడిగితే, "మీరు ఇక్కడ ఏం మర్చిపోలేదు. మాకు తెలియద"ని అన్నారు. అక్క నాకు ఫోన్ చేసి, "ఫోన్ పోయింది. పూల దుకాణంవాళ్ళు తీసుకుని ఇవ్వడం లేదు. ఇక్కడే మర్చిపోయాను" అని ఏడ్చింది. నేను ఆ చోటుకి నడక దూరంలోనే ఉన్నందున వెంటనే అక్కడికి వెళ్లేందుకు బయలుదేరాను. దారిలో బాబా మందిరం ఉంది. అక్కడ, "బాబా ఫోన్ దొరకాల"ని అనుకొని అక్కడికి వెళ్ళాను. అప్పటికి మా బావగారు కూడా అక్కడున్నారు. మేము ఎంత బతిమాలిని వాళ్ళు ఫోన్ ఇవ్వలేదు. అది బస్ స్టాప్ ఏరియా కావడం వలన జనం పోగయ్యారు. వాళ్లలో ఒకరు, "వాళ్ళు అలా ఇవ్వరు. పోలీసులకు చెప్పండి" అన్నారు. మేము సరేనని స్టేషన్‌కి వెళ్లి కంప్లెయింట్ ఇచ్చాము. కానీ పోలీసులు సరిగ్గా స్పందించలేదు. అక్కడ బాబా విగ్రహం ఉంటే నమస్కారం చేసుకొని వచ్చాము. మా అక్క, బావ ఆశ వదిలేసుకున్నారు. కానీ నాకు 'బాబా ఉన్నారు. ఏదో ఒకటి చేస్తార'న్న నమ్మకం చాలా ఎక్కువగా వుండింది. మేము ఇలా ఇంటికి వచ్చి, తలుపు కూడా తీయలేదు. పోలీస్ స్టేషన్ నుండి కాల్ వచ్చింది. “పూల దుకాణం అతను మీ ఫోను తెచ్చి ఇచ్చి వెళ్ళాడు. మీరు వచ్చి మీ ఫోన్ తీసుకుని వెళ్ళండి" అని చెప్పారు. రాత్రి 7:30కి పోయిన ఫోన్ 9:30కు దొరికిందంటే బాబా దయే. ఉగాది రోజు బాబా మందిరానికి వెళ్లి సంతోషంగా ఆయనకి కృతజ్ఞతలు చెప్పుకున్నాము.

---

బిడ్డకి పెద్ద సమస్య లేకుండా చూసిన బాబా

సాయిబంధువులందరికీ నమస్కారం. నా పేరు పద్మావతి. నేను చాలాసార్లు బాబా కృపకు పాత్రురాలినయ్యాను. అందులో ఒకటి ఇప్పుడు మీతో పంచుకుంటున్నాను. ఈమధ్య మా 4 సంవత్సరాల బాబుకి ఐ సైట్ ఉందని సందేహమొచ్చి స్పెషలిస్ట్ దగ్గరకి తీసుకెళ్ళాము. డాక్టర్ చెక్ చేసి, "బాబుకి చాలా సమస్య ఉంది. కేటరాక్ట్(శుక్లమ్) గాని, ఇంకేదైనా పెద్ద సమస్యగాని అయుండొచ్చు. రేపు రండి. టెస్టులు చేయాలి" అని చెప్పారు. అది విని నాకు చాలా బాధ కలిగింది. అంత చిన్నపిల్లాడికి కేటరాక్ట్ అంటే భయమేసింది. ఆ రోజు రాత్రి బాబాని, "బాబా! నా బిడ్డకి పెద్ద సమస్య లేకుండా చూడు" అని వేడుకున్నాను. మరుసటిరోజు ఉదయం హాస్పిటల్‌కి వెళితే డాక్టర్ టెస్టులు చేసి, "కేటరాక్ట్ లాంటిది ఏమీ లేదు. కాకపోతే సైట్ చాలా ఎక్కువగా ఉంది. అందుకోసం స్పెషల్ కళ్లద్దాలు వాడాలి. చింతించాల్సిన పని లేదు" అని చెపారు. "చాలా ధన్యవాదాలు బాబా. ఇలా ఎన్నోసార్లు మీరు నన్ను, నా పిల్లల్ని ఆదుకున్నారు. మీ దయ ఎల్లప్పుడూ మాపై ఇలాగే ఉండాలని కోరుకుంటున్నాను స్వామీ".

---