బాబాని మనం ఏదైనా అడిగితే ఇస్తారా? అడగకపోయినా ఇస్తారా?

---

బాబాని మనం ఏదైనా అడిగితే ఇస్తారా? అడగకపోయినా ఇస్తారా? అంటే దానికి సూటిగా ఒకటే సమాధానం - ఆయనకి తన భక్తుల అవసరాలు తెలుసు. వాళ్ళకి ఏది శ్రేయస్కరమో ఆయనకు తెలుసు. వాటిని దృష్టిలో పెట్టుకొని ఆయన తన భక్తులు అడిగినా, అడగకున్నా వాటిని అనుగ్రహిస్తూ ఉంటారు. వారికి భక్తులయందు అమితమైన ప్రేమ, వారిని ఎల్లవేళలా కంటికిరెప్పలా చూసుకుంటూ, కన్నతల్లిలా అవసరమైన వాటిని సరైన సమయానికి అందిస్తూ ఉంటారు.

పై రెండు ప్రశ్నలకు సంబంధించినటువంటి రెండు అనుభవాలను బాబా ఆదివారం(23.09.2018) నాకు ప్రసాదించారు. వాటిని నేనిప్పుడు మీతో పంచుకుంటాను.

బాబాను అడిగిన వెంటనే అనుగ్రహించిన అనుభవం:

మా కంప్యూటర్ లో యాంటీ వైరస్ సాఫ్ట్ వేర్ నిన్నటితో ఎక్స్పైర్ కావడంతో రాత్రి కొత్త యాంటీవైరస్ ఇన్స్టాల్ చేశాము. అయితే సాఫ్ట్ వేర్ యాక్టివేట్ చేద్దామంటే అది బై డిఫాల్ట్ IE (Internet Explorer) బ్రౌజర్ లో ఓపెన్ అవడానికి వెళ్తుంది. అయితే మా సిస్టమ్ లో IE బ్రౌజర్ ప్రాబ్లమ్ ఉంది. ఇదివరకు మేము ఎన్నోసార్లు IE అప్డేట్ చేయాలని ప్రయత్నించాము కానీ, అవలేదు. డైరెక్ట్ గా బ్రౌజర్ నుండి అప్డేట్ చేయాలన్నా, లేదా లేటెస్ట్ వెర్షన్ డౌన్లోడ్ చేసి అప్డేట్ చేద్దామన్నా కూడా మా సిస్టమ్ లో సాధ్యపడలేదు. అందువలన మేము IE ఉపయోగించడమే మానేసాము. కానీ ఇప్పుడు దానవసరమే వచ్చింది. అది అప్డేట్ కావడంలేదు. అది అప్డేట్ కాకపోతే యాంటీ వైరస్ యాక్టివేట్ కావడంలేదు. ఆల్రెడీ కొత్త యాంటీ వైరస్ వేయడానికి పాతది కూడా తీసేసాము. యాంటీ వైరస్ తప్పనిసరిగా కావాలి కాబట్టి ఏమిచేయాలో తోచలేదు. ప్రోబ్లమ్ సాల్వ్ చేయడానికి గూగుల్ లో సెర్చ్ చేసి  ప్రయత్నించాము. మా ఫ్రెండ్ కి ఫోన్ చేసి కూడా అడిగాను. కానీ ఏవిధంగానూ పరిష్కారం దొరకలేదు. చివరికి, "బాబా! ఇప్పుడెలా? బ్లాగు వర్క్ ఆగిపోతుంది. అసలే నేను ఒక పదిరోజులు ఊరికి వెళ్లాల్సి ఉంది. నేను లేని సమయంలో బ్లాగులో లీలలు అప్లోడ్ చేయడం ఆగకుండా నేను షెడ్యూలు కూడా చేసుకోలేదు. ఇప్పుడీ సమస్య వలన నేను బ్లాగు వర్క్ ఎలా చేయగలను? బాబా, మీరే ఏదో ఒక సహాయం చేయండ"ని బాబాను ప్రార్థించాను. అప్పటికే రాత్రి 10.30 దాటింది. పిలిచిన పలికే దైవం కదా మన బాబా. వెంటనే అద్భుతం మొదలైంది. బాబాని ప్రార్థించిన తరువాత బహుశా ఆయన ప్రేరణే, ఏదో అలా బ్రౌజ్ చేస్తూ ఉంటే అనుకోకుండా IE లేటెస్ట్ వెర్షన్ ఫైల్ డౌన్లోడ్ లింక్ కనిపించింది. సరే ప్రయత్నిద్దామని డౌన్లోడ్ చేసి ఇన్స్టాల్ బటన్ క్లిక్ చేశాను. ఆశ్చర్యం! ఇంతకుముందు మేము ఒక 15 సార్లు చేసినా అప్డేట్ కానిది, ఇప్పుడు బాబా దయతో విజయవంతంగా ఇన్స్టాల్ అయిపోయింది. బాబా చేసిన అద్భుతానికి మమ్మల్ని మేమే నమ్మలేకపోయాం. నాకు చాలా సంతోషంగా అనిపించి, బాబాకు కృతఙ్ఞతలు చెప్పుకున్నాను. బ్లాగు వర్క్ కి బ్రేక్ వస్తుందని చాలా ఆందోళన పడ్డాను, కానీ బాబా నా ప్రార్థనను మన్నించి సమస్యను పరిష్కరించడంతో ప్రశాంతంగా పడుకున్నాను. 

బాబాని అడగకుండానే ఆయన అనుగ్రహించిన అనుభవం:

దాదాపు సంవత్సరం, సంవత్సరమున్నర క్రిందట ఇమేజ్ ఫైల్ లో ఉండే టెక్స్ట్ ని ఎలా తీసుకోవాలో తెలుసుకోవాలని చాలా ప్రయత్నించాను. ఆ ప్రయత్నంలో OCR సాఫ్ట్ వేర్ ద్వారా చేయొచ్చని తెలిసి, ఆ సాఫ్ట్ వేర్ డౌన్లోడ్ చేసుకొని ప్రయత్నించాను. కానీ అది ఇంగ్లీష్ వరకు వర్క్ అవుతుంది కానీ తెలుగు టెక్స్ట్ ఎక్స్ట్రాక్ట్ చేయడం సాధ్యపడలేదు. నా ప్రయత్నాలు ఫలించక నా క్లోజ్ ఫ్రెండ్ ఒకతనిని ఆ విషయమై సహాయం అడిగాను, కానీ తన ద్వారా కూడా నాకు సహాయం అందలేదు. ఆ సమయంలో కనీసం బాబా సహాయం కూడా నేను అడగలేదు. ఇంక ఏమీ చేసేది లేక దానిగురించి మరచిపోయాను. అయితే బాబా చేసిన అద్భుతం చూడండి. నిన్న నేను బ్లాగులో బాబా లీలను అప్లోడు చేసిన తరువాత ఎవరో ఒక సాయిబంధువు చేసిన కామెంట్ చూసి నేను ఆనందాశ్చర్యాలకు లోనయ్యాను. ఎందుకంటే సాధారణంగా ఎవరైనా కామెంట్ చేస్తే ఆ లీల గురించిగాని, లేకపోతే కేవలం 'సాయిరామ్' అని గాని చేస్తారు. కానీ ఆ సాయిబంధువు ఇమేజ్ ఫైల్ లో వున్న తెలుగు టెక్స్ట్ ని ఎలా ఎక్స్ట్రాక్ట్ చేసుకోవాలో చూపించే లింక్ ని షేర్ చేశారు. అలా ఆ సాయిబంధువు ద్వారా సంవత్సరమున్నర క్రిందటి నా ప్రయత్నానికి బాబా జవాబు ఇచ్చారు. అసలు నేను ఆ సమస్య గురించి ఎవరికీ చెప్పలేదు, ఎవరినీ అడగలేదు, అలాంటిది ఎవరికి తెలుస్తుంది నా సమస్య గురించి? (మనందరివాడైన బాబాకి తప్ప!) ఆ కామెంట్ చూసిన నా ఆనందానికి అవధులు లేవు. నాకది ఎంతో ఉపయోగపడుతుందని బాబాకి తెలుసు కాబట్టి నేను అడగకపోయినా అద్భుతంగా బాబా నాకు కావలసింది అందించారు. బాబా లీలలు అమోఘం.

"బాబా! ఎప్పటికీ మీ సహాయ సహకారాలతో ఈ బ్లాగు ఇలాగే కొనసాగుతూ వుండాలి. ఎందరో సాయిబంధువులకు మీ భక్తుల అనుభవాల ద్వారా వారి సమస్యలకు పరిష్కారం అందాలని, మరియు వారి భక్తి విశ్వాసాలు దృఢపడేందుకు ఈ బ్లాగు ఉపయోగపడాలని మనసారా కోరుకుంటున్నాను."

---