సాయిభక్తుల అనుభవమాలిక 1896వ భాగం....

---

ఈ భాగంలో అనుభవాలు:

1. శ్రీసాయినాథుని దయ

2. బాబాని కోరుకుంటే కానిది ఏమీ ఉండదు 

---

శ్రీసాయినాథుని దయ

ఓంసాయి శ్రీసాయి జయజయ సాయి. నా పేరు లలిత. రోజూ ఈ బ్లాగులోని అనుభవాలు చదివితే మనసు ప్రశాంతంగా ఉంటుంది. మా నాన్నకి మే నెలలో చాలా నడుం నొప్పి వస్తే వైజాగ్ డాక్టర్ దగ్గరకి తీసుకెళ్లారు. ఆ డాక్టరు స్కాన్ చేసి వెన్నుపూస కొంచెం సైడ్ అయ్యింది, ఆపరేషన్ చేయాలి అన్నారు. 60 సంవత్సరాల వయసులో నాన్నకి ఆపరేషన్ అంటే కష్టమని నేను మన సాయికి, "నాన్నకి మందులతో తగ్గిపోవాలి. ఆపరేషన్ వద్దు తండ్రీ" అని దణ్ణం పెట్టుకున్నాను. డాక్టర్ కొన్ని మందులిచ్చి అవి వాడాక మళ్ళీ రండి అని చెప్పారు. నాన్న ఆ మందులు వాడి జూన్ నెలలో డాక్టర్ దగ్గరకి మళ్ళీ వెళితే, "ఆపరేషన్ ఇప్పుడు అవసరం లేదు. మందులుతో తగ్గుతుంది" అని అన్నారు. నాకు చాలా సంతోషంగా అనిపించింది. ఇదంతా నా సాయితండ్రి దయ.

2024, వేసవి సెలవుల్లో నేను మా అమ్మ వాళ్ళింటికి వెళ్ళాలని అనుకున్నాను. కానీ మా ఇంట్లోవాళ్ళు ఒప్పుకుంటారో, లేదోనని చాలా భయపడ్డాను. అప్పుడు, "ఇంట్లోవాళ్ళు ఒప్పుకోవాల"ని బాబాకి దణ్ణం పెట్టుకున్నాను. బాబా దయవల్ల వాళ్ళు ఒప్పుకున్నారు. దాంతో నేను నా కన్నవారింటికి వెళ్ళాను. అయితే మా తోడికోడలు బయట ఉందని నన్ను వెనక్కి వచ్చేయమన్నారు. కానీ నేను ఆ సమయంలో నా కన్నవారింట్లో ఉండకపోతే మళ్ళీ ఎన్నో నెలలకిగాని వెళ్లడం కుదరదు. అందుకని బాబా మీద భారమేసి తిరిగి మా ఇంటికి వెళ్ళలేదు. వారం రోజులు తర్వాత వెళ్ళాను. బాబా దయవల్ల ఇంట్లో వాళ్ళెవరూ నన్ను ఏమీ అనలేదు.

2024, జూలై 17న మా ఇంటిలో కర్కాటక సంక్రమణం పెట్టుకున్నాము. ఆ రోజు నా నెలసరి సమయం. అందుకని నేను నెలసరి రాకుండా మాత్రలు వేసుకున్నాను. అయినా నెలసరి వచేస్తుందేమోనని చాలా భయపడి బాబా ఊదీ నోట్లో వేసుకుని, మరికొంత ఊదీ కడుపుకి రాసుకున్నాను. అలా మూడు రోజులు చేశాను. బాబా దయవలన ఆ కార్యక్రమం అయిపోయాక మర్నాడు నాకు నెలసరి వచ్చింది.

నా భర్త ఆరోగ్యం బాగా లేకపోతే 'సూర్య నమస్కారాలు', హామం', 'అభిషేకం' చేయించుకోమని పంతులు చెప్పారు. ఆ కార్యక్రమాలన్నీ మా ఇంటి దగ్గర పెట్టుకున్నాం. సరిగ్గా అదే సమయంలో నా తోడికోడలు బయట చేరింది. అందువలన నేను ఒక్కదాన్నే మొదటిరోజు ఆరుగురు బ్రాహ్మణులకి, మా ఇంట్లోని ఎనిమిది మందికి వంట చేయాల్సి వచ్చింది. "చేసేందుకు కావలసిన శక్తిని ఇమ్మ"ని సాయిని ప్రార్థించాను. బాబా దయవల్ల వంటలన్నీ చాలా బాగా వచ్చాయి. అందరూ తృప్తిగా భోజనం చేశారు. మరుసటిరోజు నేను కూడా పూజలో కూర్చోవాలని అన్నారు. నేను పూజలో కూర్చుంటే వంట ఎలా అని ఆలోచించి మా బంధువుల్ని రమ్మని పిలిచాను. కానీ ఎవరూ రాలేదు. దాంతో మావారు వంట బ్రాహ్మ ణుని బుక్ చేశారు. సరిగ్గా హామం జరిగే సమయంలో మేఘం కమ్మి చిన్న జల్లు పడింది. నేను వెంటనే, "బాబా! వాన తగ్గాలి" అని దణ్ణం పెట్టాను. మా వాళ్ళు టార్పాలిన్ కట్టాలని ప్రయత్నించారు కానీ ఆలోపు వర్షం తగ్గింది. హోమం చాలా బాగా జరిగింది. అంతా నా సాయి మహిమ.

మా పెద్దపాపకి ఎంసెట్ లో తొంభై వేల ర్యాంకు వచ్చింది. నేను తనకి మాకు దగ్గరలో ఉన్న జి.యమ్.ఆర్ కాలేజీలో సీటు రావాలని బాబాకి దణ్ణం పెట్టుకున్నాను. బాబా దయవల్ల తనకి సివిల్ ఇంజినీరింగ్ సీటు వచ్చింది. "థ్యాంక్యు సాయితండ్రీ. ఎప్పుడూ నా యందు మీ దయ ఇలాగే ఉండాలని వేడుకుంటున్నాను. నేను ఎప్పుడూ మిమ్మల్ని మరువకుండ చూడు తండ్రీ. మీ పాదాల యందు స్థిరమైన నమ్మకం, భక్తి నాకు కలిగేటట్లు చేయి తండ్రీ".

---

బాబాని కోరుకుంటే కానిది ఏమీ ఉండదు

ఓంసాయి శ్రీసాయి జయజయసాయి. సాయి పాదపద్మములకు నమస్కారం. నా పేరు అమర్నాథ్. 2022, ఆగస్టులో చేతిలో చిల్లిగవ్వ లేకపోయినా ఆ బాబా దయతో సరైన సమయంలో ఆర్థిక వనరులు సమకూరడంతో నా కుమారుడు ఉన్నత విద్యకోసం ఆనందంగా అమెరికా వెళ్ళాడు. వాడు అక్కడ మంచి ర్యాంకుతో ఎమ్మెస్ పూర్తి చేశాడు. కానీ తనకి భవిష్యత్తు మీద చాలా టెన్షన్ మొదలైంది. కారణం, ఆర్థిక మాంద్యం వల్ల ఉద్యోగాలు దొరకక చాలామంది చాలా ఇబ్బందిపడుతున్నారు. ఇక్కడి నుండి వాడికి ఆర్థిక సహాయం అందిద్దామంటే నాకు అంతటి స్థాయి లేదు. అందువల్ల మేము బాబానే, "బాబుకి ఒక దారి చూపించమ"ని వేడుకున్నాము. బాబా దయవల్ల కొద్ది రోజుల్లోనే ఏ ఇబ్బంది లేని పార్ట్ టైం ఉద్యోగం బాబుకి దొరికింది. తను ఒకపక్క చక్కగా ఉద్యోగం చేసుకుంటూ మరోపక్క పిహెచ్‌డి చేసేందుకు ప్రయత్నాలు చేసాడు. మా మోర ఆలకించిన బాబా బాబుకి రోచెస్టర్ యూనివర్సిటీలో సీటు ఇప్పించారు. నిజానికి మొదట బాబు పిహెచ్‌డికి అప్లై చేసినప్పుడు సీట్లన్నీ అయిపోయాయని చెప్పారు. తర్వాత కొద్దిరోజులకి ఇంటర్న్షిప్ ఇస్తామని చెప్పారు. మేము బాబాని, "వాడికి ఇష్టమైన పిహెచ్‌డిలో చేర్పించామ"ని వాడుకున్నాము. బాబాని కోరుకుంటే కానిది ఏమీ ఉండదు కదా! అంతకు ముందు చేరిన అతను డ్రాప్ అవ్వడంతో ఆ సీటు మా బాబుకి ఆఫర్ చేశారు. పేపర్ వర్క్ అంతా రెండు రోజుల్లో అయిపోవడం, సీటు కన్ఫర్మ్ అవ్వడం, ప్రయాణానికి టికెట్లు బుక్ చేసుకోవడం అంతా ఒక మాయలా మూడు రోజుల్లో జరిగిపోయింది. 2024, ఆగస్టు 22న బాబులో పిహెచ్‌డి కోసం కాలేజీలో చేరబోతున్నాడు. ఇదంతా ఆ బాబా ప్రసాదం. "ధన్యవాదాలు బాబా. అలాగే మా పాప భవ్యకు మెడికల్ నీట్ పీజీ ఎంట్రన్స్ పరీక్షలో మొదటి ర్యాంకు ఇవ్వు తండ్రీ. మీ చల్లని చూపు నా కుటుంబం మీద ఎల్లప్పుడూ ఉండాలి బాబా".

---