సాయిభక్తుల అనుభవమాలిక 1951వ భాగం....

---

ఈ భాగంలో అనుభవాలు:

1. మేలు జరిగేలా సహాయం చేసిన బాబా

2. ప్రతి విషయం బాగా చూసుకున్న బాబా 

---

మేలు జరిగేలా సహాయం చేసిన బాబా

సాయి బంధువులకు నమస్కారం. నా పేరు శ్రీనివాసరావు. మాది పల్నాడు జిల్లా. నేను నరసరావుపేటలోని ఒక వెంచర్లో ఫ్లాట్ తీసుకోదలచి ఐదు లక్షల రూపాయలు డబ్బులు కట్టి మిగతా డబ్బులు కట్టడానికి ఒక సంవత్సరం సమయం అడిగాను. వాళ్ళు సమ్మతించి నేను అడిగిన సమయం ఇచ్చారు. తర్వాత నేను ఐదు లక్షల రూపాయలు పర్సనల్ లోన్ తీసుకుని, ఆ డబ్బు వడ్డీకిస్తే సంవత్సరంలో కొంత డబ్బు వస్తుందన్న ఉద్దేశంతో నా స్నేహితుడు, నమ్మకస్తుడు అయినా వ్యక్తి యొక్క అన్నకు ఆ డబ్బులు ఇచ్చాను. నేను అతనితో ఆరునెలలకు నా డబ్బులు నాకు తిరిగి ఇవ్వాలని చెప్పాను. అందుకు ఆ వ్యక్తి సరేనన్నాడు. కానీ సంవత్సరమవుతున్నా అతను నా డబ్బులు నాకు తిరిగి ఇవ్వలేదు. అప్పటికే మిగతా డబ్బులు కట్టి ప్లాట్ రిజిస్ట్రేషన్ చేసుకోవలసిన సమయం దగ్గర పడటంతో నేను ఆ వ్యక్తిని డబ్బులు అడగడం మొదలుపెట్టాను. అతను 'రేపు ఇస్తాను', 'పదిరోజులు గడువివ్వు' అని సుమారు 5 నెలలపాటు కాలయాపన చేసుకుంటూ పోయాడు. దాంతో నేను నాచేత అతనికి డబ్బులు ఇప్పించిన నా స్నేహితుడిపై కూడా ఒత్తిడి పెంచాను. సుమారు 46 సార్లు అడిగినప్పటికీ సదరు వ్యక్తి 'ఇస్తాను, ఇస్తాను' అనడమే తప్ప డబ్బు ఇవ్వలేదు. ఇక అప్పుడు నేను సాయిబాబా ముందు కూర్చుని, "బాబా! మిమ్మల్ని అడక్కుండా డబ్బులు అతనికి ఇచ్చినందుకు నన్ను క్షమించండి. నేను పెద్ద తప్పు చేశాను. ఇకపై ఎవరికీ వడ్డీకి ఒక్క రూపాయి కూడా ఇవ్వను" అని ఒట్టు పెట్టుకొని, "బాబాని సహాయం చేయమ"ని గట్టిగా ఒక వారం రోజులు ప్రార్థించి సాయి క్వశ్చన్&ఆన్సర్స్ వెబ్సైట్లో అడిగితే, "తప్పకుండా పని జరుగుతుంది" అని సమాధానం వచ్చింది. దాంతో నేను స్థిమితంగా ఉంటూ అతనిపై ఒత్తిడి పెంచగా బాబా చెప్పినట్లుగానే నాకు రావలసిన 5 లక్షల రూపాయలు ఒక రోజు ఇచ్చాడు. నేను ఆ డబ్బులు తీసుకొని ఫ్లాట్ రిజిస్ట్రేషన్ చేయించుకుందామని వెళితే, "మీరు ఆలస్యంగా వచ్చారు. ఆ ప్లాట్ బ్యాంకు తాకట్టులో ఉంది. వేరే ఫ్లాట్ తీసుకోండి" అని చెప్పారు. అది విని ఏం చేయాలో అర్థంకాని గందరగోళంలో పడిపోయిన నేను, "ఇదేంది బాబా? ఈ సమస్య నుండి నన్ను గట్టెక్కించు" అని బాబాని వేడుకున్నాను. తర్వాత ఆ ఫ్లాట్‌వాళ్లతో కూర్చుని మాట్లాడాను. వాళ్ళు, "వేరే ఫ్లాట్ ఇస్తాము. అందుకుగానూ కొంత డబ్బు కూడా తగ్గించుకుంటాము" అని ఒప్పందానికి వచ్చారు. దాంతో నేను వేరే ఫ్లాట్ తీసుకున్నాను. ఆ తరువాత విచారిస్తే నేను ముందు తీసుకుంటాననుకున్న ఫ్లాట్‌కి నాకంటే ముందు అడ్వాన్స్ ఇచ్చిన వ్యక్తి కొన్ని కోర్టు కేసుల్లో ఇరుక్కున్నాడని తెలిసింది. అప్పుడు సాయిబాబా నా యందు దయవుంచి ఆ ప్లాట్ నాకు దక్కకుండా చేసి వేరే ఫ్లాట్ ఇప్పించడమే కాకుండా కొంత డబ్బులు కూడా తగ్గేలా సహాయం చేసారని ఆనందించాను. "ధన్యవాదాలు బాబా".

---

ప్రతి విషయం బాగా చూసుకున్న బాబా

ప్రతి ఒక్కరికి నమస్కారం. నేను ఒక సాయి భక్తురాలిని. నేను బాబాను నా తల్లి, తండ్రి, స్నేహితుడు, ఇంకా సర్వంగా భావిస్తాను. 2024, సెప్టెంబర్ నెలలో నేను రెండు సంవత్సరాల నా కవల పిల్లలతో నా కజిన్ పెళ్లికోసం వేరే వూరు వెళ్లి అక్కడ నెల రోజులు ఉండాలనుకున్నాను. అయితే అక్కడ నా పిల్లల్ని ఎలా చూసుకోవాలో, వాళ్ళు అక్కడ ఎలా ఉంటారో, ఇంకా బంగారం, ఇతర ఖరీదైన వస్తువులు మరియు సామాను తీసుకొని అక్కడికి ఎలా ప్రయాణించాలో అని నాకు భయమేసింది. ముఖ్యంగా నా ఆరోగ్యం గురించి భీతిల్లాను. ఎందుకంటే, వేరే ఊరిలో ఉంటున్నప్పుడు అనారోగ్యానికి గురైతే మరింత గందరగోళంగా ఉంటుందనుకున్నాను. ఇలా చాలా ఆలోచనలు, భయాలతో నేను బాబాను, "అక్కడ అంతా సవ్యంగా జరిగేలా చూసుకోండి బాబా. దయచేసి మేము అక్కడ ఉంటున్నప్పుడు నన్ను, నా పిల్లల్ని రక్షించండి. అనారోగ్యం వల్ల మాకు ఎలాంటి హాని కలగనివ్వకండి" అని ప్రార్థించాను. బాబా దయవల్ల ప్రతి విషయం బాగానే జరిగింది. నేను నా కుటుంబం మరియు బంధువులతో చాలా విలువైన సమయాన్ని గడిపాను. పెళ్లి పనులలో నేను నా కజిన్స్‌కి చాలా సహాయం చేసాను. ఇది అందరికీ చిన్న విషయంగా కనిపించొచ్చు గానీ ఇద్దరు చిన్నపిల్లలకు తల్లినైనా నాకు చాలా పెద్ద విషయం. "మీరు నా కోసం చేసిన ప్రతిదానికీ ధన్యవాదాలు బాబా. మంచి ఆరోగ్యాన్ని ఇచ్చి, ఎల్లప్పుడూ నాకు తోడుగా ఉండి నన్ను జాగ్రత్తగా చూసుకున్నందుకు ధన్యవాదాలు".

---

Read More

సాయిభక్తుల అనుభవమాలిక 1950వ భాగం....

---

ఈ భాగంలో అనుభవాలు:

1. ప్రాణాపాయ స్థితి నుండి కాపాడిన బాబా

2. బాబా ఊదీ నిజంగా దివ్య ఔషధం

3. పిలిచినంతనే కష్టం తీర్చే బాబా

---

ప్రాణాపాయ స్థితి నుండి కాపాడిన బాబా

  

సాయి బంధువులందరికీ నమస్కారములు. నా పేరు మాధవి. మాది నెల్లూరు. బాబా లేకపోతే నేను లేను. ఆయన నాకు ఈ జీవితం ప్రసాదించి నా చేయి పట్టుకొని నడిపిస్తున్నారు. ఆయన ఎన్నిసార్లు నన్ను ప్రాణాపాయ స్థితి నుండి కాపాడారో లెక్కలేదు. అందుకే నా జీవితం బాబాకి అంకితం. శ్రీసాయి మహిమల గురించి చెప్పాలంటే మాటలు సరిపోవు. అవి అనుభవించేవాళ్లకు మాత్రమే తెలుస్తాయి. నేను ఈ బ్లాగులో ప్రచురితమయ్యే భక్తుల అనుభవాలు చూస్తున్నప్పటినుండి నా జీవితంలో జరిగిన అనుభవాలను మీతో పంచుకోవాలని అనుకుంటున్నాను. ఇప్పుడు ఒక రెండు అనుభవాలు పంచుకుంటాను. ఒకసారి నేను మా ఇంటి గేటు వద్ద ఉన్న మెట్ల మీద నుండి పడిపోయాను. అప్పుడు నేను పొందిన అనుభూతి మాటల్లో చెప్పలేనిది. ఒక అదృశ్య హస్తం నా తలకి ఏమీ కాకుండా పట్టుకుని కింద పెట్టింది. ఆ చేయి నాకు కనపడలేదు కానీ, స్పర్శ స్పష్టంగా తెలిసింది. అలా ఎవరు చేస్తారు? నా బాబానే నన్ను కాపాడారు.

ఇంకోరోజు నేను స్కూటీ మీద చాలా వేగంగా వెళుతున్నాను. అదే సమయంలో ఎదురుగా కాస్త దూరంలో ఒక ఆటో అంతే వేగంగా వస్తూ కనిపించింది. నాకు ఏం తోచలేదు. అంతలో ఆ ఆటో హఠాత్తుగా యుటర్న్  తీసుకోబోయేసరికి నేను బ్రేక్ వేయలేకపోయాను. నాకు టెన్షన్ మొదలై, 'ఇంకేముంది ఆటోను గుద్దేస్తున్నాను, అయిపోయింది నా పని' అని ఒకటే భయంతో, "బాబా! నువ్వే చూసుకోవాలి" అని అనుకున్నాను. అంతే! ఆటోడ్రైవర్ హఠాత్తుగా బ్రేక్ వేసి ఆటో ఆపాడు. ఒక్కసారిగా నేను స్కూటీ వదిలేసి పక్కన పడిపోయాను. నా తల రోడ్ డివైడర్ మీద పడింది. డివైడర్ మీద పడితే పరిష్టితి ఏంటో వేరే చెప్పాలా? ఎవరైనా ఉహించగలరు. మామూలుగా అయితే తల పగిలిపోవాల్సిందే. కానీ అలా జరగలేదు. బాబా అద్భుతం చేశారు. ఒక్క చుక్క రక్తం కూడా లేదు. స్కూటీకి కూడా ఏమీ కాలేదు. నేను ఆశ్చర్యపోయాను. ఏముంది, నా పని అయిపోయిందనుకున్న నాకు ఏమీ జరగకుండా కాపాడారు నా సాయి. ఆయన్ని నమ్ముకున్నవాళ్ళకి ఎప్పుడూ ఏమీ జరగదు. ఆయన ప్రతిక్షణం మన పక్కనే ఉంటూ పిలిచిన వెంటనే పలుకుతారు. ఇది సత్యం. ముమ్మాటికీ నిజం. ఎవరైతే తమని నమ్ముతారో వారిని జీవితాంతం వదిలిపెట్టరు బాబా. "ధన్యవాదాలు బాబా".

---

బాబా ఊదీ నిజంగా దివ్య ఔషధం

సాటి సాయి బంధువులకు నా నమస్కారాలు. నా పేరు విన్నీ. నేను నా చిన్నతనం నుంచి సాయిబాబా భక్తురాలిని. ఒకరోజు రాత్రి నాకు హఠాత్తుగా జలుబు చేసి విపరీతమైన జ్వరం వచ్చింది. మరుసటిరోజు హాస్పిటల్‌కి వెళితే, డాక్టర్ టెస్టులు చేసారు. రిపోర్టులో టైఫాయిడ్ అని వచ్చింది. దాంతో ఇంజెక్షన్ల కోర్స్ 3 రోజులకి ఇచ్చారు. ఆరోజు రాత్రి ఆస్తమా సమస్య ఉన్న నాకు ఊపిరి తీసుకోవడానికి చాలా ఇబ్బంది అయింది. ముక్కు పూర్తిగా బ్లాక్ అయిపోయి చనిపోతానేమో అనుకున్నాను. ఇంతలో బాబా ఊదీ గుర్తొచ్చి కాస్త నా నుదుటన పెట్టుకొని, తలగడ కింద పెట్టుకొని, సచ్చరిత్ర పుస్తకం కూడా నా పక్కన పెట్టుకొని, 'ఇక బాబా నాకు సహాయం చేస్తారో, చేయరో చూడాలి' అని అనుకున్నాను. నా సాయి 2 నిమిషాల్లో నేను అంతసేపూ పడుతున్న కష్టమంతా తీసేసి మామూలుగా ఊపిరి తీసుకొనేలా చేసారు. నేను నమ్మలేకపోయాను. బాబా ఊదీ నిజంగా దివ్య ఔషధం. దాని మహిమను అనుభవించిన వారికి మాత్రమే అర్థమవుతుంది. ఒకప్పుడు నేను కొంచెం అప్పుల్లో ఉండి వస్తున్న జీతం సరిపడక మంచి ఉద్యోగం ఇవ్వమని బాబాని ప్రార్థిస్తూ ఉండేదాన్ని. అలా రెండు సంవత్సరాలు గడిచాక ఒకరోజు అనుకోకుండా రెండింతల జీతంతో నా కలల ఉద్యోగం నాకు అనుగ్రహించారు సాయి. "చాలా ధన్యవాదాలు సాయి. అందరూ బాగుండాలి. అందులో నేను కూడా ఉండేలా చూడండి సాయి".

---

పిలిచినంతనే కష్టం తీర్చే బాబా

సదా మన వెంటుండి కాపాడే సాయినాథ్ మహారాజ్‌కు పాదాభివందనాలు. సాయి బంధువులందరికీ నమస్కారం. నా పేరు సౌజన్య. నాకు ఏ చిన్న సమస్య వచ్చినా నేను తలుచుకునేది బాబానే. 2024, డిసెంబర్ 17వ తేదీ తెల్లవారుజామున 3గంటలకి అకస్మాత్తుగా మా పాపకి జ్వరమొచ్చింది. ముందు నెలలోనే మా పిల్లలిద్దరికీ జ్వరాలు వచ్చి మేము ఇబ్బందిపడ్డాము. అందుచేత నేను వెంటనే, "సాయినాథా! మళ్ళీ ఏంటయ్యా ఇలా వచ్చింది?" అని బాబాని ప్రార్ధించి, పాపకి టాబ్లెట్ వేసి పడుకోబెట్టాను. పిలిస్తే పలికే మన దైవం బాబా ఉండగా మనకి భయమెందుకు? ఆయన పిలిచినంతనే నిరంతరం మన కష్టం తీరుస్తారు. ఉదయం 7 కల్లా అంత జ్వరం తగ్గింది. అంతా బాబా దయ. "ధన్యవాదాలు బాబా. మీ బిడ్డలను సదా కాపాడు తండ్రీ".

---

Read More

సాయిభక్తుల అనుభవమాలిక 1949వ భాగం....

---

ఈ భాగంలో అనుభవం:

• తలుచుకున్న ప్రతిసారీ తామున్నామని వెంటనే సహాయం అందించే బాబా 

---

నేను ఒక బాబా భక్తురాలిని. కొన్నిరోజులుగా నేను హెవీ బ్లీడింగ్ సమస్యతో బాధపడుతూ చెక్ చేయించుకోవడానికి డాక్టర్ దగ్గరకి వెళ్ళాను. డాక్టర్ ఏవేవో టెస్టులు చేసి, "గర్భాశయంలో ఫైబ్రాయిడ్(కణితి) ఉంది. అది కూడా క్రిటికల్ పొజిషన్‌లో ఉంది. అర్జెంటుగా దాన్ని తొలగించాలి. లేకపోతే ఇలాగే బ్లీడింగ్ అవుతుంది" అని అన్నారు. ఇంకా, "లాప్రోస్కోపీ సాధ్యం అవ్వదు, చాలావరకు ఓపెన్ సర్జరీ చేయాల"ని ఏదేదో చెప్పి భయపెట్టారు. నాకు ఏం అర్దం కాలేదు, చాలా భయమేసింది. మా ఇంట్లో ఈ సమస్య గురించి ఎలా చెప్పాలో తెలియలేదు. ఎందుకంటే, ఇంకా పెళ్లికాని నాకు గర్భాశయ సర్జరీ అంటే ఇంట్లోవాళ్ళు ఎంత బాధపడతారో, ఎలా ఫీల్ అవుతారోనన్న భయం. బాబా మీద భారమేసి సెకండ్ ఒపీనియన్ కోసం, అలాగే లాప్రోస్కోపీ సాధ్యమవుతుందేమో కనుక్కుందామని చాలామంది ఇతర డాక్టర్ల దగ్గరకి వెళ్ళాను. అయితే ఎంతమంది డాక్టర్లను సంప్రదించినా అందరూ భయపెట్టేవాళ్లే కానీ, ఎవరి దగ్గర సర్జరీ చేయించుకోవాలన్న నమ్మకం నాకు రాలేదు. ఇక అప్పుడు, "ఇంట్లోవాళ్ళకి చెప్తాను బాబా. వాళ్ళు బాధపడకుండా ధైర్యంగా ఉండేలా చేయమ"ని బాబాని ప్రార్థించి విషయం ఇంట్లో చెప్పాను. వాళ్ళు మొదట భయపడినా తర్వాత బాబా దయవల్ల ధైర్యం తెచ్చుకొని 'ఏం కాదు, అంతా మంచే జరుగుతుందని' అనుకున్నారు. నేను బాబాని తలుచుకుంటూ డాక్టర్ల చుట్టూ తిరుగుతూ తిరిగి తిరిగి చివరికి ఒక డాక్టర్ లాప్రోస్కోపీ సాధ్యమవుతుందనడంతో ఆయన దగ్గర సర్జరీ చేయించుకోవడానికి నిశ్చయించుకున్నాను. కానీ ఆ డాక్టర్ కూడా నాకు 100% నచ్చలేదు. ఎందుకంటే, ఆయన లాప్రోస్కోపిక్ సర్జనేగానీ గైనిక్‌కి సంబంధించినవారు కాదు. అదీకాక ఏదైనా అడిగితే, ఆయన చాలా కఠినంగా మాట్లాడేవారు. అయినప్పటికీ ఆయనకున్న అనుభవం దృష్ట్యా ఆయన దగ్గరే సర్జరీ చేయించుకోవాలని నిశ్చయించుకొని, "బాబా! అంతా మంచిగా అయ్యేలా చూడండి" అని బాబాకి ప్రార్థన చేస్తూ ఉండగా చివరి నిముషంలో మా తమ్ముడు, "ఇంకో డాక్టర్ దగ్గరికి వెళదాం, ఆవిడకి చాలా అనుభవం వుంది, పైగా గైనకాలజిస్ట్ కూడా" అని చెప్పాడు. నేను కూడా ఆవిడ మంచి డాక్టర్ అని విన్నాను. అయినప్పటికీ ఈ డాక్టర్ కూడా అందరిలానే ఉంటారు, ఊరికే వెళ్ళొద్దామనుకొని వెళ్లాను. కానీ ఆ హాస్పిటల్‌కి వెళ్ళగానే ఎందుకో అంత పాజిటివ్‌గా అనిపించింది. డాక్టర్, "ఓపెన్ సర్జరీ చేసే అవకాశం లేదు. మేము ఖచ్చితంగా లాప్రోస్కోపీ చేస్తామ"ని గ్యారంటీ ఇచ్చారు. అంతేకాక ఆవిడ ఇలాంటి క్రిటికల్ సర్జరీలు చేయటంలో ఎక్స్పర్ట్ అని తెలిసింది. ఆ మాటలు విన్నాక నాకు చాలా ధైర్యంగా, సంతోషంగా అనిపించింది. బాబా ఏం చేసినా, ఎలా చేసినా చివరికి మంచి దారి చూపిస్తారని అనుకున్నాను. తమను నమ్ముకున్న వాళ్ళని తామెప్పుడూ పతనం కానివ్వమన్న ఆయన మాట కూడా గుర్తుకు వచ్చింది. మొత్తానికి చివరి నిముషంలో మంచి డాక్టర్ని చూపించి పెద్ద మిరకిల్ చేసారు బాబా.

ఇకపోతే, సర్జరీకి చాలా ఖర్చు అవుతుందని చెప్పారు డాక్టర్. నాకు ఇన్సూరెన్స్ ఉన్నప్పటికీ హాస్పిటల్‌వాళ్ళు "డబ్బులు కట్టకుండా సర్జరీ చేయలేము. కాబట్టి మీరు బిల్ కట్టేసి తర్వాత క్లెయిమ్ చేసుకోండి" అన్నారు. దాని గురించి మా ఆఫీసులో, అలాగే ఇన్సూరెన్స్‌వాళ్ళని అడిగితే, ఒకరు క్లెయిమ్ చేసుకోవచ్చని, ఒకరు కుదరదని చెప్పి టెన్షన్ పెట్టారు. అప్పుడు నేను, "క్లెయిమ్ అయ్యేలా చూడమ"ని బాబాని ప్రార్థించాను. తరువాత బాబా దయవల్ల క్లెయిమ్ అవుతుందన్న నిర్ధారణ కూడా లభించింది. అలాగే ఇన్సూరెన్సు క్లెయిమ్ అయింది.

నేను సర్జరీకి వెళ్ళేముందు 'నాకు ఒక నెల రోజులు సెలవు కావాలని' నా మేనేజర్‌కి మెయిల్ పెట్టాను. నేను నాకు ఆరోగ్య సమస్య మొదలైనప్పటినుంచి దానికి సంబంధించిన ప్రతిదీ ఏ రోజుకారోజు నా మేనేజర్‌కి తెలియపరచి ఉన్నప్పటికీ ఆమె, "లాప్రోస్కోపీ అయితే ఒక వారం చాలు" అన్నారు. అది చూసి నేను షాక్ అయ్యాను. సర్జరీ చేసుకొని ఒక వారంలో ఎలా పని చేయగలనని నాకు చాలా కోపమొచ్చింది. ఆమెకి మళ్ళీ, "నా పరిస్థితి చాలా క్లిష్టంగా ఉంది. నాకు ఒక నెల నుండి 6 వారాల వరకు సెలవు కావాలి" అని మెసేజ్ పెట్టి, "ఎలాగైనా సెలవు మంజూరు చేయించమ"ని బాబాని వేడుకున్నాను. అప్పుడు బాబా దయవల్ల ఆమె ఏమీ అనలేదు, మా హెచ్ఆర్ టీమ్‌తో మాట్లాడి నేను అడిగినన్ని రోజులు సెలువు మంజూరు చేశారు. "చాలా చాలా థాంక్స్ బాబా".

చివరికి నేను సర్జరీ కోసం హాస్పిటల్‌లో అడ్మిట్ అయ్యాను. కానీ ఇంకో గంటలో సర్జరీ ఉండగా నాకు చాలా చాలా భయమేసింది. ఎంత భయపడ్డానో మాటల్లో చెప్పలేను. సర్జరీ చేయించుకోకుండా ఎటైనా వెళ్లిపోవాలనిపించింది. మొదటిసారి సర్జరీకోసం హాస్పిటల్లో ఉన్నందుకు నాకు చాలా ఏడుపు వచ్చింది. అస్సలు తట్టుకోలేక బాబాని తలుచుకుంటూ, శిరిడీ ప్రత్యక్షప్రసారంలో బాబాని చూస్తూ, "మీరే ధైర్యాన్ని ఇవ్వాలి తండ్రీ. నాకు ఏ సమస్య లేకుండా సర్జరీ అయి నాకున్న అన్ని సమస్యలు సమసిపోయేలా చేయమ"ని చాలా చాలా ప్రార్థిస్తూ ఆయన స్మరణలోనే గడిపాను. కొంతసేపటికి నన్ను సర్జరీ కోసంగా ప్రీఆపరేషన్ థియేటర్‌కి తీసుకెళ్లి అక్కడ ఒకటి లేదా రెండు గంటలు వెయిట్ చేయించారు. ఆ సమయంలో నాకు భయం పోయి కొంచెం ధైర్యం వచ్చింది. తర్వాత బాబా దయవల్ల సర్జరీ పూర్తైంది. నాకు స్పృహ వచ్చేసరికి భరించలేనంత నొప్పి అనిపించింది. "బాబా! ఎలాగైనా ఈ నొప్పి తగ్గించండి" అని బాబుతో చెప్పుకున్నాక కొంచెం నొప్పి తగ్గింది. సర్జరీ అయిన తర్వాత 6 గంటలకి మూత్ర విసర్జన చేయమన్నారు డాక్టర్. కానీ నేను ఎంత ప్రయతించినా మూత్రవిసర్జన చేయలేకపోయాను. డాక్టరు మూత్ర విసర్జన చేయకపోతే యూరిన్ పైప్ వేయాలన్నారు. అది విని నాకు చాలా భయమేసి, "ప్లీజ్ బాబా, ప్లీజ్ బాబా.. మూత్ర విసర్జన అయ్యేలా చూడండి" అని బాబాని ప్రార్థించాను. మా అమ్మ కూడా బాబాని ప్రార్థించినట్లు తర్వాత చెప్పింది. అలా బాబాని ప్రార్థించినంతనే నేను మూత్ర విసర్జన చేయగలిగాను. ఆ సమస్య నుండి బయటపడ్డాను. మరుసటిరోజు నన్ను డిశ్చార్జ్ చేసారు. ఇదంతా బాబానే చేసారని, ఈ క్రమంలో నేను చేసిన పాపపు కర్మలని బాబా తొలగించారని నేను నమ్ముతున్నాను. "చాలా చాలా ధన్యవాదాలు బాబా. ఇంతకు మించి మీకు ఏం చెప్పగలను తండ్రీ".

సర్జరీ అయినా 3 వారాలకి మా ఆఫీసు హెచ్ఆర్ నుండి నాకు కాల్ వచ్చింది. నేను తర్వాత మాట్లాడదామని లిఫ్ట్ చేయలేదు. వెంటనే మరో హెచ్ఆర్ నుండి కాల్ వచ్చింది. సాధారణంగా అయితే కాల్ లిఫ్ట్ చేయకపోతే, కొంత సమయం ఇస్తారు. అలాంటిది వెంటనే కాల్ వచ్చేసరికి 'ఏమైందో, ఏంటో, సెలవు బ్రేక్ చేసి పని చేయమంటారేమోన'ని  నాకు భయమేసి, "బాబా! ఏ సమస్య రాకుండా చూడండి" అని బాబాకి చెప్పుకున్నాను. తర్వాత వాళ్ళకి కాల్ చేస్తే, కేవలం నా ఆరోగ్యం ఎలా ఉందో కనుక్కోవడానికని ఒకరు, ఇంకొకరు ఇన్సూరెన్స్ క్లెయిమ్ చేసానో, లేదో తెలుసుకోవడానికి కాల్ చేసారని చెప్పారు. తర్వాత వాళ్ళు ఎన్ని రోజులు సెలవు కావాలని అడిగితే, నేను పూర్తిగా కోలుకోవడానికి ఇంకా కొన్ని రోజులు కావాలని చెప్పాను. వాళ్ళు ఏం అనకుండా సరేనని, విశ్రాంతి తీసుకొని తగ్గాక పని చేయమన్నారు. బాబా దయవల్ల నేను టెన్షన్ పడినట్లు ఏ సమస్య కాలేదు. "చాలా చాలా ధన్యవాదాలు బాబా".

సర్జరీ అనంతరం ఎన్నోసార్లు అర్ధరాత్రి గ్యాస్ ప్రాబ్లమ్ వచ్చి పడుకోలేకపోయాను. అప్పుడు ఊదీ పెట్టుకొని, "బాబా! నాకు ఈ బాధ తగ్గేలా చేయండి" అని ప్రార్థించాను. దయతో బాబా నాకు ఉపశమనం కలిగించారు. ఇప్పుడు ఆయన కృపవల్ల ఆ సమస్యలన్నీ తగ్గుతున్నాయి. ఇకపోతే, సర్జరీ తర్వాత మొదటిసారి నెలసరి వచ్చినప్పుడు చాలా నొప్పులు ఉండేవి. ఒకరోజు ఆ నొప్పి భరించలేక హాస్పిటల్‌‌కి కాల్ చేస్తే, ఎవరూ లిఫ్ట్ చేయలేదు. అప్పుడు, "బాబా! ఎలాగైనా ఏదో ఒక దారి చూపి ఈ నొప్పి తగ్గేలా చేయండి" అని బాబాను చాలా ప్రార్థించాను. అప్పుడు మా సిస్టర్ గుర్తొచ్చింది. తను కూడా డాక్టర్. నేను తనకి కాల్ చేసి సమస్యే, టాబ్లెట్లు ఇచ్చింది. అలాగే హాస్పిటల్ వాళ్ళు నన్ను సంప్రదించి, "సమస్యేమీ లేదు. అలాగే వస్తుంది. ట్యాబ్లెట్లు వేసుకో" అని చెప్పారు. బాబా దయవల్ల ఆ నొప్పి కూడా తగ్గింది. ఇలా ఈ నెల రోజుల్లో బాబాని ఎన్నోసార్లు తలుచుకుంటూ ఉన్నాను. నేను తలుచుకున్న ప్రతిసారీ బాబా వెంటనే తామున్నామని నాకు సహాయం చేసారు. "వాటి అన్నిటికీ చాలా కృతజ్ఞతలు బాబా. మీరు చేసిన సహాయానికి, మీరు చూపిన దయకి నేను ఎప్పటికీ మీకు ఋణపడి ఉంటాను. త్వరగా నేను పూర్తిగా కోలుకునేలా చేసి నాకు మంచి ఆరోగ్యాన్ని ప్రసాదించండి తండ్రీ. అలాగే ఆఫీసులో ఏ సమస్య లేకుండా చూడండి బాబా. ఇంకా ఇన్సూరెన్స్ ఏ సమస్య లేకుండా గరిష్ట మొత్తం క్లెయిమ్ అయ్యేలా చూడండి బాబా".

---

Read More

సాయిభక్తుల అనుభవమాలిక 1948వ భాగం....

---

ఈ భాగంలో అనుభవాలు:

1. బాబాని నమ్ముకుంటే చాలు, జీవితంలో అన్నీ శుభాలే!

2. సూపర్ మార్కెట్ దగ్గర బ్యాగులో ఉండాల్సిన పర్సు ఇంటిలో ఎలా ఉందో! - బాబాకే ఎఱుక  

3. ఎటువంటి సమస్య ఎదురైనా బాబా దయతో బాగైపోతుంది

---

బాబాని నమ్ముకుంటే చాలు, జీవితంలో అన్నీ శుభాలే!

ఓంసాయి శ్రీసాయి జయజయసాయి. అందరికీ నమస్కారం. నా పేరు నారాయణ. సాయిబాబా నాకు చేసిన మేలు నేను ఎన్నటికీ మరువలేనిది. ఆయన నన్ను అనుక్షణం ఆదుకుంటూ నడిపిస్తూ ఉద్ధరిస్తున్నారు. ఆయన్ని నమ్ముకుంటే చాలు, ఇక జీవితంలో అన్నీ శుభాలే!!! నేను ప్రమోషన్ కోసం ఒక పరీక్ష వ్రాయవలసి ఉండగా దానికి మూడు అవకాశాలే ఇస్తారు. నేను, "మొదటి ప్రయత్నంలోనే పాసవ్వాలి బాబా" అని బాబాను ప్రార్థించాను. బాబా దయవల్ల మొదటి ప్రయత్నంలోనే పాసయ్యాను. నేను బాబాని, "వైజాగ్ లో నాకు ఒక ఇల్లు ఇప్పించమ"ని ప్రార్థిస్తే, మంచి ఇల్లు ఇప్పించారు. 2024, సెప్టెంబర్ 22న మా పాప రజస్వల వేడుక చేసాము. నాకు బంధువులతో విరోధం ఎక్కువ. అందువల్ల వాళ్ళందరూ వీడు ఈ ఫంక్షన్ ఎలా చేస్తాడో, వీలైతే నష్టం చేద్దామని అనుకున్నారు. నేను, "బాబా! ఈ ఫంక్షన్ మీది. నన్ను నిమిత్తమాత్రునిగా చేసి మీ మనవరాలి వేడుక మీరే జరిపించాలి" అని మొదటి శుభలేఖ మీద వ్రాసి సాయిబాబాని వేడుకున్నాను. బాబా దయవల్ల ఆ రోజు ఫంక్షన్ ఎంత బాగా జరిగిందో చెప్పడానికి నా నోటి వెంట మాటలు రావడం లేదు. వర్షం అస్సలు పడలేదు, 350 మందికి భోజనం క్యాటరింగ్ ఇస్తే, 500 కంటే ఎక్కువ మంది వచ్చినప్పటికీ అందరికీ సరిపోగా ఇంకా మిగిలిపోయింది. ఇది బాబా చేసిన లీల. "ధన్యవాదాలు సాయినాథా! నేను ఎప్పుడైనా మీపై అపనమ్మకంతో ఉన్నా నన్ను క్షమించి ఒక తండ్రిలా నన్ను దగ్గరకు చేర్చుకోండి. ఎన్ని జన్మలైనా నాకు మీపై అచంచలమైన విశ్వాసం ఉండాలని, మీరు తప్ప ఇంకేదీ నాకవసరం ఉండకుండేలా దీవించండి".

---

సూపర్ మార్కెట్ దగ్గర బ్యాగులో ఉండాల్సిన పర్సు ఇంటిలో ఎలా ఉందో! - బాబాకే ఎఱుక 

సాయి భక్తులందరికీ నమస్కారములు. నా పేరు కోమలవల్లి. నేను 2024, డిసెంబర్ 5న మా అమ్మవాళ్లింటికి వెళ్లాను. ఆరోజు నేను, అమ్మ సరుకులు తీసుకొని రావడానికి సూపర్ మార్కెట్‌కి వెళ్ళాము. అక్కడ అమ్మ బ్యాగులో తన పర్సు పెట్టి, వాటిని బయటపెట్టింది. తర్వాత మేము సరుకులు తీసుకుని ఇంటికి వచ్చేసాం. సాయంత్రం 3 గంటలప్పుడు మళ్ళీ మార్కెట్‌కి వెళ్లాల్సొచ్చి చూసుకుంటే, బ్యాగు కనిపించలేదు. అమ్మ అంతా వెతికింది కానీ, ఎక్కడా దొరకలేదు. అప్పుడు నన్ను అడిగితే, "ఒకవేళ సూపర్ మార్కెట్లో వదిలేసామెమో!" అని అన్నాను. దాంతో అమ్మ, "త్వరగా రా చూద్దామ"ని అంది. అమ్మ నా ఖర్చులకోసమని నాన్నతో గొడవపడి డబ్బులు తీసుకొని, వాటిని ఆ పర్సులో పెట్టింది. ఆ డబ్బులు పోయాయేమోనని నాకు చాలా బాధేసి, "బాబా! ఆ బ్యాగు, పర్సులో డబ్బులు దొరికేలా దయ చూపండి" అని వేడుకొని అమ్మకంటే కాస్త త్వరగా వెళ్లి సూపర్ మార్కెట్ బయట చూస్తే, బ్యాగు, బ్యాగులో వాటర్ బాటిల్ ఉన్నాయిగాని పర్సు కనిపించలేదు. అంతలో అమ్మ వచ్చి, "అయ్యో..!" అని కంగారుపడింది. నేను తనని బాగా గుర్తుతెచ్చుకోమన్నాను. కానీ అమ్మకి ఏమీ గుర్తు రాలేదు. నేను సరేనని ఇంట్లో ఉన్న మా అబ్బాయికి ఫోన్ చేసి, "వంటింట్లో కిటికీ చుట్టుపక్కల పర్సు ఉందేమో చూడమ"ని చెప్పాను. ఎందుకంటే, మా అమ్మ ఎప్పుడూ ఆ కిటికీ దగ్గర పెడుతూ ఉంటుంది. మా అబ్బాయి చూసి, "పర్సు ఉంది. అందులో డబ్బులు కూడా ఉన్నాయి" అని చెప్పాడు. అప్పుడు నా మనసు కుదుటపడింది. కానీ సూపర్ మార్కెట్ దగ్గర బ్యాగులో ఉండాల్సిన పర్సు ఇంటిలో ఎలా ఉందో అర్థం కాలేదు. అంతా బాబా దయ. "ధన్యవాదాలు బాబా. ఆర్థికంగా నేను ఎదిగేలా దారి చూపి ఋణశేషం లేకుండా అనుగ్రహించండి బాబా".

---

ఎటువంటి సమస్య ఎదురైనా బాబా దయతో బాగైపోతుంది

 

సాయి బంధువులందరికీ నమస్కారం. నేను ఒక సాయి భక్తురాలిని. ఒకసారి మా బాబుకి విపరీతమైన జ్వరం వచ్చింది. 3-4 రోజులు మందులు వాడినా జ్వరం తగ్గలేదు. అప్పుడు నేను బాబాకి దణ్ణం పెట్టుకున్నాను. మరుసటిరోజు నుంచి జ్వరం తగ్గుముఖం పట్టి ఒక్క రోజులో పూర్తిగా మాయమైపోయింది. ఇలా నాకు ఎటువంటి సమస్య ఎదురైనా బాబా దయతో అంతా బాగైపోతుంది. "ధన్యవాదాలు బాబా. ఎప్పటికీ మీ దయ మాపై ఇలాగే ఉండి మేము ఆరోగ్యంగా ఉండాలి బాబా".

---

Read More

సాయిభక్తుల అనుభవమాలిక 1947వ భాగం....

---

ఈ భాగంలో అనుభవం:

• సాయి కరుణ

---

నేను ఒక సాయి భక్తుడిని. నేను రైల్వేలో ఎమర్జెన్సీ సెక్షన్‌లో పని చేస్తున్నాను. నేను చాలా పనులమీద 2024, నవంబర్ 23 రాత్రి రైలెక్కి 24వ తేదికి హైదరాబాద్ వెళ్ళాల్సి ఉండగా అదేరోజు ఉదయం 8:45కి మా రైల్వేస్టేషన్ నుండి 150 కిలోమీటర్ల దూరంలో వున్న ప్రాంతానికి డ్యూటీ మీద ఎమర్జెన్సీ ట్రైన్ తీసుకొని వెళ్లాల్సి వచ్చింది. వెళ్ళేటపుడు బాగానే వెళ్ళాము కానీ, తిరిగి వచ్చేటప్పుడు మా రైల్వేస్టేషన్‌కి 100 కిలోమీటర్ల దూరంలో ఉన్న ఒక స్టేషన్‌లో మా ట్రైన్ ఆపేశారు. అప్పుడు ఒక సింగిల్ లోకో అదే మార్గంలో వెళ్తుంది. మా ట్రైన్, ఆ సింగిల్ లోకో వేర్వేరుగా ఎందుకు వెళ్ళడం, మా ట్రైన్‌ని, ఆ లోకోని కలిపి కప్లింగ్ చేసి పంపితే లోకోపైలట్ ఒకరే సరిపోతారు, డీజిల్ కూడా అదా అవుతుందని పై నుండి ఆదేశాలు వచ్చాయి. అయితే అసలు చిక్కు ఏంటంటే, లోకో కప్లింగ్ అన్నది చాలా సంవత్సరాల తరువాత చేయడం, పైగా మా ట్రైన్ బ్రేక్ పైప్స్ చాలా పాతవి, చాలారోజుల నుండి వాడకపోవడం వల్ల పైప్ మీద పగుళ్లు కూడా వచ్చి ఉన్నాయి. కాబట్టి కప్లింగ్ ప్రక్రియలో ఏదన్నా సమస్య రావచ్చు. ఒకవేళ అదే జరిగితే మా ట్రైన్ సమయానికి మా రైల్వేస్టేషన్‌కి చేరుకోదు. ఆలా అయితే నేను హైదరాబాద్ వెళ్లాల్సిన ట్రైన్ అందుకోలేను. అందువల్ల నాకు భయమేసి, "బాబా! ఎటువంటి సమస్య రాకుండా చూసి, సమయానికి నేను మా ఇంటికి వెళ్లి, ఆపై హైదరాబాద్ వెళ్లి అన్ని ముఖ్యమైన పనులు పూర్తి చేసుకునేలా కరుణించండి. ఒక పేదవానికి అన్నదానం(ఫుల్ మీల్స్) చేస్తాను" అని బాబాను ప్రార్థించాను. బాబా దయ చూపారు. కప్లింగ్ అయ్యాక 100 కిలోమీటర్ల ప్రయాణంలో ఎటువంటి ఇబ్బందీ లేకుండా చేశారు. దాంతో నేను రాత్రి 7:30కి ఇంటికి చేరుకొని, 10 గంటలకి ట్రైన్ హైదరాబాద్ ఎక్కి వెళ్ళాను. అక్కడ నా పనులన్నీ పూర్తి చేసుకున్నాను. ఇంకా చాలా రోజుల తర్వాత మా బంధువులందరినీ కలిసాను. కొంతమంది బంధువులు ఇంటికి చాలా సంవత్సరాల తరువాత వెళ్లి కలవగలిగాను. ఇదంతా బాబా దయవల్లే జరిగింది.

రైల్వే జీఎం మా ఆఫీసులో వార్షిక ఇన్స్పెక్షన్ డిసెంబర్ 13న చేయడానికి నిశ్చయించారు. కిందటి సంవత్సరం ఇన్స్పెక్షన్ జరిగినప్పుడు ఇన్స్పెక్షన్‌లో భాగంగా ఒక ఇంచార్జికి అతని తప్పు అంతలా లేకపోయినప్పటికీ చార్జిషీట్ ఇచ్చి, పెద్ద పనిష్మెంట్ కూడా ఇచ్చారు. ఈసారి నేను ఇంచార్జిగా ఉన్న సెక్షన్‌లో ఇన్స్పెక్షన్ జరగనుండటం వల్ల నేను బాబాని, "ఈ ఇన్స్పెక్షన్ బాగా అయితేనే ఎటువంటి ఇబ్బందులు లేకుండా నా భార్య కాన్పు సమయానికి నాకు సెలవులు దొరుకుతాయి. కాబట్టి అలా అయ్యేటట్లు అనుగ్రహించినట్లైతే నేను మీ మందిరంలో పాలకోవా సమర్పించి, అందరికీ ఆ ప్రసాదం పంచుతాను" అని ప్రార్థించాను. బాబా దయవల్ల ఇన్స్పెక్షన్ చాలా బాగా జరిగి GM సార్ మా సెక్షన్‌కి స్పాట్ క్యాష్ అవార్డు ప్రకటించారు. అది కూడా నా చేతులకు అందజేశారు. ఇచ్చిన మాట ప్రకారం బాబా మందిరంలో పాలకోవా సమర్పించి అందరికీ పంచాను. "చాలా చాలా ధన్యవాదాలు బాబా. ఇలానే మీ కరుణ మీ భక్తులపై చూపండి".

నా భార్య 8 నెలల గర్భవతి ఉండగా రెండు నెలల నుంచి తనకి కడుపులో మరియు వెన్నులో కాస్త నొప్పి వస్తూ ఉండేది. డాక్టరుకి చూపిస్తే, "కడుపు కిందకు జారింది. కాస్త జాగ్రత్తగా ఉండాలి. అలానే ఎందుకైనా మంచిది ఫెటల్ ఎకో స్కాన్ చేయండి" అని సలహా ఇచ్చారు. స్కాన్ చేయించడానికి అపాయింట్మెంట్ కోసం చూస్తే వారం తరువాత దొరికింది. బాబా దయవల్ల ఆరోజు నాకు ఎటువంటి ఎమర్జెన్సీ డ్యూటీ పడలేదు, స్కాన్ కూడా బాగా జరిగింది. కానీ రిపోర్టులో ఏమొస్తుందోనని కాస్త టెన్షన్ పడ్డాను. వెంటనే బాబాని తలుచుకొని, "బాబా! స్కాన్‌ రిపోర్టులో అంతా బాగుండేలా చేయండి. ఎటువంటి సమస్య లేకుండా ఉండేలా చూడండి. ఒకరికి అన్నదానం చేస్తాను" అని అనుకున్నాను. బాబా దయవల్ల స్కాన్ రిపోర్ట్ బాగా వచ్చింది. కానీ కాస్త నీరు ఎక్కువగా ఉంది, మరే సమస్య లేదని డాక్టర్ చెప్పారు. "ధన్యవాదాలు బాబా".

2024, నవంబర్ 28 నాటికి నా భార్యకి 8 నెలలు పూర్తై 9వ నెల వచ్చింది. దాంతో నేను తనని హైదరాబాదులో ఉన్న తన పెద్దక్క వాళ్ళింటికి పంపాలనుకున్నాను. కానీ 2 నెలల ముందు నుండి గైనకాలజిస్ట్, "గర్భం కిందకు జారడం, ఉమ్ము నీరు ఎక్కువగా ఉండడం వల్ల చివరి నిముషం వరకు ప్రయాణం చేయొచ్చా, లేదా అన్న దాని గురించి నేనేం చెప్పలేను. 8 నెలలు పూర్తయ్యాక ఒకసారి రండి. స్కాన్ చేసి రిపోర్టు చూసాక పుట్టింటికి వెళ్లాలా, వద్దా అన్నది చెప్తాను" అని అన్నారు. ఒకవేళ డాక్టర్ వద్దంటే, మహారాష్ట్రలోని సోలాపూర్ వరకు ఇంత దూరం వచ్చి చూసుకొనే వాళ్ళే లేరు. ఎందుకంటే, నా భార్య తల్లిదండ్రులు దూరంగా విజయనగరంలో ఉంటారు. పైగా నా భార్య తండ్రికి వారంలో రెండుసార్లు డయాలసిస్ చేయాల్సిన పరిస్థితి. పోనీ హైదరాబాద్‌లో ఉన్న తన అక్క రావాలంటే, వాళ్ళ బాబు స్కూలు పోతుంది. కాబట్టి తప్పనిసరిగా నేను నా భార్యని హైదరాబాద్ పంపించాల్సి ఉంది. అందువల్ల నేను బాబాని, "బాబా! స్కాన్‌లో అంతా బాగుండాలి. తల్లి, బిడ్డ ఆరోగ్యంగా ఉంటేనే నేను నా భార్యని హైదరాబాద్ పంపగలను. అక్కడ తన ఇద్దరు అక్కల కుటుంబాలు, మా బంధువులు అందుబాటులో ఉంటారు గనక ఏదైనా సమస్య వస్తే వాళ్ళు చూసుకుంటారు. అందువల్ల అంతా బాగుండి హైదరాబాద్ వెళ్లడానికి డాక్టర్ అనుమతిస్తే, ముగ్గురు అభాగ్యులకు అన్నదానం చేస్తాను" అని ప్రార్థించాను. బాబా దయ చూపారు. రిపోర్ట్ నార్మల్‌గా వచ్చింది. డాక్టర్, "కాస్త ఉమ్మనీరు ఎక్కువగా ఉంది. జాగ్రత్త!" అని చెప్పి హైదరాబాద్ వెళ్ళడానికి ఒప్పుకున్నారు. అయితే నేను రైల్వే ఎమర్జెన్సీ సెక్షన్‌లో పని చేస్తుండటం వల్ల నాకు ఎప్పుడు డ్యూటీ వేస్తారో తెలియని పరిస్థితి. కాబట్టి నేను బాబాని, "నా భార్యని హైదరాబాద్ తీసుకొని వెళ్లేరోజు ఎటువంటి ఎమర్జెన్సీ డ్యూటీ పడకుండా, అలాగే తనకి తోడుగా వెళ్లేందుకు నాకు సెలవు దొరికేలా అనుగ్రహించి మమ్మల్ని క్షేమంగా హైదరాబాద్ చేర్చండి" అని ప్రార్థించాను. బాబా దయవల్ల ఎటువంటి ఇబ్బందీ లేకుండా మా ట్రైన్లో హైదరాబాద్‌కి ప్రయాణం సాగింది. అంతేకాదు, మర్నాడు డాక్టర్ అపాయింట్మెంట్ దొరికింది. డాక్టర్ చూసి నా గర్భంలో ఉన్న బిడ్డ ఆరోగ్యంగా ఉందని అన్నారు. బాబాకి ఇచ్చిన మాట ప్రకారం ముగ్గురికి అన్నదానం చేశాను. "ధన్యవాదాలు బాబా. ఇలానే మీ దయ మాపై కురిపిస్తూ నా భార్యకి కాన్పు సక్రమంగా అయి ఆరోగ్యవంతురాలైన చక్కటి ఆడబిడ్డని ప్రసాదించండి".

---

Read More

సాయిభక్తుల అనుభవమాలిక 1946వ భాగం....

---

ఈ భాగంలో అనుభవాలు:

1. బాబా దయతో ఆరోగ్యం

2. సాయినాథుని కృప

---

బాబా దయతో ఆరోగ్యం

సాయి భక్తులందరికీ నా నమస్కారములు. నా పేరు వెంకటేష్. నాకు సాయే తల్లి, తండ్రి, గురువు. నేను నాకొచ్చిన ప్రతి సమస్యను బాబాతో చెప్పుకుంటాను. 2024, నవంబర్‌లో ఒకరోజు రాత్రి రెండు సంవత్సరాల మా బాబుకి విపరీతమైన జ్వరం వచ్చింది. నేను బాబుకి మూర్ఛ కూడా వస్తుందేమోనని భయపడి ఇంట్లో ఉన్న పారాసెటమాల్ చుక్కలు వేసాను. అయినా జ్వరం అదుపు కాలేదు. అప్పుడు నేను, "బాబా! బాబుకి జ్వరం తగ్గేలా అనుగ్రహించండి" అని బాబాను ప్రార్ధించాను. బాబా దయవల్ల ఉదయానికి కొంచెం జ్వరం తగ్గింది. ఇంకా స్పల్ప జ్వరంతోపాటు జలుబు, దగ్గు ఉంటే ఇంట్లో ఉన్న మందు వాడాము. బాబా దయవల్ల మూడు రోజులకి బాబుకి పూర్తిగా తగ్గింది. ఇంకోసారి రాత్రి నా భార్య, తనకి ఆరోగ్యం బాగలేదని, ఊపిరి ఆడట్లేదు, భయంగా వుందని చెప్పింది. నేను తనతో, "నీకు ఏం కాదు. బాబా దయవలన తగ్గుతుంది. 'ఓం శ్రీసాయి ఆరోగ్యక్షేమదాయ నమః' అనుకో" అని చెప్పాను. తర్వాత నేను, "బాబా! నా భార్యకి ఏమీ కాకుండా చూడండి" అని బాబాను వేడుకున్నాను. బాబా దయవల్ల ఉదయానికి నా భార్యకి సాధారణమైంది. "ధన్యవాదాలు బాబా. ఇలానే మమ్మల్ని కాపాడు బాబా".

---

సాయినాథుని కృప

సాయినాథుని చరణాలకు పాదాభివందనం. అందరికీ నమస్కారం. నా పేరు రేవతి. నేను 2024, అక్టోబర్ నుండి రెండు నెలలపాటు జలుబు వల్ల గొంతులో సమస్యతో బాధపడ్డాను. హాస్పిటల్‌కి వెళదామంటే ఏదో ఒక ఆటంకమొచ్చి వెళ్లడం అయ్యేది కాదు. చివరికి నవంబర్ 14, గురువారం డాక్టర్ వద్దకు వెళితే, టెస్ట్ చేసి, "గొంతులో చిన్న పుండు అయి వాపు వచ్చింది" అని చెప్పి వారం రోజులకు మందులిచ్చి, "తగ్గకపోతే వేరే టెస్ట్ చేసి తదుపరి చికిత్స చేద్దామ"ని అన్నారు. అంటే పరోక్షంగా తగ్గకపోతే ఆపరేషన్ చేయాల్సి రావొచ్చన్నట్లు మాట్లాడారు. అదీకాక ఎంతో అవసరమైతే తప్ప మాట్లాడకూడదన్నారు. కానీ, ఉపాధ్యాయురాలినైన నేను మాట్లాడకపోతే ఎలా? అసలు నాకు ఆపరేషన్ అంటేనే భయమేసింది. విషయం తెలిసి నాకంటే ఎక్కువగా నా కుటుంబసభ్యులు, నా స్నేహితురాలు బాబాని ఎక్కువగా ప్రార్థించారు. బాబా కూడా వాళ్ళకి తగ్గిపోతుందని సందేశాలిచ్చారు. అలాగే బాబా దయవల్ల మందులు వాడిన రెండోరోజు నుండే గొంతులో మెరుగుదల వచ్చి వారం రోజులకి పూర్తిగా తగ్గిపోయింది. నేను మళ్ళీ గురువారం(నవంబర్ 21) డాక్టర్ వద్దకు వెళితే, "పూర్తిగా తగ్గింది. మీరు ఇక చెకప్‌కి రావాల్సిన అవసరం లేదు" అన్నారు. నేను ఆ సమస్యతో బాధపడుతున్న సమయంలో మా పాప జలుబు, దగ్గుతో బాధపడింది. బాబాని ప్రార్ధిస్తే రెండు రోజుల్లో తగ్గిపోయింది. ఒకరోజు మా అత్తయ్యవాళ్ళు మా ఇంటికి వచ్చి చీకటి పడుతుండగా తిరిగి వెళ్లారు. మా అత్తయ్య పెద్దావిడ. చలి ఎక్కువగా ఉన్న కారణంగా నేను, "వాళ్ళంతా క్షేమంగా ఇంటికి చేరుకొని, మా అత్తయ్యకి ఎటువంటి ఆరోగ్య సమస్యలు రాకుండా ఉండాల"ని బాబాను వేడుకున్నాను. బాబా దయవల్ల వాళ్ళు క్షేమంగా ఇంటికి చేరుకున్నారు, మా అత్తయ్య కూడా బాగానే ఉన్నారు.

మా ఇల్లు కట్టి ఏడు సంవత్సరాలవుతుంది. అందుకని పండగ సెలవుల్లో పెయింటింగ్ వేయించాలని అనుకున్నాం. కానీ తర్వాత పండగ సెలవుల్లో అయితే మరీ పండగ దగ్గరకొచ్చేస్తుంది, పని పూర్తవ్వదని, పండగ సెలవులకు ముందు సెలవులు పెట్టాల్సి వస్తుందని క్రిస్మస్ సందర్భంగా వచ్చే రెండు రోజుల సెలవులతోపాటు మరో రెండు రోజులు సెలవు పెడితే సరిపోతుందనుకొని క్రిస్మస్ రోజు పెయింటింగ్ మొదలుపెట్టాం. అయితే ఆరోజు భోరున వర్షం పడింది. "ఏమి చేయాలి బాబా?" అని బాబాని తలుచుకొని ఆ రోజుకి ఇంటి లోపల పెయింటింగ్స్ వేయించాము. బాబా దయవల్ల మరుసటిరోజుకి వర్షం తగ్గడంతో బయట పెయింటింగ్ చేయించాము. పని చాలా బాగా జరిగింది. ఇలా బాబా నన్ను ఎన్నో విధాలుగా కాపాడుతున్నారు. "ధన్యవాదాలు తండ్రీ. నన్ను మీ కుటుంబంలో చేర్చుకొని నన్ను, నా కుటుంబాన్ని కంటికి రెప్పలా కాపాడుతున్నారు సాయినాథా! మీ చల్లని దృష్టి నా మీద, నా కుటుంబం మీద, ప్రజలందరి మీద ఉండాలని కోరుకుంటున్నాను బాబా".

---

Read More

సాయిభక్తుల అనుభవమాలిక 1945వ భాగం....

---

ఈ భాగంలో అనుభవాలు:

1. బాబా చాలా దయగలవారు - జాగ్రత్త వహిస్తారు

2. ఆటంకం లేకుండా శిరిడీకి రప్పించుకున్న బాబా

---

బాబా చాలా దయగలవారు - జాగ్రత్త వహిస్తారు  

నేను ఒక సాయి భక్తురాలిని. మేము వేరే దేశంలో నివాసముంటున్నాము. ఒకరోజు తెల్లవారుజామున అకస్మాత్తుగా నా కడుపులో నొప్పి మొదలైంది. అది కూడా కుడి వైపున. నాకు ఉన్నట్టుండి ఎందుకలా నొప్పి వస్తుందో అర్థం కాలేదు. నేను ఆ నొప్పి వల్ల నిలబడలేక, కూర్చోలేక చాలా ఇబ్బందిపడ్డాను. ఒకనొక సమయంలో నేను నొప్పిని అస్సలు భరించలేకపోయాను. అప్పుడింకా, "బాబా! మీరే నా పరమాత్మ. దయచేసి నన్ను రక్షించండి" అని బాబాను ప్రార్థిస్తూ అలాగే కొంతసేపు పడుకున్నాను. ఆ తర్వాత కూడా నేను నిలబడలేకపోయాను. అప్పుడు ఎందుకిలా నొప్పి వస్తుందో తెలుసుకోవడానికి గూగుల్‌లో వెతికితే, అది అపెండిసైటిస్ కావచ్చని చూపించింది. నాకు ఆరేళ్ళ బాబు ఉన్నాడు. తనికి నేనంటే చాలా ఇష్టం. నేను తన గురించి ఆందోళన చెంది భయపడ్డాను. అదే సమయంలో మా అమ్మ ఫోన్ చేసింది. తనకి నేను నా సమస్య గురించి చెప్తే, అది గ్యాస్ నొప్పి అని, కొన్ని వ్యాయామాలు చేయమని చెప్పింది అమ్మ. అది విని నాకు కాస్త ఉపశమనం అనిపించింది. మొదటిసారి అలాంటి నొప్పిని అనుభవించడం వల్ల, గ్యాస్ నొప్పి ఎలా ఉంటుందో తెలియనందున భయంతో ఏదేదో ఊహించుకున్నాను. అమ్మ చెప్పినట్లు కొన్ని వ్యాయామాలు చేయడంతో నొప్పి నుండి చాలా ఉపశమనం పొందాను. "థాంక్యూ సో మచ్ బాబా. మీరే మా అమ్మ ద్వారా సహాయం చేసారు తండ్రి. నేను ప్రతిదీ మీ పాదకమలాల వద్ద నివేదించుకుంటున్నాను. వేరే దేశంలో ఉంటున్న మమ్మల్ని ఆరోగ్య సమస్యల నుండి జాగ్రత్తగా చూసుకోండి బాబా".

ఒకరోజు నా కొడుకు మలద్వారం వద్ద నొప్పిగా ఉందని చెప్పాడు. ఆ కారణంగా తను రెండు రోజులు మలవిసర్జనకు వెళ్ళలేదు. నేను తనని నీళ్లు ఎక్కువగా తాగమని చెప్పాను. కానీ తను చాలా తక్కువ నీళ్లు తాగి బాధపడసాగాడు. నేను తనని అలా చూడలేక అన్ని ప్రయత్నాలు చేశాను కానీ, తనకి మలవిసర్జన కాలేదు. ఇంకా నేను ఆందోళన చెంది బాబాను ప్రార్థించాను. తరువాత నేను ఒక బాబా సందేశాన్ని చూశాను, "నేను చాలా దయగలవాడిని. నేను జాగ్రత్త వహిస్తాను" అని. అది చూసాక నా మనసు కుదుటపడింది కానీ, ఒక తల్లిగా నేను నా కొడుకు బాధపడుతుంటే చూడలేకపోయాను. మూడోరోజు తను స్కూలుకి వెళ్ళాడు. నేను స్కూల్లో తనకి నొప్పి వస్తుందేమోనని చింతిస్తూ బాబా నామం జపిస్తూ గడిపాను. తను స్కూల్ నుండి వచ్చాక హఠాత్తుగా వాష్‌రూమ్‌కి వెళ్లి మలవిసర్జన చేసాడు. ఒకవేళ తనకి ఆ(మూడో)రోజు కూడా మలవిసర్జన కాకపోయుంటే చాలా కష్టమయ్యేది. కానీ బాబా దయవల్ల సమస్య తప్పింది. "చాలా చాలా కృతజ్ఞతలు బాబా. దయచేసి తననెప్పుడూ ఇలాగే ఆశీర్వదించండి. కృపతో తనని మీ భక్తుడిగా చేసుకోండి. అప్పుడు నేను తన గురించి చింతించాల్సిన పనుండదు. కారణం, ఈ కలియుగంలో మీరు చేసుకున్నట్టు ఎవ్వరూ చూసుకోరు. మీరే నా తల్లి, తండ్రి, గురువు, సర్వమూ. దయచేసి నేనెప్పుడూ మీ నామస్మరణ చేసేలా చేయండి బాబా. మీ ఉనికిని నేను అనుభవించగలిగితే చాలు, అప్పుడు నేను దేనినైనా ఎదుర్కోగలను. ఇంకొక విన్నపం బాబా, 'నేను నా తల్లిదండ్రుల దగ్గర లేను. వాళ్ళని జాగ్రత్తగా చూసుకోండి, వాళ్ళకి మంచి ఆరోగ్యం ప్రసాదించండి బాబా. అలాగే కృపతో ప్రతి ఒక్కరికీ చక్కటి ఆరోగ్యాన్ని అనుగ్రహించండి బాబా".

సాయి స్మరణం సంకట హరణం

బాబా శరణం భవభయ హరణం.

---

ఆటంకం లేకుండా శిరిడీకి రప్పించుకున్న బాబా

నా పేరు సంధ్య. బాబా లీలలు, ఆయన తన భక్తులకు అందించే సహకారం నిజంగా అద్భుతమైనవి. బాబా దర్శనానికి శిరిడీ వెళ్లాలని మనం ఎంత ప్రణాళికలు వేసినా, ఎంత ప్రయత్నించినా సాధ్యం కాదు. అది బాబా మనల్ని అక్కడికి రమ్మని పిలిచినప్పుడు మాత్రమే సాధ్యమవుతుందని నేను గట్టిగా నమ్ముతాను. ఒకసారి మేము శిరిడీ వెళ్లాలని ప్లాన్ చేసుకొని ఒక నెల ముందు టిక్కెట్లు బుక్ చేసుకున్నాము. తర్వాత హార్మోన్ల సమస్య వల్ల నా నెలసరి ఆలస్యమైంది. దాంతో నేను 'శిరిడీ వెళ్లాలా, వద్దా' అని ఎటూ తేల్చుకోలేక చాలా కలత చెందాను. శిరిడీ ప్రయాణానికి ఒక వారం ముందు నేను నా సందిగ్ధావస్థను నా భర్తతో చర్చిస్తే ఆయన, "ఎలాంటి అడ్డంకులు లేకుండా అంతా సజావుగా జరిగేలా అనుగ్రహించమని బాబాని ప్రార్థించమ"ని సూచించారు. నేను ఆయన చెప్పినట్లే బాబాను ప్రార్థించాను. బాబా దయతో అంతా సవ్యంగా జరిగి మేము శిరిడీ వెళ్లి, ఆయన దర్శనం చేసుకొని సంతోషంగా తిరిగి వచ్చాము. బాబా కృపకు నేను కృతజ్ఞురాలిని. బాబా తమ భక్తులందరినీ ఇలాగే ఆశీర్వదిస్తూ ఉండాలి. "ధన్యవాదాలు బాబా".

---

Read More

సాయిభక్తుల అనుభవమాలిక 1944వ భాగం....

---

ఈ భాగంలో అనుభవాలు:

1. బాబా ఉనికికి, వారి సహాయానికి స్పష్టమైన సంకేతం

2. ఉద్యోగం ప్రసాదించిన బాబా

---

బాబా ఉనికికి, వారి సహాయానికి స్పష్టమైన సంకేతం

శ్రీసాయిబాబాకు, వారి అనుగ్రహాన్ని పొందిన భక్తులందరికీ ప్రణామాలు. నా పేరు షమీల.  2002లో నేను మొదట బాబాను ప్రార్థించడం ప్రారంభించినప్పటి నుండి నా జీవితమంతా మారిపోయింది. బాబా నా తండ్రి మాత్రమే కాదు, స్నేహితుడు, మార్గదర్శి, ఇంకా ఎక్కువ. ఆయన ఉనికిని నేను నా జీవితంలోని ప్రతి విషయంలో అనుభూతి చెందుతున్నాను, ప్రత్యక్షంగా ఆయన కృపతో ముడిపడి ఉన్న అనుభవం కనీసమొక్కటైనా లేని రోజు నా జీవితంలో లేదని నేను నిజాయతీగా చెప్పగలను. ఆయన నాకు ప్రసాదించిన అనేక అనుభవాలలో నుండి ఇటీవల జరిగిన దాన్ని పంచుకుంటున్నాను. 2023, మార్చిలో మా కుటుంబం H4 వీసా మీద యుఎస్ వెళ్లింది. అప్పటికి భారతదేశంలో సాఫ్ట్‌వేర్ ఇంజనీర్‌గా పని చేస్తున్న నేను నా ఉద్యోగానికి రాజీనామా ఇచ్చి నా కుటుంబంతో పాటు యుఎస్ వెళ్ళాను. అక్కడికి వెళ్ళాక ఎలాగూ ఉద్యోగం చేయట్లేదు కాబట్టి నేను నా చదువును కొనసాగించడం మంచిదని తలచి డేటా సైన్స్‌లో మాస్టర్స్ చేయడానికి దరఖాస్తు చేసాను. అందులో భాగంగా నేను నా H4 వీసాను F1 స్టూడెంట్ వీసాగా మార్చడానికి ఫైల్ చేసాను. అదంతా బహు RFE(Request for Evidence)లతో చాలా సుదీర్ఘమైన ప్రక్రియ. అయినప్పటికీ బాబా దయవలన 2024, ఆగస్టు నాటికి నా F1 వీసా ఆమోదించబడింది. అయితే, నా H4 వీసా గడువు 2024, సెప్టెంబర్‌లో ముగిసింది. అందుకని నేను న్యాయవాది ద్వారా ట్రాన్సిషన్ అప్లికేషన్ సమర్పించాను. అందుకుగానూ అక్నాలెడ్జిమెంటుగా USCIS నాకు I-797C నోటీసు పంపింది. అయితే నేను నా F1 వీసా ఆమోదించబడినందున దాని గురించి పెద్దగా ఆలోచించలేదు. I-797C నోటీసును సమర్పించి కాలేజీలో చేరి అంతా బాగానే ఉందనుకున్నాను. కానీ త్వరలోనే కాలేజీవాళ్లు, 'నా F1 వీసా ఇంకా ఆమోదం పొందలేదని, I-797A అప్రూవల్ నోటీసుకు బదులుగా I-797C నోటీసు నాకు అందిందని' చెప్పారు. ఆ సమయంలో నేను భయాందోళనలకు గురయ్యాను. ఎందుకంటే, అప్పటికే నా H4 వీసా గడువు ముగిసినందున నేను సరైన పత్రాలు లేకుండా, చెల్లుబాటు అయ్యే వీసా లేకుండా యుఎస్‌లో ఉంటున్నాను. అది ఇమ్మిగ్రేషన్ చట్టాలను ఉల్లంఘించడమే. అందువలన నేను పూర్తిగా ఒత్తిడికి గురయ్యాను. నాకు ఏమి చేయాలో అర్థం కాలేదు. పరిస్థితిని వివరించడానికి నేను వెంటనే నా న్యాయవాదిని సంప్రదించాను. నేను భయాందోళనల నడమ మార్గదర్శకత్వం కోసం బాబా వైపు దృష్టి మరల్చాను. నేను ఎప్పుడు సందిగ్ధంలో ఉన్నా కాగితంపై 'అవును'/'కాదు' అని వ్రాసి, వాటిని బాబా పాదాల దగ్గర ఉంచి, ఒకదాన్ని ఆయన సమాధానంగా తీసుకోవడం నాకు అలవాటు. ఆ రాత్రి అదే పని చేసాను. చీటీలు వేసి ఏమి జరుగుతుందని బాబాని అడిగాను. బాబా 'నా వీసా ఆమోదించబడిందని, ఎటువంటి సమస్యలు ఉండవని' నాకు హామీ ఇచ్చారు. అంతేకాదు, మరుసటిరోజు ఉదయమే నా న్యాయవాది నుండి నాకు 'I-797A అప్రూవల్ నోటీసు అందుకున్నానని, దాన్ని నాకు పంపుతున్నానని తెలియజేస్తూ ఒక ఇమెయిల్ వచ్చింది. ఒక్క క్షణంలో అప్పటికి కొద్ది రోజులుగా నెలకొన్న ఆందోళన, చింత అంతా అదృశ్యమయ్యాయి. ఇది నిజంగా ఒక అద్భుతం. నా జీవితంలో బాబా ఉనికికి, వారి సహాయానికి స్పష్టమైన సంకేతం. నా అనుభవాన్ని చదవడానికి సమయాన్ని వెచ్చించిన ప్రతి ఒక్కరికీ ధన్యవాదాలు. బాబా మహిమ సత్యం. వారి ప్రేమ, అనుగ్రహానికి నేను ఎప్పటికీ ఆయనకు కృతజ్ఞురాలిని.

---

ఉద్యోగం ప్రసాదించిన బాబా

ఓం శ్రీ శిరిడీ సాయినాథా! సాయి బంధువులకు నమస్కారాలు. నా పేరు తిలోత్తమ. శ్రీ సాయినాథుని దివ్య పాదాలకు శిరస్సువంచి నమస్కరిస్తూ ఆయన మాపై చూపిన ప్రేమను పంచుకుంటున్నాను. కరోనా సమయంలో సాఫ్ట్వేర్ కంపెనీలో ఉద్యోగం చేస్తున్న మా తమ్ముడిని ఉద్యోగం నుండి తొలగించారు. అప్పటినుంచి మా తమ్ముడు ఏవేవో కోర్సులు నేర్చుకొని వైజాగ్‌లో ఉంటూ ఉద్యోగ ప్రయత్నాలు చేసాడు. కానీ తనకి ఏ ఉద్యోగ అవకాశము రాలేదు. రెండు రౌండ్లు పూర్తయ్యాక ఫోన్ చేస్తానని చెప్పేవాళ్ళు కానీ, ఏ ఫోనూ వచ్చేది కాదు. మా తమ్ముడు చాలా దుఃఖానికి గురైయ్యాడు. నేను బాబాని, "బాబా! మా తమ్ముడికి స్థిరమైన ఉద్యోగాన్ని ప్రసాదించండి" అని చెప్పుకున్నాను. కొన్నిరోజులకి హైదరాబాదులో ఉన్న మా పెద్దమ్మవాళ్ళ అల్లుడు ఒక జాబ్ ఇంటర్వ్యూకి తమ్ముడ్ని తీసుకెళ్లారు. తమ్ముడు రెండు రౌండ్లు విజయవంతంగా పూర్తిచేసాక వాళ్ళు, 'హెచ్ఆర్ ఫోన్ చేస్తార'ని చెప్పారు. కానీ వారం రోజులైనా ఫోన్ రాలేదు. దాంతో మా తమ్ముడు వాళ్ళు ఇంకా కాల్ చేయరని నిరాశ చెందాడు. నేను, "బాబా! దయతో తమ్ముడికి ఫోన్ వచ్చేలా చేయండి" అని బాబాను ప్రార్థించాను. తర్వాత ఒక ఆదివారం రాత్రి హెచ్ఆర్ ఫోన్ చేసి, "సోమవారం ఆఫీసుకు రమ్మ"ని చెప్పారు. అంతే, మా ఆనందానికి అవధుల్లేవు. బాబా దయతో మా తమ్ముడు ఆ ఉద్యోగంలో చేరి అక్కడ అంతా చాలా బాగుందని చెప్పాడు. ఇలా మంచి ఉద్యోగం కోసమే ఆలస్యమైందనుకున్నాము మేము. ఇప్పుడు మా తమ్ముడు చాలా సంతోషంగా ఉన్నాడు. "ధన్యవాదాలు బాబా".

సర్వం శ్రీసాయినాథార్పణమస్తు.

---

Read More

సాయిభక్తుల అనుభవమాలిక 1943వ భాగం....

---

ఈ భాగంలో అనుభవాలు:

1. నెలసరి ఆపి నోము చేసుకొనేలా అనుగ్రహించిన బాబా

2. బాబా అనుగ్రహం

---

నెలసరి ఆపి నోము చేసుకొనేలా అనుగ్రహించిన బాబా

 

సాయి భక్తులందరికీ నమస్కారం. నా పేరు లలిత. ఈ బ్లాగు బాబాకి దగ్గరయ్యే మార్గాన్ని చూపుతుంది,  అలాగే సమస్యల్లో ఉన్నప్పుడు ఎంతో ధైర్యాన్నిస్తుంది. మేము కార్తీకమాసంలో కార్తీక నోములు చేసుకోవడం ఆనవాయితీగా వస్తుంది. అలాంటిది ఈ సంవత్సరం(2024) అనుకోకుండా ముందుగా నాకు నెలసరి వచ్చేయడంతో మూమూలుగా నోము చేయాల్సిన రోజు చేసుకోలేకపోయాను. అందుకని ఒక వారం తర్వాత చేసుకుందామనుకొని అన్ని సిద్ధం చేసుకుంటుంటే, పూజకి ఒక రోజు ముందు మళ్ళీ నెలసరి కనిపించింది. అంతకుముందు కూడా ఇలానే నెలసరి పది రోజుల వరకు ఆగలేదు. అందువల్ల నాకు చాలా భయమేసింది. ఇల్లు శుభ్రపరచడం ఆపేసాను. కానీ ఇక అప్పుడు నోము చేయలేకపోతే ఈ సంవత్సరం కార్తీక నోములు అస్సలు చేయనట్టే. అది చాలా పెద్ద విషయం. ఇలాంటి సమయంలో నేను అనుకోకుండా చాలా రోజుల తరువాత ఈ బ్లాగ్(సాయి మహారాజ్ సన్నిధి బ్లాగు) ఓపెన్ చేసి చూసాను. నాకు బాబా గుర్తొచ్చారు. బాబా దగ్గరికి వెళ్లి, "ఇక నువ్వే నాకు దిక్కు" అని ఏడ్చి, "నీ ఊదీ నీళ్ళే నాకు ఔషధం. ఏదో ఒకటి చేసి నా నెలసరి ఆపండి. పూజ చేసుకునేలా అనుగ్రహించండి" అని చెప్పుకున్నాను. వెంటనే ఊదీ నీళ్లలో కలుపుకుని తాగాను. కొన్ని గంటల వరకు చాలా కంగారుగా భయపడుతూ గడిపాను. కానీ తరువాత అంతా సర్దుకుంటుందనిపించింది. బాబా తన లీల చూపించారు. మధ్యాహ్ననికి పూర్తిగా నెలసరి ఆగిపోయింది. ఇంటి పనులు మొదలుపెట్టుకున్నాను. అయినప్పటికీ రేపు ఏమవుతుందోనని కంగారుపడుతూనే ఉన్నాను. కానీ ఆ బాబా దయవల్ల ఏ సమస్య లేకుండా వ్రతం చేసుకోగలిగాను. "నా  ప్రతి సమస్యని తీరుస్తూ నన్ను అనుగ్రహిస్తున్న మీకు చాలా ధన్యవాదాలు బాబా. నేను ఎప్పుడూ మిమ్మల్ని మర్చిపోకుండా పూజించుకునే అదృష్టాన్ని నాకు ఇవ్వండి బాబా".

---

బాబా అనుగ్రహం

నా పేరు రాంప్రసాద్. నేను హైదరాబాద్ నివాసిని. ఒకప్పుడు నేను మా అన్నయ్యవాళ్ళ ఇంట్లో ఉండేవాడిని. మా నాన్న నన్ను చూడడానికి వచ్చినా, నేను మా వూరు వెళ్లినా నా అవసరాల కోసం నాన్న దగ్గర నుండి డబ్బులు తీసుకుంటుండేవాడిని. ఆ డబ్బుల్లో ఎంతో కొంత దాచిపెట్టుకుంటుండేవాడిని. అలా 2 సంవత్సరాలు గడిచాక నేను హాస్టల్‌లో చేరాను. అప్పుడు నా సామానంతా తెచ్చి నా గదిలో పెట్టుకున్నాను. నేను దాచిపెట్టుకున్న డబ్బులు లెక్క పెట్టి జాగ్రత్తగా ఓ బ్యాగులో పెట్టాను. కొన్ని రోజులు గడిచాక నేను ఏదో అవసరమై నా బ్యాగు తెరిచి డబ్బులు కోసం వెతికితే, అవి దొరకలేదు. హాస్టల్‌లో ఉన్నందున డబ్బులు ఏమైపోయాయో అని చాలా టెన్షన్ పడ్డాను. వెంటనే నా స్నేహితుడు నిఖిల్‌కి ఫోన్ చేసి విషయం చెపితే తను, "వస్తాను ఉండు" అని చెప్పాడు. తను వచ్చేలోపు నాకు నా పక్క బెడ్ అతని(తను ఆరోజు ఊరికి వెళ్ళాడు)పై అనుమానమొచ్చి తన బ్యాగులో అంతా వెతికాను కానీ, ఏం దొరకలేదు. ఆ డబ్బులు ఎక్కడ పెట్టానో, ఏమయ్యాయో నాకు అస్సలు గుర్తుకు రాలేదు. అప్పుడు నేను నా మనసులో బాబాను తలుచుకొని, "నా డబ్బులు నాకు దొరికేలా చేయమ"ని వేడుకున్నాను. అలా వేడుకోగానే ఎందుకో నా బ్యాగులో ఒక కవర్ ఓపెన్ చేస్తే, అందులో ఉన్న ఒక బెడ్‌షీట్‌లో డబ్బులు చుట్టి ఉన్నాయి. అలా బాబా కృపవల్ల నా డబ్బులు నాకు దొరికాయి.

2024, అక్టోబరులో అమెజాన్‌లో సేల్ పెట్టినప్పుడు నేను ఒక ఫోన్ కొనాలనుకొని నా బడ్జెట్‌లో నాకు తగిని ఫోన్ కోసం చూస్తుంటే Samsung S23 FE ఫోన్ చాలా తక్కువకి వస్తుందని చూసి నా పాత ఫోన్ ఎక్స్చేంజ్ పెట్టి, ఆర్డర్ పెట్టాను. కానీ ఆ పాత ‌ఫోన్ కాస్త చెడిపోయింది. దాన్ని తీసుకోకపోతే నేను ఆ డబ్బు చెల్లించాల్సి వస్తుంది. అప్పుడు నేను బాబాని, "వాళ్ళు ఆ ఫోన్‌ని ఎలాగైనా తీసుకెళ్లేలా చూడమ"ని కోరుకున్నాను. ఆరోజు బాగా పొద్దుపోయాక కొత్త ఫోన్ డెలివరీ ఇవ్వడానికి డెలివరీ బాయ్ వచ్చాడు. తను నా పాత ఫోన్ చూసి, "అన్ని సరిగా ఉన్నాయా?" అని అడిగాడు. నేను ఉన్నాయని చెప్పడంతో అతను అసలేం తనిఖీ చేయకుండానే నా పాత ఫోన్ తీసుకుని, కొత్త ఫోన్ నాకిచ్చి వెళ్ళిపోయాడు. నాకు చాలా సంతోషంగా అనిపించింది. అందరికీ బాబా ఆశీస్సులు ఉండాలి. "ధన్యవాదాలు బాబా".

---

Read More

సాయిభక్తుల అనుభవమాలిక 1942వ భాగం....

---

ఈ భాగంలో అనుభవాలు:

1. శ్రీసాయినాథుని దయ

2. బాబాని శరణుజొచ్చినంతనే తీరిన ఆరోగ్య సమస్యలు 

---

శ్రీసాయినాథుని దయ

సాయి బంధువులకు నమస్కారం. నా పేరు ఛత్రపతి. ఒకసారి నా కడుపులో మంట మొదలై ఎంతకూ తగ్గలేదు, చాలా ఇబ్బందిపెట్టింది. బాబాను తలిస్తే సమస్య తీరిపోతుందని తెలిసినప్పటికీ ఆ సమయంలో నాకు ఆయన జ్ఞాపకం రాలేదు. అదే మాయ అంటే. అది మనల్ని ఆవహిస్తుంది. బాబాను మనకి దూరం చేస్తుంది, సమయం వృధా అయ్యేలా చేస్తుంది, మన బాధ తీరకుండా అడ్డు పడుతుంది. ఇక అసలు విషయానికి వస్తే, కొంతసేపటి తర్వాత బాబా ఊదీ నా దగ్గర ఉండటం జ్ఞాపకమొచ్చి, దాన్ని నీళ్ళలో కలుపుకొని త్రాగి బాబా నామస్మరణ చేసుకుంటూ నిద్రపోయాను. బాబా దయవల్ల హాయిగా నిద్రపట్టి, పొదున్నకి కడుపులో మంట పూర్తిగా తగ్గిపోయింది. "ధన్యవాదాలు బాబా".

నేను ఉద్యోగంలో చేరి ఒక సంవత్సరం అవుతుండగా జీతం పెంపు విషయంగా చర్చించే రోజు వచ్చింది. 'బాబా ఉన్నారు, ఆయన నాకు మంచి జరిగేలా చూసుకుంటార'ని నాకు తెలుసు. అయినా ఎటువంటి ఆశ పెట్టుకోకుండా మా మేనేజర్ గదికి వెళ్ళాను. నేను అయితే మా మేనేజర్ నా జీతం అస్సలు పెంచరనుకున్నాను. కానీ 5% పెంచారు. అది తక్కువా, ఎక్కువా అన్నది నాకు తెలియదుగానీ, ఎటువంటి ఆశ లేని నాకు ఎంతో కొంత పెరగటం అనేది ఆనందాన్నిచ్చింది. ఈసారి బాబా ఇంకా బాగా అనుగ్రహిస్తారని, అంటే నాకు అర్హత ఉన్నంత అని నేను నమ్ముతున్నాను. "ధన్యవాదాలు బాబా".

2024, అక్టోబర్ నెలలో పెద్ద తుఫాను అని, చెన్నైలో భారీ వర్షాలని టీవీలో వార్తలు వస్తున్న రోజుల్లో మా అమ్మానాన్న మునపటి సంవత్సరంలా నాకు ఏమవుతుందోనని చాలా భయపడ్డారు. నేను మాత్రం బాబా మీద భారమేసి ధైర్యంగానే ఉంటూ బాబాను, "ఇంటికి వెళ్ళటానికి అనుమతిచ్చేలా చూడమ"ని ప్రార్థిస్తూ ఉండగా అనుకోకుండా బాబా కరుణించారు. మా మేనేజర్ ఇంటికి వెళ్ళమని చెప్పారు. దాంతో నేను హఠాత్తుగా ఇంటికి వెళ్ళడానికి సిద్ధమయ్యాను. నిజానికి నాకప్పుడు ఏదైనా ట్రైన్ అందుబాటులో ఉందా, లేదా అన్నది తెలియదు. మరుసటిరోజు ఉదయం త్వరగా తయారై రిజర్వేషన్ యాప్ చూస్తే, అద్భుతం! బాబా దయవల్ల ఒక ట్రైన్‌కి టికెట్ ఉండటంతో దాన్ని బుక్ చేసుకున్నాను. ఇక అప్పుడు సమస్య ఏంటంటే, ఆ ట్రైన్ అందుకోవాలంటే నేను గంట లోపల స్టేషన్‌కి చేరుకోవాలి. కానీ నేను ఉన్న చోటు నుండి రైల్వేస్టేషన్‌కి అంత తొందరగా వెళ్ళటం కుదిరే పని కాదు. అయినా బాబాని ప్రార్థిస్తూ రాపిడో యాప్‌లో వాహనం బుక్ చేసుకొని బయలుదేరాను. ఏదో అద్భుతం జరిగినట్లు నేను రెండు నిమిషాలు తేడాలో ట్రైన్ అందుకొని సురక్షితంగా మా ఇంటికి చేరుకున్నాను. ఆపై తూఫాన్ చెన్నైలో పెద్దగా ప్రభావం చూపలేదని తెలుసుకొని చాలా ఆనందపడ్డాను. అంతా బాబా దయ. "ధన్యవాదాలు బాబా".

---

బాబాని శరణుజొచ్చినంతనే తీరిన ఆరోగ్య సమస్యలు

'సాయి మహరాజ్ సన్నిధి'కి నా నమస్కారాలు. నా పేరు దివ్య. బాబా దయవల్ల 2024, సెప్టెంబర్ 10న నేను కోరుకున్నట్టు నాకు పాప పుట్టింది. తన బరువు 1.8 కేజీలే ఉన్నప్పటికీ తనకి ఎలాంటి సమస్య, లోపం లేదు. ఇకపోతే సాధారణంగా కాన్పు తర్వాత అందరికీ మొలల సమస్య వస్తుంది. నాకు కూడా వచ్చింది. విపరీతమైన నొప్పి భరించలేకపోయాను. కూర్చున్నా, నిలుచున్నా, నడిచినా ఏది చేసినా చాలా నొప్పిగా ఉంటుండేది. ఆ స్థితిలో చిన్నపిల్లను చూసుకోవడం నాకు చాలా కష్టమైంది. వారం రోజులు మందులు వాడినా ప్రయోజనం లేకపోయింది. నేను బాధ భరించలేక బాబాను, "రెండు రోజుల్లో నొప్పి తగ్గిపోవాలి బాబా. అదే జరిగితే 500 రూపాయలు అన్నదానంకి చందా కడతాన"ని ప్రార్థించాను. నేను కోరుకున్నట్టే నొప్పి తగ్గిపోయింది. అంతా బాబా దయ.

బాలింతలు ఏది పడితే అది తినకూడదని తెలిసి కూడా నేను ఫ్రిడ్జ్‌లో పెట్టిన లాలీపాప్ తిన్నాను. దాంతో పంటినొప్పి మొదలైంది. నేను మందులేవీ వాడకుండా బాబా దగ్గర నిలబడి, "ఇంకోసారి చల్లని పదార్థాలు ఏవీ తినన"ని మాటిచ్చి, ఐదు రూపాయల నాణెం ఆయన పాదాల దగ్గర పెట్టాను. మరుసటిరోజు ఉదయానికి పంటినొప్పి తగ్గిపోయింది. "ధన్యవాదాలు బాబా. నాకు గుండె సమస్య ఉన్నప్పటికీ నన్ను అర్థం చేసుకొనే భర్తని ఇచ్చావు. 5 నెలలుగా ఆయనకి ఉద్యోగం లేదు. ఆయనకి ఉద్యోగం వచ్చేలా చేయండి బాబా. అలాగే నా బిడ్డకి సరిపడా పాలు నాకివ్వు బాబా. చాలా కష్టంగా ఉంది. ప్రతిరోజూ నిన్ను అడుగుతున్నాను. నిన్నే నమ్ముకున్న నన్ను, నా కుటుంబాన్ని సర్వవేళలా కాపాడు. నా జీవితం బాగుండేలా చూడు తండ్రీ".

---

Read More