సాయి బంధువు శ్రావణి గారు బాబా తనకు ప్రసాదించిన అనుభవాలను ఈ బ్లాగ్ ద్వారా మన సాయి బంధువులందరితో పంచుకోవాలని పంపించారు. ఆ లీలల ద్వారా బాబా ఆమెకు ప్రసాదించిన ఆనందాన్ని, ప్రేమను చదివి ఆస్వాదించండి. అందరికీ సాయిరామ్.
ద్వారకామాయిలో అడుగుపెట్టి బాబా భక్తురాలినయ్యాను
నా పేరు శ్రావణి. నేను ద్వారకామాయిలో అడుగు పెట్టేవరకు బాబా భక్తురాలినే కాదు. ఏదో నార్మల్ గా గుడికి వెళ్లడం, రావడం అంతే! కానీ, 2017 జనవరి 18న మొదటిసారి షిరిడీ వెళ్లి ద్వారకామాయి, చావడి, ఇంకా మ్యూజియం చూసాను. అప్పటినుండి నాలో ఏదో మార్పు వచ్చింది. అసలు షిర్డీ నుండి రావాలి అనిపించలేదు.
నేను గత సంవత్సరం కొంచెం డిప్రెషన్ లో ఉన్నాను. అపుడు శ్రీ సాయి సచ్చరిత్ర పారాయణ మొదలుపెట్టదలిచాను. అప్పటికి నా దగ్గర ఇంగ్లీష్ సచ్చరిత్ర మాత్రమే ఉంది. అది కూడా తెలిసినవాళ్లు ఒకరు పెళ్లి శుభలేఖతోపాటు ఇచ్చారు. తీరా వెతుకుతూ ఉంటే, తెలుగు సచ్చరిత్ర దొరికింది(ఇంగ్లీష్ సచ్చరిత్ర ఇప్పటికీ దొరకలేదు). నాకు చాలా ఆశ్చర్యం వేసింది. అది బాబా లీల! సచ్చరిత్ర ప్రతిరోజూ ఒక అధ్యాయం చదవడం మొదలుపెట్టాను. క్రమంగా బాబా నాలో ధైర్యం పెంచారు.
నాకు కొంచెం బ్రీతింగ్ ప్రోబ్లం ఉండేది. ఒక హాస్పిటల్ లో X-ray తీసి, పరీక్షలు నిర్వహించి హార్ట్ పెరిగింది, ప్రీ ఆస్త్మా(ఆస్త్మా ముందు దశ) అని చెప్పారు. చాలా భయపడ్డాను, ఏడ్చాను. మా నాన్నగారు మా ఫ్యామిలీ డాక్టర్ గారి దగ్గరకి నా రిపోర్ట్స్ తీసుకెళ్లారు. ఆ రిపోర్ట్స్ కవర్ లో నేను ఒక బాబా ఫోటో పెట్టాను. అక్కడ ఆయన X-ray చూసి, ఇది అంతా తప్పు రిపోర్ట్, ఎందుకైనా మంచిది అని కార్డియోకి పంపారు. అప్పుడు అక్కడ అన్నీ నార్మల్ అని రిపోర్ట్స్ వచ్చాయి. ప్రతి విషయంలో నేను బాబానే నమ్ముకున్నాను. నా రిపోర్ట్స్ బాబానే మార్చేశారు. బాబా నాతోనే ఉన్నారు అనడానికి ఇదే నిదర్శనం. బాబాని నేను మరువలేను. బాబాయే నా సర్వస్వం.
నేను మొన్న గురువారం అంటే తేది. ఏప్రిల్ 5, 2018 నుండి నవ గురువార వ్రతం చేస్తున్నాను. ప్రారంభించి ఒక వారం కూడా కాలేదు, నా జీవితంలో చాలా మార్పు వచ్చింది. నా భర్తకి కొత్త జాబ్ వచ్చింది, ఆయన గత ఆరు నెలలుగా జాబు కోసం ఎంతో ప్రయత్నం చేస్తున్నా రాలేదు. ఇంకొక విషయం ఏమిటంటే, నిన్న(ఏప్రిల్ 12) మేము మా బంధువుల ఇంటికి వెళ్ళాము. అక్కడ అడుగుపెట్టగానే నాకోసం ఎదురుచూస్తున్నట్టుగా వెళ్ళగానే షిరిడీ ప్రసాదం ప్యాకెట్, ఇంకా షిరిడీ నుండి తెచ్చిన గాజులు ఇచ్చారు. నాకు సరిపడే సైజు గాజులు నాకే ఒక్కోసారి దొరకవు, అలాంటిది అవి నాకు సరిపోయాయి. ఎవరో షిరిడీ నుండి తెచ్చి వాళ్ళకి ఇవ్వడం, వాళ్ళు ఎవరు వస్తారా అని ఎదురు చూసి నాకు ఇవ్వడం అంతా బాబా లీల!
సద్గురు సాయినాథ్ మహరాజ్ కీ జై!
.jpeg)
Sri Sai
ReplyDelete