సాయి వచనం:-

- శ్రీబాబూజీ.

సాయిభక్తుల అనుభవమాలిక 1921వ భాగం....

11 comments:
ఈ భాగంలో అనుభవాలు:

1. ప్రాణాలతో ఉన్నామంటే అది బాబా అనుగ్రహమే
2. క్షేమంగా ఇంటికి చేర్చిన బాబా
3. ఆపద్భాంధవుడు సాయినాథ్ మహారాజ్
ప్రాణాలతో ఉన్నామంటే అది బాబా అనుగ్రహమే
  
సాయి భక్తులందరికీ నమస్కారాలు. నేను ఒక సాయి భక్తురాలిని. నేను ఒక ప్రైవేటు స్కూల్లో టీచరుగా పనిచేస్తున్నాను. నా భర్త ఆటోడ్రైవర్. 2017, ఏప్రిల్ 8, శనివారంనాడు నేను, నా భర్త మా ఇద్దరు పిల్లలతో కలిసి మా అమ్మవాళ్ళింటికి ఆటోలో వెళ్ళాము. మర్నాడు 9వ తేదీన మా నాన్న పుట్టినరోజు. ఆరోజు ఉదయం నా భర్త బాగానే ఉన్నారు. చుట్టుపక్కల ఉన్న గుడులకు వెళ్ళొచ్చాము. మా అమ్మవాళ్ళు మా తమ్ముడికి(అప్పట్లో) పిల్లలు లేనందున రెడ్డమ్మ తల్లికి మ్రొక్కుకొని ఆదివారంనాడు మాంసాహారం తినడం మానేసినందున ఆరోజు మాంసాహారం వండలేదు. సాయంత్రం ఆరు గంటలప్పుడు నా భర్త బాగా తాగేసి మాంసం వండలేదని మా వాళ్ళతో గొడవపడ్డారు. తర్వాత మమ్మల్ని తీసుకుని తిరిగి మా ఇంటికి బయలుదేరారు. తాగి ఉన్న నా భర్త బాగా అరుస్తూ ఆటో తోలుతుండగా ఒక 10 కిలోమీటర్లు ప్రయాణం చేసిన తర్వాత రాత్రి 9 గంటలప్పుడు మా ఆటో తలకిందులై పల్టీలు కొట్టుకుంటూ రోడ్డు మధ్యలో పడిపోయింది. అక్కడున్న వాళ్లెవరో మమ్మల్ని లేపి మాకు సహాయం చేశారు. అయితే నా భర్త తాగి ఉన్నారని తెలుసుకొని కేసు పెడతామని బెదిరించారు. మేము ఎలాగో అక్కడినుండి బయటపడ్డాము. ప్రమాదంలో నాకు, మావారికి, 5 సంవత్సరాల మా బాబుకి చిన్న చిన్న దెబ్బలు తగిలాయి కానీ, 14 సంవత్సరాల మా పాపకి మాత్రం ఏమీ కాలేదు. ఆ ఘటనలో నా ఫోన్ ఉంది కానీ, నా హ్యాండ్‌బ్యాగ్ పోయింది. అందులో ఇంటి తాళాలు, ఆధార్, అ నెల జీతం ఉన్నాయి. సరే, మేము తిరిగి మా అమ్మవాళ్ళ ఊరికి బయలుదేరి మా తమ్ముడికి ఫోన్ చేసి విషయం చెప్పాను. వెంటనే బయలుదేరి మా తమ్ముడు, అమ్మానాన్న వచ్చి మమ్మల్ని హస్పిటల్‌కి తీసుకెళ్లారు. చికిత్స అనంతరం మా తమ్ముడు మావారిని తీసుకొని పోయినవేవైనా దొరుకుతాయమోనని ప్రమాదం జరిగిన చోటుకి వెళ్ళాడు. అప్పుడు మా తమ్ముడికి దొరికింది ఒకటే. అది బాబా ఫోటో. మా ఆటోలో ఉండే ఆ బాబా ఫోటో ఆటో ముందు పడి ఉంది. ఆ రోడ్ ఎప్పుడూ వాహనాలతో రద్దీగా ఉంటుంది, ఎక్కువగా ప్రమాదాలు జరుగుతుంటాయి. మేము ప్రమాదానికి గురైనప్పుడు ఏ వాహనం వచ్చినా మేము పెద్ద ప్రమాదంలో పడేవాళ్ళం. కానీ మాకు ఏ ప్రమాదమూ జరగకుండా బాబా అడ్డుగా ఉండి మమ్మల్ని కాపాడారు. ఈరోజు మేము ప్రాణాలతో ఉన్నామంటే అది బాబా అనుగ్రహమే. ఒక 15 రోజుల తర్వాత నా హ్యాండ్‌బ్యాగ్ దొరికిన వాళ్ళు అందులో ఉన్న ఆధార్‌లోని అడ్రస్ ఆధారంగా వాటిని మా అత్తవారింటికి తెచ్చిచ్చారు. కాకపోతే నా జీతం డబ్బులున్న కవర్ మాత్రం తీసుకున్నారు. మిగతా అన్ని వస్తువులు ఇచ్చారు. "ధన్యవాదాలు బాబా. మీరు అనుక్షణం తోడు ఉండటం వల్లే నేను సమస్యలను దాటుకొని వస్తున్నాను. నా భర్త తాగుడు వదిలేసి బాధ్యతగా ఉండేలా కరుణించు తండ్రీ. నాకు అప్పిచ్చిన అందరికీ తిరిగి ఇచ్చే శక్తిని ప్రసాదించి ఋణశేషం లేకుండా చూడ తండ్రీ. అలాగే ఆర్థికంగా ఎదగడానికి దారి చూపు తండ్రీ".
క్షేమంగా ఇంటికి చేర్చిన బాబా

నా పేరు జగదీశ్వర్. మా చిన్నమ్మాయి 2024, సెప్టెంబర్ 5, రాత్రి చెన్నై నుండి వరంగల్ రావడానికి తమిళనాడు ఎక్స్ప్రెస్ బుక్ చేసుకుని ట్రైన్ ఎక్కింది. ట్రైన్ విజయవాడ చేరుకున్నాక ఉదయం 4:30 అప్పుడు ఎవరో వచ్చి, "ఈ ట్రైన్ వరంగల్ వెళ్లదు. దారి మళ్లించబడింది. వరంగల్ వెళ్ళేవాళ్ళు ఇక్కడ దిగిపోండి" అని చెప్పడంతో మా అమ్మాయి ఆ సమయంలో నాకు ఫోన్ చేసింది. నేను తనతో, "దారి మల్లింపు సమాచారమేదీ లేదు. ఎవరో కావాలని అలా చెప్తున్నట్లు ఉంది. ఏం కాదు, నువ్వు ట్రైన్‌లోనే ఉండు" అని చెప్పి, "ట్రైన్‌లో ఇంకెవరైనా వరంగల్ వచ్చే వాళ్ళుంటే చూడు" అని అన్నాను. అందుకు తను, "ఒకతను ఉన్నాడు. కానీ అతనితో ఎవరూ ట్రైన్ వరంగల్ వెళ్ళదని చెప్పలేదట" అని చెప్పింది. అంతలో టీసీ వచ్చి, "ట్రైన్ వరంగల్ వెళ్లదు. దిగిపోండి" అని చెప్పడంతో మా అమ్మాయి కంగారు పడింది. కొత్త ప్రదేశం, ఎలా రావాలో తనకి తెలియదు. ఆన్లైన్‌లో చెక్ చేస్తే మధ్యాహ్నం వరకు వరంగల్ వైపు వచ్చే బస్సులు లేవు. ఇక అప్పుడు నేను, "బాబా! మీరే ఎలాగైనా మా అమ్మాయిని క్షేమంగా కరీంనగర్ చేర్చండి" అని వేడుకున్నాను. తర్వాత మా అమ్మాయికి కాల్ చేసి, వరంగల్ వచ్చే ప్రయాణికునితో మాట్లాడి, "కాస్త సహాయం చేయమ"ని అర్థించాను. అతను, "పర్వాలేదండి. మీరు ఏం టెన్షన్ పడకండి. నేను కూడా కరీంనగర్ వస్తున్నాను" అని తన సెల్ నెంబర్, ఫోటోలను వాట్సాప్ చేశాడు. తర్వాత వాళ్ళు వరంగల్ బస్సు లేనందున సూర్యాపేట వచ్చి అక్కడినుండి వరంగల్, వరంగల్ నుండి కరీంనగర్ వచ్చారు. అలా మా అమ్మాయి బాబా దయవల్ల క్షేమంగా ఇంటికి చేరింది. "ధన్యవాదాలు బాబా".

అభయప్రదాత సాయిదేవా శరణం శరణం.
Read More

సాయిభక్తుల అనుభవమాలిక 1920వ భాగం....

12 comments:
ఈ భాగంలో అనుభవాలు:

1. శరణన్న వారిని తప్పక కాపాడే బాబా
2. ఇష్టమైన ఆహారం వదిలేయడంతో లభించిన బాబా కరుణ
3. శాంతించేలా చేసిన బాబా
శరణన్న వారిని తప్పక కాపాడే బాబా
  
సాయి బంధువులకు నమస్కారం. నా పేరు శ్రీనివాసరావు. నా జీవితంలో నా తండ్రి సాయినాథుడు చేసిన అద్భుతాలు ఎన్నో ఉన్నాయి. ఈరోజు నా కుటుంబం సంతోషంగా ఉందంటే ఆ తండ్రి పెట్టిన భిక్షే. ఇక నా భార్య విషయంలో బాబా చేసిన సహాయాన్ని ఇప్పుడు తెలియజేస్తాను. నా భార్య పద్మావతి బొప్పుడి గ్రామంలోని ఎలిమెంటరీ స్కూల్లో టీచర్(SGT)గా పనిచేస్తుంది. ప్రభుత్వం వారు ఆ స్కూలులో ఎక్కువమంది పనిచేస్తున్నారని, నా భార్యది అదనపు పోస్టుగా పరిగణించి ఆమెను వేరే స్కూలుకు పంపుతామన్నారు. అదీకాక మండల స్థాయిలో ఖాళీలు లేనందున డివిజన్ స్థాయిలో మారుస్తామని చెప్పారు. డివిజన్ స్థాయిలో ఖాళీలు అన్ని 80 కిలోమీటర్ల పై దూరంలో అనగా వినుకొండ, శావల్యపురం, నూజెండ్ల వంటి దూరమండలలలో ఉన్నాయి. ఒకవేళ ఆ మండలాలకు నా భార్యను మారిస్తే గుంటూరులో నివాసముండే మేము చాలా ఇబ్బందిపడవలసి వస్తుంది. అసలే తన ఆరోగ్యం సరిగా ఉండదు. అందువల్ల నేను, నా భార్య చాలా టెన్షన్ పడి నా తండ్రి బాబాను, "ఈ ఇబ్బంది నుండి కాపాడమ"ని వేడుకున్నాము. బాబా "నేను ఉన్నాను. మీకు ఏ ఇబ్బందీ కలగనీయను" అని సూచనలు ఇస్తూ వచ్చారు. బాబా దయవల్ల నా భార్య కన్నా ముందున్న వారితో ఖాళీలన్నీ భర్తీ అయిపోవడంతో తనని ప్రస్తుతం పని చేస్తున్న స్కూల్లోనే ఉంచారు. గత సంవత్సరం కూడా ఇలానే ఇబ్బంది అయితే, బాబా దయతో ఏ ఆటంకం లేకుండా కాపాడారు. బాబాను శరణువేడితే తప్పక కాపాడుతారు. "ధన్యవాదాలు బాబా. మా పిల్లలు చదువులో బాగా రాణించి మంచిగా జీవితంలో స్థిరపడాలని, వారికి మంచి బుద్ధినిచ్చి పలువురికి సహాయం చేసే బుద్ధిని ఇవ్వమని, అలాగే మా కుటుంబంపై నీ చల్లని చూపు ఎప్పుడూ ఉండాలని కోరుకుంటూ నీ పాదాల చెంత శరణు వేడుతున్నాము బాబా".

శ్రీ సచ్చిదానంద సమర్థ సద్గురు సాయినాథ్ మహారాజ్ కీ జై.
ఇష్టమైన ఆహారం వదిలేయడంతో లభించిన బాబా కరుణ

సాయి భక్తులందరికీ నమస్కారాలు. నా పేరు రమాదేవి. నేను 10 ఏళ్ల వయసు నుంచి సాయి భక్తురాలిని. నేను నాకేం కావాలన్నా సాయినే అడుగుతాను. ఆయన ఎంతో ప్రేమగా అనుగ్రహిస్తారు. నేను ప్రభుత్వోద్యోగం కోసం చాలా ప్రయత్నించాను కానీ, నాకు ఆ ఉద్యోగం రాలేదు. అప్పుడు నేను సచ్చరిత్ర చదివిన తర్వాత నాకు ఉద్యోగం రావాలని ఒక సంవత్సరం నాకు ఇష్టమైన చికెన్ తిననని ప్రమాణం చేసాను. బాబా దయవల్ల సంవత్సరం పూర్తయ్యేలోపే నాకు ఉద్యోగం వచ్చింది. అయినా నేను ముందుగా అనుకున్నట్లు ఒక సంవత్సరం చికెన్ తినలేదు. ఇకపోతే, నాకు వచ్చిన ఉద్యోగం వల్ల నేను, నా భర్త వేర్వేరు ప్రదేశాల్లో ఉండాల్సి వచ్చింది. అలా 5 ఏళ్ళు గడిచాక 2023, ఆగస్టులో నా భర్త నేను ఉన్న చోటుకి రావాలని మళ్ళీ ఒక సంవత్సరం చికెన్ తినని అనుకున్నాను. 2024, ఫిబ్రవరిలో నా భర్తకి నేనున్న చోటుకి దగ్గర్లో ఉన్న ప్రదేశానికి బదిలీ అయింది. కానీ ఆడిట్ కారణంగా నా భర్త అక్కడే ఉండాల్సి వచ్చింది. అయితే సరిగ్గా నేను అనుకున్నట్లు సంవత్సరం పూర్తయ్యేసరికి 2024, ఆగస్టు నెలలో నా భర్త నేను ఉన్న చోటుకి వచ్చారు. ఇదంతా ఆ సాయినాథుని దయ. మనకి ఏదైనా మంచి జరగాలంటే ఇష్టమైన ఆహారం వదిలేస్తే జరుగుతుందని నా నమ్మకం. అయితే ఆహారం వదిలేయడమే కాకుండా సాయి సచ్చరిత్ర రోజూ చదవాలి. నేను అలానే చేసాను. ఆ బాబా కరుణించారు. "థాంక్యూ సో మచ్ బాబా. లవ్ యు బాబా".
శాంతించేలా చేసిన బాబా

సాయి బంధువులందరికీ నమస్కారం. నా పేరు స్వాతి. నేను హైదరాబాద్ నివాసిని. బాబా నా జీవితంలోకి వచ్చాక చాలా అద్భుతాలు చూపించారు. మేము 6 సంవత్సరాలుగా ఒక అద్దె ఇంట్లో ఉంటున్నాము. మా ఓనర్ చాలా కోపిష్టి, చాలా గర్విష్టి. అందుకని అపార్ట్మెంట్‌లో ఉన్న మేము చాలా జాగ్రత్తగా ఉంటుంటాము. కానీ ఈమధ్య 2024, ఆగస్టు నెలాఖరులో మేము పొరపాటున మెట్లపై డస్ట్ బిన్ పెట్టాము. ఆరోజు మా ఓనర్ మా ఫ్లోర్‌కి వచ్చి మెట్లపై ఉన్న డస్ట్ బిన్ చూసి, 'దీన్ని ఇక్కడెందుకు పెట్టార'ని పెద్ద గొడవ చేసి, "సెప్టెంబర్ 1కి ఇల్లు ఖాళీ చేయమ"ని గట్టిగా చెప్పి వెళ్ళాడు. కేవలం పది రోజుల్లో వేరే ఇల్లు దొరకడం చాలా కష్టమని మాకు ఒకటే టెన్షన్ పట్టుకుంది. అందుకని నేను రోజూ రాత్రి, "అతనిని శాంతపరచమ"ని బాబాకి మొక్కుకుంటూ ఉండేదాన్ని. అతను మళ్ళీ వచ్చి, "ఖాళీ చేయమన్నాను కదా!" అని అన్నాడుగాని మళ్ళీ అంతలోనే బాబా దయవల్ల, "ఖాళీ చేయమంటే 1000 రూపాయలు అద్దె పెంచి ఉండండి" అని అన్నాడు. మేము, "సరే, 1000 రూపాయలు ఇస్తామ"ని చెప్పాము. దాంతో.అతను వెళ్ళిపోయాడు. అతను అలా శాంతించడం నిజంగా బాబా అద్భుతం. "థాంక్యూ సో మచ్ బాబా. లవ్ యు బాబా".
Read More

సాయిభక్తుల అనుభవమాలిక 1919వ భాగం....

16 comments:
ఈ భాగంలో అనుభవాలు:

1. బాబా దయ
2. శ్రీసాయి అనుగ్రహం
బాబా దయ

సాయి మహారాజ్‌కి పాదాభివందనాలు. సాయి బంధువులకు నా నమస్కారాలు. నా పేరు రేవతి. నేను టీచరుగా పనిచేస్తున్నాను. అప్పుడప్పుడు మా టీచర్లకి పని సర్దుబాటు జరిగుతుంది. అంటే ఎక్కువ టీచర్లు ఉన్న స్కూల్ నుండి కొంతమందిని తక్కువ టీచర్లు ఉన్న స్కూలుకి డెప్యూటేషన్ వేస్తారు. చివరి పనిదినం నాడు వాళ్ళు వాళ్ళ స్కూలుకి తిరిగి వచ్చేయాలి. ఈ క్రమంలో 2024లో డిప్యూటేషన్ ప్రభావం మా స్కూలులో నాపై పడింది. నాకు వేరే స్కూలుకి వెళ్ళటం ఇష్టం లేకపోయినప్పటికీ తప్పని పరిస్థితి అయింది. మా మండలంలో ఆఫీసు వర్క్ చాలా బాగా చేసే ఒక టీచర్, యూనియన్ లీడర్ కూడా, అతను నాకు ఫోన్ చేసి, వాళ్ళ స్కూల్లో ఒక పోస్ట్ ఖాళీ ఉందని, మీరు మా స్కూల్ కోరితే బాగుంటుందని అన్నారు. నేను బాగా చెప్తానని అతని నమ్మకం. కానీ కొన్ని కారణాల వల్ల నాకు ఆ స్కూలుకి వెళ్ళటం ఇష్టం లేదు. బాబా దయవల్ల నా ముందు ఉండే ఆమె ఆ స్కూలు కోరింది. కానీ అంతలో పని సర్దుబాటు వాయిదా పడింది. తీరా ఆ సమయం వచ్చేసరికి ఆమె మనసు మారి వేరే స్కూల్ కోరుకుంది. దాంతో నేను ఆ స్కూల్ తప్పక కోరాల్సిన పరిస్థితి నాకొచ్చి కౌన్సిలింగ్ ముందురోజు నుంచి నాకు భయం పట్టుకుంది. అప్పుడు నేను, "బాబా! ఏం చేయాలి? నాకు ఆ స్కూలుకి వెళ్లడం ఇష్టం లేదు. నేను ఆ స్కూల్ కోరుకోకపోతే యూనియన్ లీడర్ నాపై కోపం పెట్టుకుంటాడు, నిజానికి అతను సర్వీస్ విషయంలో చాలా సహాయం చేస్తాడు. కానీ వాళ్ల స్టాఫ్ అంటే నాకు భయం. అందుకే వాళ్ల స్కూలుకి వెళ్ళటం నాకు ఇష్టం లేదు" అని బాబాతో చెప్పుకున్నాను. ఇక కౌన్సిలింగ్ రోజున ఆ యూనియన్ లీడర్ కమ్ టీచర్ ఫోన్‌లో  కౌన్సిలింగ్ చేసి కొన్ని ప్లేస్‌లు చెప్పి కోరుకోమన్నాడు. నేను వేరే లేడీ స్టాఫ్ ఉన్న స్కూల్ కోరుకున్నాను. ఫోన్‌లోనే అతని వాయిస్ మారింది. ఆ క్షణం నేను 'అతను ఎంత ఫీల్ అయ్యారో, నన్ను ఏమైనా ఇబ్బందిపెడతారో' అని ఎంత టెన్షన్ పడ్డానో బాబాకే తెలుసు. నేను బాబాని, 'నా నిర్ణయం కరెక్టేనా, కాదా' అని అడిగితే, 'కరెక్ట్' అని బదులిచ్చారు. అప్పుడు నా మనసు కుదుటపడింది. రెండు రోజుల తర్వాత అతనికి ఫోన్ చేసి నేను వాళ్ల స్కూల్ కోరకపోవటానికి కారణం చెపితే, అతను అర్థం చేసుకున్నారు. ఎప్పుడూ మొహమాటంతో సమస్యలు తెచ్చుకునే నేను బాబా దయవల్ల మొదటిసారి మొహమాటపడకుండా నిర్ణయం తీసుకున్నాను. బాబా ఏం చేసిన మన మంచికే.

వినాయకచవితినాడు మావారికి, పాపకి జ్వరం వచ్చింది. పాపకైతే మరీ ఎక్కువగా రావడంతో నాకు చాలా భయమేసింది. ఎందుకంటే, అది డెంగ్యూ సీజన్. అందువల్ల "బాబా! పాపకి బ్లడ్ టెస్ట్ అవసరం లేకుండానే జ్వరం తగ్గాల"ని ప్రార్థించాను. తర్వాత డాక్టర్ దగ్గరకి వెళితే బ్లడ్ టెస్టు అవసరం లేదని 5 రోజులకి మందులిచ్చారు. బాబా దయవల్ల రెండు రోజుల్లో పాపకి జ్వరం తగ్గింది. మావారికి కూడా తగ్గింది. "ధన్యవాదాలు బాబా. చాలా చాలా ధన్యవాదాలు తండ్రీ".
Read More

సాయిభక్తుల అనుభవమాలిక 1918వ భాగం....

17 comments:
ఈ భాగంలో అనుభవాలు:

1. ప్రణాళిక ప్రకారం మంచి ఉద్యోగాన్ని ప్రసాదించిన బాబా 
2. పిలిచినంతనే పలికే బాబా ఉండగా భయమెందుకు?
ప్రణాళిక ప్రకారం మంచి ఉద్యోగాన్ని ప్రసాదించిన బాబా 

నేను సాయిబాబా మరియు వెంకటేశ్వరస్వాముల భక్తుడిని. నేను 2 సంవత్సరాలకు పైగా మహాపారాయణ గ్రూపులో సభ్యుడిని. బాబా అనేక విధాల నాకు సహాయం చేశారని, చాలా  కష్టాల నుండి నన్ను రక్షించారని నేను గట్టిగా నమ్ముతాను. నేను USలో కంప్యూటర్ సైన్స్‌లో మాస్టర్స్ పూర్తి చేసాను. 2024, మేలో గ్రాడ్యుయేట్‌నయ్యాను. ఆ సమయంలో US జాబ్ మార్కెట్ చాలా చెడ్డ స్థితిలో ఉంది. ఒక సంవత్సరకాలంగా చాలామంది నిరుద్యోగులుగా ఉన్నారు. అటువంటి స్థితిలో నేను ఉద్యోగం సంపాదించాను. అది నిజంగా సాయి చేసిన అద్భుతం. US జాబ్ మార్కెట్ పరిస్థితుల దృష్ట్యా 2024, జూన్‌లో నేను కన్సల్టెన్సీలో చేరాలనుకున్నాను(USలోని కన్సల్టెన్సీలు తరచుగా నకిలీ అనుభవాన్ని సృష్టించి ఉద్యోగాలు సంపాదించడంలో సహాయం చేస్తాయి. అందుకుగానూ సదరు కన్సల్టెన్సీ మాకొచ్చే జీతం నుండి 20 నుండి 30 శాతం వసూలు చేస్తాయి). ఒక కన్సల్టేన్సీ నన్ను తీసుకుంటానని హామీ ఇచ్చింది. కానీ నా జాయినింగ్ తేదీని వాయిదా వేస్తూ పోయింది. ఆలోగా నేను నా స్వంత ప్రయత్నాలు చేస్తూ ఉద్యోగాలకు దరఖాస్తు పెడుతుండేవాడిని. అలా 45 రోజులు గడిచాయి. అయినప్పటికీ సదరు కన్సల్టెన్సీ యాజమాన్యం నుంచి ఎలాంటి స్పందన రాలేదు. దాంతో నేను ఇంకో కన్సల్టెన్సీ కోసం వెతికి అందులో చేరాలనుకున్నాను. అయితే అందులో చేరడానికి ముందే నాకు ఒక ఇంటర్వ్యూ కాల్ వచ్చింది. బాబా దయవల్ల నేను 2 రౌండ్ల ఇంటర్వ్యూ విజయవంతంగా పూర్తి చేసాను. కానీ చివరి క్లయింట్ రౌండ్ ఇంటర్వ్యూ కొరకు నాకు కాల్ రాలేదు. వాళ్ళు ఆ రౌండ్ వాయిదా వేస్తూ పోయారు. నేను బాధతో నిరుత్సాహానికి గురయ్యాను. అయినప్పటికీ బాబాయందు విశ్వాసముంచి ఆయన నాకు ఒక మార్గం చూపిస్తారని నమ్మాను.

ఒక వారంలో మరొక కంపెనీ అదే క్లయింట్, అదే స్థాయి ఉద్యోగం కోసం నన్ను సంప్రదించింది. నేను అక్కడ కూడా మొదటి రెండు రౌండ్లు విజయవంతంగా పూర్తి చేసాను. అద్భుతాలలో కెల్లా అద్భుతం ఏమిటంటే, నేను మొదటి రౌండ్ ఇంటర్వ్యూకోసం ఏ వెబ్‌సైట్‌లోని ప్రశ్నలైతే చదివానో ఇంటర్వ్యూ చేసినవారు అదే సైట్‌లోని ప్రశ్నలే నన్ను అడిగారు. ఆ కంపెనీ క్లయింట్ రౌండ్‌ను ఏర్పాటు చేయగలిగింది. నేను ఆ రౌండ్‌ని కూడా విజయవంతంగా పూర్తి చేసాను. ఆ కంపెనీ మొదటి కంపెనీ కంటే 24% ఎక్కువ జీతం నాకు ఆఫర్ చేసింది. బాబా, వెంకటేశ్వరస్వాముల ఆశీస్సులతో నాకు ఉద్యోగం వచ్చింది. కన్సల్టెన్సీలో చేరడం వాయిదా పడేలా చేసి, స్వయంగా ఉద్యోగాలకు దరఖాస్తు చేసుకునేలా చేసింది బాబాయే. ఆయన నాకు ఏదైనా మంచి చేయాలనుకున్నందున మొదటి కంపెనీ క్లయింట్ రౌండ్‌ను ఏర్పాటు చేయలేకపోయింది. అదికాక నేను మే నెలలోనే కన్సల్టెన్సీలో చేరి ఉంటే నాకై నేను ఈ ఉద్యోగాలకు దరఖాస్తు చేసుకోలేకపోయేవాడిని, ఈ ఉద్యోగ అవకాశాలను కోల్పోయేవాడిని.

నేను ఆ ఉద్యోగంలో చేరడానికి వేరే రాష్ట్రానికి వెళ్లాను. అక్కడ నేను ఉండటానికి ఒక వ్యక్తితో మాట్లాడి వసతి ఏర్పాట్లు చేసుకున్నాను. అయితే, నేను అక్కడికి వెళ్ళడానికి కేవలం 2 గంటల ముందు వ్యక్తిగత కారణాల వల్ల ఆ వ్యక్తి నా వసతిని రద్దు చేశాడు. దాంతో నాకు ఉండడానికి చోటు లేకుండా పోయింది. నా దగ్గర డబ్బు కూడా తక్కువగా ఉంది. అయితే బాబా నా పక్షాన్ని వదలలేదు. 2 గంటలలోపు మునుపటి దానికంటే మెరుగైన ఇల్లు నా వసతికోసం దొరికింది. 2 గంటలలోపు వసతి లభించడం, అదికూడా USలోని వేరే రాష్ట్రంలో. ఇది ఒక అద్భుతం కంటే తక్కువ కాదు.

ఈ అనుభవం దేవునిపై విశ్వాసం ఉంచాలని, మంచి-చెడు కాలాల్లో ఆయనను ప్రార్థించాలని, ఆయనను ఎన్నటికీ మరువకూడదని, పరిస్థితులు మనకి అనుకూలంగా జరగనప్పటికీ, ఆయన మనకోసం మెరుగైన ప్రణాళికలు కలిగి ఉన్నారని అర్థం చేసుకోవాలని నేను తెలుసుకున్నాను. నేను సచ్చరిత్ర చదవమని సిఫార్సు చేస్తున్నాను; అది నాకు బాబా గురించి, ఆయన బోధనల గురించి చక్కగా అర్థం చేసుకోవడానికి సహాయపడింది.
పిలిచినంతనే పలికే బాబా ఉండగా భయమెందుకు?  

అఖిలాండ కోటి బ్రహ్మాండనాయకుడైన సాయినాథ్ మహరాజ్ కి శతకోటి వందనాలు. సాయి బంధువులందరికీ నమస్కారం. నా పేరు సౌజన్య. 2024, సెప్టెంబర్ 7, వినాయకచవితి రోజు సాయంత్రం నేను 5 సంవత్సరాల మా బాబుకి స్నానం చేశాను. ఒక గంట తర్వాత బాబు రెండు చెంపల మీద దద్దుర్లులా వచ్చాయి. పైగా అవి దురద పెడుతూండటం వల్ల బాబు వేళ్లతో గీరుకోసాగాడు. హాస్పిటల్‌కి వెళదామంటే పండగ రోజు. పైగా రాత్రి. నాకు భయమేసి, "బాబా! ఉదయానికల్లా ఆ దద్దుర్లు తగ్గిపోయేలా చూడు స్వామి" అని బాబాను ప్రార్థించాను. పిలిచినంతనే పలికే బాబా ఉండగా మనకి భయమెందుకు? బాబా దయవల్ల ఉదయానికి ఆ దద్దుర్లు తగ్గిపోయాయి. "ధన్యవాదాలు బాబా".
Read More

సాయిభక్తుల అనుభవమాలిక 1917వ భాగం....

16 comments:
ఈ భాగంలో అనుభవాలు:

1. అడిగిన వెంటనే కరుణ చూపే బాబా
2. వర్షం ఆపి కార్యక్రమాన్ని జయప్రదం చేసిన బాబా
3. బాబా మాట ఎప్పుడూ పొల్లుపోదు
అడిగిన వెంటనే కరుణ చూపే బాబా

నా పేరు రాంబాబు. మాది విజయనగరం. నేను ఒక ఫార్మా కంపెనీలో మేనేజరుగా పని చేస్తున్నాను. ఈమధ్య ఒకసారి మేము తయారు చేస్తున్న ఫార్మా ప్రొడక్ట్ ఔట్పుట్ తక్కువ రాసాగింది. ఔట్పుట్ తక్కువగా రావటానికి గల కారణాలు తెలుసుకోవడానికి మేము కొన్ని రకాల పరిశోధన చేసి చర్యలు చేపట్టినప్పటికీ ప్రతిఫలం లేకపోయింది. కారణాలు సరిగ్గా తెలియలేదు. కారణం లేకుండా తక్కువ ఔట్పుట్ వచ్చిందని, మేనేజ్మెంట్‌కు చెప్పటానికి వీలులేదు. కానీ ప్రతి బ్యాచ్ ఔట్పుట్ కూడా తక్కువగా వస్తూ స్థాక్ నెగటివ్‌లోకి వెళ్లి పోసాగింది. నేను ఎంతో ఒత్తిడికి లోనయ్యాను, నిద్ర కూడా సరిగా పట్టేది కాదు. గతంలో కూడా ఇలానే జరిగితే, 'నా అనుభవం తోటి భక్తులతో పంచుకుంటానని' సాయిని వేడుకున్నంతనే సమస్య తీరింది. అందువల్ల ఈసారి కూడా మళ్ళీ సాయిని అలానే వేడుకున్నాను. బాబా ఆశీస్సులతో ఔట్పుట్ మునుపటిలా సాధారణంగా రావడంతో సమస్య తీరిపోయింది. "బాబా! అడిగిన వెంటనే మాపై కరుణ చూపించే మీకు మా పాదాభివందనాలు. ఒకవేళ మేము మా పరిశోధనలో సరైన కారణాన్ని కనుక్కోవటంలో విఫలమై ఉంటే, దాన్ని మాకు తెలియజేయండి బాబా".

ఒకసారి నా భార్య నెలసరి విషయంలో సమస్య తలెత్తింది. అది తగ్గడానికి 2 నెలలు మందులు వాడవలసి వచ్చింది. అయితే మందులు వాడిన తరువాత కూడా రావలసిన సమయానికి నెలసరి రాలేదు. దాంతో చాలా ఖంగారు పడి బాబాను వేడుకొని, ఈ బ్లాగ్ ద్వారా తెలుసుకున్న ఒక మార్గాన్ని నా భార్య పాటించింది. అదేమిటంటే, 'ఓం శ్రీసాయి ఆరోగ్యక్షేమదాయక నమః' అన్న నామాన్ని రోజుకు 108 సార్లు పఠించడం. దాంతో తన సమస్య తీరిపోయింది. మాకు అన్ని బాబానే. ఆయన దగ్గరుండి అన్నీ తామై మా బాగోగులన్ని చూసుకుంటున్నారు. "ఏ జన్మలో ఏమి పుణ్యం చేసామో! ఈ జన్మలో ఈవిధం గా మీ కృపకు ప్రాప్తులమవుతున్నాము బాబా. మీకు మేము ఏమి ఇవ్వగలం, మీ పాదాలను మా హృదయంలో ప్రతిష్టించడం తప్ప". 'ప్రజలందరి నోటా సాయి నామం పలకాలి. ముజ్జగాలు శ్రీ సాయి మహిమతో ముప్పిరుగొనాలి' అనే మా గురువుగారు శ్రీ శరత్ బాబూజీ ఆశ ఈ బ్లాగు ద్వారా నెరవేరుతుందని ఆశిస్తూ,..
 
సర్వేజనా సుఖినోభవంతు.
వర్షం ఆపి కార్యక్రమాన్ని జయప్రదం చేసిన బాబా

నా పేరు జగదీశ్వర్. 2024, సెప్టెంబర్ 3వ తేదీన నా తండ్రి ప్రథమ వర్ధంతి మా సొంతూరు మెట్పల్లిలో నిర్వహించాలని ఆగస్టులో నిర్ణయించుకున్నాం. తదనుగుణంగా సెప్టెంబర్ నెల 1వ తేదీన అందరం మెట్పల్లి వెళ్ళడానికి సిద్ధమయ్యాము. ఐతే ఆగస్టు 30వ తేదీ నుండి విపరీతమైన వర్షాలు పడసాగాయి. ఇంకా 5 రోజులు అతి భారీ వర్షాలు పడతాయని టీవీలో చెప్తుండటంతో 3వ తేదీన కార్యక్రమం ఎలా అవుతుందోనని మాకు ఆందోళన మొదలైంది. ఆ దశలో నేను బాబాకి మనస్పూర్తిగా దణ్ణం పెట్టుకొని, "బాబా! నా తండ్రి సంవత్సరీకం ఎలాంటి ఇబ్బందులు లేకుండా మీరే జరిపించాలి" అని వేడుకున్నాను. ముందుగా అనుకున్నట్లు సెప్టెంబర్ 1న వర్షంలోనే బయలుదేరి వెళ్ళాము. అక్కడికి వెళ్ళాక చూస్తే, స్లాబ్ లీకేజీ వల్ల ఇల్లంతా చిత్తడిగా ఉంది. ఏం చెయ్యాలో తెలియలేదు. ఇంటి పక్కనే ఉన్న ఫంక్షన్ హాల్‌లో అన్ని ఏర్పాట్లు చేసుకున్నప్పటికీ ఇంట్లో జరగాల్సిన కార్యక్రమం ఎలా అవుతుందోనని ఆందోళన చెందాము. కానీ బాబా దయవల్ల సరిగ్గా 3వ తేదీ ఉదయం నుండి మంత్రం వేసినట్లు మెట్పల్లిలో వర్షం ఆగిపోయింది. ఇల్లంతా ఆరిపోయి శుభ్రంగా అయింది. మెట్పల్లి చుట్టుపక్కల మాత్రం వర్షం పడుతున్నట్లు కార్యక్రమానికి వచ్చిన బంధువులు చెప్పారు. బంధువుల మధ్య కార్యక్రమం చక్కగా జరిగింది. నేను కోరుకున్నట్లు బాబా చుట్టూ వర్షమున్నా మెట్పల్లిలో లేకుండా చేసి కార్యక్రమం ఎలాంటి ఇబ్బంది, ఆందోళన లేకుండా ప్రశాంతంగా సక్రమంగా జరిపించారు. "బాబా సాయి చరణం... సర్వదా శరణం శరణం".
బాబా మాట ఎప్పుడూ పొల్లుపోదు

సాయిభక్తులకు నమస్కారాలు. నా పేరు శ్రీదేవి. బ్యాంక్ ఉద్యోగి అయిన నా భర్తకి మూడు సంవత్సరాలకు ఒకసారి బదిలీలుంటాయి. ఆ క్రమంలో 2024, జూన్‌లో బదిలీలు జరగనున్నాయని మాకు తెలిసింది. అప్పుడు నేను, "బాబా! ఎలాగైనా నా భర్తకి దగ్గరలో ఉన్న ఊరుకి బదిలీ అయ్యేలా చూడండి" అని బాబాను వేడుకున్నాను. బాబా దయవల్ల రోజూ వెళ్ళిరాగలిగేలా 35 కిలోమీటర్ల దూరంలో ఉన్న ఊరుకి బదిలీ అయింది.

ఒకసారి మా పెద్దపాపకు జ్వరం, ఒళ్లునొప్పులు వచ్చాయి. డాక్టర్ దగ్గరకి వెళ్తే, "డెంగ్యూ అయుండొచ్చు" అని, "టెస్ట్ చేయించి సాయంకాలం మళ్లీ రండి" అని చెప్పారు. నేను, "బాబా! డెంగ్యూ జ్వరం కాకుండా చూడండి" అని బాబాను ప్రార్థించాను. బాబా దయవల్ల టెస్టు రిపోర్టు నార్మల్ వచ్చింది. డాక్టర్ మామూలు జ్వరమేనని టాబ్లెట్లు ఇచ్చారు. 

మా పాప బీటెక్ చదవడానికి అనేక ఎంట్రన్స్ పరీక్షలు వ్రాసింది. కానీ దేనిలోనూ మంచి ర్యాంకు రాలేదు. ఎన్ని ప్రయత్నాలు చేసినా మంచి కాలేజీలో సీటు వచ్చే అవకాశం లేదు. కానీ బాబా ప్రశ్నలు-జవాబులు యాప్‌లో ఎప్పుడూ, "విజయం వరిస్తుంది" అనే వచ్చేది. బాబా మాట ఎప్పుడూ పొల్లుపోదు. మేము రాదనుకున్న టాప్ కాలేజీలో సీఎస్సీ సీటు పాపకి వచ్చింది. ఇది అంతా బాబా దయవలన జరిగింది. "అన్నిటికీ ధన్యవాదాలు బాబా".

ఓంసాయి శ్రీసాయి జయజయసాయి.
Read More

సాయిభక్తుల అనుభవమాలిక 1916వ భాగం....

13 comments:
ఈ భాగంలో అనుభవం:

  • బాధ వెనకాల బాబా ఇచ్చిన సంతోషం
నేను కొన్ని సంవత్సరాల నుంచి బాబా భక్తురాలిని. నేను నా జీవితంలోని ప్రతి విషయంలో బాబా నాకు తోడు ఉన్నారని నమ్ముతూ ఉంటాను. ఒక్కోసారి కోపంలో, బాధలో ఆయన్ని మర్చిపోతాను. కానీ బాబా మాత్రం నన్ను మర్చిపోరని నా గట్టి నమ్మకం. ఎందుకంటే ఆయన దయగల దేవుడు కదా! నాకు ఎప్పటినుంచో శిరిడీ వెళ్లి బాబాని దర్శించాలని కోరికగా ఉన్నందున 2024లో దగ్గరలో ఒక వారాంతంలో నా పుట్టినరోజు ఉందనగా నా పుట్టినరోజుకి బాబా దగ్గరికి వెళ్ళాలి, ప్రశాంతంగా ఉండాలనిపించింది. ఎందుకంటే, నేను నా జీవితంలో ఎవరికీ చెప్పుకోలేని కొన్ని సమస్యలతో బాధపడుతున్నాను. అందుచేత శిరిడీ వెళ్తే కొంచెం ప్రశాంతత దొరుకుతుందేమోనని అనుకున్నాను. కానీ ఇంట్లో శిరిడీ వెళదామని అడిగితే, "అన్ని బాగున్నాక వెళ్దాం" అన్నారు. అప్పుడు నేను ఇంకా ఇలా కాదని మా చెల్లి(మా బాబాయ్ కూతురు)తో మాట్లాడి ఇంట్లో చెప్పకుండా తను, నేను కలిసి నా పుట్టినరోజుకి శిరిడీ వెళ్లాలనుకున్నాం. మా శిరిడీ ప్రయాణానికి ఇంకో రెండు వారాలు ఉందనగా మా తమ్ముడు నాకు ఫోన్ చేసి, "వచ్చే వారాంతంలో శిరిడీ వెళ్దాం. హైదరాబాద్ వస్తావా?" అని అన్నాడు. నేను తనతో, "ఎవరికీ చెప్పకుండా నేను, చెల్లి వెళదామనుకున్నాము. హఠాత్తుగా నువ్వు కూడా శిరిడీ వెళదామని అడుగుతున్నావు. సరే వెళ్దాం కానీ, వచ్చే వారంతో కాకుండా ఆ మరుసటి వారాంతంలో ఉన్న నా పుట్టినరోజు సమయానికి వెళ్దామ"ని అన్నాను. కానీ తను తన భార్యకి ఆ వారం కుదరదన్నాడు. నేను ఇంకా బాబా దగ్గరకి వెళ్లి, 'అవకాశం రావడమే అదృష్టం. ఎప్పుడు అయితే ఏంటి? నాకు ఇలా వ్రాసి ఉందేమో!' అని అనుకున్నాను. ఇంకా తమ్ముడువాళ్ళు ఈ వారాంతంలో, మరుసటి వారాంతంలో నేను, చెల్లి వెళ్తే బాగోదు. ముఖ్యంగా తమ్ముడు అడిగాక కాదంటే బాగోదని తనతో సరేనన్నాను. ఐతే మర్నాడు తమ్ముడు మళ్ళీ ఫోన్ చేసి, "సరే, మరుసటి వారాంతంలో నీ పుట్టినరోజుకు వెళ్దాం లే" అని చెప్పి, "నీ మరదలువాళ్ళ తల్లిదండ్రులు కూడా వస్తార"ని అన్నాడు. అంతే, అది వింటూనే నాకు ఏడుపు వచ్చింది. ఎందుకంటే, వాళ్ళ తల్లిదండ్రులతో వెళ్తే నాకు ఇబ్బందిగా ఉంటుంది. వాళ్లు అందరూ ఒక్కటిగా ఉంటే నాకు ఒంటరిగా ఉన్నట్టు ఉంటుందనిపించి తమ్ముడుతో నేను రానని చెప్పేసాను. తర్వాత, "నా పుట్టినరోజుకి మీ దగ్గరకు రావాలని ఆశపడితే ఎందుకు బాబా ఇంత ఏడిపిస్తున్నావు?" అని బాగా ఏడ్చాను. ఆ తర్వాత నేను వెళ్లి మా అమ్మవాళ్ళని, "మరదలువాళ్ల తల్లిదండ్రులు వస్తున్నారు అంట. మీరూ రండి. అందరం కలిసి శిరిడీ వెళ్తే నాకు బాగుంటుంద"ని అడిగాను. కానీ మా అమ్మ, "మేము రాములే, నువ్వు వెళ్ళు" అంది. నాకు మరింత ఏడుపొచ్చి, "సరే నేనూ వెళ్ళను" అని అనేసి, "ఎందుకు బాబా ఇలా చేసావు? నేనిప్పుడు వాళ్లతో పోకుండా వేరుగా వెళ్తే బాగోదు. అలాగని వాళ్లతో వెళ్తే, ఏ సంతోషం కోసం, మనశాంతికోసం రావాలనుకుంటున్నానో అది నాకు అక్కడ దొరకదు. కాబట్టి ఇంకా బాధపడతానేమో!" అని బాగా ఏడ్చాను. తర్వాత మా తమ్ముడు, డాడీలను అడిగాను. అయితే వాళ్లు కూడా శిరిడీ  రావడానికి ఒప్పుకోకుండా రామన్నారు. తర్వాత నేను హైదరాబాద్ వెళ్తూ మా డాడీవాళ్లతో, "నాకోసం ఏదైనా చేస్తాను అన్నారుగా, శిరిడీకి రండి" అని ఆంటే మా డాడీ, "చూద్దాంలే" అన్నారు. నేను హైదరాబాద్ వెళ్ళిపోయాక నా పుట్టినరోజు వారంలో ఉందనగా హఠాత్తుగా మా డాడీ నాకు కాల్ చేసారు. అప్పుడు నేను మళ్ళీ  అడిగితే, సరే వస్తామన్నారు. వెంటనే అందరికీ బస్సు టికెట్లు బుక్ చేసి మా చెల్లితో, "మన ఇద్దరమే కాదు. మా వాళ్ళందరూ శిరిడీ వస్తున్నారు" అని చెప్పాను. తను, 'అందరూ వస్తే నేను ఒక్కదాన్నే ఉన్నట్టు ఉంటుంద'ని వాళ్ళ తల్లిదండ్రులను కూడా రమ్మని అడిగింది. వాళ్ళు సరేనని మాకన్నా ఒకరోజు ముందు ట్రైన్‌లో శిరిడీ చేరుకున్నారు. మేము మరుసటిరోజు వెళ్లి వాళ్ళని కలుసుకున్నాం. అంతమంది మధ్య ఎంతో సంతోషంగా నా పుట్టినరోజు చేసుకున్నందుకు నాకు చాలా చాలా ఆనందంగా అనిపించింది. నా జీవితంలో ఏ పుట్టినరోజూ ఇలా జరపుకోలేదు. అన్నిటికీ మించిన సంతోషం ఏమిటంటే, నేను మొదటిసారి నా పుట్టినరోజుకి శిరిడీ వెళ్లి, బాబా సన్నిధిలో పుట్టినరోజు జరుపుకున్నాను. ఇదంతా బాబా నాకు ఇచ్చిన సంతోషం. ఆయనకి నా మీద ఉన్న ప్రేమకి నేను నిజంగా ఆశ్చర్యపోయాను. బాబాకి నా మీద ఇంత ప్రేమ ఉందా అని నా సంతోషానికి అవదులు లేకుండా పోయాయి. నేను 'నాకు ఎందుకు ఇంత బాధనిచ్చావు బాబా?' అని ఏడ్చాను గానీ, ఆ బాధ వెనకాల బాబా నాకు ఇంత సంతోషాన్ని ఇవ్వాలనుకున్నారని అనుకోలేదు. నా మరదలువాళ్ళ తల్లిదండ్రులు రాకపోతే మా డాడీవాళ్లు వచ్చే వాళ్ళు కాదు, మా డాడీవాళ్లు రాకపోతే మా పిన్నివాళ్ళు వచ్చే వాళ్ళు కాదు. బాబా నాకోసం ఒకరి వెనక ఒకరిని కలిపి మరీ అందరినీ శిరిడీకి రప్పించారని నాకనిపిచింది. మా డాడీ అయితే "నువ్వు ఒక్కదానివే వెళ్లాలనుకున్నావు. కానీ కుటుంబంలో అందరినీ నీ పుట్టినరోజుకి శిరిడీ తీసుకొచ్చారు బాబా" అన్నారు. నేను ఆయనతో "అవును, ఇదంతా బాబానే చేశార"ని చెప్పాను.  ఇప్పుడు ఇది వ్రాస్తుంటే నా కళ్ళల్లో నీళ్ళు తిరుగుతున్నాయి. ఇంతకు మించి ఎవరికైనా ఏం కావాలనిపిస్తుంది. "థాంక్యూ సో మచ్ బాబా. నా ఈ పుట్టినరోజుని నా జీటివితంలో అత్యంత గుర్తుంచుకో దగ్గ రోజుగా మార్చేశారు మీరు. ఎప్పుడూ నాతోనే ఉండండి బాబా. మీరు నాతో లేకుంటే నేను లేనట్టే బాబా. మీరే నాకు అన్ని బాబా. ఇంతకుమించి ఏం చెప్పలేను. ఎంతో చెప్పాలని ఉంది కానీ సంతోషం వల్ల నాకు మాటలు రావట్లేదు".

తరువాత మేము తిరుపతి వెళ్ళాలనుకొని రెండు నెలల ముందు మా అమ్మ, నాన్న, తమ్ముడు మరదలు, తన తల్లిదండ్రులకి దర్శనం టిక్కెట్లు బుక్ చేసాము. తీరా తిరుపతి వెళ్ళే సమయం దగ్గరకు వస్తూండేసరికి మా పిన్ని, బాబాయ్ కూడా మాతో వస్తామని చెప్పారు. కానీ టిక్కెట్లు బుక్ చేసేటప్పుడు వాళ్ళు వస్తారని మాకు తెలియక మేము వాళ్ళని అడగకుండా మాకు మాత్రమే టిక్కెట్లు బుక్ చేసినందువల్ల వాళ్ళకి టికెట్లు లేవు. అయినా వాళ్ళు మాతోపాటు వచ్చి, ఉచిత దర్శనానికి వెళతామని అన్నారు. దాంతో అందరం కలిసి రెండు కార్లలో వెళదామని నిర్ణయించుకున్నాము. అయితే మా ప్రయాణానికి కొన్నిరోజుల ముందు నుంచి బాగా వానలు పడుతుండటంతో నేను బాబాని, "దూర ప్రయాణమవుతున్నాము. ఏ సమస్య లేకుండా తిరుపతి వెళ్లి దర్శనం చేసుకొని వచ్చేలా చేయండి బాబా" అని కోరుకున్నాను. మేము ప్రయాణమయ్యే రోజు కూడా వాతావరణం మేఘావృతమై ఉంది. పైగా ఆరోజు ఇంట్లో పూజ చేస్తూ అమ్మ కొబ్బరికాయ కొడితే అది కుళ్లిపోయి వుంది. ఇంకొక కాయ కొడితేపోయేది. కానీ మా అమ్మ విషయం నాతో చెప్పి, "నాకు ఎందుకో ఆందోళనగా ఉంది" అని అంది. నేను ఆమెతో, "ఏం కాదు. అంతా మంచిగా జరుగుతుంది. నువ్వు బాధపడకు, భయపడకు" అని చెప్పాను. కానీ నా మనసులో కూడా కొంచెం ఏదోలా  అనిపించింది. అయినా, 'బాబా ఉన్నారు. అంతా ఆయన చూసుకుంటారు' అని అనుకున్నాను. తర్వాత మేము ప్రయాణమయ్యే ముందు నేను నా మనసులో బాబాని తలుచుకొని, "బాబా! కారులో వెళుతున్నాం. వాతావరణం బాగోలేదు. మేము క్షేమంగా వెళ్లి, వచ్చేలా చూడండి. సదా మాకు  తోడుగా ఉండండి" అని బాబాతో చెప్పుకున్నాను. తర్వాత మా ప్రయాణం మొదలవగానే నేను నా మనసులో, "బాబా! మీరు ఏదో ఒక రూపంలో కనిపించి నాకు తోడుగా ఉన్నానని తెలియజేసి నా టెన్షన్ తగ్గించండి" అని అనుకున్నాను. కానీ బాబా ఎక్కడా కనిపించలేదు. నేను బాబా గుడి లేదా ఏదైనా వాహనం మీద బాబా కనిపిస్తారని కారులో నుండి బయటకి చూస్తున్నాను కానీ కారు లోపల చూడట్లేదు. నిజానికి బాబాని కనిపించమని నేను కోరుకున్నప్పుడే మా నాన్న కారులో ఉన్న అద్దానికి తగిలించి ఉన్న బాబా ఫోటో పట్టుకొని, "ఇది మొన్న శిరిడీలో కొన్నదేనా?" అని మా బాబాయ్‌ని అడిగారు. కానీ బయట ఎక్కడా బాబా కనపడలేదన్న టెన్షన్‌లో ఉన్న నేను నాన్న మాటల్ని ఆ క్షణం పట్టించుకోలేదు. కానీ కాసేపటికి ఒక్కసారిగా 'కారులో వేలాడుతున్న ఫోటోలో ఉన్నది బాబానే కదా!' అన్న ఆలోచన నాకు వచ్చింది. అప్పుడు 'బాబా నాతో తామున్నామని తెలియజేయటం కోసమే నేను బాబాని కనిపించమని కోరుకోగానే మా నాన్న ఫోటో పట్టుకుని మరీ మా బాబాయిని 'ఇది శిరిడీలో కొన్నదేనా?' అని అడిగిలా చేసారని, కానీ నా అజ్ఞానంతో నేను దానిని అర్దం చేసుకోలేకపోయాను' అని గ్రహించాను. "క్షమించండి బాబా". 

మా పిన్నివాళ్ళు ఉచిత దర్శనానికి వెళ్లారని చెప్పను కదా! ఆ సమయంలో తిరుమలలో చాలా రద్దీ ఉంది. అందువల్ల నేను, "ఏ ఇబ్బందీ లేకుండా పిన్నివాళ్ళు దర్శనం చేసుకొని వచ్చేలా చేయమ"ని బాబాని కోరుకున్నాను. కొంచెం సమయం ఎక్కువ పట్టినా బాబా దయవల్ల ఏ సమస్య లేకుండా అనుకున్న దానికంటే బాగా దర్శనం చేసుకొని వచ్చారు పిన్నివాళ్ళు. ఇకపోతే, బయటకి వెళితే నాకు ఫుడ్ పడదు. శిరిడీ వెళ్లినప్పుడు ఇబ్బందిపడ్డాను కూడా. అందువల్ల, "ఇప్పుడు ఏ ఇబ్బందీ లేకుండా చూసుకో బాబా" అని బాబాకి చెప్పుకున్నాను. బాబా దయవల్ల వెళ్లిన రెండు రోజుల్లో నాకు ఏ జీర్ణ సమస్య రాలేదు. అంతేకాదు, తిరుపతి వెళ్ళేరోజు నాకు కొంచం అసౌకర్యంగా అనిపించినప్పటికీ బాబా దయవల్ల ఏ సమస్య రాలేదు. మేము తిరుపతి వెళ్లే సమయానికల్లా నాకు నెలసరి వచ్చేయాలి. కానీ ఎందుకో తెలీదు, సమయానికి నెలసరి రాలేదు. నేను చేసేదేమీలేక తిరుపతి వెళ్ళొచ్చేవరకు నెలసరి రాకుండా ఉండటం కోసం టాబ్లెట్లు వేసుకోటం మొదలుపెట్టాను. అయితే దాదాపు తిరుపతి వెళ్లే సమయం దగ్గరకి వచ్చాక వేసుకోవడం వల్ల ఎక్కడ నెలసరి వేచేస్తుంది అన్న భయం నన్ను వెంటాడింది. అందుచేత, "నెలసరి రాకుండా స్వామి దర్శనం చేసుకొని వచ్చే బాగాన్ని ప్రసాదించమ"ని బాబాని వేడుకున్నాను. బాబా దయతో ఏ సమస్య రాకుండా చూసారు. మా అమ్మ కాళ్ల నొప్పులతో బాధపడుతున్నప్పటికీ కొండపైకి నడిచి వస్తానని నడిచింది. అప్పుడు నేను, "బాబా! అమ్మకి ఏ సమస్య రాకుండా చూడమ"ని కోరుకున్నాను. బాబా దయవల్ల అమ్మ క్షేమంగా కొండెక్కి స్వామి దర్శనం చేసుకుంది. తిరుగు ప్రయాణంలో వాహనాలు, షాపుల పైన ఫోటోలు, నామం రూపంలో ఎక్కడ చూసినా నాకు బాబానే కనిపించారు. తద్వారా బాబా నాతోనే ఉన్నానని చెప్తున్నారని నాకు అర్దమైంది. "అన్నిటికీ చాలా చాలా ధన్యవాదాలు బాబా".
Read More

సాయిభక్తుల అనుభవమాలిక 1915వ భాగం....

12 comments:
ఈ భాగంలో అనుభవాలు:

1. కన్నతండ్రిలా బాధ్యత తీసుకొని ఊహించని విధంగా ఉద్యోగాన్ని ప్రసాదించిన బాబా
2. అడిగినంతనే దర్శనమిచ్చి ధైర్యాన్నిచ్చిన బాబా
కన్నతండ్రిలా బాధ్యత తీసుకొని ఊహించని విధంగా ఉద్యోగాన్ని ప్రసాదించిన బాబా

నేను ఒక సాయి భక్తురాలిని. నేనే కాదు మా కుటుంబం యావత్తు సాయి భక్తులే. మేము విధిగా ప్రతి సంవత్సరం శిరిడీకి వెళ్తాం. రోజూ రెండు పూటలా బాబాకి దీపారాధన చేసి హారతి ఇవ్వడం మా దినచర్య. ఆయన మా ఇంటి పెద్ద. నేను ఆయన్ని నాన్న అని పిలుస్తాను. నేను తినే ప్రతిదీ ఆయనకి నివేదించిన తర్వాతే నేను తింటాను. 'నాన్న అని పిలిచినందుకు ఆయన నిజంగానే కన్నతండ్రిలా బాధ్యత తీసుకొని నేను ఊహించని విధంగా నాకు ఉద్యోగాన్ని ప్రసాదించారు. ఆ అనుభవాన్ని నేనిప్పుడు మీతో పంచుకుంటున్నాను. నేను అనారోగ్య కారణాల వల్ల దగ్గర దగ్గర 7, 8 సంవత్సరాలుగా ఉద్యోగం చేయడం లేదు. ఉద్యోగం చేయాలన్న ఆలోచన కూడా నాకు లేదు. అలాంటిది నాకు అప్పుడప్పుడు ఇంస్టాగ్రామ్, ఫేస్బుక్ తేరుస్తుంటే, 'బతుకుతెరువు కోసం నీకు ఉద్యోగం వస్తుంది' అని సాయి సందేశాలు వస్తుండేవి. నేను వాటిని చూసి 'అది ఎలా సాధ్యం? నేను ఉద్యోగం చేయాలనుకోవటం లేదే! ఉద్యోగం చేసే ఆలోచన కూడా నాకు లేదే! మరి నాకు ఉద్యోగం రావడం ఏంటి? నేను ఉద్యోగం చేయడం ఏంటి? అది కూడా ఇప్పుడున్న కఠిన పరిస్థితుల్లో' అని అనుకుంటూ ఉండేదాన్ని. ఇలా ఉండగా ఐదు వారాల సాయి దివ్యపూజలో భాగంగా రెండు వారాల పూజ పూర్తై, మరో మూడు వారాలు ఉన్నాయన్న సమయంలో సాయి నాకు ఒక బంపర్ ఆఫర్ ఇచ్చారు. అనుకోకుండా ఒక MNC కంపెనీ నుంచి వర్క్ ఫ్రం హోం వెసులుబాటు ఉన్న ఒక ఉద్యోగం నన్ను వెతుక్కుంటూ నా దగ్గరకి వచ్చింది. నాలుగు దశల ఇంటర్వ్యూ జరిగితే, ఏ ఒక్క దశ ఇంటర్వ్యూలో కూడా నేను విశ్వాసంతో పాల్గొనలేదు. ఎందుకంటే, ఆ ఉద్యోగం నాకు వస్తుందన్న నమ్మకం లేకపోవడం, నాకెలా వస్తుందన్న ఆలోచనలు ఉండటం వల్ల. ఏదో ఇంటర్వ్యూ జరుగుతుంది కాబట్టి 'ఓకే పాల్గొందాం' అని పాల్గొన్నాను. అంతేగానీ ఉద్యోగం వస్తుందన్న నమ్మకం నాకు ఏ కాస్తైనా లేదు. అయితే నాలుగు రౌండ్ల ఇంటర్వ్యూ పూర్తవుతూనే అదేరోజు(జూలై 22) నాకు ఆఫర్ లెటర్ వచ్చింది. సాయి ఎప్పుడూ, 'నీ అదృష్టంలో లేనిది కూడా నేను నీకు ఇస్తాను' అని సందేశం ఇస్తుందేవారు. నేను అదేంటో అనుకునేదాన్ని గానీ ఆ ఆఫర్ లెటర్ అందుకున్న తర్వాత నాకు అర్థమైంది. నా సాయినాన్న మా అవసరాల గురించి ఎంతగా ఆలోచిస్తున్నారో! మా అవసరాలు మేము మర్చిపోయినా ఆయన మర్చిపోవటం లేదనిపిస్తుంది. సాయిబాబా లేనిదే మా కుటుంబం లేదు. ఆయనకి మేము ఎప్పటికీ ఋణపడి ఉంటాం. "చాలా చాలా ధన్యవాదాలు బాబా".
అడిగినంతనే దర్శనమిచ్చి ధైర్యాన్నిచ్చిన బాబా

సాయి భక్తులందరికీ నా నమస్కారములు. నా పేరు వెంకట్. 2024, ఆగస్టు నెలాఖరు నుండి ఒక వారం రోజులపాటు నా భార్యకి మూత్ర సంబంధిత ఇన్ఫెక్షన్, నీరసం, కాళ్ళుచేతులు తిమ్మిర్లుగా ఉండటం ఉండింది. ఆమె నాతో, "నాకు భయమేస్తుంది" అని చెప్పింది. నేను తనతో, "నువ్వు బాబాని ప్రార్థించు. ఏదో విధంగా షుగర్ టెస్ట్ చేయిస్తానులే" అని ఆ టెస్ట్ చేయించాను. తర్వాత, "బాబా! మీ దయవలన టెస్టు రిపోర్టు నార్మల్‌గా‌ రావాలి తండ్రీ. ఇప్పటికే ఆమెకు కొన్ని ఆరోగ్య సమస్యలున్నాయి. మరలా ఇది కూడా అంటే తట్టుకోలేదు బాబా" అని బాబాని ప్రార్థించాను. అదేరోజు సాయంత్రం టెస్టు రిపోర్టు కోసం ఫ్రెండ్‌కి ఫోన్ చేస్తే, "షుగర్ ఎక్కువగా వుంది" అన్నాడు తను. అది విని నేను, 'ఏంటి బాబా ఇది?' అని బాధపడ్డాను. విషయం నా బార్యకి చెపితే, తను టెన్షన్ పడింది. నేను సరే ఏదైతే అది అయిందని 2024, సెప్టెంబర్ 5న మా అమ్మవాళ్ల వూరు వెళ్ళడానికి బయలుదేరాను. నేను వూరు వెళ్తుంటే నా మనసులో, "ఫ్రెండ్ సరదాగా ఆలా చెప్పాడేమో బాబా! అది నిజమైతే మీరు మీ దర్శనభాగ్యం నాకు ప్రసాదించండి" అని అనుకున్నాను. అంతలోనే ఒక కారు మీద బాబా దర్శనం ఇచ్చారు. నాకు చాలా ధైర్యం వచ్చింది. తర్వాత ఫ్రెండ్ ఫోన్ చేసి, "రిపోర్ట్ నార్మల్ వచ్చింది. నేను ఊరికే అలా చెప్పాను" అని అన్నాడు. అది విని నేను ఆనందంతో బాబాకి చాలా చాలా ధన్యవాదాలు చెప్పుకున్నాను.

సాయి దయవలన నాకు ఒక పాప, బాబు. 2024, సెప్టెంబర్‌‌లో 20 నెలల వయసున్న మా బాబుకి బాగా జలుబు, దగ్గుతో పాటు స్వల్ప జ్వరం కూడా వచ్చింది. ఆర్ఎమ్‌పి డాక్టరుకి చూపించినప్పటికీ బాబుకి తగ్గలేదు. ఇక అప్పుడు మా పిల్లల డాక్టరుకి బాబుని చూపిస్తే, "వైరల్ ఫీవర్‌లా ఉంది. మూడు రోజులు మందులు వాడండి. తగ్గకపోతే చూద్దాం" అన్నారు. నాకు చాలా భయమేసింది. ఎందుకంటే, ఆ సమయంలో వైరల్ ఫీవర్స్ చాలా ఉన్నాయి. నేను బాధతో, "బాబా! నా బాబుకి ఏమీ కాకుండా తగ్గిపోవాల"ని బాబాని వేడుకొని రోజూ బాబు చేత ఊదీ నీళ్లు తాగించాను. బాబా దయవలన మూడు రోజులకి బాబుకి పూర్తిగా తగ్గిపోయింది. "చాలా చాలా ధన్యవాదాలు సాయి. మీ దయవలన మాకు అంతా మంచి జరగాలి". 
Read More

సాయిభక్తుల అనుభవమాలిక 1914వ భాగం....

14 comments:
ఈ భాగంలో అనుభవాలు:

1. పెద్ద బాధ నుండి బయటపడేసిన బాబా
2. బాబా దయతో ఆటంకం లేకుండా తిరుమల దర్శనం - తగ్గిన జ్వరం
3. ఊదీ మహిమ
పెద్ద బాధ నుండి బయటపడేసిన బాబా

ఓంసాయి శ్రీసాయి జయజయసాయి. నా  అనూష. నాకు గురువు, తండ్రి, అన్న అయిన నా సాయికి శతకోటి ప్రమాణాలు. సాయి భక్తులందరికీ నమస్కారం. సాయి నన్ను ఒక పెద్ద కష్టం, బాధ నుండి బయటపడేసారు. ఆ అనుభవాన్ని నేనిప్పుడు మీతో పంచుకుంటున్నాను. 2024, జూలై నెలలో ఒక మంగళవారంనాడు నేను పని చేస్తున్న స్కూలులో పాఠ్యప్రణాళిక చూద్దామని లాప్టాప్ ఓపెన్ చేసి చూస్తున్నప్పుడు అనుకోకుండా స్క్రీన్ మీద ఒక ఇమేజ్ ఓపెన్ అయింది. అది పోలేదు, మినిమైజ్ కూడా కాలేదు. అక్కడ డిలీట్ అనే ఆప్షన్ ఉంటే, దానిపై నేను చాలాసార్లు క్లిక్ చేశాను. చేసినప్పుడల్లా ఏదో డిలీట్ అయినట్లు సౌండ్ వచ్చింది కానీ, ఆ ఇమేజ్ మాత్రం పోలేదు. ఇంకా నేను ఆ ఇమేజ్ పక్కకి జరిపి ఫోల్డర్‌లోని పాఠ్యప్రణాళిక చూద్దామని చూస్తే, అక్కడ పాఠ్యప్రణాళిక లేదు. పూర్తిగా డిలీట్ అయిపోయింది. ఒక్క సెకనుపాటు నాకు అంతా శూన్యమైపోయింది. చాలా భయమేసి లాప్టాప్ షట్‌డౌన్ చేసి, వెంటనే మళ్ళీ ఓపెన్ చేసాను. ఆ ఇమేజ్ స్క్రీన్ మీద అలానే ఉంది. ఫోల్డర్‌లోని పాఠ్యాంశం లేదు. నేను భయంతో మళ్ళీ షట్‌డౌన్ చేసేసాను. విషయం ఎవరికీ చెప్పకుండా, "బాబా! ఏంటి ఇలా జరిగింది. నాకు చాలా భయంగా ఉంది. అది స్కూల్ పాఠ్యప్రణాళిక. దయచేసి ఏదో ఒకటి చేయండి బాబా" అని బాబాని వేడుకున్నాను. మర్నాడు బుధవారం పండుగ కారణంగా సెలవు వచ్చింది. నా మదిలో అదే దిగులు వెంటాడుతున్నందువల్ల ఆ రోజంతా నేను బాబాని, "మీరే ఏదో ఒకటి చేసి రేపు నేను స్కూలుకి వెళ్లి ఫోల్డర్ ఓపెన్ చేసినప్పుడు ముందు ఎలా ఉండేదో అలాగే ఉండేలా చేయండి. మీరు ఏమైనా చేయగలరు బాబా. ఆ సమస్యను తొలగించి నన్ను కాపాడండి బాబా. ప్లీజ్ బాబా" అని వేడుకుంటూ గడిపాను. తర్వాత రోజు అంటే గురువారం నేను తొందరగా స్కూలుకి వెళ్లి ల్యాప్‌టాప్ ఓపెన్ చేశాను. ఈసారి ఆ ఇమేజ్ లేదు. ఫోల్డర్ ఓపెన్ చేస్తే, ఏదో అద్భుతం జరిగినట్లు ముందు ఎలా ఉండిందో అలాగే పాఠ్యప్రణాళిక ఉంది. ఆ క్షణం నేను ఎంత ఆనందపడ్డానో మాటల్లో చెప్పలేను. ఒక్కసారిగా నా బాధ అంతా మాయమైపోయింది. తర్వాత గురువారం గుడికి వెళ్లి, బాబాకి శిరా నివేదించాను. "చాలా చాలా ధన్యవాదాలు బాబా. అనుక్షణం మమ్ము కాపాడుతున్నందుకు మీకు శతకోటి ప్రమాణాలు సాయితండ్రీ":.
బాబా దయతో ఆటంకం లేకుండా తిరుమల దర్శనం - తగ్గిన జ్వరం

నా పేరు షాలిని. నాకు బాబాతో పరిచయం 2022, మేలో జరిగింది. తక్కువ కాలమే అయినా బాబా నాకు ప్రసాదించిన అనుభవాలు అనేకం. 2024, జూలై 8, 9 తేదీల్లో మేము తిరుమల వెళ్ళాము. అది మా అక్క నెలసరి సమయం కావడం వలన బాబాకి, వెంకటేశ్వరస్వామికి ప్రయాణంలో, అలాగే దర్శనానికి నెలసరి ఆటంకం కాకుండా ఉండాలని కోరుకున్నాము. అయితే అలిపిరి దగ్గరకి వెళ్లేసరికి అక్కకి నెలసరి వచ్చిన అనుభూతి కలిగింది. కానీ నిజానికి కాలేదు. అయినా కూడా మాకు భయం పట్టుకుంది. అందువల్ల సాయి నామస్మరణ, గోవింద నామస్మరణ చేసుకుంటూ కొండా ఎక్కసాగాము. అక్కకి కొంచం ఆరోగ్య సమస్యలు ఉన్నందువలన తను ఎక్కగలదో, లేదో అనుకున్నాము కానీ బాబా, వెంకటేశ్వరస్వామి దయవల్ల ఎక్కగలిగింది. తిరుమల చేరుకున్నాక నేను ఎక్కడైనా బాబా దర్శనం ఆవుతుందేమోనని చూశాను. కానీ బాబా ఎక్కడా కనిపించలేదు. కొంతసేపటి తర్వాత స్వామి దర్శనానికి వెళ్లేముందు ఒక ఫోటో రూపంలో, అలాగే క్యూలైన్లోకి వెళ్లినప్పుడు ఒక కారు వెనుక వైపు బాబా దర్శనం మాకు అయింది. బాబా దయవల్ల స్వామి దర్శనం చాలా బాగా జరిగి క్షేమంగా ఇంటికి తిరిగి వచ్చాము.

2021, ఆగస్టు నెలాఖరులో వరుసగా నాలుగు రాత్రులు మా అక్కకి జ్వరం వస్తుండేది. ఆగస్టు 28న మరీ ఎక్కువగా వచ్చింది. దాంతో అక్కని హాస్పిటల్‌కి తీసుకెళ్ళాము. డాక్టర్ ఇంజక్షన్ వేసి టాబ్లెట్లు ఇవ్వకుండా "నాలుగు రోజుల నుంచి జ్వరం వస్తుంది కాబట్టి ఇంజక్షన్‌కి తగ్గకుంటే బ్లడ్ టెస్ట్ చేయాలి" అన్నారు. నేను వెంటనే, "బాబా! రేపు సాయంత్రానికి అక్కకి జ్వరం తగ్గేలా దయ చూపండి" అని బాబాని వేడుకున్నాను. విచిత్రంగా మధ్యాహ్నం వరకు ఉన్న జ్వరం సాయంత్రం అవుతూనే తగ్గిపోయింది. అంతా బాబా దయ. ఆయన అనుకుంటే కానిది ఏముంది?

ఒకసారి మా అక్క నాలుకపై గుల్లలు వచ్చి చాలా ఇబ్బందిపడింది. బికాంప్లెక్స్ టాబ్లెట్లు వేసుకున్నా పూర్తిగా తగ్గలేదు. రెండు రోజులు తగ్గడం మళ్ళీ రావడం జరుగుతూ నాలుక అంతా ఎర్రగా అయిపొయింది. నేను అక్కతో, "బాబా ఉన్నారుగా తగ్గిపోతుంది" అని చెప్పాను. అప్పుడు అక్క బాబాను వేడుకోగా అయన దయతో ఆ గుల్లలు తగ్గిపోయాయి. "ధన్యవాదాలు బాబా". 
ఊదీ మహిమ
 
సాయి బందువులందరికీ నా నమస్కారాలు. నేను ఒక సాయి భక్తురాలిని. నేను, మావారు, నా అత్తమామలు కలిసి ఉంటున్నాము. మా అత్తమామలు చాలా వయస్సు పైబడినవాళ్ళు. వాళ్ళు వాళ్ళకై వాళ్ళు ఏమీ చేసుకోలేరు. ఒకరోజు నాకు, మావారికి ఒకేసారి నడుము పట్టేసింది. మాకు ఏమి చేయాలో అర్థం కాలేదు. నేను 'ఎలారా భగవంతుడా?' అని అనుకుంటూ చిటికెడు ఊదీ నీళ్ళలో కలుపుకొని, బాబాకి దణ్ణం పెట్టుకొని ఆ నీళ్ళు తాగేసాను. మావారికి కూడా ఇచ్చాను. బాబా దయవల్ల నాకు వెంటనే తగ్గిపోయింది. మావారికి మాత్రం తగ్గడానికి 2 రోజులు పట్టినప్పటికీ బాబా దయవల్ల ఎవ్వరికీ ఇబ్బంది కాలేదు. ఇలా బాబా నన్ను కాపాడుతున్నారు. బాబా లేకపోతే నేను ఏమైపోయేదాన్నో. నేను కొన్ని సమస్యలతో ఇబ్బంది పడుతున్నాను. ఆ విషయంలో బాబా నాకు రోజూ 'అన్ని సర్దుకుంటాయి' అని మెసేజ్ ఇస్తున్నారు. "నన్ను తొందరగా ఆ సమస్యల నుండి కాపాడండి బాబా".
Read More

సాయిభక్తుల అనుభవమాలిక 1913వ భాగం....

12 comments:
ఈ భాగంలో అనుభవం:

  • 'సాయీ' అని పిలిస్తే 'ఓయీ' అని పలుకుతారు బాబా
నా పేరు హాసిని. ఒకరోజు నేను స్పెట్స్ తీసుకుందామని స్పెట్స్(కళ్లద్దాలు) షాపుకి వెళ్లే ముందు బాబాకి, "తక్కువలో సెట్ అయ్యేలా చూడండి బాబా" అని చెప్పుకొని వెళ్ళాను. అక్కడ చెకప్ అయ్యాక స్పెట్స్, ఫ్రేమ్ మొత్తం కలిపి 6,200 రూపాయలు చెప్పారు. నేను "ఏంటి ఇంతా?" అని షాప్ నుండి బయటకి వచ్చేసి, 'బాబా! నాకు ఆ స్పెట్స్ బాగా నచ్చాయి. కానీ, అంత డబ్బు ఎందుకు పెట్టాలి బాబా?' అని అనుకున్నాను. తర్వాత విషయం మా ఫ్రెండ్‌కి చెప్తే, "నాకు తెలిసినవాళ్ళు వున్నారు. వెళ్దాం లే" అని అక్కడికి తీసుకొని వెళ్ళాడు. వాళ్ళు అంతా కలిపి 2,500 చెప్పి 2,250కి ఇస్తామన్నారు. నేను, "బాబా! 2,000కి ఇచ్చేలా చేయండి" అని అనుకున్నాను. బాబా దయవల్ల వాళ్ళు ఆఖరికి నేను కోరుకున్న 2,000కి ఇచ్చేసారు. నేను 3,000 రూపాయలలో అయ్యేలా చూడండి బాబా అని అనుకుంటే ఆయన 2000కే ఐపోయేలా దయ చూపారు. ఇకపొతే, స్పెట్స్ తయారయ్యాక పెట్టుకొని చూస్తే, అవి నాకున్న సైట్‌కి సంబంధించినవి కావు. గ్లాసెస్ తప్పుగా ఫిట్ చేసారు. షాపు వాళ్ళని అడిగితే, మీదే తప్పు అంటారేమోనని నాకు భయమేసింది. సాధారణంగా ఏ షాపువాళ్ళు అయినా అలానే అంటారు. అందుచేత నేను, "ఏంటి బాబా, ఇలా జరిగింది? వాళ్ళు నా స్పెట్స్ విజన్ పవర్ సరిచేసి ఇచ్చేలా చూడండి" అని బాబాను అడిగాను. బాబా దయవల్ల వాళ్ళు నా స్పెట్స్ మార్చి ఇచ్చారు.

నేను స్పెట్స్ తీసుకోవడానికి వెళ్ళినప్పుడు 2గంటలపాటు నిరంతరాయంగా వర్షం కురిసింది. ఆ వర్షంలో నేను బాగా తడిసిపోయాను. నా ఫోన్ కూడా తడిసిపోయి దానంతట అదే స్విచ్ ఆఫ్, ఆన్ అవ్వసాగింది. నాకు భయమేసి, "ఏంటి బాబా, ఇలా అవుతుంది. ఇప్పుడు ఈ ఫోన్ పొతే డబ్బులు పెట్టె పరిస్థితి లేదని మీకు తెలుసు కదా!" అని బాబాకి చెప్పుకున్నాను. కానీ ఫోన్ ఆన్ అవ్వలేదు. అప్పుడు, "ఏంటి బాబా? మీరు 'సాయీ' అంటే 'ఓయ్' అని పలుకుతానని అన్నారు. మరి ఇప్పుడు ఎందుకు పలకట్లేదు" అని బాబాని అడిగాను. సాధారణంగా నా నుదిటిపై బాబా ఊదీ ఎప్పుడూ ఉంటుంది. కొంతమంది "ఎప్పుడూ విబూది పెడతావు. నువ్వు కేరళ అమ్మాయివా?" అని అన్నారు. కానీ వాళ్ళకి ఏం తెలుసు బాబా ఊదీ శక్తి, లీలలు. చెప్పినా అర్దం కాదని నేను వాళ్ళకి ఏమీ చెప్పలేదు. సరే విషయానికి వస్తే, 'వర్షంలో తడిచిపోయినందువల్ల నా నుదిటిపై ఊదీ లేదు. బాబాకి ఇష్టం లేదేమో! ఆయనకి ఈరోజు నాపై కోపం వచ్చిందేమో! ఫోన్ ఆన్ అవ్వలేదు. సమస్య అలాగే ఉంది' అని అనుకొని ఇంటికి వెళదామని ఆటోలో బయలుదేరాను. ఆటోలో ఉన్నప్పుడు నాకు ఒక విషయం గుర్తొచ్చింది. అదేమిటంటే, ఆరోజు నేను అమ్మవారి గుడికి వెళ్ళినప్పుడు హుండీలో డబ్బు వేద్దామనుకున్నాను కానీ, నిన్ననే వేశానని వేయకుండా స్పెట్స్ తెచ్చుకోవడానికి వెళ్ళిపోయాను. అది గుర్తొచ్చాక, 'చిన్న మొత్తం డబ్బు హుండీలో వేయకుండా ఆగిపోయాను. అందుకే ఇప్పుడు ఇంత పెద్ద మొత్తం డబ్బు పెట్టాల్సిన ఫోన్ రిపేర్ వచ్చింది' అని అనుకున్నాను. నా తప్పు నేను తెలుసుకున్నాక "తప్పు అయిపొయింది అమ్మా. హుండీలో ఇందాక వేయాలనుకున్న డబ్బు వేసేస్తాను" అని అనుకున్నాను. ఇంకా 'ఆటో దిగి ఇంటికి వెళ్ళాక ఫోన్‌కి బాబా ఊదీ పెట్టాలి. అప్పుడే ఫోన్ సరిగా వుంటుంది' అనుకున్నాను. అలా అనుకున్నాక మనసులో చాలా ఉత్సాహంగా అనిపించింది. సరిగా అప్పుడే నేను అమ్మవారి గుడి దాటాను. నా ఫోన్ ఆన్ అయింది. అప్పుడే నా ఫ్రండ్ వచ్చి 'ఓయీ' అని నన్ను పిలిచాడు. నేను, సరైన సమయానికి వచ్చావు. ఫోన్ ఆన్ ఐయింది చూడు" అని ఫోన్ తనకి ఇచ్చాను. తను ఫోన్ సెట్టింగ్స్ సరి చేసాడు. ఇంకా ఫోన్ ఆగలేదు. నేనింకా అలానే అమ్మవారి గుడికి వెళ్ళిపోయి అదివరకు వేయాలనుకున్న డబ్బు హుండీలో వేసేసి, తప్పు అయిపొయింది అమ్మా అని దణ్ణం పెట్టుకొని వచ్చాను. అప్పుడు రాత్రి ఈ అనుభవాన్ని బ్లాగ్‌కి పంపుదామని అనుకున్నాను. కానీ అది తప్ప అన్ని పనులు చేసాను. అప్పుడు చూస్తే ఫోన్ ఛార్జింగ్ అవ్వట్లేదు. వెంటనే, "బాబా! తప్పు అయిపొయింది. మీ అనుగ్రహాన్ని బ్లాగ్‌కి పంపుతాను" అని చెప్పుకున్నాను. అంతే, ఫోన్ ఛార్జింగ్ అయింది. నాకు తెలిసి ఈ అనుభవం ఎవరికైన ఉపయోగపడవచ్చు. అందుకే బాబా నాచేత ఇంత తొందరగా ఈ అనుభవాన్ని బ్లాగ్‌కి పంపేలా చేసారు. "క్షమించండి సాయినాన్నా. రెండేళ్ల నుంచి నేను మిమ్మల్ని ఒకటి అడుగుతున్నాను. ఇప్పుడైనా అది నెరవేరుస్తారని ఎదురు చూస్తున్నాను తండ్రీ".

మా చెల్లి గొడవ చేసి మరీ మూడు, నాలుగు రోజుల వయసున్న ఒక చిన్న కుక్కపిల్లని ఇంటికి తీసుకొచ్చింది. అది చాలా అందంగా బాగుంది. కానీ మాకు పెంపుడు జంతువులను పెంచడం ఇష్టం వుండదు. మునుపెన్నడూ వాటిని పెంచనందున మాలో ఎవరికీ వాటిని ఎలా పోషించాలో తెలీదు. అందువల్ల ఆ కుక్కపిల్లకి పాలు ఎలా పెట్టాలో మాకు తెలియలేదు. మేము ఏదోలా పెట్టినా కూడా అది తాగేది కాదు. 2024, ఆగస్టు 25 మధ్యాహ్నం ఏదో కాస్త పాలు తగ్గిందికానీ రాత్రి వరకు మళ్ళీ తాగలేదు. మాకు చాలా జాలి వేసింది. మనకి సహాయం చేయడానికి మన సాయినాన్న ఉన్నారు కదా! "బాబా! పాపం దాన్ని వేరు చేసి తెచ్చేయడం, అది పాలు తాగకపోవడం వల్ల చాలా బాధగా ఉంది. తల్లిప్రేమ ఎవరికైన కావాలి. ఉదయానికి ఎలాగైనా ఆ కుక్కపిల్ల తన తల్లి దగ్గరకి వెళ్లిపోయేలా చేయండి" అని బాబాని వేడుకున్నాను. 'సాయీ' అని పిలిస్తే 'ఓయీ' అని పలుకుతారు కదా బాబా. రాత్రి ఆయన్ని అడిగానో, లేదో ఉదయం ఆ కుక్కపిల్ల తన తల్లి దగ్గరకి చేరుకుంది. నిజానికి అప్పటివరకు మా చెల్లితో ఆ కుక్కపిల్లని ఎక్కడినుంచి తెచ్చావో అక్కడ వదిలేయి అని చెప్తుంటే, నేను  ఇంట్లోంచి వెళ్ళిపోయి దాన్ని పెంచుకుంటానని మొండిగా ప్రవర్తిస్తుండేది. అలాంటి తను ఉదయం బాగా సర్ధి చెప్పి, తిడితే ఒప్పుకొని కుక్కపిల్లని తీసుకెళ్లి వదిలేసి వచ్చింది. ఇది బాబా లీలే కదా!
 
సర్వం శ్రీసాయినాథార్పణమస్తు.
Read More

సాయిభక్తుల అనుభవమాలిక 1912వ భాగం....

14 comments:
ఈ భాగంలో అనుభవాలు:

1. సాయితండ్రి దయతో చేకూరిన ఆరోగ్యం
2. బాబాని తలుచుకుంటే ఏదైనా అవుతుంది
సాయితండ్రి దయతో చేకూరిన ఆరోగ్యం
 
సాయిభక్తులందరికీ నమస్కారం. నేను ఒక సాయిభక్తురాలిని. మాది కడప జిల్లా. మా నాన్నకి ప్రోస్టేట్ సమస్య ఉంది. దానితో సరిగా కూర్చోలేక, బైక్ నడపడానికి కూడా రాక చాలా ఇబ్బందిపడుతుండేవారు. హాస్పిటల్‌కి వెళితే డాక్టర్ టాబ్లెట్లు ఇచ్చి తగ్గుతుందని చెప్పారు. కానీ డాక్టర్ ఇచ్చిన పవర్‌ఫుల్ యాంటీబయోటిక్స్ నాన్న తట్టుకోలేకపోయారు. ఆయనకి ఆకలి లేకపోవడం, కొంచెం తిన్నా వాంతి అవ్వడం, నరాలన్ని లాగుతూ ఉండటం జరుగుతుంటుండేది. వాటితో ఆయన అస్సలు నిద్రపోయేవారు కాదు. అప్పుడు మేము ఒక సమస్య తగ్గుతుందనుకుంటే ఇంకో సమస్య తోడైందని చాలా బాధపడ్డాం. ఇంతలో నాన్నకి పంటి సమస్య వచ్చింది. దానివలన ఆయన నీళ్లు తాగడానికి కూడా ఇబ్బందిపడ్డారు. డెంటల్ హాస్పిటల్‌కి వెళితే రూట్ కెనాల్ చేసి క్యాప్ వేయాలని చెప్పి, రూట్ కెనాల్ చేసి ఇంజక్షన్లు, టాబ్లెట్లు ఇచ్చారు. అవి కూడా ఎక్కువ పవర్ ఉన్నవి కావడం వల్ల, అదీకాక మునపటి టాబ్లెట్లు కూడా వాడుతుండటం వలన సమస్య ఇంకా ఎక్కువైంది. నాన్నకి గుండె దడ వచ్చి హార్ట్ స్పెషలిస్ట్ దగ్గరకి వెళ్లాల్సి వచ్చింది.  డాక్టరు నాన్నకి ఇంజెక్షన్స్ వేసి సాయంత్రం వరకు అక్కడే ఉండమన్నారు. ఆయన ఎందుకలా చెప్పారో మాకు తెలియక మేము చాలా టెన్షన్ పడ్డాం. మేమెంత భయపడ్డామో ఆ సాయితండ్రికి మాత్రమే తెలుసు. హాస్పిటల్లో ఉన్న ప్రతిక్షణం నేను, 'ఓం శ్రీసాయి ఆరోగ్యక్షేమదాయ నమః' అని జపిస్తూ, "ఏంటి సాయితండ్రి మాకు ఈ సమస్యలు? తెలిసీతెలియక ఏమైనా తప్పులు చేసుంటే క్షమించి నాన్నని ఈ అనారోగ్య సమస్యల నుండి కోలుకునేలా చూడు సాయీ" అని వేడుకున్నాను. చివరికి డాక్టర్ వచ్చి చెక్ చేసి, "ఇబ్బందేమీ లేదు. మీరు ఇంటికి వెళ్లొచ్చు" అని చెప్పారు. ఆ మాట వినగానే చాలా సంతోషపడి సాయితండ్రికి ధన్యవాదాలు తెలుపుకొని ఇంటికి వచ్చాము. కొద్దిరోజులు గడిచిన తర్వాత మేము తిరుపతి వెళ్ళాము. కారులో ఏసీ వేయడం వల్లనేమో అసలే ఎలర్జీ ఉన్న నాన్నకి ఇంటికొచ్చేసరికి దగ్గు మొదలైంది. ఆ రాత్రంతా నిమిషం కూడా గ్యాప్ లేకుండా నాన్న దగ్గుతూనే ఉన్నారు. ఆ సమయంలో హాస్పిటల్స్ మూసి ఉంటాయి. మాకు ఏం చేయాలో అర్థంకాక ఎంతో బాధపడ్డాము. దగ్గు ఎక్కువగా వచ్చిన ప్రతిసారీ నాన్న కళ్ళనుండి నీరు రావడం. కండరాలన్నీ పట్టేయడం జరుగుతుంటే నాన్న బాధను చూడలేక మాకు ప్రాణం పోయేంత బాధేసింది. "ఏంటి సాయితండ్రి మాకీ  సమస్యలు? ఒకదాని తర్వాత ఒకటి వస్తూనే ఉన్నాయి. ఏమి తప్పు చేశాము తండ్రి? తెలిసీతెలియక చేసిన తప్పులుంటే క్షమించి చెడు కర్మలను తొలగించి నాన్నకు మంచి ఆరోగ్యానికి ప్రసాదించు తండ్రీ" అని బాబాను వేడుకున్నాను. నాకు తెలిసి నేను ఎప్పుడూ నాన్న ఒకరిని ఒక మాట అనడం, ఒకరి గురించి చెడుగా మాట్లాడటం చూడలేదు. అటువంటి మంచి వ్యక్తికి ఎందుకు ఇన్ని కష్టాలు అని బాధేసింది. కానీ మనసులో 'సాయి ఉన్నారు. అంతా ఆయన చూసుకుంటార'న్న దృఢ నమ్మకం ఎప్పుడూ ఉంటుంది. కానీ పరిస్థితుల వల్ల మనశ్శాంతి కోల్పోయి బాధపడాల్సి వస్తుంది. అటువంటి పరిస్థితుల్లో నేను ఎప్పుడూ సాయి నామాన్ని జపిస్తూ ఉంటాను. సరే, అసలు విషయానికి వస్తే మర్నాడు హాస్పిటల్‌కి వెళ్తే డాక్టర్ అన్ని చెక్ చేసి, "ఎలర్జీ ఎక్కువైంది. లంగ్స్ చాలా వీక్‌గా ఉన్నాయి" అని టాబ్లెట్లు, ఇంజక్షన్ ఇచ్చారు. డాక్టర్ అలా చెప్పినప్పటినుండి నేను సమస్యలు బాధలు తగ్గుతాయి అనుకుంటే ఇలా పెరుగుతున్నాయని మానసికంగా చాలా కృంగిపోయాను. నా బాధను సాయితండ్రికి చెప్పుకొని, "నాన్న ఆరోగ్యం మెరుగుపడేలా చూడమ"ని అనుకున్నాను. బాబా దయవల్ల ఒక మూడు నెలలు టాబ్లెట్లు వాడిన తర్వాత నాన్న ఆరోగ్యం మెరుగుపడుతూ వచ్చింది. ప్రస్తుతం నాన్నకి బాగుంది. ఇలా సాయితండ్రి మమ్మల్ని ఎన్నోసార్లు ఎన్నో సమస్యల నుండి గట్టెక్కించారు. సాయితండ్రి నాన్నకు మంచి ఆరోగ్యాన్ని ప్రసాదిస్తారని దృఢంగా విశ్వసిస్తున్నాను.

కొద్దిరోజులు ముందు అమ్మకు జలుబు చేసి ఏది తిన్నా, చివరికి తాగినా మింగడానికి చాలా ఇబ్బంది అయ్యేది. ENT డాక్టర్ దగ్గరకి వెళితే ఆయన చెక్ చేసి "నాకు సంబంధించి ఎటువంటి సమస్య లేదు. ఒకసారి హార్ట్ డాక్టరుని కలవండి" అని చెప్పారు. సరేనని ఆ డాక్టరు దగ్గరకి వెళితే, ఆయన చెక్ చేసి "లంగ్స్ వీక్‌గా ఉన్నాయి. మింగేందుకు ఏ సమస్య లేద"ని టాబ్లెట్లు వ్రాసిచ్చారు. కానీ సమస్య తగ్గకపోవడంతో మళ్ళీ ENT డాక్టర్ దగ్గరకి వెళ్ళాము. ఆయన ఈసారి "గ్యాస్టిక్ డాక్టర్ దగ్గరకి వెళ్లి ఎండోస్కోపీ చేయించుకొండి. ఏదైనా సమస్య ఉంటే ఆపరేషన్ చేయాల్సి ఉంటుంది" అన్నారు. దాంతో మా అమ్మ చాలా టెన్షన్ పడింది. ఎండోస్కోపి ఇదివరకు ఎప్పుడూ చేయించుకోలేదు, ఎలా చేస్తారో, ఏం చేస్తారో అని చాలా భయపడింది. నేను సాయితండ్రికి నా బాధ చెప్పుకొని, "అమ్మకి ఎటువంటి ఇబ్బంది లేదని డాక్టర్ చెప్పేలా ఆశీర్వదించండి బాబా" అని కోరుకున్నాను. ఎండోస్కోపీ చేసే సమయంలో నేను, 'ఓం శ్రీసాయి ఆరోగ్యక్షేమదాయ నమః' అనే నామాన్ని జపిస్తూ గడిపాను. సాయితండ్రి మేము కోరుకున్నట్లే మమ్మల్ని అనుగ్రహించారు. డాక్టర్ ఎటువంటి ఇబ్బంది లేదని, టాబ్లెట్లు  వ్రాసిచ్చారు. అంతటితో సమస్య తగ్గి అమ్మ ఆరోగ్యంగా ఉంది. సాయితండ్రికి ఎన్ని కృతజ్ఞతలు చెప్పుకున్నా తక్కువే. "సాయితండ్రీ! అమ్మకు, నాన్నకు మంచి ఆరోగ్యాన్ని ప్రసాదించు. నీ అనుగ్రహం మా కుటుంబంపై ఎల్లవేళలా ఉంచి మమ్మల్ని ఆపదల నుండి రక్షిస్తావని విశ్వసిస్తున్నాను తండ్రీ".
బాబాని తలుచుకుంటే ఏదైనా అవుతుంది

ముందుగా అందరికీ వందనాలు. నా పేరు గురుప్రసాద్. నేను ఆస్ట్రేలియాలో ఉంటున్నాను. మూడు సంవత్సరాల క్రితం నేను నా స్నేహితునికి కొంత డబ్బు ఇచ్చాను. నాకు చాలా అవసరమై 4 నెలల నుండి ఆ డబ్బు తిరిగి ఇమ్మని అడుగుతుంటే,.నేను కాల్ చేసినా ప్రతిసారీ తను ఇస్తానని చెప్తుండేవాడు కానీ, ఇచ్చేవాడు కాదు. డబ్బు ఇచ్చి, మన అవసరానికి అడిగితే ఇలా చేస్తున్నారని నాకు చాలా బాధేసి, "బాబా! మీరే ఏదో విధంగా తన నుండి నా డబ్బు నాకు వచ్చేలా చేయండి" అని బాబాతో చెప్పుకున్నాను. బాబా దయవల్ల 2024, సెప్టెంబర్ 1న తను నా డబ్బు నాకు పంపండి. బాబాని తలుచుకుంటే ఏదైనా అవుతుంది. "బాబా! మీకు ఋణపడి ఉంటాను. దయతో నా ఆఫీస్‌వాళ్ళు నాకు PR నామినేట్ వేసేలా చూడండి బాబా".
Read More

సాయి మహారాజ్ సన్నిధి సోషల్ మీడియా లింక్స్:

సాయి మహారాజ్ సన్నిధి సోషల్ మీడియా లింక్స్:

Subscribe Here

బ్లాగ్ అప్డేట్ నోటిఫికేషన్స్ నేరుగా మీ మెయిల్ కే వచ్చేందుకు క్రింద బాక్సులో మీ మెయిల్ ఐడి టైపు చేసి subscribe పై క్లిక్ చేసి, తరువాత స్టెప్స్ పూర్తీ చేయండి.

Delivered by FeedBurner

Followers

Recent Posts


Blog Logo