సాయిభక్తుల అనుభవమాలిక 1919వ భాగం....

---

ఈ భాగంలో అనుభవాలు:

1. బాబా దయ

2. శ్రీసాయి అనుగ్రహం

---

బాబా దయ

సాయి మహారాజ్‌కి పాదాభివందనాలు. సాయి బంధువులకు నా నమస్కారాలు. నా పేరు రేవతి. నేను టీచరుగా పనిచేస్తున్నాను. అప్పుడప్పుడు మా టీచర్లకి పని సర్దుబాటు జరిగుతుంది. అంటే ఎక్కువ టీచర్లు ఉన్న స్కూల్ నుండి కొంతమందిని తక్కువ టీచర్లు ఉన్న స్కూలుకి డెప్యూటేషన్ వేస్తారు. చివరి పనిదినం నాడు వాళ్ళు వాళ్ళ స్కూలుకి తిరిగి వచ్చేయాలి. ఈ క్రమంలో 2024లో డిప్యూటేషన్ ప్రభావం మా స్కూలులో నాపై పడింది. నాకు వేరే స్కూలుకి వెళ్ళటం ఇష్టం లేకపోయినప్పటికీ తప్పని పరిస్థితి అయింది. మా మండలంలో ఆఫీసు వర్క్ చాలా బాగా చేసే ఒక టీచర్, యూనియన్ లీడర్ కూడా, అతను నాకు ఫోన్ చేసి, వాళ్ళ స్కూల్లో ఒక పోస్ట్ ఖాళీ ఉందని, మీరు మా స్కూల్ కోరితే బాగుంటుందని అన్నారు. నేను బాగా చెప్తానని అతని నమ్మకం. కానీ కొన్ని కారణాల వల్ల నాకు ఆ స్కూలుకి వెళ్ళటం ఇష్టం లేదు. బాబా దయవల్ల నా ముందు ఉండే ఆమె ఆ స్కూలు కోరింది. కానీ అంతలో పని సర్దుబాటు వాయిదా పడింది. తీరా ఆ సమయం వచ్చేసరికి ఆమె మనసు మారి వేరే స్కూల్ కోరుకుంది. దాంతో నేను ఆ స్కూల్ తప్పక కోరాల్సిన పరిస్థితి నాకొచ్చి కౌన్సిలింగ్ ముందురోజు నుంచి నాకు భయం పట్టుకుంది. అప్పుడు నేను, "బాబా! ఏం చేయాలి? నాకు ఆ స్కూలుకి వెళ్లడం ఇష్టం లేదు. నేను ఆ స్కూల్ కోరుకోకపోతే యూనియన్ లీడర్ నాపై కోపం పెట్టుకుంటాడు, నిజానికి అతను సర్వీస్ విషయంలో చాలా సహాయం చేస్తాడు. కానీ వాళ్ల స్టాఫ్ అంటే నాకు భయం. అందుకే వాళ్ల స్కూలుకి వెళ్ళటం నాకు ఇష్టం లేదు" అని బాబాతో చెప్పుకున్నాను. ఇక కౌన్సిలింగ్ రోజున ఆ యూనియన్ లీడర్ కమ్ టీచర్ ఫోన్‌లో  కౌన్సిలింగ్ చేసి కొన్ని ప్లేస్‌లు చెప్పి కోరుకోమన్నాడు. నేను వేరే లేడీ స్టాఫ్ ఉన్న స్కూల్ కోరుకున్నాను. ఫోన్‌లోనే అతని వాయిస్ మారింది. ఆ క్షణం నేను 'అతను ఎంత ఫీల్ అయ్యారో, నన్ను ఏమైనా ఇబ్బందిపెడతారో' అని ఎంత టెన్షన్ పడ్డానో బాబాకే తెలుసు. నేను బాబాని, 'నా నిర్ణయం కరెక్టేనా, కాదా' అని అడిగితే, 'కరెక్ట్' అని బదులిచ్చారు. అప్పుడు నా మనసు కుదుటపడింది. రెండు రోజుల తర్వాత అతనికి ఫోన్ చేసి నేను వాళ్ల స్కూల్ కోరకపోవటానికి కారణం చెపితే, అతను అర్థం చేసుకున్నారు. ఎప్పుడూ మొహమాటంతో సమస్యలు తెచ్చుకునే నేను బాబా దయవల్ల మొదటిసారి మొహమాటపడకుండా నిర్ణయం తీసుకున్నాను. బాబా ఏం చేసిన మన మంచికే.

వినాయకచవితినాడు మావారికి, పాపకి జ్వరం వచ్చింది. పాపకైతే మరీ ఎక్కువగా రావడంతో నాకు చాలా భయమేసింది. ఎందుకంటే, అది డెంగ్యూ సీజన్. అందువల్ల "బాబా! పాపకి బ్లడ్ టెస్ట్ అవసరం లేకుండానే జ్వరం తగ్గాల"ని ప్రార్థించాను. తర్వాత డాక్టర్ దగ్గరకి వెళితే బ్లడ్ టెస్టు అవసరం లేదని 5 రోజులకి మందులిచ్చారు. బాబా దయవల్ల రెండు రోజుల్లో పాపకి జ్వరం తగ్గింది. మావారికి కూడా తగ్గింది. "ధన్యవాదాలు బాబా. చాలా చాలా ధన్యవాదాలు తండ్రీ".

---

శ్రీసాయి అనుగ్రహం

నిత్యం నా వెంట ఉంటూ నన్ను ఎల్లవేళలా కాపాడే నా గురువు, దైవం అయిన బాబాకు పాదాభివందనాలు. తమ అనుభవాల ద్వారా నన్ను బాబాకు చేరువ చేస్తున్న సాటి సాయిభక్తులకు కృతజ్ఞతలు. నేను ఒక సాయి భక్తురాలిని. నేను ఒక సమస్య కారణంగా ఆయుర్వేద మందులు వాడుతున్నాను. ఆ మందుల వల్ల నాకు అప్పుడప్పుడు కడుపునొప్పి వస్తుండేది. అప్పుడు నేను, "బాబా! ఇలా నొప్పి వుంటే నెలసరి సమయంలో నేను తట్టుకోగలనా? అసలే ఆయుర్వేద వైద్యుడు నెలసరి సమయంలో పెయిన్ కిల్లర్స్ వేసుకోవద్దన్నారు. దయచేసి ఆ సమయంలో నొప్పి ఎక్కువగా రాకుండా చూడండి. నన్ను మీరే కాపాడాలి" అని బాబాకి చెప్పుకున్నాను. బాబా దయవల్ల టాబ్లెట్ వేసుకోవాల్సిన అవసరం రాలేదు. "ధన్యవాదాలు బాబా".

నేను ఒక పరీక్షకి(అర్హత పరీక్ష) సిద్ధమై పరీక్షకి వెళ్లేముందు హాల్ టికెట్‌లో ఉన్న సూచనలు చదివితే, అక్కడ ఒరిజినల్ ఐడి ప్రూఫ్ కావాలని ఉంది. కానీ అది నా దగ్గర లేదు, మా ఇంట్లో ఉంది. అందువల్ల నన్ను పరీక్షకి అనుమతించరేమోనని టెన్షన్ పడుతూ, "బాబా! నన్ను పరీక్షకి అనుమతించేలా చూడండి. అలాగే నేను ఈ పరీక్షలో పాసయ్యేలా అనుగ్రహించండి" అని బాబాను ప్రార్థించాను. బాబా దయవల్ల నేను కోరుకున్న రెండూ నెరవేరాయి. "వేల వేల కృతజ్ఞతలు బాబా".

మా అన్నయ్యవాళ్ళు మొదటి శ్రావణ శుక్రవారంనాడు ఉదయం 3 గంటలకి గృహప్రవేశం చేసారు. ఆ గృహప్రవేశం అయ్యాక మా పెద్దమ్మ బీరువాలో నగలు పెడుతున్నప్పుడు చూస్తే, అక్కవాళ్ళ పాపాల గొలుసులు రెండు ఉండాల్సి ఉండగా ఒకటే ఉంది. పొద్దున్న హడావిడిలో కిందపడిపోయిందేమోనని అంతా వెతికారు కానీ, ఎక్కడా దొరలేదు. అక్కకానీ, బావకానీ ఒక్క మాట కూడా పెద్దమ్మని అనలేదు. కానీ పెదమ్మ, 'ఆడపిల్ల గొలుసు పోగొట్టాను. బంగారం ధర చాలా పెరిగిపోయింది. నేను వాళ్ళకి కొనివ్వలేను. ఇప్పుడు ఎలా?' అని చాలా కంగారు పడింది. విషయం నాతో చెప్పి, "పాపలిద్దరి గొలుసులు ఎప్పుడూ ఒకే చోట ఉంటాయి. నెల క్రితం నా కూతురు మా ఇంటికి వచ్చినప్పుడు నగలు ఉన్న పర్సు చూసాను. గొలుసు లేకుంటే నేను నా  కూతురిని అడిగేదాన్ని. కానీ అప్పుడు ఆ గొలుసులు ఉన్నాయి. ఇప్పుడు చూస్తే ఒకటే ఉంద"ని చాలా బాధపడింది. అప్పుడు నేను, "పెదమ్మా! ఏమి కాదు. బాబాని నమ్ముకో. ఎన్నిసార్లు వెతికినా కనపడిని వస్తువులు బాబాకి చెప్పుకొని అదేచోట వెతికితే, దొరికిన అనుభవాలు నేను బ్లాగులో చాలా చదివాను. బాబాని ప్రార్థించు. తప్పకుండా ఆ గొలుసు దొరుకుతుంది" అని పెద్దమ్మతో చెప్పాను. పెద్దమ్మ అలాగే చేసి అక్క వాళ్ళింటి నుండి( హైదరాబాద్) తన ఇంటికి వెళ్ళింది. తర్వాత బ్యాంక్ లాకర్‌లో చూస్తే అక్కడ పోయిన గొలుసు కనపడింది. పెదమ్మ చాలా ఆశ్చర్యానికి గురైంది. అసలు ఏం జరిగిందో బాబాకే తెలియాలి గానీ అయన దయవల్ల గొలుసు దోరికింది. "పెదమ్మ, అక్క వాళ్ళందరి తరుఫున మీకు చాలా చాలా ధన్యవాదాలు బాబా. చెప్పలేని పెదమ్మ (నీ భక్తురాలి) బాధను తొలగించారు. మీకు ఎన్నిసార్లు కృతజ్ఞతలు చెప్పుకున్నా తక్కువే బాబా. ఎల్లప్పుడూ అందరినీ చల్లగా చూడండి బాబా".

---