సాయిభక్తుల అనుభవమాలిక 1977వ భాగం....

---

ఈ భాగంలో అనుభవాలు:

1. సాయితో చెప్పుకుంటే కానిది ఏదీ లేదు

2. బాబా ఉన్నారని పూర్తి నమ్మకంతో ఉంటే ఆయన మన జీవితంలో వెలుగు నింపుతారు

---

సాయితో చెప్పుకుంటే కానిది ఏదీ లేదు

నా పేరు మణి. మాది హైదరాబాద్. సాయితో చెప్పుకుంటే కానిది ఏదీ లేదు. సాయి నాకు చాలా అనుభవాలు ఇచ్చారు. మేము మా మనవడి మొదటి పుట్టినరోజు చేసిన తర్వాత మా కులదైవం సత్తెమ్మతల్లి సంబరం చేయడానికి మా ఊరు వెళ్ళాం. అక్కడ అంతా బాగా జరిగిన తర్వాత శనివారంనాడు తిరిగి వచ్చాం. ఆరోజు హఠాత్తుగా మా మనవడికి వాంతులు, విరోచనాలు చాలా ఎక్కువగా అయి బాగా నిరసించిపోయాడు. మర్నాడు ఆదివారం మావారి ఆబ్దికం ఉన్నందున మాకు ఏం చేయాలో తోచలేదు. నేను సాయినే నమ్మి, "బాబా! ఇంటి దైవానికి సంబరం చేసి వచ్చేసరికి ఇలా అయిందేంటి? బాబుకు నీరసంగా ఉంటే ఎవరికీ ఏమీ తోచట్లేదు. రేపు నా కొడుకు తన బాధ్యతను నిర్వర్తించాల్సి ఉంది. ఆ కార్యక్రమం పూర్తి చేయాల్సిన బాధ్యత మీదే తండ్రీ. ఆ సత్తమ్మతల్లి, మీరు కలిసి బిడ్డకు ఆరోగ్యం ప్రసాదించండి. రేపటికి బాబుకు తేలికపడాలి" అని చెప్పుకొని బాబుకు ఊదీ పెట్టి ఆయన మీదే భారం వేసాను. తర్వాత బాబుని హాస్పిటల్‌కి తీసుకెళ్లి వచ్చాము. ఆ రాత్రి బాబు నిద్రపోతాడో, లేదో అని చాలా భయమేసింది. కానీ బాబా దయవల్ల బాబు కొంచెం కోలుకొని బాగానే నిద్రపోయాడు. తెల్లారి జరగాల్సిన కార్యక్రమం సజావుగా సాగింది. ఆ సాయంత్రానికి బాబు బాగా కోలుకున్నాడు. కానీ తర్వాత రోజు నుంచి ఇంట్లో అందరికీ కొంచెం నలతగా అనిపించింది. అప్పుడు నేను, "బాబా! నీదే భారం తండ్రి. శివరాత్రి వస్తుంది. ఆరోజుకి అందరూ కోలుకొని ఆనందంగా శివయ్యను ప్రార్థించుకొనేలా చేయి తండ్రీ" అని బాబాకి చెప్పుకొని, 'ఓం శ్రీసాయి ఆరోగ్యక్షేమదాయ నమః' అని అనుకున్నాను. సాయి పిలిస్తే పలికే దైవం కదా! అన్ని సమస్యలను తొలగించి అందరం ఆనందంగా శివయ్యకు పూజ చేసుకునేలా ఆశీర్వదించారు బాబా. "ధన్యవాదాలు సాయి".

---

బాబా ఉన్నారని పూర్తి నమ్మకంతో ఉంటే ఆయన మన జీవితంలో వెలుగు నింపుతారు  

సాయి భక్తులందరికీ నా నమస్కారాలు. నా పేరు శాంతి. మాది విశాఖపట్నం. 2025, జనవరి నెలాఖరు నుంచి ఒక నెల రోజులు మావారికి చెవిలో నొప్పిగా ఉంటుండేది. ఆయన  చెపితే, నేను మొదట్లో మామూలు నొప్పి అయ్యుంటుందని పట్టించుకోలేదు. తర్వాత కూడా ఆయన నొప్పి ఎక్కువగా ఉందని బాధపడుతుంటే, అప్పుడు నేను ఎందుకైనా మంచిదని చెవిలోకి లైట్ వేసి చూస్తే, లోపల ఏదో రక్తంలా కనిపించింది. నేను చాలా భయపడి బాబాకి దణ్ణం పెట్టుకొని, మావారి చెవి చుట్టూ ఊదీ రాయడం మొదలుపెట్టాను. తర్వాత, "మంచి డాక్టర్ని చూపించండి బాబా" అని బాబాకి దణ్ణం పెట్టుకొని హాస్పిటల్‌కని బయలుదేరి వెళ్లి ఒక హాస్పిటల్ దగ్గర ఆగాము. కానీ మనసులో 'ఇది మంచి హాస్పిటలో, కాదో' అని భయపడుతూ అటూఇటూ చూస్తుంటే ఆ మార్గంలో బాబా ఫోటో కనిపించింది. అప్పుడు బాబా చూపిస్తున్న హాస్పిటల్ ఇదేనన్న నిర్ధారణకు వచ్చి హాస్పిటల్లోకి వెళ్ళాము. డాక్టర్ మావారి చెవులు చెక్ చేసి, "ఇన్ఫెక్షన్ అయింది. సమస్య పెద్దదిగానే ఉంది. మూడు రోజులకి మందులు, డ్రాప్స్ ఇస్తాను. వాటితో తగ్గకపోతే బ్లడ్ టెస్టులు చేయించి, ఎక్స్‌రే తీయించండి" అని చెప్పారు. నేను బాబాకి దణ్ణం పెట్టుకొని, "తండ్రీ! పెద్ద సమస్య కాకుండా తగ్గిపోయేలా అనుగ్రహించండి" అని చెప్పుకున్నాను. మావారికి మందులు ఇస్తూనే చెవి చుట్టూ ఊదీ రాయడం ఆపలేదు. బాబా అద్భుతం చేశారు. మూడు రోజులకి నొప్పి తగ్గింది. డాక్టర్ దగ్గరికి వెళితే, మావారి చెవి క్లీన్ చేసి, "ఇంకే సమస్య లేద"ని చెప్పారు.

నేను కూడా కొన్ని రోజులు మైగ్రేన్ తలనొప్పితో బాధపడ్డాను. పొద్దున్న లేస్తూనే తలనొప్పి చాలా ఇబ్బందిపెడుతుండేది. బయటకి ఎటైనా వెళితే, తిరిగి ఇంటికి వచ్చేసరికి తలనొప్పి బాధపెడుతుండేది. మందులు వేసుకుంటే ఒకటి, రెండ్రోజులు ఉపశమనమిచ్చి మళ్లీ వస్తుండేది. చివరికి నేను, "బాబా! ఈ తలనొప్పి తగ్గాల"ని బాబాతో చెప్పుకొని టాబ్లెట్లు వేసుకోకుండా ఊదీ నీటిలో కలుపుకొని తీసుకుంటుంటే బాబా దయ చూపించారు. తలనొప్పి అదుపులోకి వచ్చింది. ఏ సమస్య వచ్చినా బాబా ఉన్నారని పూర్తి నమ్మకంతో ఉంటే ఆయన మన జీవితంలో వెలుగు నింపుతారు."వేలవేల కృతజ్ఞతలు బాబా. ఏమిచ్చి మీ ఋణం తీర్చుకోవాలి సాయిదేవా. మీ పాదాల దగ్గర ఉండేలా అనుగ్రహించండి బాబా".

---