సాయిభక్తుల అనుభవమాలిక 2085వ భాగం....

---

ఈ భాగంలో అనుభవాలు:

1. అంతా బాబా దయ

2. బాబా ఊదీ అనుగ్రహం

---

అంతా బాబా దయ

సాయిభక్తులకు నమస్కారాలు. నా పేరు కోమలవల్లి. 2026, ఫిబ్రవరిలో నేను విపరీతమైన దగ్గు, గొంతునొప్పితో బాధపడ్డాను. గొంతు నుంచి మాటలు కూడా రాలేదు. మా అమ్మ వాళ్ళింటికి వెళ్ళినప్పుడు డాక్టరుకి చూపించుకుంటే, మూడు రోజులకు మందులిచ్చారు. కానీ ఆ మందులు అయిపోయినా నాకు తగ్గలేదు. మా అమ్మవాళ్ళు, "వచ్చి చూపించుకొని వెళ్ళు" అన్నారు. కానీ మావారు హాస్పిటల్‌కి వెళ్తానంటే అరుస్తారు. నా పరిస్థితి చూస్తే,  గొంతునొప్పి, దగ్గు వలన ఏమీ తినలేకపోయేదాన్ని. కేవలం వేడి నీరు మాత్రమే తాగగలిగేదాన్ని. రాత్రిపూట విపరీతమైన దగ్గు, ముక్కు నుండి శ్వాస ఆడక చాలా ఇబ్బందిపడేదాన్ని. ఇలా ఉండగా ఒకరోజు రాత్రి నేను ఇంక భరించలేకపోయాను. నాకు ఎప్పుడు ఆరోగ్యం బాగలేకపోయినా ఎంతవరకు భరించగలనో అంతవరకు భరిస్తాను, ఇక నావల్ల కాదన్నప్పుడు బాబా ఊదీయే నాకు ఔషధం. రాత్రి 1:30 ప్రాంతంలో బాబాను, "దగ్గు, గొంతునొప్పి తగ్గించి ప్రశాంతమైన నిద్రని ప్రసాదించు బాబా" అని వేడుకొని కొంచెం ఊదీ గొంతుకి రాసుకొని, మరికొంత ఊదీ నోట్లో వేసుకున్నాను. అయితే ఆ తర్వాత కూడా విపరీతంగా ఇబ్బందిపడి ఏడ్చేసాను. తెల్లవారుజామున 4:30 గంటలకు నిద్రపట్టింది. రాత్రి అంతలా ఇబ్బందిపడినా ఉదయం 6 గంటలకు నిద్ర లేచేసరికి చాలా ప్రశాంతంగా అనిపించింది. వరసగా మూడురోజులు ఊదీ గొంతుకు రాసుకొని, కొద్దిగా నోట్లో వేసుకుంటుంటే, గొంతునొప్పి, దగ్గు పూర్తిగా తగ్గిపోయాయి. అంతా బాబా దయ.

2026, మార్చి 31న మా మామయ్యగారు చనిపోయారు. మేము 7వ రోజు కొన్ని కార్యక్రమాలు చేస్తాం. అందుకోసం నేను స్కూల్లో ఏప్రిల్ 1వ తేదీన నాకు ఏప్రిల్ 6వ తేదీన సెలవు కావాలని అడిగాను. అయితే ఏప్రిల్ 2వ తేదీన హఠాత్తుగా మా తోడికోడలు ఫోన్ చేసి, "7వ రోజు కార్యక్రమం 5వ రోజు అంటే ఏప్రిల్ 4న పెట్టుకుందామ"ని అంది. ఆరోజు నా సహోద్యోగి సెలవు తీసుకుంటున్నందున నాకు సెలవు ఇవ్వరు. ఆ విషయం చెప్పినా మా తోడికోడలు ఒప్పుకోలేదు. అప్పుడు నేను, "బాబా! ఎలాగైనా కార్యక్రమం 7వ రోజు జరిగేలా చూడండి. నేను ఏం చెప్పినా మా తోడికోడలు ఒప్పుకోదు. నీదే భారం" అని బాబాను వేడుకున్నాను. ఆరోజు సాయంత్రం నేను ఇంటికి వెళ్ళాక మా తోడికోడలు, "కార్యక్రమం 5వ రోజు చేయకూడదు. కాబట్టి 7వ రోజు చేద్దామ"ని అంది. ఇదంతా బాబా దయ మాత్రమే. "శతకోటి ధన్యవాదాలు బాబా".

---

బాబా ఊదీ అనుగ్రహం

సాయిభక్తులందరికీ నమస్కారాలు. నా పేరు దివ్య. మేము 2026, మార్చి 6న శిరిడీ వెళ్ళాము. మాకు మంచిగా దర్శనమైంది. నేను అనుకున్నట్టుగా అక్కడ నా బిడ్డకు వెంట్రుకలు తీయించాము. అలాగే నా బిడ్డ పుట్టినప్పుడు తను ఎంత బరువు ఉంటే అంత చక్కెర పంచిపెడతానని మొక్కుకున్న విధంగా ద్వారకామాయి ముందు చక్కెర పంచిపెట్టాను. అన్ని మంచి జరిగాయి. ఇక నా అనుభవానికి వస్తే..  నేను కాన్పు అనంతరం తగిన జాగ్రత్తలు తీసుకొని కారణంగా నాకు విపరీతమైన నడుము నొప్పి వస్తుంది. ఆ నొప్పి పాపని చూసుకోవడం, ఇంట్లో పనుల వల్ల నొప్పి భరించలేనంతగా ఎక్కువ అయింది. నేను బాధను భరించలేక, "వారం రోజుల్లో తగ్గిపోవాల"ని బాబాను వేడుకొని ప్రతిరోజు ఉదయం, రాత్రి నొప్పి ఉన్న చోట ఊదీ రాసుకొని, మరికొంత ఊదీ నీళ్ళులో కలిపి తీసుకున్నాను. బాబా దయవల్ల నొప్పి చాలావరకు తగ్గిపోయి బాగా ఉపశమనం వుంది.

2026, ఏప్రిల్ 14, సాయంత్రం నుంచి నా బీపీ తక్కువ అవ్వసాగింది. మా 18 నెలల పాప వల్ల నాకు సమయానికి తిండి ఉండట్లేదు, రాత్రి నిద్ర కూడా సరిగా ఉండటం లేదు. మాకు ఆర్థిక సమస్యలు కూడా వున్నాయి. ఈ కారణాల వల్లే నా బీపీ లౌ అయింది. నేను బాబాని, "ఊదీ నీళ్లు తీసుకుంటాను. వెంటనే బీపీ నార్మల్‌కి వచ్చేలా చూడండి" అని వేడుకున్నాను. బాబా దయవల్ల నా పరిస్థితి కొంచం మెరుగు అయింది. "ధన్యవాదాలు బాబా. నేను నిన్నే నమ్ముకున్నాను. ఎన్నో సందర్భాలలో నన్ను రక్షించావు. ఇప్పుడు కూడా నాకున్న కోర్కెలు/సమస్యలు తీర్చి నన్ను ఆదుకో తండ్రీ".

---