సాయిభక్తుల అనుభవమాలిక 2032వ భాగం....

---

ఈ భాగంలో అనుభవాలు:

1. బాబా దయ లేకుంటే ఏమైపోతామో!

2. అర్ధరాత్రి బాబా అందించిన సాయం

---

బాబా దయ లేకుంటే ఏమైపోతామో!

  

నా పేరు జగదీశ్వర్. నేను కొంతకాలంగా ప్రోస్టేట్ విస్తరణ(prostate Enlargement)తో బాధపడుతున్నాను. నాకు అదివరకే బీపీ ఉంది. 2022లో మధుమేహం కూడా ఉన్నట్టు బయటపడింది. నేను క్రమం తప్పకుండ మందులు వాడటంతోపాటు ప్రతిరోజూ పూజ సమయంలో బాబా ఊదీ నీళ్లలో కలిపి తీర్థంలా తీసుకుంటాను. ఆ కారణంగా ఆ ఆరోగ్య సమస్యలన్నీ అదుపులో ఉన్నాయి. మందులు కేవలం మాధ్యమంగా ఉన్నా బాబా ఆశీస్సులే ప్రధాన కారణమన్నది సత్యం. ఇక విషయానికి వస్తే.. 2025, ఫిబ్రవరిలో ఆల్ట్రాసౌండ్ టెస్ట్ చేయించుకుంటే, రిపోర్టులో ప్రోస్టేట్ సైజు తగ్గిందని వచ్చింది. దాంతో డాక్టర్ ప్రోస్టేట్ సంబంధిత మందులు వాడటం ఆపమన్నారు. నేను ఏప్రిల్ నెల నుండి ఆ మందులు తీసుకోవడం ఆపేసాను. తర్వాత కొంతకాలానికి రోజూ నా కిడ్నీలకి కింద నొప్పి వస్తుండేది. కిడ్నీలు పాడయ్యాయేమో, టెస్టు చేయించుకుంటే రిపోర్టులో ఏమొస్తుందో అని భయంతో చెకప్‌కి కూడా వెళ్ళలేదు. అలా 2025, సెప్టెంబర్ 26 వరకు టెస్టుకి వెళ్లకుండా ఉన్నాను. ఒక దశలో ఒకవేళ కిడ్నీలు పాడైతే ఆత్మహత్యే శరణమనుకుంటూ ప్రతిరోజూ బాబాని, "రిపోర్టులన్నీ నార్మల్ వచ్చి నా మెంటల్ టెన్షన్ తగ్గితే గురువారం మీ గుడిలో 27 మందికి బెల్లం ఉండలు పంచుతాను" అని వేడుకుంటుండేవాడిని. మనం ఇటువంటి మొక్కులు మొక్కినా, మొక్కకున్నా బాబా ఏది చేయాలో అది చేస్తారు. మొక్కుకోవడం కేవలం మన తృప్తికోసమేనని నా అభిప్రాయం. చివరికి ధైర్యం చేసి సెప్టెంబర్ 26న అన్ని టెస్టులు చేయించుకున్నాను. నాలో ఉన్న భయం, టెన్షన్ అన్ని పటాపంచలు చేస్తూ ప్రోస్టేట్ విస్తరణ అయినప్పటికి మిగతా రిపోర్టులన్నీ నార్మల్ వచ్చేలా బాబా కరుణించారు. ఇంకా నా భయం మొత్తం తొలగిపోయింది.

మా పెద్దమ్మాయివాళ్లు పోలాండ్ దేశంలోని క్రకౌలో ఉంటారు. ఇటీవల ఒకసారి అక్కడున్న మా మనవరాలికి జ్వరమొచ్చింది. ఇక్కడ నేను ఊదీ పెట్టుకొని, బాబాకి దణ్ణం పెట్టుకుంటే, బాబా ఆశీస్సులతో పాపకి జ్వరం తగ్గింది. సాధారణంగా క్రకౌలో ఉన్న తెలుగువాళ్లు వారాంతంలో అంటే శని, ఆదివారాల్లో ఎక్కడికైనా వెళ్ళడానికి ప్లాన్ చేసుకుంటారు. అందులో భాగంగా ఆసారి ఆడవాళ్లు మాత్రమే వెళ్లేందుకు ప్లాన్ చేసుకొని ముందుగానే అన్నీ బుక్ చేసుకున్నారు. అయితే ఆ ప్రయాణానికి మూడురోజుల ముందు మా అమ్మాయికి జ్వరం, దగ్గు మొదలయ్యాయి. హాస్పిటల్‌కి వెళ్తే, టెస్టులు చేసారు. కోవిడ్ పాజిటివ్ అని రిపోర్టు వచ్చింది. నేను ప్రయాణం మానుకోమని చెప్పాను. కానీ, వాళ్ళు ప్రయాణమయ్యేరోజు మా అమ్మాయికి కొద్దిగా ఉపశమనంగా ఉండడంతో 8 మంది ఆడవాళ్లు ముందుగా అనుకున్నట్లు ప్రయాణమై వెళ్లారు. ఇంట్లో మా అల్లుడు, మనవరాలు ఉన్నారు. మరునాడు ఉదయానికి మా అల్లుడికి 103 డిగ్రీల జ్వరం వచ్చింది. అది తెలిసి నాకు భయమేసి బాబాకి దణ్ణం పెట్టుకొని, ఊదీ పెట్టుకొని, "మా అల్లుడుకికి జ్వరం తగ్గాలి. మా అమ్మాయి, తనతోపాటు వెళ్లిన అందరూ క్షేమంగా తిరిగి రావాలి" అని వేడుకున్నాను. మా అల్లుడు వాళ్ళింటి కింద అంతస్తులో ఒంటరిగా ఉన్న మా అల్లుడు ఫ్రెండ్ మా అమ్మాయి వాళ్ళింటికి వచ్చి మా అల్లుడికి తోడుగా ఉన్నాడు. పారాసిటమాల్‌తో మా అల్లుడికి జ్వరం తగ్గింది. కాదు కాదు, కేవలం బాబా ఆశీస్సులతో తగ్గింది. మా అమ్మాయివాళ్లు కూడా 3 రోజుల యాత్ర పూర్తి చేసుకుని సురక్షితంగా ఇంటికి తిరిగి వచ్చారు. సర్వం సాయి మహిమ. బాబా దయ లేకుంటే ఏమైపోతామో అని ఒక్కోసారి అనిపిస్తుంది. బాబా సాయి చరణం, సర్వదా శరణం శరణం.

---

అర్ధరాత్రి బాబా అందించిన సాయం

అందరికీ నమస్కారం. నా పేరు అలేఖ్య. మేము హైదరాబాద్‌లో ఉంటాము. ఒకరోజు మేము మా సొంతూరు వరంగల్‌ వెళ్ళడానికి కారులో ప్రయాణమయ్యాము. మధ్య దారిలో తినడానికని ఒక చోట ఆగి, తిన్న తర్వాత తిరిగి బయల్దేరుతుంటే కారు స్టార్ట్ అవ్వలేదు. అసలు సమస్యేమిటో తెలుసుకుందామంటే దగ్గర్లో మెకానిక్ షాపు లేదు. అక్కడ ఆ హోటల్ తప్ప చుట్టుపక్కల ఎక్కడా ఒక్క షాపు కూడా లేదు. మెల్లగా వర్షం కూడా మొదలయింది. గంటకు పైగానే వర్షంలో పిల్లలతో మేము ఇబ్బందిపడ్డాము. అక్కడ ఉన్నవాళ్లలో ఒక్కరు కూడా మాకు సహాయం చేయడానికి ముందుకు రాలేదు. మాకు ఏం చేయాలో అర్థం కాలేదు. నేను మనసులో "బాబా! మీరే ఏదో ఒకటి చేయండి. ఇప్పటికే చాలా ఆలస్యమైంది(రాత్రి 11 గంటలు). ఏదో ఒక రూపంలో మాకు సాయమైన చేయండి. లేదా తొందరగా కారు స్టార్టు అయ్యేలా చూడు తండ్రీ" అని బాబాను వేడుకున్నాను. చాలాసేపటికి ఒక ముస్లిం అతను తనంతట తానుగా వచ్చి నేను సహాయం చేస్తానని చెప్పి, ఇంకొకరిని కూడా తీసుకొచ్చి సహాయం చేసాడు. 2 నిమిషాల్లో కారు స్టార్ట్ అయ్యింది. కొంతదూరం వెళ్ళాక సాయిబాబానే  ఆ ముస్లిం అబ్బాయి రూపంలో వచ్చి మాకు సహాయం చేసారని నాకనిపించింది. ఎప్పటికీ మా వెంటే ఉండే తండ్రి మా సాయిబాబా. శ్రీ సచ్చిదానంద సద్గురు సాయినాథ్ మహారాజ్ కి జై.

---

Read More

సాయిభక్తుల అనుభవమాలిక 2031వ భాగం....

---

ఈ భాగంలో అనుభవాలు:

1. దయతో ఇబ్బందులు లేకుండా సంతోషపరచిన బాబా

2. పిలిచిన వెంటనే పలికే బాబా ఉండగా భయం ఎందుకు?

3. బాబా దయతో దొరికిన లాకర్ తాళం

---

దయతో ఇబ్బందులు లేకుండా సంతోషపరచిన బాబా

మా పెద్దమ్మాయి పోలాండ్ దేశంలోని క్రకౌలో ఉంటుంది. అక్కడున్న తన స్నేహితులు కొత్త ఇల్లు కొనుక్కొని 2025, సెప్టెంబర్ 27న గృహప్రవేశం పెట్టుకున్నారు. పూజ అప్పుడు ధరించడానికి సాంప్రదాయ వస్త్రాలు కొత్తవి కావాలంటే మేము సిద్ధం చేసి సెప్టెంబర్ 12న కరీంనగర్ నుండి పోలాండ్‌కి కొరియర్ చేసాము. 10 రోజుల్లో చేరుకుంటుందని చెప్పారు. కానీ ఆన్‌లైన్ ట్రాకింగ్ చూస్తే 22వ తేదీ నుండి 24 వరకు జర్మనీలోనే ఉన్నట్టు చూపించింది. దాంతో 26వ తేదీ కల్లా ఆ కొరియర్ చేరుకుంటుందన్న నమ్మకం మాకు పోయింది. నేను బాబాని, "ఎలాగైనా 26వ తేదీకి ఆ పార్శిల్ వెళ్లేలా చేసి, గృహప్రవేశం సంతోషంగా జరిగేలా చూడండి బాబా" అని వేడుకున్నాను. ఆ తర్వాత చెక్ చేస్తే, ఆ పార్శిల్ జర్మనీ నుండి క్రకౌ వెళ్లకుండా వేరే చోటకి వెళ్ళింది. మా అమ్మాయి ఆ విషయం పోలాండ్‌లోని DPD సర్వీస్ వల్ల దృష్టికి తీసుకెళ్లింది. బాబా దయవల్ల అనుకున్న సమయం లోపు రాదనుకున్న పార్శిల్ సెప్టెంబర్ 26 మధ్యాహ్నం మా అమ్మాయి వాళ్ళింటికి చేరుకుంది. మర్నాడు 27వ తేదీన గృహప్రవేశ సమయానికి కొత్త బట్టలు మా అమ్మాయి స్నేహితులకి అందాయి. అందరూ సంతోషించారు.

మా రెండో అమ్మాయి MS ENT పూర్తిచేసి ప్రైవేట్ హాస్పిటల్‌లో సీనియర్ రెసిడెంట్‌గా చేస్తుంది. 2025, సెప్టెంబర్ మూడో వారంలో తను తన స్నేహితులతో(అందరూ అమ్మాయిలు మరియు డాక్టర్లు) కలిసి 3 రోజులు గోకర్ణ, మురుడేశ్వర్ యాత్రకి వెళ్ళింది. అసలే ఆ సమయంలో ఎక్కడ చూసినా ఉరుములు, పిడుగులు, భారీ వర్షాలు. అందువల్ల మేము ఎలా వెళ్ళొస్తారోనని టెన్షన్ పడ్డాము. నేను ఏ కష్టం వచ్చినా ముందుగా చెప్పుకునే మన బాబాకి "వాళ్ళు క్షేమంగా వెళ్లి, రావాల"ని చెప్పుకున్నాను. బాబా దయ, వాళ్ళు ఏ ఇబ్బందులు లేకుండా సురక్షితంగా వెళ్లొచ్చారు. నమో సాయినాథం!

---

పిలిచిన వెంటనే పలికే బాబా ఉండగా భయం ఎందుకు?

సాయిబంధువులందరికీ నమస్కారం. నా పేరు సౌజన్య. 2025, సెప్టెంబర్ 20వ తేదీ ఉదయం నిద్రలేవగానే నాకు ఎందుకో బాగా కడుపునొప్పి వచ్చింది. ఒక 2 నిముషాలు కూడా నిల్చోలేకపోయాను. వాంతి కూడా అయింది. ఒక పక్క మా పాప స్కూలుకి సమయమవుతుంది. నాకేమో వంట చేయడానికి అస్సలు ఓపిక లేదు. నా బాధ చూడలేక మావారు వెంటనే వెళ్లి మాత్రలు తెచ్చారు కానీ, నాకు వాటిని వేసుకోవడం ఇష్టంలేక, "బాబా! మీ అనుగ్రహంతో ఈ కడుపునొప్పి తగ్గేలా చేయండి" అని హృదయపూర్వకంగా బాబాను ప్రార్థించి, ఆయన మీద భారమేసి పడుకున్నాను. బాబా దయతో ఒక అరగంట/గంటకల్లా నా ఆరోగ్యం కుదుటపడింది. ఇంకోరోజు రాత్రి అందరూ పడుకున్నాక హఠాత్తుగా మా బాబు చెవినొప్పి అని ఏడ్చాడు. ఆ రాత్రివేళ ఏమి చేయాలో నాకు తోచక పెద్దవాళ్ళు వేసుకోనే ఎయిర్ డ్రాప్స్ బాబు చెవిలో వేసాను. అయినా వాడికి నొప్పి తగ్గలేదు. నాకు ఏం చేయడానికి అర్ధంకాక 'ఓం సాయి రక్షక శరణం దేవా' అని నామస్మరణ చేస్తూ వుంటే, గంటసేపటికి బాబు నిద్రపోయాడు. బాబా దయవల్ల వాడి చెవినొప్పి తగ్గింది. పిలిచిన వెంటనే పలికే బాబా ఉండగా మనకి భయం ఎందుకు?. ఆయన మీద భారమేస్తే, అయనే మనల్ని కాపాడతాడు. "సాయినాథా! ఎల్లప్పుడూ మమ్మల్ని కాపాడండి".

---

బాబా దయతో దొరికిన లాకర్ తాళం

సాయి బంధువులందరికీ నమస్కారం. నా పేరు గురుమూర్తి. ఒకరోజు నేను బ్యాంకు లాకర్ పని చేసుకొచ్చాను. కొన్నిరోజుల తరువాత ఇంట్లో వెతికితే ఆ బ్యాంకు లాకర్ తాళం కనిపించలేదు. దాదాపు  రెండు వారాలపాటు కప్‌బోర్డ్స్ మొదలుకొని ఇంట్లో అంతా వెతికినా ఆ తాళం కనిపించలేదు. దాంతో ఇక కనిపించదేమోనని భయమేసింది. ఎందుకంటే, బ్యాంకు లాకర్ తాళం పోతే చాలా పెద్ద ప్రక్రియ ఉంటుంది. అందువల్ల సాయినాథుని, ఏడుకొండలవాడిని తాళం దొరికేలా చేయమని మనసారా వేడుకున్నాను. ఒక వారం తరువాత వేరే వస్తువుకోసం వెతుకుతుంటే ఎప్పుడూ పెట్టని చోట హ్యాండ్ బ్యాగ్ కనిపించింది. ఆ హ్యాండ్ బ్యాగులో చూడగా తాళం అందులోనే ఉంది. మా ఆనందానికి అంతులేదు. "ధన్యవాదాలు సాయినాథా, ఏడుకొండలవాడా!".

ఓంసాయి శ్రీసాయి జయజయసాయి.

---

Read More

సాయిభక్తుల అనుభవమాలిక 2030వ భాగం....

---

ఈ భాగంలో అనుభవం:

• కన్నీటిపరమైన జీవితాల్లో వెలుగు నింపిన బాబా

---

సాయిభక్తులందరికీ నా నమస్కారం. నేను ఒక సాయిభక్తురాలిని. మేము వరంగల్ దగ్గర ఒక పల్లెటూరులో నివాసముంటున్నాము. 2019 నుండి నేను బాబా భక్తురాలినయ్యాను. అసలు ఎందుకు ఆయనకు భక్తురాలినయ్యానో, ఎలా అయ్యాను నాకు ఇప్పటికీ అర్థం కాదు. కానీ నేను బాబాని విడువలేనంత, తలవకుండా ఉండలేనంత దగ్గరయ్యాను ఆయనకు. 2004, జనవరి 5న మా నాన్న అనారోగ్యంతో చనిపోయారు. అప్పటినుండి అమ్మ ఒక్కతే చాలా కష్టపడాల్సి వచ్చింది. నాన్న చనిపోయిన మూడు నెలలకి 2004, మార్చ్ 11న మా అక్కకి వివాహం చేసింది. నన్ను, మా అన్నని పెంచి పెద్ద చేసి చదివించింది. 2020 నుండి నాకు పెళ్లి చేయాలని సంబంధాలు చూడటం మొదలుపెట్టారు. అయితే నాకు, మా అన్నకి సంబంధాలు చూసే పెద్ద దిక్కు, మా వివాహాలకు అండగా ఉండేవాళ్లు ఒక్కరు కూడా లేరు. తెలిసినవాళ్లు ఎవరైనా చూసినా వాళ్ళు వాళ్ళ కన్నా తక్కువ స్థాయిలో ఉండాలని, చదువులేని వాళ్ళని, క్రైస్తవులని తీసుకొచ్చేవాళ్ళు. అవి నాకు నచ్చేవి కాదు. అలా సంవత్సరాలు దొర్లుతూ ఎన్ని సంబంధాలు చూసినా ఒక్క సంబంధం కూడా కుదరలేదు. గ్రామంలో అందరూ మమ్మల్ని చూసి, 'మీకు దిక్కు ఎవరూ లేరని, మీకింకా పెళ్లి కాదని' ఎగతాళి చేసి నవ్వుకుంటూ ఉండేవారు. ఆ టార్చెర్ అనుభవిస్తూ నేను, అన్న, మా అమ్మ మాకు మేమే ధైర్యం చెప్పుకుంటూ, ఇంట్లో ఏడ్చుకుంటూ ఉండేవాళ్ళం. చివరికి ఊర్లో వాళ్ళందరూ మా అమ్మని అనే మాటలకి తట్టుకోలేక ఇంట్లోని అందరం చచ్చిపోదాం అనే స్థితికి వచ్చాము. మా పరిస్థితి అంత దారుణంగా ఉన్నప్పటికీ నేను మొదటినుంచి మా అమ్మ, అన్నలకి, "బాబా ఉన్నారు. ఆయన మంచి సంబంధాలు తెస్తారు. ఆయన అనుగ్రహంతో ఘనంగా వివాహాలు జరుగుతాయి" అని ధైర్యం చెప్తూండేదాన్ని. కానీ మనసులో మాత్రం, 'ఎప్పటికీ నా పరిస్థితి ఇంతేనేమో! నాకు వివాహం కాదేమో! నేను ఇలాగే ఈ ఇంట్లోనే ఉండిపోతానేమో! మమ్మల్ని అందరూ ఎగతాళి చేసి నవ్వుకుంటూ ఉంటారేమో!' అని బాగా ఏడ్చేదాన్ని. నేను ఏడవని రోజంటూ ఉండేది కాదు. నాలో నేనే కుమిలిపోతూ, కృంగిపోతూ ఉండటం వల్ల నా ఆరోగ్యం బాగుండేది కాదు.

అంతటి కష్టంలోనూ నేను ప్రతిక్షణం సాయిస్మరణ చేసుకుంటూ ఉండేదాన్ని. ఆయన నాకు ఎన్నో స్వప్న దర్శనాలు ఇచ్చారు. ఒకసారి స్వప్నంలో 'నేను ఒక అబ్బాయి బండి మీద వెళ్తున్నాను. ఒక మారుమూల గ్రామంలోని పొలం పక్కగా వెళ్తుంటే దారికి ఎడమవైపున ఒక రేగి చెట్టు ఉంది. అక్కడ నేను ఆ అబ్బాయిని బండి ఆపమని చెప్పి, రేగుపళ్ళు తెంపుకొని నేను తింటూ ఆ అబ్బాయికి కూడా ఇచ్చాను. అతను 'నాకొద్దు నువ్వే తిను' అన్నాడు. తర్వాత మేము అక్కడినుండి ఆ అబ్బాయి వాళ్ళింటికి వెళ్ళాము. వాళ్లది చిన్న ఇల్లు. ఆ ఇంటి ముందున్న ఒక హోటల్ వద్ద 'సాయిబాబా హోటల్' అని ఫ్లెక్సీ ఉంది. అది చూసిన నేను మా అమ్మవాళ్ళు రమ్మంటుంటే, 'ఇక్కడ బాబా ఉన్నారు. నేను రాను. నేను ఇక్కడే ఉంటాను. నాకు ఇక్కడే బాగుంది' అని అంటున్నాను. అంతలో బాబా ఒక నది మీదగా గాలిలో కాషాయ రంగు వస్త్రాలలో, చేతిలో జపమాలతో దర్శనమిచ్చి నన్ను ఆశీర్వదిస్తూ, 'నేను శిరిడీలో పుట్టాను. శిరిడీలో పెరిగాను. నీకు అంతా మంచే జరుగుతుంది' అని చెప్పి అదృశ్యమయ్యారు'. నాకు మెలకువ వచ్చింది. వెంటనే నేను ఆ కల గురించి మా ఇంట్లోని అమ్మవాళ్లతో చెప్పాను. వాళ్ళు, "అదంతా నీ భ్రమ" అన్నారు. కానీ నా మనసుకు తెలుసు, 'బాబా నాకు మంచి భాగస్వామిని ఇస్తార'ని. అదే నమ్మకంతో బాబా మీద విశ్వాసంతో బ్రతుకుతుండేదాన్ని.

2024, జూలై 10న నా పుట్టినరోజు. ఆ రోజు నాకు ఒక అబ్బాయి నుండి 'హాయ్! మేము పెళ్ళికి ఆసక్తిగా ఉన్నామ'ని మెసేజ్ వచ్చింది. విషయమేమిటంటే, 2023లో 'భరత్ మ్యాట్రిమోనీ'లో నేను నా ప్రొఫైల్ అప్లోడ్ చేశాను. కేవలం అప్లోడ్ చేయడమైతే చేసానుగాని, 'నాకేం సంబంధం కుదురుతుంది?' అనుకొని ఆ విషయం పూర్తిగా మర్చిపోయాను. ఆ అబ్బాయి మెసేజ్ వచ్చినప్పుడు 'ఎన్నో వస్తుంటాయి, పోతుంటాయి' అని ఏదో మామూలుగా చూశాను. కానీ ఆ అబ్బాయి ఫోటో చూస్తే, బాబా నాకు స్వప్నంలో చూపించిన అబ్బాయి పోలికలు సరిపోలాయి. ఆ విషయం నేను మా ఇంట్లోవాళ్ళకి చెప్తే, వాళ్ళు నమ్మలేదు, 'పిచ్చమ్మాయి' అన్నట్టుగా నన్ను చూశారు. నాకు ఒకవైపు బాబా లీల అనిపించినప్పటికీ మరోవైపు అంతా నా భ్రమ ఏమో అనిపించింది. కానీ అదే అబ్బాయితో నాకు వివాహం నిశ్చయమై 2024, డిసెంబర్ 11కి ఘనంగా జరిగింది. ఆరోజు స్వప్నంలో కనిపించిన అబ్బాయి, ఇప్పుడు నా భర్త; స్వప్నంలో ఉన్న ఆ ఇల్లే నా అత్తారిల్లు. నా జీవితాన్ని బాబా నాకు ముందుగానే స్వప్నంలో చూపించారు. నేను కోరుకున్న దానికంటే ఎన్నోరేట్లు అధిక సద్గుణాలు కలిగిన వ్యక్తిని నాకు భర్తగా ప్రసాదించారు బాబా. ఆయన కృపవల్ల గుణవంతుడైన భర్త, ప్రేమగా చూసుకునే అత్తారిల్లు నాకు లభించాయి. ఆయన నా వివాహాన్ని ఒక అద్భుతంలా జరిపించి నన్ను చిన్న చూపు చూసిన వారి ముందే తలెత్తుకుని గౌరవంగా ఉండేలా చేశారు.

 

బాబా అనుగ్రహంతో నా అన్నకి కూడా సంబంధం కుదిరి నా పెళ్ళికి 20 రోజుల ముందు అనగా 2024, నవంబర్ 20న వివాహం అయింది. ఇదంతా చూసి ఊర్లో వాళ్లంతా, 'ఏంటి ఇదంతా? ఇన్ని రోజులు, ఎన్ని సంబంధాలు చూసినా కుదరని వాళ్ళిద్దరికీ సంబంధాలు కుదిరి, రెండు పెళ్లిళ్లు ఒకేసారి అవ్వడం ఏంటి?' అని ఆశ్చర్యపోయారు. ఇప్పుడు మా ఇంట్లో అందరం చాలా సంతోషంగా, మనశాంతిగా, ప్రశాంతంగా ఉన్నాము. మాకు ఇప్పుడు బాబానే అండదండ అని తలచి ఆయన బిడ్డలుగా జీవిస్తున్నాము. మా ఇంట్లో జరిగిన ఈ పెళ్ళిళ్ళను బాబా ప్రసాదంగా, బిక్షగా నేను, నా కుటుంబం భావిస్తున్నాము. బాబా అంటే తెలియని నా భర్త కూడా ఇప్పుడు బాబా భక్తుడిగా మారి బాబానే సర్వంగా తలుస్తున్నారు. ఇదంతా బాబా దయవల్లనే. ఇదంతా టైపు చేస్తుంటే నా మనసు కదిలిపోతుంది, నాకు మాటలు రాక సరిగా బాబా లీలను వ్యక్తపరచలేకపోతున్నాను. ఏదేమైనా కన్నీటిపరమైన నా జీవితంలో వెలుగు నింపిన బాబాకి శతకోటి వందనాలు. "తండ్రీ! సాయినాథా! మీకు శతకోటి వందనాలు. నేను ఇప్పుడు చాలా సుఖంగా ఉన్నాను. నా భర్తతో సంతోషకరమైన జీవితాన్ని గడుపుతున్నాను. నేనేమైనా తప్పులు చేసుంటే నన్ను మన్నించి నాకు ఎల్లవేళలా తోడుగా ఉండు తండ్రీ. జన్మజన్మలకు నీ భక్తురాలిగా నీ పాద సేవ చేసుకునే అవకాశం నాకు కల్పించు తండ్రీ".

సర్వం శ్రీసాయినాథార్పణమస్తు.

---

Read More

సాయిభక్తుల అనుభవమాలిక 2029వ భాగం....

---

ఈ భాగంలో అనుభవాలు:

1. బాబా అనుగ్రహం

2. నమ్మినవాళ్ళని ఎల్లవేళలా చాలా చక్కగా చూసుకుంటారు బాబా  

3. అడిగినంతనే అనుగ్రహించిన బాబా

---

బాబా అనుగ్రహం

సాయి బంధువులకు నమస్కారాలు. నా పేరు రాణి. కాకినాడ మా స్వగ్రామం. నాకు ఇద్దరు అమ్మాయిలు. మా పెద్దమ్మాయి ఎంబిబిఎస్ పూర్తి చేసింది(తనకి అది బాబా పెట్టిన భిక్ష). తర్వాత తను పీజీ చేయడానికి యూఎస్ఏ వెళ్లేందుకు బాబాని అనుమతి అడిగితే, ఆయన తమ అంగీకారం తెలియజేశారు. అంతా బాగుంది కానీ, డబ్బు విషయంలో మేము చాలా ప్రయత్నాలు చేయాల్సి వచ్చింది. బ్యాంకు లోన్ అప్రూవ్ అవ్వడానికి ఇంజనీర్ అప్రూవల్ అవసరమైంది. మేము ఎంతోమంది ఇంజినీర్లను కలిసాము. వాళ్లంతా మాకు లోన్ రాదని చెప్పారు. ఇక ఆఖరికి, "బాబా! ఇదే చివర ప్రయత్నం" అని బాబాతో చెప్పుకొని  ఒక ఇంజనీర్ దగ్గరకి వెళ్ళాము. అక్కడ మొదలైంది బాబా అద్భుతం. ఆ ఇంజనీర్ సాయి భక్తుడు. అతని ఆఫీసులో ఎంట్రన్స్ దగ్గర నిలువెత్తు సాయి ఫోటో వుంది. అది చూసి 'వేర్ యు గో. ఐ విల్ ఫాలో యు(నువ్వెక్కడికి వెళ్లినా నేను నీ వెంటుంటాను)' అని బాబా నిరూపించారని నాకు అనిపించింది. ఆ ఇంజనీర్ లోన్ ప్రక్రియ అంతా పూర్తి చేసి మా అమ్మాయికి చాలా సహాయం చేసారు. చాలా అడ్డంకులు వచ్చాయి కానీ, బాబా అవి అన్ని తొలగించారు. "ధన్యవాదాలు బాబా. మమ్మల్ని ఇలాగే కాపాడుతూ ఉండండి బాబా. నాకు, నా కుటుంబానికి, పిల్లలకి తోడుగా ఉండండి. తోటి భక్తులని కూడా చల్లగా చూడు బాబా".

---

నమ్మినవాళ్ళని ఎల్లవేళలా చాలా చక్కగా చూసుకుంటారు బాబా  

సాయి పాదపద్మములకు నా నమస్కారాలు. నా పేరు అమరనాథ్. మా అబ్బాయి సాయికార్తికేయ. యూస్ఏలోని మిస్సోరి యూనివర్సిటీలో ఎమ్ఎస్ చేసాడు. వాడు ఉద్యోగం చేస్తే, నాకు ఆర్థిక వెసులుబాటు దొరుకుతుందని నా ఆశ. కానీ మొదట్నుంచి వాడికి పిహెచ్‌‌డి చేయాలని కోరిక. అందువల్ల నా ఆర్థిక స్థితి అంతమంచిగా లేకున్నా వాడి ఇష్టాన్ని కాదనలేక వాడిని ప్రోత్సహించాను. బాబా దయతో రోచెస్టర్ యూనివర్సిటీలో స్టైఫండ్‌తో పిహెచ్‌డి సీటు వచ్చింది. మొదటి సంవత్సరం చక్కగా నడించింది. అప్పుడు దేశాధ్యక్షుడిగా ట్రంఫ్ వచ్చి స్టైఫండ్ తీసేసాడు. దాంతో నెలకు వచ్చే రెండున్నర లక్షల స్టైఫండ్ ఆగిపోయింది. ఉద్యోగానికి వెళ్లే వీలులేదు, తప్పనిసరిగా పిహెచ్‌డి చేయాలి. ‌‌‌మాకు ఏం చేయాలో తెలియలేదు. మా కుటుంబానికి బాబా అంటే గట్టి నమ్మకం, 'ఆయన ఒక దారి చూపుతారని'. అందుచేత మళ్ళీ ఆయన్నే ఆశ్రయించాము. బాబా దయవల్ల మా అబ్బాయి అదివరకు ఎమ్‌ఎస్ చేసిన యూనివర్సిటీలోనే మళ్ళీ పిహెచ్‌డి సీటు వచ్చింది. కానీ స్టైఫండ్ నిశ్చయం కాలేదు. మా అబ్బాయి చాలా టెన్షన్ పడ్డాడు. రెండు నెలలు బాగా ఇబ్బంది పడ్డాడు. రోజూ యూనివర్సిటీకి వెళ్లి ప్రొఫసర్లని కలిసి వచ్చేవాడు. చివరికి బాబా దయవలన వినాయకుని ఆశీస్సులతో వినాయకచవితి రోజున యూనివర్సిటీవాళ్ళు రెండువేల డాలర్లతో టీచింగ్ ప్రొఫెసర్‌గా మా వాడికి అవకాశం ఇచ్చారు. దాంతో మేము ఈసారి వినాయకచవితి చాలా ఆనందంగా చేసుకున్నాము. బాబా నమ్మినవాళ్ళని ఎల్లవేళలా చాలా చక్కగా చూసుకుంటారు అనడానికి మా జీవితం ఒక ఉదాహరణ. "ధన్యవాదాలు బాబా".

---

అడిగినంతనే అనుగ్రహించిన బాబా

నేను ఒక సాయి భక్తురాలిని. నేను కొద్దిరోజుల నుండి ఈ బ్లాగులో వస్తున్న సాయి లీలలు చదువుతున్నాను. అలాంటి ఒక అనుభవం మీతో పంచుకోవాలని అనుకుంటున్నాను. నాకు 3 సంవత్సరాల పాప వుంది. 2025, సెప్టెంబర్ 10న తనకి విరోచనలై మంట పెడుతుందని గోల చేసింది. నేను తనతో, "బాబాని అడుగు తగ్గిస్తారు" అని చెప్పాను. తను నేను చెప్పినట్లే బాబాని అడిగింది. నేను కూడా బాబాని, "తనకి బాధ, మంట తగ్గి నిద్రపోయేలా చూడండి" అని ప్రార్థించాను. అంతే! 5 నుండి 7 నిమిషాల లోపు పాప నిద్రపోయింది. అయినా కూడా నాకేంటో గాబరాగా అనిపించి ఫేస్బుక్ ఓపెన్ చేసి ఈ 'సాయి మహారాజ్ సన్నిధి' ఫేస్బుక్ పేజీలో సాయి లీలలు చూస్తే, అందులో మొదటి లీలే నాకొచ్చిన సమస్య వంటిది. దాంతో నాకు, 'బాబా ఏం భయం లేదు, నేను ఉన్నాను' అని అభయమిస్తున్నట్లు అనిపించింది. "నాతో ఎల్లప్పుడూ ఉండి నన్ను, నా కుటుంబాన్ని కంటికి రెప్పలా కాపాడుతున్నందుకు ధన్యవాదాలు బాబా".

---

Read More

సాయిభక్తుల అనుభవమాలిక 2028వ భాగం....

---

ఈ భాగంలో అనుభవాలు:

1. బాబాకు తమ భక్తులపై ఎంతో ప్రేమ

2. తమ గుడిని చూపించడమే కాకుండా ఆరతి కూడా ఇప్పించుకున్న బాబా

---

బాబాకు తమ భక్తులపై ఎంతో ప్రేమ

సాయి భక్తులందరికీ నా నమస్కారాలు. నా పేరు విజయలక్ష్మి. బాబా నాకు చాలా అనుభవాలు ఇచ్చారు. ఒకసారి నేను, మావారు, మా ఇద్దరు పిల్లలు బైక్‌పై హైదరాబాద్‌లోని ఎర్రగడ్డ మెట్రోస్టేషన్ పక్కనున్న మాక్స్ షాపింగ్ మాల్‌కి వెళుతుంటే సండే మార్కెట్ వద్ద మా బైక్ ఆగిపోయింది. ఎంత ప్రయత్నించినా స్టార్ట్ అవ్వలేదు. అది చాలా రద్దీ ప్రదేశం. వెనకనున్న చాలా వాహనాలు ఒకటే హార్న్‌ల మోత మోగిస్తుంటే నాకు కంగారుగా అనిపించి, "బాబా! ఇప్పుడు ఈ బైక్ స్టార్ట్ అయ్యేలా లేదు. మాకు ఏ దారి కనపడటం లేదు. దయతో బైక్ స్టార్ట్ అయ్యేలా చూడండి" అని బాబాను వేడుకున్నాను. వెంటనే బైక్ స్టార్ట్ అయింది. బాబా ఎంత అద్భుతం చేసారో చూసారా!

ఒకసారి మావారు చాలా పెద్ద ఆరోగ్య సమస్య వల్ల ఒక వారం రోజులు హాస్పిటల్, ఐసీయూలో ఉన్నారు. ఆయన డిశ్చార్జ్ అయ్యాక నేను కూడా ఆరోగ్యం బాగాలేక హాస్పిటల్లో ఉండాల్సి వచ్చింది. అప్పుడు నాకు చాలా భయమేసి, "బాబా! ఏంటి మాకు ఇలా అవుతుంది. మమ్మల్ని కాపాడండి. మా పిల్లలు ఆనాధలు కాకుండా చూడండి" అని ఏడ్చాను. అప్పుడు నాకు, "ఎందుకు ఏడుస్తావు? నీకు నేను ఉన్నాను" అని బాబా సందేశం వచ్చింది. అలా నేను ఎప్పుడు ఏడ్చినా దయగల నా తండ్రి ఆ సందేశం నాకు చూపిస్తారు. దాంతో నాకు చాలా ధైర్యంగా ఉంటుంది.

నేను కోలుకొని హాస్పిటల్ నుండి ఇంటికి వచ్చిన కొన్నిరోజులకి మావారికి మళ్ళీ ఆరోగ్య సమస్యలు వచ్చాయి. బ్లడ్ లో క్లాట్స్ ఏర్పడి అవి బ్రెయిన్‌కి రక్త సరఫరా అయ్యే చోట అడ్డంపడి మావారికి ఒక కంటిచూపు పోయింది. దానికి డాక్టరు ఇచ్చిన మందు వాడటం వల్ల మావారికి నిద్రపట్టేది కాదు. ఆయన రాత్రీపగలూ నిద్రలేక, కన్ను కనిపించక చాలా ఒత్తిడి అనుభవించారు. నేను బాబాకి, "ఆయన ఆరోగ్యం బాగుండాల"ని చెప్పుకొని సచ్చరిత్ర పారాయణ మొదలుపెట్టి రోజూ మావారికి ఊదీ నీళ్లు ఇస్తుండేదాన్ని. అయినా ఆయనకి నిద్రపట్టేది కాదు. ఇలా ఉండగా సచ్చరిత్రలో 'బాంద్రా నివాసి కాయస్థ ప్రభు జాతికి చెందిన ఒక పెద్దమనిషి నిద్రించుటకు నడుము వాల్చగనే గతించిన తన తండ్రి స్వప్నములో కనిపించి తీవ్రంగా తిట్టేవాడని, అది అతని నిద్రను భంగపరిచేదని, ప్రతిరోజూ అట్లు జరుగుతుండటం వల్ల అతను చాలాకాలం నిద్రపట్టక బాధపడ్డాడని, అతనికి ఏమి చేయడానికి తోచలేదని, ఒకనాడు అతను తన బాధ గురించి ఒక బాబా భక్తునితో చెప్పగా, "బాబా ఊదీ అతని బాధను తప్పనిసరిగా తీర్చున"ని ఆ భక్తుడు చెప్పి, కొంత ఊదీ ఇచ్చి ప్రతిరోజు నిద్రించుటకు ముందు కొంచం నుదుటకి రాసుకొని, మిగతా పొట్లం తలదిండు కింద పెట్టుకోమని సలహా ఇచ్చేనని, ఆవిధంగా చేయడంతో ఆ పెద్దమనిషికి సంతోషము, ఆశ్చర్యము కలుగునట్లు మంచిగా నిద్రపట్టిందని' చదివిన నేను, "బాబా! నాకు ఇంకా మిగిలింది ఇది ఒకటే. ఈ చివరి ప్రయత్నం కూడా ఫలితం ఇవ్వకపోతే మీ దయ మీపై లేనట్టే!" అని బాబాతో చెప్పుకొని ఊదీ నీళ్ళు మావారి చేత తాగించి. కొంచెం ఊదీ పొట్లం కట్టి ఇచ్చి, "దీనిని తలగడ కింద పెట్టుకోమ"ని చెప్పాను. ఆయన అలానే చేసారు. మర్నాడు ఉదయం మావారు నిద్రలేవగానే, తనకి చాలా బాగా నిద్రపట్టిందని చెప్పారు. నాకు బాబా మాపై చూపిన ప్రేమకు కళ్ళలో నీళ్ళు తిరిగాయి. ఒక్కోసారి మనం బాబాని 'మాపై మీకు దయ లేదు' అంటాముగాని బాబా ఎప్పుడూ మన పక్కనే ఉంటారు. ఆయన మనం అనుభవించే ప్రారబ్ధ కర్మలను నుండి మనలను విముక్తులను చేయాలని ఆరాటపడుతుంటారు. బాబాకి తన భక్తులపై ఎంతో ప్రేమ ఉంటుంది. "ధన్యవాదాలు బాబా. నేను మీ బిడ్డగా ఉన్నందుకు, మీరు నన్ను మీ బిడ్డగా ఎన్నుకున్నందుకు జన్మజన్మలకు నేను నీకు ఋణపడి ఉంటాను బాబా". నా ఈ అనుభవాలను ఎంతో ఓపికగా చదివిన ప్రతి ఒక్కరికీ నా శిరస్సు వంచి నమస్కరిస్తున్నాను. మీ అందరిపైనా బాబా ఆశీస్సులు ఎప్పుడూ ఉండాలని కోరుకుంటున్నాను.

ఓం శ్రీ సచ్చిదానంద సద్గురు సాయినాథ్ మహరాజ్ కి జై.

---

తమ గుడిని చూపించడమే కాకుండా ఆరతి కూడా ఇప్పించుకున్న బాబా

సాయిభక్తులందరికీ నమస్కారాలు. నా పేరు శ్వేత. మేము 4 నెలల క్రితం ఇల్లు మారాము. కొత్త చోట అంతా సర్దుబాటు అయ్యాక నేను దగ్గరలో బాబా గుడి ఉందేమోనని వెతకడం మొదలుపెట్టాను. ఆ క్రమంలో ఒక ఆదివారం సాయంత్రం మా కుటుంబంలోని అందరం కలిసి బయటికి వెళ్తున్నప్పుడు నేను మా భర్తతో, "ఏదైనా బాబా గుడికి వెళదాం" అని అన్నాను. తను, "దారిలో చుద్దాం" అని చూసుకుంటూ వెళ్తుంటే, ఒక గుడి కనిపించింది. ఆనందంగా దర్శనం చేసుకుందామని గుడి లోపలకి వెళ్ళాము. అప్పుడు సాయంత్రం ఆరతి అవుతుంది. అక్కడున్న పంతులుగారు మమ్మల్ని బాబాకి ఆరతి ఇవ్వమన్నారు. నేను దర్శనమైతే చాలు అనుకుంటే, బాబా మాచేత తమకి ఆరతి ఇప్పించుకున్నారు. నాకు చాలా సంతోషంగా అనిపించింది. కాసేపు సేవ చేసుకొని వచ్చేసాము. అప్పటినుంచి నేను సంతోషంగా ఆ గుడికి వెళ్ళడం మొదలుపెట్టాను. "థాంక్యూ వెరీ మచ్ సాయీ! మేము ఎక్కడికి వెళ్ళినా మాతో ఉండండి. అందరూ బాగుండేలా ఆశీర్వదించండి".

---

Read More

సాయిభక్తుల అనుభవమాలిక 2027వ భాగం....

---

ఈ భాగంలో అనుభవాలు:

1. బాబా సహాయం

2. సర్జరీ, కీమోథెరపీ లేకుండా క్యాన్సర్‌ను నయం చేసిన బాబా 

---

బాబా సహాయం

నా పేరు మాధవి. నేను ఒక కంపెనీలో పని చేస్తున్నాను. ఒకరోజు ఆఫీసులో నా వల్ల చిన్న తప్పు జరిగి, దానివల్ల పనిలో కాస్త గందరగోళం అయింది. నా పైఆఫీసర్ పెట్టిన మెయిల్స్ ద్వారా ఆయన ఏ కారణం చేతనో ప్రాజెక్ట్ ప్రొడక్షన్‌కి వెళ్లాల్సొచ్చి బాగా ఒత్తిడికి గురై చాలా టెన్షన్‌గా ఉన్నట్లు నాకనిపించింది. దాంతో ఆ స్థితిలో నా వల్ల తప్పు జరిగినందుకు ఆయన నన్ను ఏమంటారో అని చాలా భయపడ్డాను. బాబా నామస్మరణ చేస్తూ, "బాబా! నాకు, నా పైఆఫీసర్‌కి ఫోన్ కాల్ పెట్టొద్దు. ఆయన ఉన్న ఒత్తిడిలో నన్ను ఏమైనా అంటే, నేను అదే ఆలోచిస్తూ ఉండిపోతాను. ప్లీజ్ బాబా! నన్ను రక్షించండి" అని బాబాను అడిగాను. బాబా నా ప్రార్థన విన్నారు. ఫోన్ కాల్ ఆయనతో కాకుండా ఎనలిస్ట్ టీమ్‌తో జరిగింది. నేను నా తప్పుకి క్షమాపణ చెప్పడంతో సమస్య పరిష్కారమై అంతా ప్రశాంతంగా సాగింది. "ధన్యవాదాలు బాబా. ఒకవేళ నా పైఆఫీసర్ ఏదైనా అని ఉంటే, సున్నిత మనస్కురాలినైన నేను చాలా బాధపడేదాన్ని. చాలా చాలా ధన్యవాదాలు బాబా".

2025, ఆగస్టు 27, రాత్రి పడుకునేముందు మా 7ఏళ్ళ బాబు కొంచం అలసటగా అనిపించాడు. తనకి కాస్త జలుబు చేసినట్టు నాకనిపించింది. తను నిద్ర మధ్యలో భయపడుతున్నట్టు నిద్రలేచి, 'ప్లీజ్.. ప్లీజ్' అని అర్థించాడు. తనకి బాగా కలలు వస్తాయి. గతసారి బాగా జ్వరం వచ్చినప్పుడు కూడా ఇలానే కలవరించాడు. వాడికి జ్వరం వస్తే చాలా తీవ్రంగా వస్తుంది. అదీకాక మేము ఇంకో 2 రోజులలో బయటకు వెళ్ళడానికి ప్లాన్ చేసాము. కాబట్టి నాకు భయమేసి బాబుకి బాబా ఊదీ పెట్టి, కాస్త సిరప్ పట్టాను. తర్వాత,  "బాబు ప్రశాంతంగా నిద్రపోవాలి, తనకి జ్వరం రాకూడదు బాబా" అని బాబాకి దణ్ణం పెట్టాను. అప్పటివరకు కలత నిద్రపోయిన బాబు బాబా ఊదీ పెట్టినప్పటినుండి చాలా ప్రశాంతంగా నిద్రపోయాడు. నిజంగా ఇది బాబా దయ. ఎందుకంటే, సిరప్ పని చేయడానికి కనీసం ఒక గంట పడుతుంది. "ధన్యవాదాలు బాబా. ఊదీ ఈ కలికాలంలో మీరు మాకు ప్రసాదించిన దివ్య ఔషధం బాబా. కోటికోటి ప్రణామాలు బాబా. మీరు నా జీవితంలోకి రావటం నేను చేసుకున్న అదృష్టం తండ్రీ. ఎప్పుడూ మీరు నాతో ఉండండి. నా చేయి వదలకండి బాబా".

సాయి స్మరణం సంకట హరణం

బాబా శరణం భవభయ హరణం.

---

సర్జరీ, కీమోథెరపీ లేకుండా క్యాన్సర్‌ను నయం చేసిన బాబా   

సాయిభక్తులందరికీ నా నమస్కారాలు. నేను ఒక సాయి భక్తురాలిని. 2025, మే 1న మా వారికి మూత్రంలో రక్తం వస్తే, ఒక యూరాలజిస్ట్ దగ్గరకి వెళ్లాము. అతను స్కాన్ చేసి, "లోపల చిన్న గడ్డ ఉంది. చిన్న సర్జరీ చేసి దాన్ని తొలగించాలి" అన్నారు. అలాగే మే 2న సర్జరీ చేసి గడ్డని తీశారు. దాన్ని బయాప్సీకి పంపితే, రిపోర్టులో బ్లాడర్ క్యాన్సర్ అని వచ్చింది. అది తెలిసి నేను ప్రతిరోజూ "ఎందుకింత పరీక్ష పెట్టావు బాబా?" అని బాబాని అడుగుతుండేదాన్ని. ఎంతోమంది ఆంకాలజిస్ట్‌లను కలిస్తే, అందరూ బ్లాడర్ తీసేసి యూరిన్ బ్యాగ్ వేయాలి అన్నారు. మాకు ఏ నిర్ణయం తీసుకోవాలో అర్ధం కాలేదు. బ్లాడర్ తొలగించే సర్జరీకి వెళ్లాలా, వద్దా అని చీటీలు వేసి బాబాని అడిగే ధైర్యం కూడా లేక ఒక బాబా భక్తురాలిని అడిగితే, ఆమె చీటీలు వేసి బాబాని అడిగారు. బాబా వద్దని చెప్పారు. అలాగే ఇంకో భక్తునితో కూడా చీటీలు వేయిస్తే, అప్పుడూ బాబా వద్దన్నారు. ఇంకా బాబా మీద భారమేసి, ఆయన సూచించిన హెర్బల్ మందు మావారికి ఇస్తూ, "బాబా! మీరే ఈ బాధ నుండి రక్షించాలి" అని బాబాను ప్రార్థిస్తూ ఉండేదాన్ని. అలా మూడు నెలలు గడిచాక టెస్ట్ చేయిస్తే, స్కానింగ్‌లో బ్లాడర్ నార్మల్ అని వచ్చింది. ఆ రిపోర్ట్ డాక్టరుకి చూపిస్తే, "సర్జరీ, కీమోథెరపీ ఏదీ చేయించకుండా ఎలా తగ్గుతుంది. ఈ రిపోర్ట్ నిజాం కాదు" అన్నారు డాక్టరు. కానీ నా బాబా ఆ గడ్డని తన చేతితో తీసేశారని, ఆయన్ను శ్రద్ధ, సబూరిలతో ఎంతగానో నమ్మితే ఎంతటి కష్టానైనా తొలగిస్తారని వాళ్ళకి ఏం తెలుసు? సరే, మళ్ళీ పెట్ స్కాన్ చేయిస్తే, అప్పుడు కూడా నార్మల్ వచ్చింది. బాబా నా కుటుంబం మీద ఎంతో దయ చూపించారు. నేను ఆయనకి ఎంతో ఋణపడిపోయాను. "చాలా చాలా ధన్యవాదాలు బాబా ఇదే దయను నా కుటుంబం మీద ఎల్లప్పుడూ చూపించండి. సదా మీ నామాన్ని పలికేలా నాకు మరింత శ్రద్ధ, సబూరీలు ఇవ్వండి తండ్రీ".

శ్రీ సచ్చిదానంద సమర్థ సద్గురు సాయినాథ్ మహరాజ్ కీ జై.

---

Read More

సాయిభక్తుల అనుభవమాలిక 2026వ భాగం....

---

ఈ భాగంలో అనుభవాలు:

1. ఆటంకం లేకుండా స్వామి దర్శనం చేయించిన బాబా

2. శ్రీసాయి ఆశీస్సులు

3. సాయినాథుడు పిలిస్తే పలికే దైవం

---

ఆటంకం లేకుండా స్వామి దర్శనం చేయించిన బాబా

నా పేరు శ్రీనివాస్. మాకు ఒక బాబు, ఒక పాప. మేము బాబుకి మూడో సంవత్సరంలో తిరుపతి మొక్కు తీర్చాలని అనుకున్నాం. పాపకి 2025, ఆగస్టు 17న 9వ నెల వస్తుండటంతో ఆగస్టు 18న వెంకన్న సన్నిధికి వెళ్ళి దర్శనం చేసుకుందామనుకొని 2025, మార్చిలో ఆగస్టు నెల దర్శనం టికెట్ల కోసం ఆన్లైన్లో ప్రయత్నించాము కానీ, దొరకలేదు. అయినప్పటికీ సంవత్సరం లోపు పిల్లలుంటే సుపథం ద్వారా నేరుగా దర్శనం చేసుకునే అవకాశముందని మేము ధైర్యంగా ఉన్నాము. అయితే అదివరకు సుపథం ద్వారా దర్శనానికి వెళ్లిన మాకు తెలిసిన ఒకతను పాపకి బర్త్ సర్టిఫికెట్ ఉంటే చాలు గానీ, బాబుకి మాత్రం ఆధార్ కార్డు ఉండాలన్నారు. దాంతో బాబు ఆధార్ కార్డు కోసం ప్రయత్నాలు మొదలుపెట్టాం. కానీ నాలుగు నెలల్లో ఎన్నిసార్లు ప్రయత్నించినా ప్రతిసారీ తిరస్కరించబడింది. ఇక అప్పుడు నేను బాబాని, "బాబా! కలియుగ దైవం ఆ వెంకటేశ్వరస్వామి దర్శనం ఎటువంటి ఆటంకాలు లేకుండా అయ్యేలా చూడండి" అని ప్రార్థించి ఆగస్టు 17న పాపకి అన్నప్రాసన, మొదటి కొప్పు తీయడం చేసి అదేరోజు రాత్రి తిరుపతి వెళ్ళే ట్రైన్ ఎక్కి ఆగస్టు 18 ఉదయం తిరుమల చేరుకున్నాం. ఘాట్ రోడ్డులో బాబుకి రెండు సార్లు వాంతులయ్యాయి. రూమ్ తీసుకున్నాక పాపకి రక్త విరోచనాలయ్యాయి. దాంతో మేము దర్శనం ఎలా అవుతుందో అని భయపడ్డాం కానీ, బాబా, వెంకటేశ్వరస్వాములను నమ్ముకొని దర్శనానికి బయలుదేరాం. "బాబా! దర్శనం బాగా అయి మేము క్షేమంగా తిరిగి మా ఇంటికి చేరుకునేలా చూడండి. ఐదుగురికి అన్నదానం చేస్తాను" అని అనుకున్నాను. బాబా దయవల్ల బాబు ఆధార్ కార్డు అడగలేదు, దర్శనం కూడా రెండు గంటల్లో ఆయిపోయింది. అదేరోజు రాత్రి ట్రైన్ ఎక్కి మర్నాడు ఉదయం క్షేమంగా షోలాపూర్ లోని మా ఇంటికి చేరుకున్నాం. తర్వాత పాపని డాక్టర్‌కి చూపిస్తే, "కంగారుపడాల్సిన అవసరం లేదు. శరీరంలో వేడి వల్ల అలా రక్తవిరోచనాలు అయ్యాయ"ని మందులు వ్రాసిచ్చారు. అదేరోజు బాబు ఆధార్ కార్డు ఒకే అయ్యి వారం రోజుల్లో అప్రూవల్ వచ్చింది. "చాలా చాలా ధన్యవాదాలు బాబా". 

---

శ్రీసాయి ఆశీస్సులు

ఓంసాయి శ్రీసాయి జయజయసాయి. నేను ఒక సాయి భక్తురాలిని. మా ఇంట్లో మా మావయ్యగారు తన తల్లి ఆబ్దికం కోసం బంధువులందర్నీ ఆహ్వానించారు. నాకేమో అది నెలసరి సమయమైంది. నెలసరి ఆగడానికి మాత్రలు వేసుకుందామంటే, వినాయకచవితికి ఆటంకమవుతుంది. అందువల్ల నాకు ఏం చేయాలో అర్థంకాక బాబాకి దణ్ణం పెట్టుకొని మాత్రలు వేసుకున్నాను. కానీ అవి నాకు సరిగ్గా పని చేయలేదు. నెలసరి వచ్చినట్టు అనిపించింది. నేను చాలా టెన్షన్ పడి మళ్ళీ బాబాకి దణ్ణం పెట్టుకొని, "బాబా! ఇటు ఆబ్దికానికి, అటు వినాయకచవితికి నెలసరి ఆటంకం లేకుండా చూడండి. మీకు 11 రూపాయలు దక్షిణ సమ్పరించుకుంటాను" అని గట్టిగా ప్రార్థించి ఆ రెండు రోజులు బాబా ఊదీ నోట్లో కొంచెం వేసుకొని, కడుపుకి కొంచెం రాసుకున్నాను. బాబా దయవలన ఆబ్దికం కార్యక్రమం అయిపోయాక ఆ రోజు రాత్రి నెలసరి వచ్చింది. వినాయకచవితికి ఆరురోజులు అయింది. అలా నా సాయితండ్రి నెలసరి ఇటు ఆబ్దికానికి, అటు వినాయకచవితి ఆటంకం లేకుండా చేసారు. "బాబా! మీ మేలు జన్మజన్మలకు మర్చిపోలేను తండ్రీ. నా మీద, నా కుటుంబం మీద మీ దయ ఎల్లప్పుడూ ఇలాగే ఉండాలని కోరుకుంటున్నాను".

ఇకపోతే, వినాయకచవితి రోజున నా పుట్టినరోజు. నేను బాబాని, "నన్ను మీ భక్తురాలిగా మీరు ఒప్పుకుంటే, ఆరోజు ఉదయం కాకడహారతి తర్వాత ఆకుపచ్చ రంగు వస్త్రాల్లో, బంగారు రేకుల పువ్వు ధరించి కనిపించండి సాయి" అని వేడుకున్నాను. నేను కోరుకున్నట్లే వినాయకచవితినాడు సాయి దర్శనమిచ్చి నన్ను ఆశీర్వదించారు. "సాయీ! ఎప్పుడూ నన్ను ఇలాగే ఆశీర్వదించండి. అలాగే నాకు ఎప్పుడూ మీ పాదాల యందు స్థిరమైన నమ్మకం, శ్రద్ధ ఉండేలా అనుగ్రహించండి".

శ్రీ సచ్చిదానంద సద్గురు సాయినాథ్ మహరాజ్ కి జై.

---

సాయినాథుడు పిలిస్తే పలికే దైవం

శ్రీసాయిబాబాకు నా శతకోటి నమస్కారాలు. నా పేరు తన్వి. చిన్న, పెద్ద ఏ కష్టం వచ్చినా నాకు సాయిబాబానే దిక్కు. ఆయన ప్రతిసారీ ఏదో ఒక రూపంలో పరిస్కారం చూపి నన్ను ఆ కష్టం నుండి బయటపడేస్తున్నారు. ఒకరోజు ఉదయం నిద్రలేచినప్పటి నుండి నా పొత్తి కడుపులో చాలా నొప్పిగా అనిపించసాగింది. అది నెలసరి సమయం కాకపోవటంతో నాకు చాలా భయమేసింది. అయినా నేను బాబాని తగ్గించమని ప్రార్థించలేదు, తగ్గిపోతుందిలే అనుకున్నాను. కానీ రాత్రి అయ్యేసరికి నొప్పి చాలా ఎక్కువైంది. ఇక అప్పుడు భరించలేక, "బాబా! నొప్పి తగ్గేలా చూడండి" అని బాబాని ప్రార్ధించాను. మన సాయినాథుడు పిలిస్తే పలికే దైవం కదా! ఆయన్ని ప్రార్ధించిన 5 నిమిషాలకి నొప్పి తగ్గిపోయింది. ఇంకో రోజు నా మనసు ఎందుకో బాగా అలజడి చెందింది. అప్పుడు, "బాబా!  ఈ ఆందోళన తగ్గేలా చూడండి" అని బాబాను ప్రార్ధించాను. అంతే! నా మనసు కుదుటపడింది. "చాలా ధన్యవాదాలు సాయి. మీ మేలు ఈ జన్మలో మార్చిపోలేను".

---

Read More

సాయిభక్తుల అనుభవమాలిక 2025వ భాగం....

---

ఈ భాగంలో అనుభవాలు:

1. పిలిస్తే పలికే గొప్ప దేవుడు సాయిబాబా

2. బాబా కృప

---

పిలిస్తే పలికే గొప్ప దేవుడు సాయిబాబా

సాయినాథ్ మహారాజ్ భక్తులకు నమస్కారం. నా పేరు మోహన్. మా ఊరు ధర్మవరం. నేను 1996 నుండి సాయిబాబా భక్తుడిని. ఇప్పటివరకు బాబా నన్ను ఎన్నోసార్లు ఎన్నో కఠిన పరిస్థితుల నుండి కాపాడారు. వాటిలో నుండి ముందుగా నా మొట్టమొదటి అనుభవంతోపాటు ఇటీవల జరిగిన అనుభవం ఈరోజు మీతో పంచుకోవడం నా అదృష్టంగా భావిస్తున్నాను. నాకు 1996వ సంవత్సరం వరకు బాబా గురించి తెలియదు. ఆ సంవత్సరం నేను మొట్టమొదటిసారి బాబా గుడికి వెళ్ళినప్పుడు, "స్వామీ! మీరు నిజంగా భక్తులను కాపాడేవారైతే, నేను డిగ్రీ మొదటి సంవత్సరంలో ఒక సబ్జెక్టు ఫెయిల్ అయ్యాను. ఆ సబ్జెక్ట్ నాకు చాలా కష్టంగా ఉంది. దయచేసి ఆ సబ్జెక్ట్ పాసయ్యేలా చూడండి" అని బాబాని వేడుకున్నాను. ఆ తర్వాత నేను మళ్ళీ గుడికి వెళ్ళలేదు. మూడు నెలల తర్వాత పరీక్ష ఫలితాలు వచ్చాయి. నేను ఎంతో కష్టంగా భావిస్తున్న ఆ సబ్జెక్ట్‌లో నాకు 71 మార్కులు వచ్చాయి. నాకు చాలా ఆశ్చర్యంగా అనిపించింది. ఒకే ఒక్కసారి మొక్కినందుకే ఆయన నా కష్టాన్ని దాటించాడు. ఇంకా ఆరోజు నుంచి ఈరోజు వరకు నేను ఆయనను మరువలేదు. నా ప్రాణం ఉన్నంతవరకు కూడా మరువను.

2025, ఆగస్టు 26వ తేదీలోగా నాకు 13 లక్షల రూపాయలు అవసరం అయ్యాయి. అది చాలా క్లిష్టమైన పరిస్థితి. ఆ డబ్బు సమకూర్చలేకపోతే మాట పోతుంది. నాకు తెలిసిన చాలామందిని డబ్బులు అడిగాను. కానీ ఎవరి దగ్గర కూడా డబ్బులు లేవు. నాకు ఏం చేయాలో అర్థం కాలేదు. ఆగస్టు 15వ తేదీ నుండి 21వ తేదీ వరకు చాలా టెన్షన్ పడ్డాను. 21వ తేదీన 'సాయి సచ్చరిత్ర' చదవడం ప్రారంభించి, "26వ తేదీలోగా డబ్బులు సర్దుబాటు ఐతే, మీ అనుగ్రహాన్ని తోటి సాయి భక్తులతో పంచుకుంటాను" అని మొక్కుకున్నాను. ఇక ఏం జరిగిందో చూడండి. చివరి ప్రయత్నంగా మాకు తెలిసిన ఒకరిని 5 లక్షల రూపాయలు అడిగాను. అతను చూస్తానని, మర్నాడు ఫోన్ చేసి, "డబ్బులు ఉన్నాయి" అని అన్నాడు. ఇంకో స్నేహితుడు 1 లక్ష ఇస్తాన్నాడు. నాకు ఇంకా 7 లక్షలు అవసరం. అసలు అద్భుతం ఇప్పుడు జరిగింది. 25వ తేదీ సాయంత్రం బ్యాంకు మేనేజర్ నాకు ఫోన్ చేసి, "మీ పర్సనల్ లోన్ తీరిపోతుంది. మళ్ళీ లోన్ ఇస్తాము, తీసుకోండి" అని అన్నారు. మర్నాడు 26వ తేదీ మధ్యాహ్నం నేను బ్యాంకుకి వెళ్లి, "10 లేదా 15 లక్షలు ఐతేనే తీసుకుంటాను" అన్నాను. అతను నాకున్న లోన్‌లన్నీ చెక్ చేసి, మీకు 7 లక్షలు మాత్రమే ఇవ్వగలం" అని అన్నాడు. అప్పటికే నాకు సాయి బాబా లీల అర్థం అయింది. ఎటువంటి రుసుములు లేకుండా 15 నిమిషాల్లోనే నా బ్యాంకు ఖాతాలో 7 లక్షలు వేశారు. అలా నాకు కావాల్సిన 13 లక్షలు 26వ సాయంత్రానికి అందాయి.  మనం బాబా మీద భారమేస్తే, ఆయన మనకు ఎంత కావాలన్నా ఇస్తారు. పిలిస్తే ఇంత తొందరగా పలికే దేవుడు నాకు తెలిసి ఇంకెవ్వరూ లేరు. శిరిడీ సాయినాథ్ మహారాజ్ ఒక్కరికే అది సాధ్యం. "చాలా చాలా ధన్యవాదాలు బాబా".

నేను ఈ బ్లాగులో వచ్చే చిన్న చిన్న విషయాలకు సంబంధించిన భక్తుల అనుభవాలు చూసి ఆశ్చర్యపోయేవాడిని. కానీ అలాంటి అనుభవమే నాకు 2025, సెప్టెంబర్ 13న జరిగింది. ఆరోజు సాయంత్రం 6 గంటలప్పుడు నేను శిరిడీ లైవ్ చూస్తూ, "బాబా! నాకిష్టం ఐన బ్లూ డ్రెస్ హారతికి వేసుకోండి" అని అనుకున్నాను. ఆ తర్వాత హారతి సమయంలో నేను బాబాని చూసి ఆశ్చర్యపోయాను. బాబా నేను కోరుకున్న బ్లూ డ్రెస్ ధరించారు. ఆ రాత్రి శేజరాతికి కూడా బాబా బ్లూ డ్రెస్ ధరించారు. ఈ అనుభవం కలిగిన తర్వాత ఈ బ్లాగులో భక్తులు రాస్తున్న చిన్న చిన్న అనుభవాల విషయంలో నాకు సదాభిప్రాయం వచ్చింది. నిజంగా భక్తులు ఎలాంటి కోరిక కోరినా అది చిన్నదా, పెద్దదా అని ఆలోచించకుండా బాబా తీరుస్తారు. ఆయన అనుగ్రహం ఉంటే ఎలాంటి కోరికైనా తీరుతుంది. "ధన్యవాదాలు బాబా".

---

బాబా కృప

నా పేరు జగదీశ్వర్. 2025, ఆగస్టు నెలాఖరులో తీవ్రమైన జలుబు, దగ్గు, ఒళ్లునొప్పులు మొదలై నీరసంతోపాటు జ్వరం కూడా వచ్చేలా అనిపించింది నాకు. దాంతో డెంగ్యూ, వైరల్ జ్వరాలు ఎక్కువగా ఉన్న ఈ సమయంలో జ్వరం వస్తుందేమోనని భయమేసి, "బాబా! జ్వరం రాకుండా చూడండి" అని వేడుకొని ఊదీ పెట్టుకున్నాను. ఎటువంటి టాబ్లెట్లు వేసుకోలేదు. బాబా దయవలన ఒక వారం వరకు జలుబు ఉన్న కూడా జ్వరం మాత్రం రాలేదు.

ఒకరోజు మా ఆవిడ ఇంట్లోకి క్రిములు వస్తున్నాయని పెస్టిసైడ్ స్ప్రే చేసింది. అది కాస్త పూజ గదిలోకి వెళ్లడంతో ఆ స్ప్రే బల్లికి తగిలి అది కదలకుండా ఉండిపోయింది. నాకు ఆ బల్లి చనిపోతుందేమోనని బాధేసింది. మర్నాడు ఉదయం నేను రోజూ నైవేద్యంతోపాటు ఒక రాగి పాత్రలో ఉంచే జలం కొద్దిగా ఆ బల్లి మీద వేసి, "ఆ బల్లికి ఏమీ కాకూడద"ని బాబాని వేడుకున్నాను. అలా రెండు రోజులు చేసాక బాబా కరుణ వల్ల ఆ బల్లికి ఏమీ కాలేదు. ఇంటిలో నుండి బయటకి వెళ్ళిపోయింది. "ధన్యవాదాలు బాబా".

---

Read More

సాయిభక్తుల అనుభవమాలిక 2024వ భాగం....

---

ఈ భాగంలో అనుభవం:

• పోస్ట్ క్రియేట్ చేసి మరీ ఉద్యోగం అనుగ్రహించిన బాబా

---

నా పేరు లక్ష్మి. మాది మండపేట. నేను సాయి భక్తురాలిని. నేను ఇసుకపల్లి బేబీగారి సాయి సత్సంగదామంలో పాల్గొంటూ ఉంటాను. బాబా నాకు ప్రసాదించిన ఒక అనుభవాన్ని మీతో పంచుకుంటున్నాను. హైదరాబాదులోని ఒక పెద్ద కంపెనీలో ఉద్యోగం చేస్తున్న మా పెద్దబాబు కంపెనీలో తనకి సమస్యగా ఉందని, హఠాత్తుగా ఉద్యోగం మానేశాడు. మా కోడలు అమ్మవాళ్లు, "పిల్లలున్నారు, కుటుంబాన్ని ఎలా పోషిస్తాడు" అని చాలా అన్నారు. నేను చాలా వేదన చెంది బాబాకి చెప్పుకుంటూ 'కుటుంబం ఉంది, ఇద్దరు పిల్లలున్నారు' అని చాలా ఆలోచిస్తుండేదాన్ని. బాబు ఉద్యోగం లేకుండా సంవత్సరం ఇంట్లోనే ఉన్నాడు. తను ఒకసారి మండపేట వచ్చినప్పుడు నేను తనని బేబీగారి ఇంటికి తీసుకెళ్లి, బాబాకి దణ్ణం పెట్టిందామని అనుకున్నాను. ముందుగా అబ్బాయిని తీసుకెళ్లకుండా నేను ఒక్కదాన్నే బేబీగారి ఇంటికెళ్లి, అమ్మ ఉంటే అబ్బాయికి ఫోన్ చేసి రమ్మందామనుకొని వెళ్లాను. అప్పుడు ఆమె ఇంట్లోనే ఉన్నారు. దాంతో మా అబ్బాయికి కాల్ చేసి సత్సంగానికి రమ్మని చెప్పాను. తర్వాత నేను వాడికి అడ్రస్ తెలీదు కదా అని, బయట నిల్చొని వాడికోసం వేచి ఉండగా తెల్లని మాసిన బట్టలు, చేతిలో సంచి ధరించిన ఒక పెద్దాయన కనిపించారు. ఆయన్ని, "ఎవరండీ మీరు? ఎవరు కావాలండి?" అని అడిగాను. ఆయన నా వంక చాలా దీక్షగా చూసిన మీదట, "బేబీగారు ఉన్నారా అండి?" అని అడిగారు. నేను, "ఆఁ.. ఉన్నారండి. పిలవమంటారా?" అని అడిగాను. ఆయన కాసేపు ఆగి, "వద్దులెండి. నేను మళ్ళీ వస్తాను" అని చెప్పి వెనుతిరిగి వెళ్ళిపోయారు. అంతలో బేబీగారు లోపల నుంచి వచ్చి, "లక్ష్మీగారూ! మీ అబ్బాయి వచ్చాడా అండి" అని అన్నారు. నేను, "లేదండి. వాడికోసమే చూస్తున్నానండి. అమ్మా! ఇప్పుడు ఒక పెద్దాయన వచ్చి, మీ గురించి అడిగితే, ఉన్నారండని చెప్పాను.  పిలుస్తానంటే, వద్దండి. మళ్ళీ వస్తానండి అని చెప్పి వెళ్ళిపోతున్నారమ్మా. ఇప్పుడే వెళ్తున్నారు, పిలుస్తాను ఉండమ్మా" అని చెప్పి వెళ్తున్న ఆయన్ని "ఏవండీ! బేబీగారు వచ్చారు. రండి రండి" అని పిలిచాను. "ఎవరండీ" అంటూ బేబీగారు కింద మెట్ల వరకు వచ్చారు. అప్పటివరకు నాకు కనిపిస్తున్న ఆయన ఆమె వచ్చేసరికి మలుపు తిరిగిపోయారు. ఈలోగా మా అబ్బాయి వచ్చాడు. ఇంకా మేము ముగ్గురం ఇంటి లోపలికి వెళ్ళాము. బేబీగారు అబ్బాయికి బాబా దర్శనం చేయించి, బాబా ఫోటో, ఊదీ ఇచ్చి, "ఉద్యోగం వస్తుందమ్మా. మళ్లీ ప్రయత్నించమ్మా, మీ అమ్మ నీ గురించి చాలా వేదన చెందుతుంది. బాబాని తలుచుకో, నీకు అంతా మంచి జరుగుతుంది" అని దీవించారు. తర్వాత నేను, మా అబ్బాయి మా ఇంటికి వచ్చేసాము. భోజనాలు చేసి పడుకున్నాము. సరిగ్గా తెల్లవారుజామున 3 గంటలప్పుడు నాకు కలలో బేబీగారి ఇంటి దగ్గర కనిపించిన పెద్దాయన చిరునవ్వుతో నన్ను చూస్తూ కనిపించారు. సాక్షాత్తు బాబానే దర్శనమిచ్చి 'నేనున్నాను వేదన చెందకు' అని చెప్తున్నట్లనిపించి నాకు కన్నీళ్లు అస్సలు ఆగలేదు. 'ఎంత దయామయుడువయ్యా సాయినాథా! నా వేదన ఆలకించి నాకు అభయాన్నిచ్చావు. చాలా చాలా సంతోషమయ్యా. నా బిడ్డ భారం నీదే' అనుకుని బాబానే తలుచుకున్నాను తెల్లారేవరకు. ఉదయం బేబీగారికి ఫోన్ చేసి, "అమ్మా! నిన్న సాయంత్రం వచ్చిన ఆయన మళ్లీ వస్తానని చెప్పారు. వచ్చారా అమ్మా" అని అడిగితే, "లేదు లక్ష్మిగారు" అన్నారు ఆవిడ. అప్పుడు, "నాకు రాత్రి స్వప్నంలో ఆ పెద్దాయన కనిపించారమ్మా" అని చెప్పాను. ఆవిడ, "ఇంకేంటి లక్ష్మిగారు. బాబానే స్వయంగా బాబు బాధ్యత తీసుకుంటానని చెప్పారు. ఇంకా వేదన చెందకండి" అన్నారు. అప్పటినుంచి నేను చాలా సంతోషంగా ఉండసాగాను.

తర్వాత మా అబ్బాయి, నేను హైదరాబాద్ వెళ్లాము. హైదరాబాద్ వెళ్ళాక అబ్బాయి ప్రయత్నాలు చేసుకునేవాడు కానీ, ముందు కంపెనీలో చెప్పకుండా మానేసిన కారణంగా వాళ్లు ఎక్స్పీరియన్ లెటర్ ఇవ్వలేదు. అది చాలా సమస్య అయ్యింది. నేను బాబాను తలుచుకుంటూ నాకు తెలిసిన వాళ్ళని అడుగుతుండేదాన్ని. వాళ్లలో సుమన్ అనే ఆయన నేను అడిగే విధానాన్ని మనసులో పెట్టుకొని, "అమ్మా! నీ వేదన నాకు అర్థమవుతుంది. కానీ నేను చేసేది చిన్న కంపెనీలో. మీ వాడు పెద్ద కంపెనీలో చేశాడు కదమ్మా. కాబట్టి పెద్ద కంపెనీలలో ప్రయత్నిస్తాను. అక్కడ మీవాడికి ఉద్యోగం రాకపోతే నా కంపెనీలోనే ఉద్యోగం ఇప్పిస్తాను. బాధపడకు నేనున్నాను" అని అభయమిచ్చి చాలా ప్రయత్నించారు కానీ, ఫలితం రాలేదు. చివరికి ఆయన తన కంపెనీలో అడిగారు. ఆయన ఆ కంపెనీలో పెద్ద పోస్టులోనే ఉన్నారు. ఆయన ఆఫీసులో, "నేను చెప్పిన అబ్బాయికి మన ఆఫీసులో తప్పకుండా ఉద్యోగం ఇవ్వాలి. ఇది నా రిక్వెస్ట్" అని అడిగారు. దానికి మేనేజ్మెంట్ వాళ్లు 'సుమన్ సార్ చెప్పార'ని ఆఫీసులో ఖాళీ పోస్టు లేకపోయినా పోస్ట్ క్రియేట్ చేసి మరీ మా అబ్బాయికి ఉద్యోగం ఇవ్వడానికి నిశ్చయించారు. అప్పుడు సుమన్ సార్ నాకు ఫోన్ చేసి, "అమ్మా! మీ అబ్బాయిని ఇంటర్వ్యూకోసం మా ఆఫీసుకి పంపించండి. ఉద్యోగం ఇస్తారు" అని చెప్పారు. నాకు కలిగిన ఆనందం మాటల్లో చెప్పలేను. నా చిన్న కోడలు చూసింది నేనెంత ఆనందపడ్డానో. నేను ఎంత గెంతులేసానో నాకే తెలుసు. బాబా పాదాలను ఆనందబాష్పలతో కడిగాను. మా అబ్బాయి ఆ ఆఫీసుకి వెళ్తే, "వెంటనే జాయిన్ అయిపోమ"ని అన్నారు. కానీ నేను రెండు రోజులు సమయం అడిగి మా అబ్బాయిని తీసుకుని శిరిడీ వెళ్ళాను. బాబా దర్శనానికి లైన్లో వెళ్తున్నంతసేపూ 'బాబా ఎప్పుడు కనిపిస్తారా?' అని ఆరాటంతో 'బాబా బాబా' అనుకుంటూ ఉంటే, మా అబ్బాయి చూసి 'అమ్మ నాకోసం ఎంత వేదన చెందిందో' అని చాలా ఫీల్ అయ్యాడు. అబ్బాయితో బాబా దర్శనం చేయించి, ఆయన సమాధిని తాకించి, "నా బిడ్డ భారం నీదేనయ్యా. నా బిడ్డ చేయి పట్టుకొని మీరే నడిపించాలి సాయినాథా" అని కన్నీటితో వేడాను. అప్పటినుంచి మా అబ్బాయి కూడా బాబానే తలుచుకుంటున్నాడు. బాబా అంటే ఏంటో తెలియనటువంటివాడు ప్రతి గురువారం బాబాకి ఉపవాసం ఉంటున్నాడు(బాబాకి ఉపవాసం ఉండటం ఇష్టముండదు, ఆయన తమ భక్తులని ఉపవాసముండనిచ్చేవారు కాదు. అందుకు సంబంధించిన వివరాలు చదవాలనుకుంటే దిగువన ఇవ్వబడిన లింక్ ద్వారా 'సాయియోగంలో ఉపవాస నియమం' అనే ఆర్టికల్ చదవండి). బాబా ఫోటో తన వాట్సాప్ ప్రొఫైల్లో పెట్టుకున్నాడు. అది చూసి నేను చాలా చాలా సంతోషపడ్డాను. ఇక నా బిడ్డ భారం బాబాయే చూసుకుంటారు. ఆ తండ్రి సుమన్ సార్ రూపంలో నా వేదన అర్థం చేసుకుని పొజిషన్ లేకపోయినా పోస్టు క్రియేట్ చేసి  ఉద్యోగం ఇప్పించారు. అదే మన బాబా. సాయినాథ్ మహారాజ్ కి జై. శ్రీసాయినాథ్ మహారాజ్ కీ జై.

---

'సాయియోగంలో ఉపవాస నియమం' ఆర్టికల్ లింక్:-

 https://saimaharajsannidhi.blogspot.com/2020/09/blog-post_27.html

---

---

Read More