ఈ భాగంలో అనుభవాలు:
1. బాబా మీద భారమేస్తే చాలు - అంతా సవ్యంగా ఉంటుంది
2. శ్రీసాయి అనుగ్రహం
3. ఊదీతో పని చేసిన టీవీ
బాబా మీద భారమేస్తే చాలు - అంతా సవ్యంగా ఉంటుంది
సాయి బంధువులందరికీ నమస్కారం. నా పేరు సునీత. 2024, జూన్ నెలలో మా కొత్తింటి గృహప్రవేశం గురించి నాకు తెలిసిన ఒక పంతుల్ని అడిగితే, "ఆగస్టులో మంచి ముహూర్తాలున్నాయి, గృహప్రవేశం చేసుకోవచ్చు" అన్నారు. కానీ మా అత్తయ్య ఇంకో పంతుల్ని అడిగితే, "ఆగస్టు నెలలో ముహూర్తాలు లేవు" అని చెప్పారు. ఇలా రెండు రకాల సమాధానాలు వినేసరికి నాకు ఏం చేయాలో తోచక సందిగ్ధంలో పడిపోయాను. అప్పుడు బాబా మీద భారమేసి చిటీలు వేసి మా పాపచేత తీయిస్తే, 'ఆగస్టులో గృహప్రవేశం చేసుకోమ'ని వచ్చింది. అయితే ఆలోగా మా నాన్న ఆరోగ్యం బాగాలేక పోవడంతో గృహప్రవేశం ఎలా జరుగుతుందోనని నేను చాలా టెన్షన్ పడ్డాను. కానీ బాబా అనుమతి ఇచ్చిన పని సవ్యంగా జరగకుండా ఎందుకు ఉంటుంది? బాబా దయవల్ల గృహప్రవేశం అనుకున్న దానికంటే చాలా బాగా జరిగింది. ఆ రోజంతా మా 5ఏళ్ల పాప పడుకోకుండా తిరిగింది. ఆ కారణంగానో ఏమోగానీ మరుసటిరోజు పాపకి జ్వరమొచ్చింది. అయితే బాబా దయవల్ల తొందరగానే తగ్గింది. కానీ, నెల తర్వాత పాపకి ఫుడ్ ఇన్ఫెక్షన్ అయి వాంతులు, విరోచనాలు మొదలయ్యాయి. మందులేసినా తగ్గలేదు. పాప 5 రోజులు బాధపడి రోజురోజుకు నీరశించిపోయింది. అప్పుడు నేను, "బాబా! త్వరగా పాప కోలుకునేలా చేస్తే గురువారం ఉపవాసం ఉంటాను" అని అనుకొని ఆయన మీద భారమేసి మందులన్ని ఆపేసాను. ఒక్కరోజులోనే పాపకి వాంతులు, విరోచనాలు తగ్గాయి. అన్ని మందులు వేసినా తగ్గనిది బాబా మీద భారమేయగానే తగ్గింది. "ధన్యవాదాలు బాబా. ఇలానే నాకు, నా కుటుంబానికి ఎల్లవేళలా తోడు ఉండండి బాబా".
గమనిక: బాబాకి తమ భక్తులు ఉపవాసం ఉండటం నచ్చదు. ఆ విషయాన్ని ఆయన ఎన్నో అనుభవాల ద్వారా తెలియజేసారు. అందుకు సంబంధించిన పూర్తి వివరాల కోసం కింద ఇచ్చిన లింక్ ద్వారా 'సాయిభక్తి సాధన రహస్యం - సాయియోగంలో ఉపవాస నియమం' అన్న ఆర్టికల్ చదవగలరు.
శ్రీసాయి అనుగ్రహం
నేను ఒక సాయి భక్తురాలిని. 2022లో మేము శిరిడీ వెళ్ళాము. మేము అక్కడినుండి శనిసింగణాపూర్, ఇంకా పేరు గుర్తులేదుగానీ దగ్గర్లో ఉన్న ఒక శివుడి గుడికి కూడా వెళదామనుకున్నాము. కానీ వెళ్లలేకపోయాము. అందువల్ల నా మనసులో తీరని బాధగా వుండింది. అయితే శిరిడీలో ఒక అద్భుతం జరిగింది. శిరిడీలో ఎక్కడన్నది నాకు సరిగా తెలీదు కానీ, ఓ చోట హాల్లా ఉంది. అందులో వరుసగా చిన్నచిన్న విగ్రహాలు చాలా ఉన్నాయి, శివలింగం కూడా ఉంది. ముందు మా అమ్మాయి, అల్లుడు వెళ్తుంటే వెనుక నేను, నా వేలు పట్టుకొని నా 3 సంవత్సరాల మనవరాలు నడుస్తున్నాము. ఒక పూజారి నీళ్లు దగ్గర పెట్టుకొని, చెంబుతో కొంతమందికి ఇస్తున్నారు. అతను నా ముందున్న మా అమ్మాయి, అల్లుడికి ఇవ్వకుండా నా ముఖం వైపు చూసి, చెంబుతో నీళ్లు ఇచ్చి, 'శివలింగంకి పోయమ్మా' అన్నారు. నేను అలాగే చేశాను. మా అల్లుడు ఆశ్చర్యంగా "ఆ పూజారి మీకు నీళ్ళు ఇచ్చారా? మేము మీ ముందేగా వచ్చాము. మాకు ఇవ్వలేదు, మీకు ఇచ్చారు. అద్భుతం!" అని అన్నారు. నాకు ఆరోజు అర్ధం కాలేదు కానీ, తర్వాత సాయితండ్రి నా చేత శివయ్యకు అభిషేకం చేయించారని అనుకున్నాను.
2024, అక్టోబర్ 24, గురువారం మధ్యాహ్నం నుండి నాకు వీపు, కుడిభుజం బాగా నొప్పిగా వుండింది. మర్నాడు కూడా అలానే ఉంది. టాబ్లెట్ వేసుకున్నా తగ్గలేదు. ఇక నొప్పి భరించలేక, "బాబా! నొప్పి తగ్గించండి" అని బాబాను వేడుకున్నాను. బాబా దయవల్ల ఒక గంటలో తగ్గింది. "ధన్యవాదాలు బాబా".
ఊదీతో పని చేసిన టీవీ
నా పేరు శాంతి. మాది విశాఖపట్నం. బాబా నాకు ప్రసాదించిన అనుభవాలు చాలా ఉన్నాయి. అందులో నుండి ఒక అనుభవాన్ని ఇప్పుడు సాయి బిడ్డలతో పంచుకుంటున్నాను. 2019లో మేము స్మార్ట్ టీవీ కొన్నాము. అది బాగానే పని చేసేది కానీ, 2024లో సరిగా పని చేయడం మానేసింది. ఎన్నిసార్లు మెకానిక్కి ఫోన్ చేసి వచ్చి చూడమని చెప్పినా కొన్నిరోజులు రాలేదు. చివరికి ఒకరోజు వచ్చి చూసి, "రిపేర్ చేయాలి. 1800 రూపాయలు అవుతుంది. తర్వాత కూడా పని చేయకపోతే 6,000 రూపాయలు అవుతాయ"ని చెప్పారు. "అయితే తర్వాత చేయిద్దాం. మెకానిక్ని పంపించేయండ"ని నేను మా ఆయనతో చెప్పి టీవీకి బాబా ఊదీ పెట్టాను. బాబా అద్భుతం చేశారు. హఠాత్తుగా టీవీ పని చేయడం మొదలుపెట్టింది. మా ఇంట్లో వాళ్ళందరూ "ఎలా పని చేస్తుంది?" అని అడిగారు. నేను గర్వంగా, "బాబా దయవల్ల ఇది సాధ్యపడింది" అని చెప్పుకున్నాను. "కష్టం అనగానే మాతో ఉండి మమ్మల్ని నడిపిస్తున్నందుకు వేల వేల కృతజ్ఞతలు సాయిదేవా. ఏమిచ్చినా మీ ఋణం తీర్చుకోలేనిది తండ్రీ".
