సాయిభక్తుల అనుభవమాలిక 1931వ భాగం....

---

ఈ భాగంలో అనుభవం:

• శ్రీసాయి కరుణామృత తరంగాలు

---

నేను ఒక సాయి భక్తుడిని. 2024, ఆగస్టు 30న మా బాబు 2వ జన్మదిన వేడుకలు ఇంట్లోనే ఘనంగా చేయాలనుకుని కేటరింగ్, డెకరేషన్, కేక్ బుకింగ్ అన్నీ మాట్లాడాం. అయితే నాది రైల్వే ఎమర్జెన్సీ సెక్షన్లో ఉద్యోగం అవ్వడం వల్ల పుట్టినరోజు ఏర్పాట్లకు ఎక్కడ ఏదైనా సమస్య వస్తుందోనని టెన్షన్ పడ్డాను. ఎందుకంటే, ఒకవేళ నాకు ఎమర్జెన్సీ డ్యూటీ పడి నేను డ్యూటీకి వెళ్ళిపోతే ఏర్పాట్లన్నీ దెబ్బ తింటాయి. ఆ వేడుకకోసం చాలా దూరం నుండి వచ్చిన మా అమ్మ, నాన్న, నా భార్య అక్కలకు ఇబ్బందవుతుంది. అందువల్ల నేను బాబాని తలుచుకొని, "బాబా! మీ అనుగ్రహంతో పుట్టినరోజు వేడుక ఎటువంటి ఆటంకాలు లేకుండా ఘనంగా జరిగేలా చూడండి. మీ మందిరంలో గురువారంనాడు పాలకోవా సమర్పించి అందరికీ పంచుతాను. అలాగే 101 రూపాయల దక్షిణను సమర్పించుకుంటాను" అని అనుకున్నాను. బాబాని ప్రార్థిస్తే కాని పని అంటూ ఉంటుందా? బాబా దయ చూపారు. పుట్టిన రోజు చాలా ఘనంగా జరిగింది. పిలిచిన అతిధులు అందరూ వచ్చారు. డెకరేషన్, కేక్ మరియు విందు చాలా బాగున్నాయని అందరూ మెచ్చుకున్నారు. భోజనం అందరికీ సరిగ్గా సరిపోయింది. "చాలా చాలా ధన్యవాదాలు బాబా. మమ్మల్ని ఎప్పుడూ ఇలానే కరుణించండి బాబా".

మా ఇంట్లో పనిమనిషి, మా 2 సంవత్సరాల బాబుని చూసుకొనే ఆమె హఠాత్తుగా పని మానేసింది. దాంతో నేను, నా భార్య ఉద్యోగరీత్యా ఇంట్లో ఉండలేక చాలా అంటే చాలా కష్టం ఐపోయింది. బాబుకి సమయానికి తిండి, నిద్ర ఉండేవి కావు. గర్భవతిగా ఉన్న నా భార్య ఇంటి పనులు, బాబుని చూసుకోలేక చాలా ఇబ్బందిపడింది. ఇటువంటి స్థితిలో నేను బాబాని తలుచుకొని, "బాబా! మాకు తొందరగా కొత్త పనిమనిషి దొరికి, ఈ సమస్య తొలగిపోయేలా చూడండి. ముగ్గురికి అన్నదానం చేస్తాను" అని అనుకున్నాను. బాబా దయవల్ల రెండు రోజుల్లో తెలిసినవాళ్ల బంధువు పనికి కుదిరారు. నేను బాబాకి చాలా చాలా ధన్యవాదాలు చెప్పుకున్నాను. అయితే ఆ సమయంలో ఆరు నెలల గర్భవతిగా ఉన్న నా భార్యకి పనులు పెరగడంతో తన ఆరోగ్యం కాస్త క్షీణించింది. ఆరు నెలలప్పుడు మామూలుగా చేయాల్సిన చెకప్ మరియు స్కానింగ్‌కోసం హాస్పిటల్‌కి వెళితే, డాక్టర్ కడుపు చూసి కాస్త కిందకి వచ్చిందని, అల్ట్రాసోనిక్ స్కానింగ్ చేస్తే కానీ విషయమేమిటన్నది చెప్పలేమని కంగారు పెట్టారు. మేము కాస్త టెన్షన్ పడ్డాం కానీ. 'మనకు బాబా తోడున్నారు కదా!' అని బాబాని తలుచుకొని, "స్కానింగ్ రిపోర్టు నార్మల్ అని వస్తే ఒకరికి అన్నదానం చేస్తాను" అని ప్రార్థించి స్కానింగ్ జరిగే సమయమంతా 'ఓం శ్రీసాయి ఆరోగ్యక్షేమదాయ నమః', 'శ్రీసాయి అసహాయసహాయాయ నమః', 'శ్రీసాయి సులభ దుర్లభయ నమః' అని జపించాను. బాబా దయ చూపారు. స్కానింగ్ రిపోర్ట్ నార్మల్ అని వచ్చింది. కానీ డాక్టరు, 15 రోజులు రెస్ట్ చాలా అవసరం అని చెప్పారు. అయితే బెడ్ రెస్ట్ అన్న మాటేగానీ ఆ 15 రోజులు కూడా నా భార్యకు విశ్రాంతి లేకుండా పోయింది. కారణం ఏంటంటే, కొత్త పని ఆమెకు బాబు అలవాటుపడలేకపోవడం, ఇంకా ఆమె మతిమరుపు. ఆమె ప్రతిదీ మర్చిపోతూ ఉండేది. గీజర్ స్విచ్ ఆన్ చేసి మర్చిపోయేది, బాబుకోసం స్టవ్ మీద అన్నం పెట్టి మర్చిపోయేది, వాడికి మందులు వేయడం మర్చిపోయేది. దానితో నేను బాబాని, "మీ దయతో పనిమనిషి+కేర్ టేకర్ ఐతే దొరికారు కానీ, ఆమె సరిగా చేయలేకపోతుంది. బాబు కూడా అలవాటు పడలేకపోతున్నాడు. కావున ఎలా అయినా పాత పని ఆమె పనికి రావడానికి, బాబుని చూసుకోవడానికి ఒప్పుకునేలా చేయండి. అలాగే ఈ కొత్త ఆమెని పనిలో నుంచి తీసేసేటప్పుడు ఆమె ఎటువంటి గొడవ పెట్టకుండా చూడండి తండ్రీ" అని ప్రార్థించాను. తర్వాత మేము పాత పనిమనిషి ఇంటికి వెళ్లి ఆమెతో మాట్లాడాము. ఆమె మళ్ళీ రావడానికి ఒప్పుకుంది. అలాగే కొత్త పనిమనిషి మానేయడానికి ఒప్పుకుంది. ఆమె ఎటువంటి ఇబ్బందీ పెట్టలేదు, ఎక్కువ డబ్బులు కూడా డిమాండ్ చేయలేదు. తర్వాత బాబా భక్తులకు పవిత్ర దినమైన దసరా నాడు నా భార్య చెకప్ కి వెళితే, ఆ తండ్రి దయవల్ల తల్లి, బిడ్డ ఆరోగ్యం బాగుందని డాక్టర్ చెప్పారు. అదేరోజు కొత్త పనిమనిషికి ఇవ్వాల్సిన డబ్బులు ఇచ్చి గౌరవంగా సాగనంపాము. మరుసటిరోజు నుండి పాత పనిమనిషి పనికి రావడం మొదలుపెట్టింది. అంతా బాబా దయ.

మేము ఉంటున్నది మహారాష్ట్రలోని సోలాపూర్‌లో. ఇక్కడ తెలుగు సినిమాలు చాలా అరుదుగా వస్తాయి. నా భార్య 8 నెలల గర్భవతిగా ఉన్నప్పుడు ఒక ఆదివారం ఒక మంచి తెలుగు సినిమాకి తీసుకెళ్లండని అడిగింది. ఆడవాళ్లు గర్భవతిగా ఉన్నప్పుడు వాళ్ళు ఏం అడిగితే, అది చేయాలని పెద్దవాళ్ళు చెప్తుండేవాళ్ళు. అందుచేత నేను తనని సినిమాకి తీసుకొని వెళ్లాలనుకున్నాను. అయితే మేము వెళ్ళాల్సిన థియేటర్‌కి వెళ్లే రోడ్ గతుకులమయంగా ఉంటుంది. ఎలా లేదన్న 20-25 నిమిషాల సమయం పడుతుంది. నేనేమో రైల్వే ఎమర్జెన్సీ విభాగంలో ఇంజనీరుగా పని చేస్తున్నాను. ఎక్కడైనా అత్యవసర పరిస్థితి ఏర్పడితే 15 నిముషాల్లో మా ఆక్సిడెంట్ ట్రెయిన్ బయలుదేరాలి. ఆలస్యమైతే ఏదో ఒక పనిష్మెంట్ ఉంటుంది. అదీకాక ఆదివారం బయటకి వెళ్ళాలంటే ముందురోజే అనుమతి తీసుకోవాల్సి ఉంటుంది. అలాంటిది ఆదివారం ఉదయం నా భార్య హఠాత్తుగా అడిగింది. ఇంకా నేను నా పైఅధికారులు వద్ద నుండి అనుమతి తీసుకోకుండానే బాబా మీద భారమేసి నా భార్యను తీసుకొని బయల్దేరాను. బాబాకి దణ్ణం పెట్టుకొని, "బాబా! మేము సినిమాకి వెళ్ళొచ్చేవరకూ ఎటువంటి ఎమర్జెన్సీ కాల్ రాకుండా, అత్యవసర విధులు పడకుండా కాపాడు తండ్రీ" అని అనుకున్నాను. బాబా దయవల్ల ఎటువంటి ఇబ్బందీ కలగలేదు.  ఒకవేళ కాల్ వచ్చునంటే గర్భవతి అయిన నా భార్యతో బైక్ మీద ఆ గతుకుల రోడ్డుపై ప్రయాణం చాలా కష్టం అయ్యుండేది. "ధన్యవాదాలు బాబా. నా భార్యకి డెలివరీ చక్కగా అయ్యేలా చూడండి తండ్రీ".

---