సాయిభక్తుల అనుభవమాలిక 2109వ భాగం....

---

ఈ భాగంలో అనుభవాలు:

1. శిరిడీలో పాండురంగ విఠలుని దర్శనం

2. కోరిన కోరికలన్నీ తీర్చే సాయినాథుడు

3. బాబాని భక్తితో కొలిస్తే నెరవేరని కోరిక ఏదీ లేదు!!

---

శిరిడీలో పాండురంగ విఠలుని దర్శనం

అఖిలాండకోటి బ్రహ్మాండనాయకుడైన నా సాయితండ్రికి సహస్ర వందనాలు. సాయి బంధువులందరికీ నమస్కారాలు. నా పేరు జ్యోతి. కానీ, సాయిబిడ్డ అనడంలోనే నాకు సంతోషం. ఆనాడు కాకాసాహెబ్ దీక్షిత్‌‌కి ఒకరోజు ఉదయం ధ్యానంలో పాండురంగని విఠలుని దివ్య దర్శనం అవుతుంది, తర్వాత అతను మసీదుకు వెళ్లి సాయిబాబాను దర్శించుకోగా ఆయన, "విఠల్ పాటిల్ వచ్చాడా? జాగ్రత్తగా పట్టుకో, లేదంటే పారిపోతాడు" అని అంటారు. ఆ భక్తుడు బాబాలో ఐక్యమై(1926లో) నేటికీ(2026కి) 100 సంవత్సరాలు. నాడు ఆ భక్తుడికి బాబా ఏదైతే అనుభవాన్ని ఇచ్చారో, అదే అనుభవాన్ని నాకు ఇచ్చారు. అదెలాగంటే, ఈ మధ్య నాకు, నా కూతురికి బాబా చాలాసార్లు స్వప్న దర్శనమిస్తుంటే, మేము దాన్ని బాబా పిలుపుగా భావించి 2026, మే 13వ తేదీన శిరిడీకి బయలుదేరాం. మాకు బాబా దర్శనం చాలా బాగా జరిగింది. మేము కాకడ ఆరతికి వెళ్ళాము. ఆ ఆరతిలో బాబా పాండురంగ విఠలుడే అని అభంగాలు ఉన్నాయి. అందువల్ల నేను బాబాను చూస్తూ, "బాబా! మీరు పాండురంగ విఠలుడే" అని మనస్సులో పాండురంగని రూపాన్ని తలుచుకున్నాను. అదేరోజు సాయంత్రం బాబా పాండురంగ విఠలుని దర్శనాన్ని మాకు అనుగ్రహించి అద్భుతమైన అనుభవాన్ని ఇచ్చారు. ఆరోజు మధ్యాహ్నం 3 గంటలకి మా తిరుగు ప్రయాణానికి బస్సు ఉంది. కానీ మేము మా రూముకు వెళ్ళినప్పుడు, బస్సు 5 గంటలకని మెసేజ్ వచ్చింది. అప్పుడు నా కూతురు సమయం ఉంది కాబట్టి, ఖండోబా గుడికి వెళ్ళొద్దామంటే ఆటోలో వెళ్ళాం. అక్కడ దర్శనమయ్యాక రూమ్ దగ్గరే కదా! నడుచుకొని వెళ్దామని నడుస్తుంటే, ఒక చోట పొరపాటున వేరే సందులోకి వెళ్ళాం. ఆ సందులో చుట్టుపక్కల షాపులు చూస్తూ నడుస్తుంటే, ఒక చోట హఠాత్తుగా ఒక ఇల్లు కనిపించింది. ఆ ఇల్లు చూస్తూనే ఆ ఇంట్లోకి వెళ్లాలనిపించి వెళ్ళాము. ఆ ఇల్లు ఆనాటి భక్తుడు లక్ష్మణ్ మామది. ఆ ఇంట్లో ఎదురుగా పాండురంగ విఠలుని చూడగానే నాకు అత్యంత అద్భుతం అనిపించింది. అదే ఇంట్లో దాసుగణు కూర్చొని 'సాయి రెహమ్ నజర్ కరనా' అనే ఆరతి గీతం వ్రాశారని అక్కడున్న వాళ్ళు చెప్తే, మరింత ఆశ్చర్యమేసింది. బాబా ఇప్పటికీ జీవించే ఉన్నారననడానికి ఇంతకన్నా నిదర్శనం ఏముంది?

శ్రీ సచ్చిదానంద సద్గురు సాయినాథ్ మహారాజ్ కీ జై.

---

కోరిన కోరికలన్నీ తీర్చే సాయినాథుడు

సాయిబంధువులకు నా హృదయపూర్వక నమస్కారాలు. నా పేరు రాంబాబు. నేను విజయనగరం నివాసిని. ఇక్కడ నేను ఒక ఫార్మా కంపెనీలోని మాన్యుఫాక్చరింగ్ డిపార్ట్మెంట్లో ఒక బ్లాక్ మేనేజరుగా పని చేస్తున్నాను. మా బ్లాక్‌లో తయారయ్యే ప్రొడక్ట్ ఔట్పుట్ అప్పుడప్పుడు తక్కువగా వస్తూ ఉండేది. అలా ఎందుకు జరుగుతుందో నాకు, మా జనరల్ మేనేజరుకి అంతుపట్టేది కాదు. నేను తక్కువ వచ్చిన ప్రతిసారీ ఆ సాయినాథుని, "ఔట్పుట్ బాగా రావాల"ని వేడుకునేవాడిని. బాబా దయవల్ల ఆ తర్వాత ఔట్పుట్ సాధారణ స్థితికి వస్తుండేది. ఇలా జరుగుతుండగా ఈసారి ఔట్పుట్ తక్కువ వచ్చినప్పుడు, నేను బాబాను మునపటిలా వేడుకోవడమే కాకుండా, "ఇలా తక్కువ రావటానికి గల కారణాన్ని మాకు బోధపడేలా చేయండి" అని కోరుకున్నాను. బాబా నేను కోరుకున్నట్లే అనుగ్రహించారు. ఆయన ప్రేరణ వల్ల మేము వాడే రా మెటీరియల్స్‌లో ఒక దానిపై నాకు సందేహం కలిగింది. అదే విషయం మా మేనేజ్మెంట్‌కి చెప్తే, వాళ్ళు దానికి అంగీకరించలేదు. కానీ ఆ తరువాత నేను సందేహించిన రా మెటీరియల్ మారి వేరే కంపెనీది వచ్చింది. అప్పుడు నేను ఇప్పుడు వచ్చిన కంపెనీ మెటీరియల్ వాడిన బ్యాచ్‌ల ఔట్పుట్ బాగా వస్తే, నా సందేహం నిజమైనట్లే అని మా మేనేజ్మెంట్‌కి చెప్పాను. నేను అనుకున్నట్లే నా సందేహం నిజమై ఔట్పుట్ బాగా వచ్చింది. నేను, మా మేనేజ్మెంట్ చాలా సంతోషించాము. ఇంకా సమస్య ఉన్న ఆ మునుపటి రా మెటీరియల్ వాడటం ఆపేసి, కార్పొరేట్ స్థాయిలో ఈ విషయాన్ని తెలియబరిచాము. 'భక్తులు కోరినవన్నీ ఇస్తాను. నేను ఇవ్వదలచింది వారు అడిగేంతవరకు' అన్న ఆ సాయినాథుని మాటకు నా అనుభవం సాక్షాత్తు నిదర్శనం. "సాయినాథా! మీకు, మీరు మాపై చూపిన ప్రేమకు మా పాదాభివందనాలు. మా కుటుంబ ఆర్థికంగా నిలదొక్కుకోవడానికి, నా ఉద్యోగంలో ఎదుగుదలకు, మా పిల్లల చదువుకు మీ ఆశీర్వాదాలు ప్రసాదించండి తండ్రీ".

సర్వం సాయినాథార్పణమస్తు

---

బాబాని భక్తితో కొలిస్తే నెరవేరని కోరిక ఏదీ లేదు!!

సాయి భక్తులందరికీ నమస్కారములు. నా పేరు సంధ్యారాణి. నేను ఎన్నో సంవత్సరాల  నుండి బాబాని ఆరాధిస్తున్నాను. ఆయన నా కోరికలెన్నో తీర్చి ఎంతో ఆనందాన్ని, శాంతిని ఇచ్చారు. నేను గవర్నమెంట్ టీచరుని. నేను ఉద్యోగంలో చేరి 22 సంవత్సరాలు అయిపోయింది. కానీ ఇప్పుడు గవర్నమెంట్ అందరూ టెట్ పరీక్ష పాసవ్వాలని రూల్ పెట్టింది. ఓసీ కాండిడేట్‌ని అయినా నేను ఆ పరీక్ష పాసవ్వాలంటే నాకు 90% మార్కులు రావాలి. అందుకని నేను బాబాని, "బాబా! నేను ఈ పరీక్ష తప్పకుండ పాసయ్యేలా అనుగ్రహించండి" అని వేడుకొని కష్టపడి ప్రిపేర్ అయ్యాను. కానీ పేపర్  చాలా కష్టంగా వచ్చింది. అయినా బాబా మీద భారమేసి నాకు చేతనైనంత వరకు సమాధానాలు వ్రాసాను. బాబా ఉండగా చింత ఎందుకు? ఆయన దయవల్ల నేను అందరి కంటే ఎక్కువ మార్కులతో క్వాలిఫై అయ్యాను. ఇంకో విషయం, మా చెల్లెలువాళ్ళు ఇళ్లు మారుదామని చాలా ప్రయత్నించారు. కానీ చాలా రోజులు ఎంత వెతికినా మంచి ఇల్లు దొరకలేదు. చివరికి బాబాని, "మంచి ఇల్లు దొరికేలా అనుగ్రహించమ"ని ప్రార్థించాము. ఆ తరువాత బాబా దయవల్ల మంచి ఇల్లు దొరికింది. బాబాని భక్తితో కొలిస్తే నెరవేరని కోరిక ఏదీ లేదు. ఇది నా విషయంలో యెన్నోసార్లు  ఋజువైంది  "థాంక్యూ బాబా". 

---