సాయిభక్తుల అనుభవమాలిక 2114వ భాగం....

---

ఈ భాగంలో అనుభవాలు:

1. బాబా చూపించిన ప్రేమ, కరుణ, మార్గదర్శకత్వానికి ప్రత్యక్ష సాక్ష్యం

2. సాయి సచ్చరిత్ర చదవడం వల్ల పొందిన బాబా అనుగ్రహం

---

బాబా చూపించిన ప్రేమ, కరుణ, మార్గదర్శకత్వానికి ప్రత్యక్ష సాక్ష్యం

ఓం శ్రీసాయినాథాయ నమః. సాయి భక్తులందరికీ నా హృదయపూర్వక నమస్కారాలు. నా పేరు ఛత్రపతి. నా జీవితంలో ప్రతి అడుగు బాబా అనుగ్రహంతోనే పడుతుందని నేను గట్టిగా నమ్ముతాను. ఏ పని ప్రారంభించినా, ఎక్కడికి ప్రయాణం చేసినా ముందుగా బాబాను మనసారా ప్రార్థించి, ఆయన ఆశీస్సులు తీసుకోవడం నాకు అలవాటు. ఈ మధ్య నా తిరుమల యాత్ర కూడా అలాగే ప్రారంభమైంది. నిజానికి నేను ఈ యాత్రను నా స్నేహితురాలికోసం ప్లాన్ చేసి ఇద్దరికీ టికెట్లు బుక్ చేశాను. ఎందుకంటే, తను ఇంతవరకు తిరుమల దర్శనం చేసుకోలేదు. కానీ విధి విచిత్రమైనది. చివరి క్షణంలో అనివార్య కారణాల వల్ల తను రాలేని పరిస్థితి వచ్చింది. ఒక్క క్షణం, 'నేను కూడా ప్రయాణం వాయిదా వేసుకుందామా?' అన్న ఆలోచన నాకు వచ్చింది. కానీ, 'ఎవరికోసం ఈ యాత్రను ప్లాన్ చేశానో తను రాలేకపోయింది. అయినా శ్రీవేంకటేశ్వరస్వామి నన్ను తమ సన్నిధికి పిలుస్తున్నారేమో! ఆ పిలుపు వెనుక బాబా దివ్య సంకల్పమే ఉందేమో! అని నా మనసుకి బలంగా అనిపించింది. బహుశా ఈ యాత్రను నేను ఒంటరిగా చేయాలని, ఆ అనుభూతిని పూర్తిగా ఆస్వాదించాలని బాబా ముందుగానే నిర్ణయించి ఉండవచ్చు. అందులకాని నేను ఒక్కడినే తిరుమల వెళ్లి, వద్దామని అనుకున్నాను. అయితే, తిరుమలలో విపరీతమైన రద్దీ ఉందని, దర్శనానికి గంటల సమయం పడుతుందని అందరూ అన్నారు. తర్వాత నేను నా ప్రయాణం మొదలుపెట్టేముందు బాబాను ఒక్కటే కోరుకున్నాను, "బాబా! మీ దయతో శ్రీవేంకటేశ్వరస్వామివారి దర్శనం తొందరగా, ప్రశాంతంగా, ఎలాంటి ఇబ్బందులు లేకుండా జరిగేలా అనుగ్రహించండి తండ్రీ" అని. బాబా కరుణ ఎంత అద్భుతమో! ఎవరి ఊహకి అందనంత త్వరగా, ఎలాంటి ఇబ్బందులు లేకుండా, ఎంతో ప్రశాంతమైన స్వామివారి దివ్య దర్శనం నాకు లభించింది. ఆ క్షణం నా మనసంతా బాబాపట్ల కృతజ్ఞతతో నిండిపోయింది. దర్శనానికి క్యూలో వెళ్తున్నప్పుడు ప్రతి అడుగు బాబా నా చేయి పట్టుకుని నడిపిస్తున్నట్లు నాకు అనిపించింది. నాకు ఒక గొప్ప సత్యం అర్థమైంది, 'మనం ప్రణాళికలు వేసుకుంటాం కానీ, అవి ఎప్పుడు, ఎలా, ఎవరి ద్వారా నెరవేరాలో నిర్ణయించేది మాత్రం దైవ సంకల్పమే. కొన్నిసార్లు మనం అనుకున్నది జరగకపోవచ్చు. కానీ ఆ జరగకపోవడం వెనక కూడా భగవంతుని దయ దాగి ఉంటుంది. జరిగేది మన ఊహలకు మించిన అనుభవమవుతుంది' అని. చివరిగా నా ఈ తిరుమల యాత్ర నాకు కేవలం ఒక దర్శనం కాదు, బాబా చూపించిన ప్రేమ, కరుణ, మార్గదర్శకత్వానికి ప్రత్యక్ష సాక్ష్యం. నన్ను తిరుమల శ్రీవేంకటేశ్వరస్వామి సన్నిధికి చేర్చి, ఎలాంటి ఆటంకం లేకుండా దివ్య దర్శనం ప్రసాదించి, తిరిగి క్షేమంగా ఇంటికి తిరిగి చేర్చిన నా సద్గురు శ్రీ శిరిడీ సాయిబాబాకు నా హృదయపూర్వక శతకోటి ప్రణామాలు.

సద్గురు శ్రీ శిరిడీ సాయినాథ మహారాజ్ కి జై.

---

సాయి సచ్చరిత్ర చదవడం వల్ల పొందిన బాబా అనుగ్రహం

సాయి  బంధువులందరికీ నమస్కారం. నా పేరు శ్రీకాంత్. నేను హైదరాబాద్ నివాసిని. నేనిప్పుడు సాయి సచ్చరిత్ర చదవడం వల్ల బాబా నన్ను, నా కుటుంబసభ్యులను కష్టాల నుండి ఎలా బయటకు తీసుకువచ్చారో పంచుకుంటున్నాను. అది 2018వ సంవత్సరం, ఆగస్టు నెల. అప్పుడు మా పెద్ద కుమారుడు 'సాయి'కి నాలుగు సంవత్సరాల వయసు. తను ఏదైనా తినేటప్పుడు, "ఛాతీలో నొప్పిగా ఉంద"ని చెప్తుండేవాడు. మేము దగ్గరలో ఉన్న పిల్లల వైద్యుడిని సంప్రదిస్తే, ఛాతీ ఎక్స్-రే తీసి మరో డాక్టర్‌ను కలవమని సూచించారు. ఆ డాక్టర్ బయాప్సీ చేసి, బాబు ఛాతిలో ఒక గడ్డ ఏర్పడిందని, వారం రోజుల్లో చికిత్స ప్రారంభించాలని చెప్పారు. అది విని మేము చాలా ఆందోళన చెందాము. ఇంత చిన్న వయసులో మా బాబుకి ఇలాంటి సమస్య ఏంటని బాధపడ్డాము. రెండో అభిప్రాయం కోసం రెయిన్బో ఆసుపత్రికి వెళితే, అక్కడి డాక్టర్ అప్పటివరకు చేసిన టెస్టుల రిపోర్టులు చూసి, "వెంటనే చికిత్స ప్రారంభించమ"ని చెప్పారు. మేము ఆ క్లిష్ట సమయంలో బాబుకు సాయిబాబా ఆశీస్సులు ఉండాలని భావించి, గుడికి వెళ్లి, "బాబా! బాబు త్వరగా కోలుకోవాల"ని ప్రార్థించాము. నేను సాయి సచ్చరిత్ర గ్రూపులో చేరి, సచ్చరిత్ర చదవడం ప్రారంభించాను. సాయిబాబా ఆశీస్సులతో డాక్టర్ చేసిన చికిత్స ఫలించి మా బాబు కోలుకున్నాడు.

నేను ఒక ప్రైవేట్ ఉద్యోగిని. చాలాకాలం ఒక కంపెనీలో పనిచేసాక నా కష్టానికి తగిన ప్రతిఫలం రావట్లేదని విసుగు చెంది ఉద్యోగానికి రాజీనామా చేశాను. తర్వాత బాబా ఏదో ఒక మార్గం చూపుతారని నమ్మకంతో మళ్లీ సాయి సచ్చరిత్ర చదవడం ప్రారంభించాను. నోటీసు పీరియడ్‌లో ఇంకో వారం రోజులు ఉందనగా గురువారంనాడు ఆఫీసుకి వెళ్ళేముందు చాదర్‌ఘాట్‌లోని సాయిబాబా గుడికి వెళ్లి, బాబాని ప్రార్ధించి ఆఫీసుకి వెళ్ళాను  నేను పనిలో నిమగ్నమై ఉండగా, అదివరకు పని చేసిన ఒక కంపెనీ మేనేజర్ వచ్చి, నన్ను కలిశారు. మాటల్లో నేను ఆయనకు నా సమస్య గురించి వివరించాను. ఒక పెద్ద పోస్ట్‌లో ఉన్న ఆయన నా అనుభవానికి సరిపోయే ఒక ఖాళీ తన విభాగంలో ఉందని చెప్పి, నన్ను తీసుకున్నారు. ఆయనకు నేను ఎంతో ఋణపడి ఉన్నాను. ఇలా సాయిబాబా నన్ను, నా కుటుంబాన్ని ఎన్నో విధాలుగా ఆదుకుంటూ వస్తున్నారు. "చాలా చాలా ధన్యవాదాలు".

---